Read Mongondow MARKUS 9 Bible Online

MARKUS 9 - Mongondow bible

MARKUS 9

¹Guman i Yesus kon i monia, “Pokotaaudon! Kon sigad monimu inta kon naa, oyúon in diápabí matoi aka diápa mokoontong kon i Allah momarenta takin kawasa-Nea!”

²Onom nosinggai noidudui kon tua, ki Yesus nodia kon i Petrus, kon i Yakobus bo kon i Yohanes, mosia minayá in buḷud inta moḷantud bo sinumontaní. Kon tayowon monia tua nobaḷui in pogot i Yesus.

³Pakeang-Nea nobaḻídon nobudó mopouḻi-uḻinag. Diábí in tobatúmai intau mokobatá námai tua in kobudónea.

⁴Onda intua inontong in murí-Nea toḷu tua, ki Yesus nongonguman takin i Elia bo i Musa.

⁵Dá ki Petrus in noguman kon i Yesus, “Pak Guru, mopiabí totok kita in kon naa. Mopirabí aka mogaid in kami kon ḷoḷaigan toḷu: tobatú in kon i Pak Guru, tobatú in kon i Musa, bo tobatú doman in kon i Elia.”

⁶Sabanarnea diádon kinotaauan i Petrus mongo onu in musti singogonnea, sin sia takin yobayatnea taya dua tua in totokpa inangoian ondok.

⁷Noiduduimai kon tua, mosia in kinokoḷubungandon in goḷom bo kinodongogan in singog nongkon goḷom tatua noguman, “Naabí in ki Adí-Ku inta kinotabi-Ku. Indongogai in Sia!”

⁸Baḷú nobobui magí-mako in taya toḷu bo diádon in ibanea mako inontong monia koḻikud in ki Yesus tontaní in kon tua.

⁹Wakutu in nosiḻigdon nongkon buḷud tatua in mosia, ki Yesus nongoyow kon imonia, kai-Nia, “Donaai potaau monimu kon i ineka onu inta inontong monimu koina aka ki Adí Intau diápa biagon nongkon kinopatoian.”

¹⁰Dinuduian monia in koyow tatua, táe mosia tontaní in momangkoidon mongonguman mongo onu in makusud in singog i Yesus, “mobiag bui nongkon kinopatoian”.

¹¹Tuamai mosia noḻibó kon i-Nia, “Nongonu sin mototundú mita kon agama in Yahudi noguman kon ki Elia mustibí mamangoi muna?”

¹²Tubag i Yesus, “Ki Elia in totuubí kon mamangoi muna sin monoḻisí kon bayongan yagi-yagi. Táe naonda degá in soaḷ Adí Intau inta pinais kon Buk Motusi, kon Sia in koantugan in roriga mobarong bo poḷat singkuḻeon in intau?

¹³Tongá poguman-Kudon kon i monimu: Ki Elia namangoidon, táe pinomia in intau ibo-ibog in sia. Tua noyokaan in onu inta ain pinais kon bonu in Buk Motusi soaḷ sia.”

¹⁴Naonda in ki Yesus, ki Petrus, ki Yakobus, bo ki Yohanes minayá noyodondon bui takin murí-Nea mita ibanea, inontong monia nobarongdon totok in intau kon tua. Bo tongonumai doman in mototundú kon agama mobobayowanmai in murí mita i Yesus kon tua.

¹⁵Naonda intau mita tatua nokoontong kon i Yesus, mosia in nongoitongau bodongka noribatuk nonontomu kon i-Nia.

¹⁶Sia in noḻibó kon murí-Nea mita, “Onu in pinobobayowan monimu takin mototundú mita kon agama tatua?”

¹⁷Dodai intua oyúon in tobatú intau kon sigad intau moantó tatua noguman, “Pak Guru, akuoi in nodia kon i adíku poangoi kon i Pak Guru. Sia in nobobó sin popisí in kinotoḷangan in dimukud moraat.

¹⁸Aka kotoḷangan dimukud moraat, yo monontaḻebug in sia kon butá, bibignea boburaan, ingipon morokokot bo awaknea in motorondó. Pinoigumkudon kon murí-Mu mita moguntun kon dimukud moraat tatua, táe diá mokountun in mosia.”

¹⁹Dá ki Yesus in noguman kon murí-Nea mita, “Moiḻiu-ḻiu bidon in moiko nion! Totu-totuubí kon moiko nion intau inta diá mopirisaya. Modapotpa in onda in Akuoi musti mogutun moyotakin monimu bo mokoposabar? Dia mangoi kon naa in adí tanion!”

²⁰Dá dinia monia kon i Yesus in adí tatua. Wakutu in dimukud moraat tatua nokoontong kon i Yesus, pinotorondónea in awak in adí tatua dá noḷabú noitangkuḻitod. Bo iḷuaian burá in bibignea.

²¹Ki Yesus in noḻibó kon i amá in adí tatua, “Dodaipa onda in sia nanaa?” “Nongkon mointokanpamai!” tubag i amánea tua.

²²“Mokakitdon in dimukud moraat tatua moḷongasi moḻimod kon inia takin pogonagnea kon tuḷu ande kon bonu in tubig. Aka ki Pak Guru mokotuḷungbí dá kotabipa in kami bo tuḷungaipa!”

²³Ki Yesus in notubag, “Onu in kainimu? Aka mokotuḷungbí in Akuoi? Komintanbí motaau-Ku aidan asaḷ bo mopirisaya intau!”

²⁴Baḷú nomaḷú in ki amá in adí tatua, kainia, “Tuhan, mopirisaya in akuoi, táe noyakagpa in pirisayaku. Tuḷungaidon sinbá modugangdon in pirisayaku!”

²⁵Naonda inontong i Yesus kon intau mobayong momangkoidon moyoḻipung, pinarentaan-Nea in dimukud moraat tatua takin singog, “Ei dimukud moraat inta bongoḷ bo bobó, Akuoi in moguman kon inimu, ḷuaidon nongkon adí tanaa bo dikadon bui tumoḷang kon inia!”

²⁶Dimukud moraat tatua nomaḷú, bodongka sinorondónea in awak in adí tatua, bo iḷumuai nongkon adí tatua. Ontongon nádon onda bo mayat in adí tatua, sahingga in komintandon intau nosingog, “Minatoidon sia!”

²⁷Táe kinadaian i Yesus in ḻimanea bo sinuḷungan binangon. Dá nobangondon adí tatua.

²⁸Naonda in kon baḷoidon in ki Yesus, murí-Nea mita namangoi sinumontaní bo noḻibó kon i-Nia, “Nongonu sin diábí in kami mokountun kon dimukud moraat tatua?”

²⁹Tubag i Yesus, “Dimukud moraat ná tatua diábí motaau untunon in cara naondaka, koḻikudbí in sambayangan.”

³⁰Ki Yesus bo murí-Nea mita nonaḷámaidon kon tampat tatua bo nongingguput kon bobayáan monia nongin Galilea. Doíbí in ki Yesus kotaauan in intau in bayáan-Nea,

³¹sin koyogot in Sia motundú kon murí-Nea mita. Sia in noguman, “Adí Intau posarakan kon bonu in kawasa in intau, bo ḻimodon in Sia, táe kon singgai intoḷunea Sia in bui mobiag!”

³²Diá kinomangaḻean in murí-Nea mita in makusud in singog i Yesus tatua, táe moondok mosia in moḻibó kon i-Nia.

³³Noidudui kon tua noiyaputdon in Kapernaum in mosia. Naonda in kon baḷoi ki Yesus noḻibó kon murí-Nea mita, “Onu in pinobobayowan monimu koina kon daḷan?”

³⁴Táe mosia in tongá kibio-biómai, sin pinobobayowan monia koina kon daḷan in soaḷbí ki ine in moḷobe-ḷoben.

³⁵Dá ki Yesus iḻimitú bo nogoiní kon murí-Nea mopuḷú bodoyowá tatua bo noguman kon i monia, “Intau inta moibog kon muna totok, yo musti in sia moibog kon tumi totok bo moibog mobaḻí bobantung in bayongan intau.”

³⁶Onda intua ki Yesus nogamá kon tobatú mongoadí bo pinosindog-Nea kon tayowon monia komintan. Kinoyotan i Yesus in adí tatua bo noguman kon murí-Nea mita,

³⁷“Intau inta motarima kon tobatú adí ná tanaa popisí in nopirisaya kon i-Nakó, yo tua in mangaḻenea sia in notarima kon i-Nakó. Bo intau inta notarima kon i-Nakó, sia tua in deemanbí tongá notarima kon i-Nakó, táe notarima domandon kon i-Nia inta nopotabá kon i-Nakó.”

³⁸Ki Yohanes in noguman kon i Yesus, “Pak Guru, kami nokoontong kon tobatú intau noguntun kon dimukud moraat pinodoyon kon tangoi i Pak Guru, táe ilarang nami sin sia in deemanbí intau naton.”

³⁹Táe guman i Yesus, “Donaai molarang kon inia, sin diábí in tobatúmai intau inta nogaid kon mokoherang inta pinodoyon kon tangoi-Ku, bo baḷú in sia moporaa-raatmai kon i-Nakó.

⁴⁰Sin intau inta diá moḷawang kon i naton, yo sia tua in yotakin naton.

⁴¹Pokotorop! Intau inta nopoinum kon i monimu sin popisí in moiko murí i Datu Mopoposaḷamat, yo nopasti bidon kon motarima in sia kon bungainea.”

⁴²“Ki ine in mokopopisí modapot kon tobatú nongkon mongoadí mita tanaa diádon mopirisaya kon i-Nakó, yo mopira-piradon intau tatua popotogotan in gantung kon sigogow, bo pogonag kon dagat.

⁴³Aka ḻimamu mokopopisí kon inimu mogaid kon mokobaradosa, yo pongkó in ḻimamu tatua! Sin mopira-pirabí kon diá koḻima tosimpaḷ iko bo mobiag takin i Allah, dika in oyúonpa in ḻima doyowa nosimpaḷ táe tumuot iko kon naraka, tuata in tuḷu inta diá mopio-piong. [

⁴⁴Kon tampat tatua uḷodnea mita in diábí matoi bo tuḷúnea in diábí kopiongan.]

⁴⁵Bo aka sioḷmu mokopopisí kon inimu mogaid kon mokobaradosa, yo pongkó in sioḷmu tatua. Sin mopira-pirabí kon diá in sioḷ tosimpaḷ táe mobiag takin i Allah, dika in oyúonpa in sioḷ doyowa nosimpaḷ táe pogonag kon bonu in naraka. [

⁴⁶Kon tampat tatua uḷodnea mita in diábí matoi, bo tuḷúnea in diábí doman kopiongan.]

⁴⁷Aka matamu mokopopisí kon inimu mogaid kon inta mokobaradosa, yo kuildon in matamu tatua! Sin mopira-pirabí kon diá in mata tosimpaḷ in tumuot kon Dunia Mobagu i Allah, dika in oyúonpa in mata doyowa nosimpaḷ táe pogonag kon bonu in naraka.

⁴⁸Kon tampat tatua uḷodnea mita diábí matoi, bo tuḷúnea in diábí doman kopiongan.

⁴⁹Pomuḷoi intau ujion in tuḷu ná doman kuruban potusion in simuton.

⁵⁰Simuton tua in mopiabí, táe aka moḷiaudon yo onu i motaau pogibung monimu bui kon tua? Dá tuamai kobaḻíbí in moiko ná simuton bo kobiagbí moyotakin, takin popiaan bo totabian.”