Read Mongondow LUKAS 1 Bible Online

LUKAS 1 - Mongondow bible

LUKAS 1

¹Tuang Teopilus inta mopia. Nobayongdon intau ain noramuji nomais kino tompia kon soaḷ mita inta ain nobaḻí kon sigad naton.

²Onu inta pinais monia tatua in notongkaibí in ná inta inouman kon i naton in intau mita inta ain nokoontong tontaní kon kinobaḻian in tua komintan nongkon pinomangkoianmai. Intau doman mita tatua inta minaya-mayá mako nopohabar kon onu inta ain nobaḻí tatua.

³Tuamai in naonda in binalajarku muna intua komintan nongkon pinomangkoianmai, iraiku, mopiabí totok aka habar tatua paison kotompiaan kon bonu in buk bo ogoi kon i Tuang,

⁴Tua in aidanku, sinbá kotaauan i Tuang kon onu inta ain sinundú mita kon i Tuang in totuubí kon ain nobaḻí.

⁵Wakutu in ki Herodes nobaḻí datu kon butá in Yudea,[1] oyúon inang, tangoinea ki Zakharia. Ki Zakharia naa in inang nongkon kolompó inta sinangoian “kolompó Abia” (imang mita buí i Eleazer). Ki buḷoinea buí doman in inang, tangoinea in ki Elisabet.

⁶Kobobiag inayadua motonibuḷoi tua mokosanang kon gina i Allah, sin taya dua in umuranbí dinumudui kon parenta bo atorang i Tuhan, diábí in sinaḻiban monia.

⁷Tongá mosia naa in diá kogadí, sin ki Elisabet in bantó bo taya dua naa aindon mogoguyang doman.

⁸Kon singgai tobatú, wakutu in kolompó i Abia naa nokouḻí kon tonsilai tumuot kon Baḷoi Tuhan, dá ki Zakharia in minayá bo nogaid kon oaidan in imang kon tayowon i Allah.

⁹Sin wakutu in inundi inta kabiasaan monia monantú kon ki ine in imang tumuot kon Baḷoi Tuhan mogaid kon oaidan imang, dá sia in kinopiḻían tumuot bo motubá kon kamania kon bonunea.

¹⁰Kon dodai in pinotubaan kon kamania, bayongan in intau nosipun kon ḷuai bo nosambayang.

¹¹Bo kon wakutu in sia notubá kon kamania, malaekat i Tuhan nokipogontong kon inia. Malaekat tatua in sinimindog kon dotá in koḷanan meja pototubaan kon kamania.

¹²Naonda in nokoontongmai kon malaekat tatua, noitaḻikokog in sia bo inangoian in ondok.

¹³Táe kain singog in malaekat tatua kon inia, “Dika moondok Zakharia, sin mintahangmu inindongogandon i Tuhan, dá ki Elisabet ki buḷoimu tua in mopolahirbí in adí ḷoḷaki, bo mustibí tangoianmu ki Yohanes in adí tatua.

¹⁴Mosanang bo moḷunganga totok in ginamu, ná doman tua, mobayong doman intau in mosanang in gina aka adí tatua moilahirdon.

¹⁵Sia in mobaḻí intau moḷoben kon tayowon mata i Tuhan, bo sia tua in diábí monginum kon anggur andeka oinumon ibanea mako inta mokoḷoḷangu, bo sia in kinawasadon in Roho i Allah nongkon bonupamai in sian i inánea.

¹⁶Mobarong in intau Israel diaannea bui mayá kon i Tuhan, Allah monia.

¹⁷Sia in mobaḻí totabá i Tuhan inta moropot bo mokawasa ná ki Elia. Sia mopoyodame kon gina in guyanga bo adí, bo intau mita inta raian monia diá moitutui in potutuionnea bui. Tua in mangaḻenea kon sia in moposadia kon umat inta moibog dumudui kon parenta i Tuhan.”

¹⁸Dá ki Zakharia in noḻibó kon malaekat tatua, “Nábí onda in kobobaḻí intua komintan? Kaminda motonibuḷoi naa in tumpaḷadon mogoguyang!”

¹⁹Dá guman in malaekat tatua, “Akuoi naa in ki Gabriel inta nogundoi kon i Allah, bo ki Allah tontaní in nopotabá kon inakó mopoyaput in habar mopia tanaa kon inimu.

²⁰Habar inta totu-totuu kon mobaḻí kon wakutu inta ain sinantú i Tuhan, tongá iko bo diá mopirisaya kon singogku naa, dá iko in diádon mokosingog dapot intua komintan mobaḻí ná kain singogku.”

²¹Intau mobayong kon tua umuranpa doman mogoḷat mako kon i Zakharia. Mosia in noherang totok sin moonggotbí in sia kon bonu in Baḷoi Tuhan tua.

²²Naonda in sia iḷumuai, diádon in sia notaau noyosingog in intau mita kon tua, sia in dongkadon umuran monuḷadá takin ḻimanea sin umuranpa doman diá mokosingog. Bain kino onggotanea bo kinomangaḻean monia kon naanta oyúon inontongnea kon bonu in Baḷoi Tuhan tua.

²³Naonda in nopaḷutdon i wakutunea nopobayá in oaidannea kon Baḷoi Tuhan, ki Zakharia nobuidon kon baḷoinea.

²⁴Diá noonggot kon tua, ki Elisabet ki buḷoinea in sidiadon, bo ḻima nobuḷan sia diá iḷumua-ḷuai kon baḷoi.

²⁵Ki Elisabet nosingog nanaa, “Pangabisannea sinuḷungan i Tuhan in akuoi, ininggamáan-Nea in onu inta mokooyá kon inakó.”

²⁶Naonda in onomdon nobuḷan sian i Elisabet, ki Allah bui nopotabá kon i malaekat Gabriel minayá in Nazaret, tobatú kotá kon Galilea.

²⁷Pinotabá-Nea in malaekat tatua minayá kon tobatú mongodeaga inta ain kinantangan i Yusup, buí i Daud, ki Maria tangoi in bobay tatua.

²⁸Malaekat tatua sinumuot kon baḷoi i Maria bo poḷat noguman nanaa, “Salam kon inimu inta binarakatan, ki Tuhan in koyota-yotakinmu.”

²⁹Nokodongogmai kon singog tatua in ki Maria, noitaḻikokog in sia bo norai kon bonu in ginanea, onu degá in mangaḻe in salam tatua.

³⁰Dá malaekat tatua in noguman kon inia nanaa, “Dika moondok Maria, sin iko in kinosanang gina i Allah.

³¹Iko in mobaḻí sidia bo nopolahir in adí ḷoḷaki, bo musti tangoianmu ki Yesus in Sia.

³²Sia in mobaḻí intau moḷoben bo tangoion ki Adí i Allah inta Totok in Moḷantud. Baḻíon i Allah in Sia Datu naonda bo ki Daud ki ḷaki-Nea.

³³Bo sia in mobaḻí doman Datu kon yua-yuak in intau mita inta buí i Yakub modapot in kopaḷutan in dunia. Dodatuan-Nea in mononoi.”

³⁴Dá kai Maria, “Akuoi naa in mongodeagapa, yo naonda in kobobaḻí intua komintan?”

³⁵Dá tubag in malaekat tatua kon inia nanaa, “Roho i Allah takin kawasa-Nea inta totok in moḷantud mamangoi bo mongawasa kon inimu. Tuamain Adí inta polahirmu tua in tangoion Mokudus, ki Adí i Allah.

³⁶Bo pokotaaudon kon ki Elisabet inta ginaḷummu tua ain doman sidia onom nobuḷan. Adí inta kon bonu in siannea tua in adí ḷoḷaki, umpaka nogoguyangdon bo kain intau in bantó.

³⁷Sin aka kon i Allah, diábí in diá motaau aidan-Nea.”

³⁸Kain singog i Maria doman, “Akuoi naa kaasí in tongábí bobantung i Tuhan, dá onu in kinoibog i Tuhan mobaḻí kon inakó dá kobaḻídon podudui in singogmu tanion.” Onda intua malaekat tatua nonaḷámai kon i Maria.

³⁹Diá noonggot kon tua, ki Maria minayá in tobatú kotá kon buḷud in Yudea.

⁴⁰Sia minayá in baḷoi Zakharia. Naonda in sia sinumuot in baḷoi tatua, sia nobogoi in salam kon i Elisabet,

⁴¹naonda in dinongog i Elisabet in salam i Maria tatua, adí inta kon bonupa in siannea tua iḻimiai noropot bo dodai doman intua ki Elisabet kinawasa in Roho i Allah,

⁴²bo poḷat nosingog noropot, nanaa, “Binarakatandon in iko kon sigad in bayongan bobay! Binarakatan doman in adí inta polahirmu!

⁴³Ki inebí in akuoi naa nodapot in ki iná i Tuhan namangoi noindoi kon inakó?

⁴⁴Sin totuubí kon wakutu in dinongogku in singogmu, yo adí kon bonu in sianku naa noḻiai sin mopia in ginanea.

⁴⁵Kosanangdon iko inta mopirisaya, sin onu inta ain pinoguman i Tuhan kon inimu, totu-totuubí mobaḻí intua!”

⁴⁶Ki Maria nosingog nanaa, “Akuoi in modayow kon i Tuhan,

⁴⁷bo mopia totok in ginaku sin ki Allah in mopoposaḷamatku.

⁴⁸Sia nokotorop kon inakó, bobantung inta nobogá! Pinangkoi kon tanaa mako bayongan in intau moguman kon akuoi in totok mosanang.

⁴⁹Sin ki Allah inta totok in mokawasa ain nogaid kon oaidan inta totok in moḷoben kon inakó. Mokudus totok in tangoi-Nea

⁵⁰Sia umuran mobogoi in totabi-Nea kon bayongan intau inta moondok kon i-Nia.

⁵¹Takin kawasa-Nea inta totok in moropot, Sia in mopoyayit in bayongan intau inta mododia, bo momoguyaat kon tomayá mita monia.

⁵²Datu mita in dunia naa poponagon-Nea mita nongkon tampat pomomarentaan monia, táe intau mita inta moompá in dodia in poḷantudon-Nea.

⁵³Sia mobogoi in bayongan inta mopia kon intau mita inta ginogoy, táe intau mita inta nooyúon poguntunon-Nea bo diá ogoian in onu bo onu.

⁵⁴Sia in motuḷung kon Israel inta simpaḷ-Nea, podudui in dandi inta pinodandi-Nea kon i mogoguyang naton.

⁵⁵Ki Tuhan diá mokoḻiong kon dandi-Nea, bo umuran mosanang in gina-Nea kon i Abraham bo buínea mita dapot in kopaḷutan in dunia naa.”

⁵⁶Bo ki Maria nogutun toḷumai nobuḷan degá takin i Elisabet, onda intua sia nobui kon baḷoinea.

⁵⁷Noiduduimai kon tua nodapotdon singgai pononggadían i Elisabet, sia nopolahir in adí ḷoḷaki.

⁵⁸Bo naonda in topodiugnea mita bo ginaḷumnea mita nokodongog kon ki Tuhan ain nopoontong in totabi-Nea inta totok in moḷoben, dá nopia totok in gina monia, natua doman gina i Elisabet.

⁵⁹Wakutu in waḷudon nosinggai in adí mointok tatua, mosia namangoi sin mokisunat in adí tatua, bo ibogon monia in adí tatua tangoian ki Zakharia podudui kon tangoi i amánea,

⁶⁰táe kai inánea in, “Donaai! Sia in mustibí tangoian ki Yohanes.”

⁶¹Dá kain tubag doman monia kon i Elisabet, “Diábí in tangoi natua kon sigad i utatmu mita.”

⁶²Bo mosia in nonuḷadá noḻibó kon i amánea mongo ki ine in ponangoinea kon i adínea tatua.

⁶³Ki Zakharia noigum kon batu pomomais bodongka nomais nanaa, “Tangoinea in ki Yohanes.” Bo noherang in mosia komintan.

⁶⁴Kon dodaipa doman intua sia nokosingogdon bui bodongka nodayow kon i Allah.

⁶⁵Dá intau mita topodiugmai kon tua, komintan inangoian in ondok. Onu inta ain nobaḻí tatua, nobaḻí ouman kon bayongan ḻipú in Yudea.

⁶⁶Bo komintan intau inta nokodongog kon ouman tatua noḻibo-ḻibóan kon bonu in gina, “Mobaḻí onu degá in adí tatua in kon singgai moiduduimai?” Sin sia kokapi-kapit i Tuhan.

⁶⁷Ki Zakharia, ki amá in adí tatua kinawasa in Roho i Tuhan bo sia in nopoyaput in habar nongkon i Tuhan. Nanaa in kainia,

⁶⁸“Dinayo-dayowdon in ki Tuhan, ki Allah Israel! Sia ain notuḷung kon umat-Nea bo nonginggamá doman kon roriga monia.

⁶⁹Sia in nobogoi in mopoposaḷamat kon i naton nongkon buí i Daud, simpaḷ-Nea.

⁷⁰Ná inta ain pinodandi-Nea pinongin nabi-Nea mita inta ain piniḻí-Nea.

⁷¹Sin in mopoposaḷamat kon i naton nongkon saturu mita naton bo nongkon kawasa in intau mita inta moyaat in gina kon i naton.

⁷²Sin mopoontong in totabi-Nea kon i mogoguyang naton podudui in dandi-Nea. Sin dandi-Nea tua in umuranbí kinotoropan-Nea.

⁷³Sin tuata in ibot-Nea kon i Abraham ki amá naton, Sia in nodandi kon moposaḷamat kon i naton nongkon saturu naton, sinbá kita in diá koaputan in ondok in mogundoi kon i-Nia.

⁷⁴

⁷⁵Kita in umuran mogaid kon onu in kinoibog bo inta kinosanang in gina-Nea kon wakutu in mobiagpa.

⁷⁶Bo iko, adí-Ku in tangoion nabi i Allah inta totok in Moḷantud. Iko in pinotabá umuna kon i Tuhan sin moposadia in daḷan bayáan-Nea.

⁷⁷Bo iko in mopotaau kon umat-Nea, kon mosia in posaḷamaton i Allah aka taḷá mita monia bo ampungan-Neadon.

⁷⁸Ki Tuhan naton mopia in gina bo motabi doman totok. Sia in mamangoi sinbá mosaḷamat in kita. Sia naonda bo mata in singgai inta momuká doḷo-doḷom,

⁷⁹natua in Sia monimbayag kon bayongan intau inta nobiag kon sindip bo inta umuran moondok. Sia in nodia kon i naton mayá mongin daḷan inta mopobayá in tampat inta mopia.”

⁸⁰Ki adí i Zakharia tatua kodugang-kodugangdon in koḷobennea bo rohonea in koropot-koropot domandon. Bo sia in umuran nogutun kon padang gurun nodapot in singgai inta aindon sinantú kon pokipogontongannea kon intau in Israel.