Read Mongondow LUKAS 10 Bible Online

LUKAS 10 - Mongondow bible

LUKAS 10

¹Noiduduimai kon tua, ki Yesus nomiḻí kon dumodudui-Nea ibanea pitu nopuḷú[14] in kobayongnea bodongka nopotabá kon i monia. Mosia pinotabá tumododoyawa sin umuna kon i-Nia mayá in kotá bo tampat mita inta bayáan-Nea.

²Ki Yesus in noguman nanaa, “Bungainea in mobayong totok, táe mononoḻisí kon bungainea in tongá topiḻik. Manangka intua poigumdon kon i togi gobá sinbá potabánea mangoi in intau inta mogogaid sinbá mosia in monoinut kon bungainea mita tatua.

³Tuamai in bayádon! Akuoi in mopotabá kon i monimu naonda bo mopotabá in domba kon yua-yuak in serigala.

⁴Bo donaai modia kon pundi andeka baḷun andeka aip in sioḷ. Dika mogogai kon yuak in daḷan bo mobogoi in horomat kon i inekadon.

⁵Bo aka moiko in tumuot kon tobatú baḷoi yo naa in singogon muna, ‘Igumon mako dodamean bo saḷamat kotaki-takin monimu tobaḷoian naa.’

⁶Bo aka kon tua oyúon in intau inta moibog in dodamean bo saḷamat, yo salammu tatua in motantú kon baḷoi tatua, tongá aka diá, yo salammu tatua in moibuibí kon inimu.

⁷Kotantú kon tobatú baḷoi aka mogutun. Tarima onu in ogoi monia kon inimu. Sin intau inta mogaid in patusbí in sia motarima kon bungai in inaidannea. Donaai momampi-mamping mako kon pogutunan.

⁸Aka moiko bo mamangoi in kotá tobatú bo sinomu notompia in intau kon tua, yo kaanbí in onu inta ogoi monia kon i monimu.

⁹Tuḷungai bo undamai in intau mita inta notakit kon kotá tatua bo poguman kon intau mita kon tua, ‘Ki Allah in mamangoidon momarenta saḷaku Datu kon yua-yuak monimu.’

¹⁰Táe aka moiko bo mamangoi in tobatú kotá bo doí in intau kon tua motarima kon i monimu, yo bayá in doḷaag bo singog nanaa,

¹¹‘Umpaka ḷobud in kotámu naa inta nongoikompit kon sioḷ nami, daiton doman nami topiran saḷaku tompoingat kon i monimu. Táe bá kotaauan monimu kon diá bidon moonggot in ki Allah mamangoi momarenta saḷaku Datu kon yua-yuak monimu!’

¹²Torop in naa, Kon singgai ponantúan, intau in Sodom in mogampa-gampang ampungan i Allah in intau mita in kotá tatua!”

¹³“Koboditodon in moiko, Korazim! Bo koboditodon in moiko, Betsaida! Sin aka kuma bo kon ḻipú in Tirus bo Sidon in pinogaidan kon inta mokoherang mita inta ain inaidan kon yua-yuak monimu, yo noonggot bidon mosia in nogogai nogaid kon dosa, bo inangoiandon in panasaḷan.

¹⁴Táe kon singgai ponantúan, ḻipu in Tirus bo Sidon in mogampa-gampang ampungan i Allah dika in moiko.

¹⁵Bo moiko, Kapernaum! Degá kainimu kamai dá poḷantudonbí in iko dapot in soroga? Bá pogumanku, Diábí! Sedang bo moiko nion in pogonagbí kon naraka!”

¹⁶Bo ki Yesus in noguman kon murí-Nea mita, “Ki ine in moibog mokidongog kon i monimu, yo mosia tua i mokidongog doman kon i-Nakó. Táe ki ine in doí motarima kon i monimu, yo sia in doí doman motarima kon i-Nakó. Bo ki ine in doí motarima kon i-Nakó, yo sia in doí doman motarima kon i-Nia inta nopotabá kon i-Nakó.”

¹⁷Onda intua, dumodudui i Yesus inta pitu nopuḷú[15] nobuidon mangoi takin pia in gina bo noguman, “Tuhan umpaka dimukud mita moraat moondok kon inami sin mokodongog kon tangoi-Mu!”

¹⁸Dá ki Yesus in noguman kon i monia, “Akuoi in nokoontong kon Ibilis noḷabú nongkon ḷangit naonda bo kilat.

¹⁹Pokotaau! Moiko aindon inogoian-Ku in kawasa poritak kon uḷag bo bambau, bo kawasa pomutoḷ kon ropot in saturu, dá diá bidon in mokobodito kon i monimu.

²⁰Tongá umpakabí natua, yo dikabí mopia-pia in gina monimu sin moondok in dimukud moraat kon i monimu. Naabí in patus mokopia kon gina monimu, tangoimu aindon pinais kon soroga.”

²¹Kon wakutu intua doman, noḷungangadon in gina i Yesus, sin kinawasa in Roho i Allah.[16] Ki Yesus in nosingog nanaa, “Akuoi in mosukur kon ini-Mu Amá, Tuhan in ḷangit bo butá sin bayongan intua aindon binuni-Mu kon intau mita inta mopandoi bo mobijaksana, táe aindon pinoontong-Mu kon intau mita inta nongobodok. Tuabí in kinoibog i Amá.

²²Yagi-yagi komintandon pinosarakan i Amá kon i-Nakó. Bo diábí in tobatúmai intau nonotaau kon Adí, koḻikudbí in ki Amá. Bo diábí doman intau in nonotaau kon i Amá koḻikudbí in Adí; bo intau mita inta kinoibog in Adí popotaauan kon ki ine in ki Amá.”

²³Onda intua ki Yesus nobobui kon dumodudui-Nea mita bo noguman, “Nomujur totok moiko in nokoontong kon onu inta ain inontong monimu tanaa.

²⁴Sin toropbí monimu: Nobayong in nabi bo datu in moibog moindoi kon onu inta ain inontong monimu, táe mosia in diá nokoontong. Ná doman tua, mosia in moibog mokidongog kon ná inta ain dinongog monimu, táe mosia in diádon nokodongog kon tua.”

²⁵Noiduduimai kon tua, oyúon mototundú kon agama namangoi bo monungkuḷ kon i Yesus. Sia in noḻibó kon i Yesus, “Pak Guru, onu degá in musti aidanku sinbá akuoi mokouḻí kon kobiagan mopia bo mononoi?”

²⁶Ki Yesus in bui noḻibó kon inia, “Onu in pinais kon hukum i Musa? Podudui in raianmu, naonda intua?”

²⁷Intau tatua in notubag, “ ‘Kotabibí in ki Tuhan Allahmu, takin ḻimbatú in gina, ḻimbatú jiwa, bo takin bayongan in ropotmu, bo takin sinangkub in raianmu,’ bo ‘Kotabibí in tumpaḷa intau ná kototabimu kon awakmu tontaní.’ ”

²⁸Dá kai Yesus doman, “Totuu in tubagmu nion! Aidaidon intua komintan, dá iko in mokouḻíbí kon kobiagan mononoi.”

²⁹Táe mototundú kon agama tatua doí taḷowon, dá sia in noḻibó bui kon i Yesus, “Ki inebí inta sinangoi tumpaḷa intau?”

³⁰Ki Yesus in notubag, “Oyúon intau nosiḻig nongkon Yerusalem. Sia mayá in Yerikho. Kon yuak in daḷan, sia dinomok in intau mita inta mogogagow. Binongkug monia in sia bo inagow doman in bayongan kapunyaannea inta kodia-dianea. Nodait mako inagow onu in kon inia, binongkug doman monia inimibo-ibog nodapot in aindon matoi bodongka sinaḷáan monia.

³¹Noitongkanábí kon oyúon in tobatú imang nosiḻig nongin daḷan tatua. Táe naonda inontongnea intau inta binongkug monia tua, nomarut in sia bo nongin daḷan toḷosi.

³²Natua doman intau in Lewi inta noitaḻib kon tua. Nokoontongmai kon intau tatua, nomarut doman in sia bo nongin daḷan toḷosi.

³³Noiduduimai kon tua oyúon intau in Samaria nongin daḷan doman tatua. Nokoontongmai kon intau tatua totok noḻiai in ginanea bo notabi.

³⁴Dá dinimiug in sia kon intau tatua bo dinaritannea in anggur in kekebnea mita bo inundaman poḷat binakut kinopia in kekebnea tatua. Nopaḷut mako, pinoponiknea in intau tatua kon keledainea, bo dinia pinobayá in baḷoi inta pongongandupan bo sinompianeamai.

³⁵Nopoikoḷomai kon singgai inogoiannea in doit saḷaka doyowa in kitogi baḷoi pongongandupan tatua bo nongoyow, ‘Tompiapa in sia bo onu in taḷuionmu ponompia kon inia daitonkubí toḻiuan aka mobuidon mangoi in akuoi.’ ”

³⁶Onda intua ki Yesus nonimpod kon ouman-Nea tatua bo noḻibó kon inia, “Podudui in raianmu, ki ine in kon sigad nayatoḷu tua in nomia kon oaid saḷaku tumpaḷa intau kon inia inta pinogagowan tatua?”

³⁷Mototundú kon agama tatua in notubag, “Intau inta ain inangoian in tabi bo poḷat notuḷung kon intau tatua.” Ki Yesus in noguman, “Dá aka natua, yo bayádon bo aidai doman in natua!”

³⁸Onda intua ki Yesus bo murí-Nea mita nongingguputdon kon bobayáan monia, bo mosia in noiyaputdon in tobatú ḻipu. Kon ḻipú tatua oyúon tobatú bobay nogoiní kon i monia minayá in baḷoinea, ki Marta in tangoinea.

³⁹Ki Marta naa oyúon in ki utatnea bobay doman inta tangoinea in ki Maria. Ki Maria naa iḻimitú mako kon diug i Yesus bo mokidongogmai kon onu in singogon-Nea.

⁴⁰Táe ki Marta in mosibuk totok mogaid kon oaidannea kon baḷoi. Dá ki Marta in dinimiug kon i Yesus bo noguman, “Tuhan, degá bo diábí ontongon i Tuhan in ki utatku tanion. Koinapa in sia tongábí ḻimitú mako mokidongog kon onu in poguman i Tuhan bo pomayánea mako in akuoi in mogaid tontaní?”

⁴¹Táe ki Tuhan in noguman, “Marta, Marta! Iko naa in totokbí mohawatir bo mopoyoyiga in awakmu tontaní bo tongá umuran morai kon bayongan rupa-rupa.

⁴²Bá poguman-Ku kon inimu kon tongábí tobatú in totok moponting. Ki Maria ain nomiḻí kon inta mopia, inta diábí bui gamáan kon inia.”