Read Mongondow LUKAS 11 Bible Online

LUKAS 11 - Mongondow bible

LUKAS 11

¹Kon singgai tobatú ki Yesus in nosambayang kon tobatú tampat. Naonda in Sia nopaḷutdon nosambayang, murí-Nea tobatú noguman, “Tuhan, tundúpa in kami mosambayang, ná ki Yohanes notundú kon dumoduduinea mita.”

²Dá kai Yesus doman, “Aka moiko bo mosambayang yo singogdon nanaa, ‘Amá, Tongábí Iko in ki Allah. Poigumon mako Iko in sumbaan bo horomaton. Ikobí in Datu nami. Poigumon mako Iko momarenta kon dunia.

³Ogoiaidon in pomuḷoi in singgai in kaanon inta tugat kon inami.[17]

⁴Ampungaidon in taḷá mita nami, sin kami in nongampung domandon kon intau inta kotaḷá kon inami. Bo donaai pomayá mako in kami kobuḻian in pirisaya kon dodai in kami koantugan in totungkuḷ.’ ”

⁵Onda intua noguman doman Sia kon murí-Nea mita nanaa, “Aka kuma kon sigad monimu oyúon in tobatú intau mayá in baḷoi yobayatnea pongantog in doḷom bo moguman, ‘Uḻe, popoḷuanaipa in bogat in akuoi,

⁶sin oyúon in yobayatku nongkon binayáan noiandup mangoi kon baḷoiku bo diádon in kaanon kon baḷoiku!’

⁷Bo aka kuma yobayatnea tatua notubag nanaa, ‘Dikadon monuyayow kon inakó sin kinunsíankudon in ḷoḻingkop bo nosiugdon in kami motoḷuadí. Diádon in akuoi mokopobangon bo mobogoi in kaanon kon inimu uḻe.’ ”

⁸“Yo naonda?” guman i Yesus bui. “Akuoi in moguman kon inimu, umpakabí iko yobayatnea, yo diábí mobangon in sia bo mobogoi kon onu in paraḷumu. Táe aka iko bo diá mooyá in umuran monangkokó bo moigum, dá mobangonbí in sia bo mobogoi kon onu in paraḷumu.

⁹Manangka intua Akuoi in moguman kon i monimu: Poigumdon, dá ogoianbí in moiko; potayakdon dá mokouḻíbí in moiko; Ponangkokódon dá pobukatanbí kon ḷoḻingkop in moiko.

¹⁰Sin pomuḷoi in intau inta moigum in motarimabí, bo intau inta motayak in mokouḻíbí, bo intau inta monangkokó in pobukatanbí kon ḷoḻingkop.

¹¹Degá oyúon in kon sigad monimu in guyanga inta aka poiguman i adínea kon toyá, yo ogoiannea in uḷag?

¹²Andeka aka ki adínea moigum kon natu yo ogoiannea in uḻipan?

¹³Dá aka moiko inta moraat bo motaau mobogoi kon inta mopia kon i adímu mita, yo bambíkabí ki Amámu inta kon soroga! Sia in mobogoibí in Roho-Nea kon i monia inta umuran moigum kon i-Nia!”

¹⁴Kon singgai tobatú ki Yesus noguntun kon dimukud moraat nongkon intau bobó. Naonda in dimukud moraat tatua iḷumuai kon intau bobó tatua, nokosingogdon in sia. Intau moantó kon tua in nongoherang,

¹⁵tongá oyúon in kon sigad monia tua in noguman, “Sia tua in noguntun kon dimukud moraat nomaké in kawasa i Beelzebul, inta itoi in dimukud moraat mita.”

¹⁶Oyúon doman kon sigad monia tua in moigum kon tanda nongkon soroga saḷaku bukti kon Sia in nongkon i Allah. Mosia tua in monungkuḷ kon i-Nia.

¹⁷Táe kinotaauanbí i Yesus in raian monia tatua, dá Sia in noguman kon i monia, “Aka tobatú negara bo mosila-silai bo mosisaturuandon, yo negara tatua in diábí mononoi. Andeka motoḷuadí inta posibayá, yo tantú diábí doman mononoi.

¹⁸Natua doman in kon dodatuan in Ibilis; aka kolompó tobatú bo moropatoi in kolompó doman tobatú, yo dodatuan tatua in morumbunbí. Moiko in noguman kon Akuoi in noguntun kon dimukud moraat takin nomaké in kawasa i Beelzebul.

¹⁹Aka natua, yo kawasa i ine in pinaké in dumoduduimu mita noguntun kon dimukud moraat tatua? Dumoduduimu bidon tontaní in noguman kon noitaḷá in moiko!

²⁰Akuoi naa in noguntun kon dimukud moraat takin kawasa i Allah. Tua in mangaḻenea kon ki Allah in nomangkoidon nomarenta kon yua-yuak monimu.

²¹Aka intau moropot bo notouḷut domandon in pakakatnea sin poḷukadnea kon baḷoinea tontaní, yo komintan kapunyaannea in mosaḷamatbí.

²²Táe aka oyúon in moiḻiu in ropot kon inia in mamangoi monubu bo monaḷow kon inia, dá daitonbí agowon in intau moropot tatua in bayongan pakakatnea inta mobaḻí kinodoyonan in ropotnea poḷukad kon baḷoinea. Onda intua daitonnea bo sila-silaion mako in barang in intau inta pinogagowannea tatua.

²³Intau inta umuran momaḷawang kon i-Nakó, mosaturu kon i-Nakó. Bo intau inta doí moduḷu mogaid kon oaidan-Ku, sia tua in momoguyaat kon oaidan-Ku!”

²⁴“Aka dimukud moraat bo nonaḷámai kon tobatú intau, yo sia tua in maya-mayá bí mako in tampat inta noingkag sin motayak kon pogogaian, táe diá in sia nokouḻí. Manangka intua sia in nosingog nanaa, ‘Akuoi in bui mayá in baḷoi inta ain sinaḷáanku tua!’

²⁵Bo sia in minayádon bui. Kinobayáanneamai yo baḷoi tatua in nodaritdon sin ain sinimpatan bo totok doman sinompia kinopira.

²⁶Dá iḷumuai bui in dimukud moraat tatua bo nogoiní kon dimukud moraat ibanea taya pitu inta moraa-raat nongkon inia. Onda intua mosia nogutun kon intau tatua, dá pangabisannea, kaadaan in intau tatua in nodugang moraat nongkon kaadaannea inta muna.”

²⁷Koyogotpa in ki Yesus nosingog, indoianmai tobatú bobay kon sigad intau mobayong tatua nogumanbí kon i Yesus nanaa, “Mosanangdon totok in bobay inta nopolahir bo nopoteté, kon i Tuang.”

²⁸Táe ki Yesus noguman nanaa, “Intau inta mosanang totok in mosiabí inta moibog mokidongog kon Pirman i Allah, bo moibog mogaid kon onu inta pinoguman-Nea!”

²⁹Kon yuak in intau mobayong tatua ki Yesus nogingguput kon sirita-Nea, nanaa, “Moraat totok intau masa in tanaa. Mosia mopoigum bá Akuoi in mogaid kon inta mokoherang sinbá mopirisaya in mosia. Táe mosia in diábí ogoian in tobatúmai, koḻikudbí in tanda kon i Nabi Yunus.

³⁰Sin naonda bo ki Nabi Yunus inta nobaḻí tanda kon intau mita in Niniwe, yo natua domandon in ki Adí Intau mobaḻí tanda kon intau mita masa in naa.

³¹Kon Singgai Pohakiman, Ratu nongkon Toḷatan mobangon moyotakin in intau mita masa naa bo mohakim kon i monia. Sin Ratu tanaa in namangoi nongkon popod in dunia sin mokidongog kon totundú i Salomo. Táe kon naa tanaa mako oyúon in noiḻiu kon kopopandoi i Salomo!

³²Kon Singgai Tumi, intau mita in Niniwe mobiagdon bui moyotakin in intau mita masai naa bo mosia in mohukum doman kon i monia. Sin intau mita in Niniwe noibog nogogai in nogaid kon inta moraat kon wakutu in mosia nokodongog kon onu inta pinoguman i Nabi Yunus kon i monia. Táe kon naa, tanaa mako oyúon inta mokawa-kawasa nongkon i Nabi Yunus!”

³³“Diábí in tobatúmai intau mopoyongkit mako in togá bodongka tungkubannea in tampayang,[18] tantú tuduonneabí kon tampatnea. Sinbá komintan intau inta tumuot in mokoontong kon bayagnea.

³⁴Mata naa togá in awak. Aka matamu bo mopia, dá mobayagbí doman in awakmu, táe aka matamu bo diá mopia, mosindipbí doman in awakmu.

³⁵Tuamai umuran mokopopia sinbá bayag inta kon inimu diá mobaḻí mosindip.

³⁶Aka awakmu bo mobayag komintan, diábí tobatúmai in mosindip, bo mobayagbí doman komintan in awakmu, naonda bo sindar in togá nonimbayag kon inimu.”

³⁷Naonda in ki Yesus nopaḷutdon nobogoi in totundú, intau in Parisi tobatú namangoi nogoiní kon i-Nia mayá mongaan kon baḷoinea. Dá ki Yesus in minayá doman bo nongaan.

³⁸Táe intau in Parisi tatua nongoherang in nokoontong kon i Yesus nongaan táe diá muna nonomok ná atorang in agama.

³⁹Tuamai ki Tuhan in nosingog kon i-Nia nanaa, “Moiko intau in Parisi totuubí kon aka palo bo pindan yo yuyúanbí monimu dotá in ḷuainea, táe bonu in gina monimu nopuḻing in raian inta diá mopia. Mongoraat bo mongotogat in gina in moiko.

⁴⁰Nongo bodok in moiko! Diábí degá kotaauan monimu kon ki Allah inta nogaid kon dotá in ḷuainea, Siabí doman tuata inta nogaid kon dotá in bonunea?

⁴¹Nanaa! Onu inta kon bonu in pindan bo palomu tua, tuata inta musti ogoi monimu kon intau mita nobogá. Aka tua in aidanmu, yo modarit komintan onu inta nokotor kon inimu.

⁴²Koboditodon in moiko intau mita in Parisi, sin pododungú mita, pogamaan monimu kon mopuḷú noporsen sin posukur, táe oaid mita moadil bo tabi kon i Allah in iḻiongdon monimu. Aka mogaid kon tobatú, yo ibanea in dikabí koḻiongan.

⁴³Koboditodon in moiko intau mita in Parisi inta moibo-ibog ḻimitú kon muna totok aka kon baḷoi pososambayangan bo inta totok doman moibog horomaton aka kon pasar.

⁴⁴Koboditodon in moiko intau mita in Parisi! Moiko in naonda bo poḷoḷobongan inta diá pinaisan tangoi inta korita-ritakan mako in intau táe diábí kinotaauan monia kon poḷoḷobonganbí intua.”

⁴⁵Tobatú mototundú kon agama noguman kon i Yesus nanaa, “Pak Guru, singog i Pak Guru tua in mokopooyábímai kon inami!”

⁴⁶Táe ki Yesus in notubag, “Koboditodon doman moiko inta mototundú mita kon agama! Sin moiko in mogaid kon atorang mita inta mobogat aidan, táe moiko tontaní in doíbí dumudui kon atorang tatua.

⁴⁷Koboditodon in moiko! Sin moiko in nogaid kon poḷoḷobongan in nabi mita, inta sinokoḻimod in mogoguyang monimu.

⁴⁸Bá kotaauan monimu, oaid monimu tatua, noginsilangbí kon intau, kon moiko in nosotuju kon onu inta inaidan in mogoguyang monimu; sin mogoguyang monimu in noḻimod kon nabi mita tatua bo moiko in nogaid kon poḷoḷobongan monia.

⁴⁹Tuamai hikmat i Allah in noguman nanaa, ‘Akuoi mopotabá in nabi mita bo rasul mamangoi kon i monimu; ibanea in ḻimodon bo ibanea doman in pogutúon!’

⁵⁰Tua inaidan i Allah sinbá intau mita masa naa hukumon sin pinoḻimodan inta inaidan kon bayongan in nabi nongkon wakutupa in dunia naa inaidan,

⁵¹pinangkoipa kon pinoḻimodan kon i Habel nodapot in pinoḻimodan kon i Zakharia inta iḻimod, kon sigad in meja pobobogoian kon sosumba bo Baḷoi Tuhan. Popirisayabí: Intau mita masa naa pastibí kon hukumon sin popisí in oaid mita tatua.

⁵²Koboditodon in moiko mototundú mita kon agama! Sin kokunsi pobuká kon pongotahuan sinagúdon kon i monimu, táe moiko tontaní in diá moibog tumuot kon bonunea sin motayak kon pongotahuan tatua. Nodapot in moiko in tongábí mobaḻí ḷonggai kon intau mita inta moramuji tumuot kon bonunea!”

⁵³Bo naonda in ki Yesus nonaḷámai kon tampat tatua, intau mita in Parisi bo mototundú mita kon agama sinumorú totok. Mosia umuran monaridi mako kon i-Nia bo kopia mopoḻibó-ḻibó kon yagi-yagi.

⁵⁴Ḷoḻibó monia tua in tongábí potayakan monia kon taḷá i Yesus, sinbá oyúon in baḻíon monia dodoyonan podomokan kon i-Nia.