Read Mongondow LUKAS 14 Bible Online

LUKAS 14 - Mongondow bible

LUKAS 14

¹Kon singgai in Sabat tobatú, ki Yesus minayá nongaan kon baḷoi in intau in Parisi. Intau mita kon tua nonarukiramai kon i Yesus.

²Kon tua oyúon intau inta notakit binoba-bobagaan in ḻima bo sioḷnea.

³Dá ki Yesus in noḻibó kon mototundú mita kon agama bo intau mita in Parisi inta kon tua, “Aka podudui in agama naton, motaau degá andeka diá in mongundam kon intau notakit kon singgai in Sabat?”

⁴Táe mosia tongá kibio-biómai. Dá inoiní i Yesus in intau tatua bo inundaman. Onda intua pinotabá-Neadon minayá in sia.

⁵Nopaḷut mako kon tua, ki Yesus in noḻibó kon i monia, “Yo aka kuma bo oyúon in ki adí monimu andeka bobiagon monimu moḷabú kon parigí kon singgai in Sabat, yo umpaka diá ḷagi ḷongasion monimu bo poḷuaion kon singgai doman tatua?”

⁶Diá tobatúmai in nokotubag kon singog-Nea tatua.

⁷Onda in ki Yesus nokoontong kon mokokiangoi mita inta nomiḻí kon tampat inta mopira totok, Sia in nongonguman kon tobatú poumpamaan kai-Nia.

⁸“Aka oyúon in intau mogoiní kon i monimu mayá in ponikaan, yo donaai moiko muna-munamai mayá bo ḻimitú kon tampat inta mopira totok, sin dikabo oyúon doman intau ibanea inta inoiní monia in moponti-ponting nongkon i monimu,

⁹sahingga in ki togi baḷoi inta ain nogoiní kon i monimu in mamangoi bo moguman kon inimu nanaa, ‘Maap uḻe, tampat tanaa aindon sinadiaku ḻitúan in intau tatua.’ Dá takin oyá moḷoben iko momamping bo mayá in tampat inta kon tumi totok.

¹⁰Poguman-Ku naa kon i monimu: Aka moiko bo oiníon kon ponikaan, yo piḻídon in tampat inta kon tumi totok, sinbá aka ontongondon i togi baḷoi in iko yo sia in mamangoi bo moguman kon inimu nanaa: ‘Uḻe, koḻigai bá mayá ḻimitú kon muna.’ Aka natua yo iko in horomatondon totok kon tayowon in bayongan mokokiangoi kon tua.

¹¹Sin ki ine in mosiḷantud, yo popoompáan, táe ki ine in moompá in dodia, yo sia in poḷantudon.”

¹²Onda intua ki Yesus noguman kon i togi baḷoi, “Aka iko bo mogaid kon bobutungan kon wakutu in singgai andeka doḷom, yo donaaidon mogoiní kon yobayat, utat, andeka bayongan ginaḷum bo topodiugmu inta nobiag nooyúon, sin aka natua yo tuḻían doman oiníon monia in iko. Dá oyúon tontuḻí in pinogoiníanmu kon i monia.

¹³Manangka intua aka iko bo mogaid kon bobutungan, yo oinídon in intau mita bogá, intau nongobogit, intau mita inta ḻempeng, bo intau mita bilog.

¹⁴Aka natua yo iko in barakatan sin intau mita tatua in diá mokotuḻí kon oaidmu inta mopia. Oaidmu inta mopia tua in ki Allahbí in motuḻí kon wakutu in intau mita mopia tatua biagon bui nongkon kinopatoiannea.”

¹⁵Nokodongogmai kon singog i Yesus natua, oyúon tobatú intau inta nongaan noyotakin-Nea in noguman kon i-Nia, “Momujur totok in intau inta mongaan moyotakin i Allah aka Sia mamangoidon saḷaku Datu!”

¹⁶Táe ki Yesus in noguman kon inia, “Oyúon intau in nogaid kon bobutungan moḷoben. Sia in nogoiní kon mobarong intau.

¹⁷Naonda in wakutuneadon pangkoion in bobutungan tatua, sia in nopotabá in simpaḷnea mayá kon intau mita inta ain sinokooinínea bo moguman kon i monia, ‘Angoidon sin ain sinadia komintan!’

¹⁸Táe nobatu-batú mosia in nopoigum maap. Inta muna, noguman nanaa kon simpaḷ tatua, ‘Akuoi in bagu notaḷui kon butá, bo musti bayáanku indoian intua, dá akuoi in mopoigum in maap sin diá mokopobayá.’

¹⁹Intau inta induanea in noguman nanaa, ‘Akuoi in bagu notaḷui kon sapi ḻima no par bo musti bayáankupa tungkuḷan, dá akuoi in mopoigum maap sin diá mokopobayá.’

²⁰Intau ibanea doman in noguman nanaa, ‘Akuoi in bagu nobuḷoi, tuamai in akuoi in diápa mokopoangoi.’

²¹Simpaḷ tatua in nobuidon bo noguman kon i tuangnea kon bayongan alasan inta pinoyaput in intau mita inta sinokooiní. Dá sinumorú totok in ki togi baḷoi tatua poḷat noguman in Sia kon simpaḷnea nanaa, ‘Ḷagidon bayá kon daḷan mita moḷoben bo loro-lorongannea kon kotá, bo diadon mangoi in intau mita inta bogá, bogit, bilog, bo intau mita ḻempeng.’

²²Onda intua simpaḷ tatua namangoidon bui kon i tuangnea bo noguman nanaa, ‘Tuang, onu in pinoki aid i tuang aindon nodait dinuduianku, táe oyúonpa doman in ḷoḻitúan in diá iḻitúan.’

²³Dá kai tuangnea doman, ‘Bayádon in daḷan mita moḷoben bo loro-lorongannea kon ḷuai in kotá bo pakisadon in mosia dia mangoi sinbá mopuḻing in baḷoiku naa.

²⁴Toropdon! Diábí in tobatúmai kon sigad in intau mita inta ain sinokooiníku tatua in moikaan kon kaanon kon bobutungan inta inaidanku naa!’ ”

²⁵Kon singgai tobatú, wakutu in nobayong intau in dinumudui kon i Yesus, Sia in nobobui kon i monia komintan bo nosingog,

²⁶“Aka intau mamangoi kon i-Nakó, táe sia in motabi-tabi kon i iná bo kon i amánea andeka kon i adíneabí bo kon i buḷoinea bo kon awaknea tontaní, yo sia tua in diá motaau mobaḻí dumodudui-Ku.

²⁷Intau inta doí momotaan kon kayu pinoyotaḻempang bo dumudui kon i-Nakó, sia tua in diábí motaau mobaḻí dumodudui-Ku.

²⁸Aka oyúon in kon sigad monimu in moibog moposindog in ḷangkeang, yo tantú munapabí in sia ḻimitú bo mogiap muna mongo tongonu in doit pakéon kon tua, sinbá kotaauanneadon muna mongo tugat in doitnea pogaid modapot in moḷapat in ḷangkeang tatua.

²⁹Sin dikabo inaidanneadon in pondasinea, bo indoianmai yo doit in diábí tugat pongingguput dá intau inta mokoontong kon oaidan tatua in kumosingbí kon inia.

³⁰Bo poḷat doman singogon monia nanaa, ‘Kaasí ah, kuma intau tanion mobaḷoi, táe diá mokoḷapat.’

³¹Andeka nanaa aka oyúon in datu inta tontaranea in mopuḷú noribu bo moparang in datu ibanea inta doyowa nopuḷú noribu in tontaranea, yo tantú raionbí muna in datu tatua mongo mokomampu in mosia in tumayow kon saturu tatua andeka diá.

³²Aka korasaanmai bo diá mokomampu, yo tantú wakutu in saturu noyayúpa yo sia muna bidon mopotabá kon intaunea bo moguman kon moyodamedon.

³³Natua doman in moiko komintan. Diábí tobatúmai in kon sigad monimu inta motaau mobaḻí dumodudui-Ku aka moiko bo diá mokotaḷá kon kapunyaanmu.”

³⁴“Simuton tua in mopiabí, táe aka moḻiaudon, yo degá motaaupa pogibung?

³⁵Diá bidon in baragunanea umpaka pakéon kon gobá andeka pomupuk. Manangka intua ḷumbúon bidon. Tuamai aka kobongoḷan, yo pokidongog!”