Read Mongondow LUKAS 15 Bible Online

LUKAS 15 - Mongondow bible

LUKAS 15

¹Kon singgai tobatú, nobayong in mononagi kon pajak bo intau mita baradosa ibanea namangoi kon i Yesus, sin mokidongog kon i-Nia.

²Dá intau mita in Parisi bo mototundú mita kon agama nomangkoidon mongunsingog, kai monia, “Sesé ah, intau tanion moibogbí motarima kon intau mita inta diá mopia, bo mongaan doman moyotakin monia!”

³Dá tuamai in ki Yesus nongonguman kon poumpamaan tanaa kon i monia, kai-Nia,

⁴“Aka kuma oyúon kon sigad monimu inta nomiag kon domba mogatut in kobayongnea, bo tobatú in nobuḻi, yo onu in aidannea? Tantú taḷaanneapabí in domba inta siow nopuḷú bo siow kon ḷantungnea bo mayá in sia motayak kon inta nobuḻi tatua modapot in mouḻíneadon.

⁵Bo aka mouḻíneadon bui in domba tatua, yo totokbí in mopia-pia in ginanea, dá in potaanonneadon in domba tatua,

⁶bo diaan mobui. Onda in moiyaputmai kon baḷoinea, sia in mogoiní kon yobayatnea mita bo topodiugmai poḷat moguman nanaa, ‘Igai bá moramepa in kita sin dombaku inta nobuḻi in nouḻíkudon bui!’

⁷Bá poguman-Kudon kon i monimu: natua doman in kon soroga. Moḷoben totok pia in gina sin popisí tobatú intau inta ain nogogai nogaid kon dosa. Pia in gina tatua moiḻiu kon pia in gina kon i monia inta siow nopuḷú bo siow inta ain nopira bo diádon moparaḷu mogogai in mogaid kon dosa.”

⁸“Andeka, aka kuma bo tobatú bobay kodoit saḷaka mopuḷú in kobayongnea, bo tobatú in nobuḻi — onu in aidannea? Tantú mopoyongkitbí in togá in sia bo mongait kon bonu in baḷoinea bo kotaya-tayak modapot in mouḻínea bui in doitnea tatua.

⁹Bo aka mouḻíneadon in doitnea tatua, yo mogoiníbí in sia kon yobayatnea mita bo topodiugmai mita, bodongka moguman, ‘Igai mobarasanangpa in kita sin doitku inta nobuḻi in nouḻíkudon bui!’

¹⁰Natua doman in malaekat mita i Allah, mopia in gina monia aka oyúon tobatú intau inta moraat in mogogaidon in mogaid kon dosa. Tuamai, popirisayabí!”

¹¹Ki Yesus in nongonguman doman kon poumpamaan nanaa, “Oyúon in tobatú guyanga ḷoḷaki kogadí kon doyowa, adí ḷoḷaki komintan.

¹²Inta muit noguman kon i amánea, ‘Papa, ogoidon kon inakó tanaa mako in silaiku nongkon kapunyaan naton.’ Dá sinilaidon i amánea kon i adínea doyowa tua in kapunyaannea.

¹³Tongonumaidon nosinggai noiduduimai nongkon tua, adí muit tatua nopotaḷui in bayongan silainea bodongka minayá in kotá inta moyayú. Kon tua sia in nopomaké in doitnea tatua inimibo-ibogbí.

¹⁴Naonda in doitnea tatua nodaitdon komintan, kotá inta binayáannea tatua kino antugan in malarat, sahingga in sia nomangkoidon doman mokorasa kon roriga sin diádon koonu bo onu.

¹⁵Dá sia in minayá nogaid kon tobatú intau kon kotá tatua. Intau tatua nopotabá kon inia minayá in gobá sin moḷukad kon bokénea.

¹⁶Wakutu intua, sia in totokdon gogoyon, dá sia in moibog domandon mokaan kon kaanon in boké tatua. Sin umpaka totokdon in gogoyon in sia, táe diábí doman in intau in mamangoi mobogoi in kaanon kon inia.

¹⁷Pangabisannea sia in nosadar bo nosingog nanaa, ‘Intau mita inta nogaid kon i papaku mobayong totok in kaanon kon i monia, táe akuoi in kon naa gogióbí bo matoi in gogoy!

¹⁸Yo maníka bo mobui in akuoi kon i papaku, bo moguman kon inia nanaa: Papa, akuoi naa ain nomia kon taḷá kon i Tuhan bo kon i papa.

¹⁹Dá akuoi in diá bidon patus tangoion ki adí i papa. Tuamai pomiadon in akuoi naonda bo intau mogogaid i papa.’

²⁰Dá nobuatdon in sia bo nobui mangoi kon i amánea. Noyayúpa in sia, inontongdon i amánea. Popisí in tabi bo tanobnea totok dá noribatuk in ki amánea bo notomu kon inia, bo ginakapannea poḷat inayokan.

²¹Táe ki adínea tatua in noguman: ‘Papa, akuoi naa aindon nomia kon taḷá kon i Tuhan bo kon i papa, tuamai akuoi diá bidon patus tangoion ki adí i papa.’

²²Táe ki amánea nogoiní kon simpaḷnea mita bo noguman, ‘Koḻikat! Podiaaipa mangoi kon ḷambung inta totok in nopira bo popopaké kon inia. Popopakéai doman in sising kon gongguyamúnea bo ḷutudai domandon in sapatu.

²³Mopaḷut mako pogamá kon ki adí in sapi inta totok in noḷongó bo ratádon. Kita in mongaan moyotakin poḷat morame.

²⁴Sin ki adíku inta ain minatoi, tanaa mako in nobiagdon bui.’ Bo nomangkoidon in mosia norame.

²⁵Koyogot in norame, ki adínea inta guya-guyang in kon gobápa. Naonda in sia nobui bo nodiugdon kon baḷoi, sia in nokodongog kon singog in musik pinoramean kon baḷoi monia.

²⁶Dá sia in nogoiní kon simpaḷnea tobatú, bo noḻibó, ‘Mongo onu in nobaḻí kon baḷoinea?’

²⁷Dá simpaḷ tatua noguman, ‘Ki ai-ai i tuang in nobuidon mangoi! Bo pinorataan i papamu kon ki adí in sapi inta totok in moḷongó, sin nouḻíneadon bui in ki adínea takin nosaḷamat!’

²⁸Dá sinumorú totok in ki adínea guya-guyang tatua poḷat doí sinumuot kon baḷoi. Dá iḷumuai in ki amánea bo nodondouḷug kon inia.

²⁹Táe adí tatua in noguman kon i amánea, ‘Aindon kon taongannea in akuoi in nogaid nobantung kon i papa. Diá dodai onda in akuoi in nomaḷawang kon parenta i papa. Yo onu degá in inogoi i papa kon inakó? Umpaka tongá ki adí in bembé diápa kon dodai in onda ki papa nobogoi kon inakó sin poramean takin yobayatku mita!

³⁰Táe naonda in nobuidon mangoi ki adí i papa inta ain nokopodaitmai kon bayongan kapunyaan i papa takin bobay mita sundaḷ, yo sia in sinomu i papa bo pinorataan kon ki adí in sapi inta totok in moḷongó!’

³¹Dá ki amánea in notubag nanaa, ‘Uḻeku, iko in umuran koyota-yotakin i papa. Bo bayongan kapunyaan i papa kapunyaanmubí doman.

³²Tanaa in kita in patusbí mosanang in gina bo morame moyotakin, sin ki ai-aimu uḻe inta ain minatoi in nobiagdon bui. Ki ai-aimu inta nobuḻi in nouḻídon bui.’ ”