Read Mongondow LUKAS 18 Bible Online

LUKAS 18 - Mongondow bible

LUKAS 18

¹Onda intua ki Yesus nongonguman kon tobatú poumpamaan sin potundú kon i monia sinbá mosia in umuran mosambayang bo umuran moropot in gina.

²Ki Yesus in noguman, “Aka tobatú kotá oyúon in hakim inta diá moondok kon i Allah bo diá doman mopandungmai kon kasusahan in intau.

³Kon tua oyúon doman in intau inta dongkadon boba-bobay. Sia in umuran mamangoi kon hakim tatua bo moguman kainia, ‘Tuḷungaipa in akuoi nongkon oaid in saturuku.’

⁴Aindon kotongonu degá in bobay tatua in mayámai kon hakim tatua táe umuranbí doman doí motuḷung in hakim tatua kon inia. Táe pangabisannea hakim tatua in norai nanaa, ‘Umpakabí akuoi naa diá moondok kon i Allah bo diá doman mopandung kon tumpaḷa intau,

⁵táe popisí in bobay tanaa bo umuranbí monuyayow kon inakó, dá maníka bo duduiankudon in ibognea. Sin aka diá yo umuranbí in sia mamangoi bo mokiposusamai doman kon inakó.’ ”

⁶Bo ki Yesus in noguman doman kon i monia nanaa, “Tarukira onu inta siningog in hakim inta diá moondok kon i Allah tatua!

⁷Umpaka yo diá tuḷungan i Allah in intau inta ain piniḻí-Nea bo inta umuran doman mokuani kon i-Nia doḷom bo singgai? Umpaka yo onggo-onggotan-Neapa in wakutu-Nea motuḷung kon i monia?

⁸Popirisayabí: tuḷungan-Neabí in mosia! Táe aka Adí Intau mamangoi, yo oyúonpa degá in intau mopirisaya in kon dunia naa?”

⁹Ki Yesus in nongonguman kon poumpamaan tanaa, sin kon tua oyúon in intau inta monganggap kon tongábí mosia in intau mobanar, bo intau ibanea inanggap monia komintanbí binaradosa.

¹⁰Ki Yesus in noguman, “Oyúon intau doyowa minayá in Baḷoi Tuhan sin mosambayang. Tobatú intau in Parisi, tobatú in mononagi kon pajak.

¹¹Intau in Parisi tatua in sinimindog sinumontaní bo nosambayang,[25] kon bonu in ginanea nanaa, ‘O, Allah, akuoi in mopoyaput in sukur kon ini-Mu, sin akuoi in diá ná intau ibanea modunia, diá moadil, moibog monuaḻing, bo diá kototabi kon tumpaḷa intau. Bo akuoi in diá doman ná intau mononagi kon pajak tatua.

¹²Akuoi in mopuasa kodua in todiminggu, bo kon pomuḷoi in diminggu akuoi in umuran mobogoi in mopuḷú noporsen nongkon onu inta nouḻíku.’

¹³Táe mononagi kon pajak tatua in sinimindog iyumayú bo diá doman kobaḻí in ḷumangag kon ḷangit in nosambayang. Sia in tongá kopia moyapu kon dodobnea bo nosingog nanaa, ‘O Allah, kotabipa in akuoi naa, sin akuoi naa intaubí baradosa!’ ”

¹⁴“Bá poguman-Ku kon i monimu kon sambayangbí in mononagi kon pajak tanaa in sinarima i Allah, deemanbí sambayang intau in Parisi. Sin ki ine in mosiḷantud, yo sia in poompáanbí, táe ki ine moompá in dodia, yo sia in poḷantudonbí.”

¹⁵Oyúon in intau namangoi kon i Yesus bo nodia kon mongoadí mita sinbá kadaian-Nea mita i mosia bo barakatan. Nokoontongmai kon natua, murí-Nea mita sinumorú kon intau mita tatua.

¹⁶Táe inoiní i Yesus in mongoadí mita tatua bo noguman kon murí mita, “Pomayá mako in mongoadí mita tanion in mamangoi kon i-Nakó! Donaai ampagan, sin intaubí ná mita nion in mobaḻí umat i Allah.”

¹⁷Torop kopira in singog-Ku naa, “Intau inta mamangoi kon i Allah táe diá ná mongoadí mita tanaa, yo mosia in diábí mobaḻí umat i Allah.”

¹⁸Oyúon tobatú itoi intau Yahudi in noḻibó kon i Yesus, “Pak Guru, Inta mopia totok, onu in musti aidanku sinbá mokouḻí in akuoi kon kobiagan mononoi?”

¹⁹Dá ki Yesus in notubag, “Nongonu sin iko in mogumanbí kon Akuoi in mopia? Diábí tobatúmai in mopia, koḻikudbí in ki Allah tontaní.

²⁰Ain bidon kinotaauanmu in parenta mita i Allah: ‘Dika monuaḻing, dika moḻimod, dika monakow, dika moguman kon inta diá totuu bo horomatbí in ki amá bo ki inámu.’ ”

²¹Dá kaín intau doman tatua, “Tua komintan aindon dinuduianku nongkon mongoadíanpamai.”

²²Nokodongogmai kon tua in ki Yesus, noguman in Sia nanaa, “Tobatúpa in musti aidanmu: Potaḷuidon in bayongan kapunyaanmu bodongka sila-silaidon mako in doit tatua kon intau mita bogá, dá mokouḻíbí in iko kon kapunyaan kon soroga. Mopaḷut mako kon tua angoi bo duduidon kon i-Nakó.”

²³Táe naonda in sia nokodongog kon onu inta pinoguman i Yesus tatua, noajar totok in ginanea sin sia nobiag nooyúon.

²⁴Dá ki Yesus in nobobui kon i monia komintan inta kon tua bo nosingog, “Mororiga totok intau inta kodoit mobaḻí umat i Allah!

²⁵Aka poyobandingonmai, yo untapa in mogampa-gampang in tumuot mongin bubú in dodagum dika in intau inta nooyúon mobaḻí umat i Allah.”

²⁶Intau mita inta nokodongog kon singog i Yesus tatua in noḻibó bui kon i Yesus nanaa, “Aka natua dá ki ine in posaḷamaton?”

²⁷Ki Yesus in notubag, “Inta diá motaau aidan in intau, mogampangbí i Allah aidan!”

²⁸Dá ki Petrus in noguman, “Pak Guru, indoiaika in kami! Kami naa aindon nonaḷámai kon bayongan yagi-yagi kapunyaan nami bo dinumudui kon i Pak Guru, yo onu in mouḻí nami.”

²⁹Ki Yesus in noguman kon i monia, “Popirisayabí! Intau inta aindon nonaḷámai kon baḷoinea, nonaḷámai kon i buḷoinea, nonaḷámai kon i utatnea mita andeka nonaḷámai kon i iná bo kon i amánea andeka kon i adínea mita sin mobantung kon i-Nakó,

³⁰yo intau tatua in buibí motarima kon doyowa noguntuḷ nongkon inta aindon nouḻínea muna kon masa in tanaa, bo kon singgai inta moiduduimai sia in motarima kon kobiagan mononoi.”

³¹Ki Yesus in nogoiní kon murí-Nea mopuḷú bodoyowá, bo noguman nanaa, “Indongogai! Tanaa mako kita in mopobayádon in Yerusalem, bo bayongan inta ain pinais in nabi mita soaḷ Adí Intau in intompodandon kon tua.

³²Sia in posarakandon kon intau mita inta diá nonotaau kon i Allah, poyambáon monia in sia, singkuḻeon bo duyáan monia.

³³Pogutúon monia in Sia bo poḷat ḻimodon, táe kon singgai intoḷunea, Sia in mobiag bui.”

³⁴Singog i Yesus tatua, diábí kinomangaḻean in murí-Nea mita tatua. Mangaḻe in singog mita tatua in sinokobunibí kon i monia. Dá diábí kinotaauan monia mongo onu in inouman-Nea tatua.

³⁵Naonda in ki Yesus nodiugdon kon Yerikho, oyúon in tobatú intau bilog inta iḻimitú mako kon bingkí in daḷan bo moigumai kon doit kon bayongan intau inta moitotaḻib kon tua.

³⁶Wakutu in dinongognea kon nobayong in intau noitaḻib, sia noḻibó, “Onu in nobaḻí?”

³⁷Dá kain tubag doman monia kon intau bilog tatua, “Ki Yesus intau in Nazaret noitaḻib.”

³⁸Dá intau bilog tatua in baḷú bo nomaḷú, “Yesus Adí i Daud! Kotabipa in akuoi naa!”

³⁹Intau mita kon muna sinumorú kon inia noguman kon inia kon kibio-biómai. Táe tongábí nodugang noropot in kuaninea, “Adí i Daud! Kotabipa in akuoi naa!”

⁴⁰Dá ki Yesus in sinumogon bo noguman, “Dia mangoi kon naa in intau tatua.” Bo naonda in noiyaputdon kon i-Nia, ki Yesus in noḻibó kon inia,

⁴¹“Onu in kon ibogmu aidan-Ku kon inimu?” Intau tatua in notubag, “Tuhan, moibog in akuoi mokoindoi!”

⁴²Dá ki Yesus in noguman, “Aka natua, yo indoidon! Popisí in mopirisaya in iko kon i-Nakó, dá mopia in iko.”

⁴³Kon dodaipa doman tatua bo nokoontongdon in intau tatua poḷat dinumudui kon i Yesus bo sindaḷan modayow kon i Allah.