Read Mongondow LUKAS 19 Bible Online

LUKAS 19 - Mongondow bible

LUKAS 19

¹Naonda in ki Yesus noyaputdon kon Yerikho, Sia minayá turus bo diá nongandu-ngandup kon kotá tatua.

²Kon tua oyúon in intau tangoinea in ki Zakheus. Sia naa, itoi in mononagi kon pajak.

³Sia moibog totok moindoi mongo ki ine in ki Yesus tua, táe popisí in intau modamaḷ totok dá diá mokoontong in sia, apapa doman sia in noompá.

⁴Dá noribatuk in sia inumuna kon intau mita tatua bo noponik kon pangkoi in kayu ara sinbá mokoontong kon i Yesus inta motoyongdon moitaḻib kon tua.

⁵Naonda in ki Yesus noiyaput kon pangkoi in kayu tatua, iḷumangag in Sia bo noguman, “Zakheus, ḷagidon poponag! Sin Akuoi in musti mongandup kon baḷoimu in singgai naa!”

⁶Dá pona-ponag in ki Zakheus bo notarima kon i Yesus takin pia in gina.

⁷Táe intau mita inta nokoontong kon tua in nomangkoidon mongunsingog kai monia, “Ih! Sia in mongandupbí kon baḷoi in intau inta diá mopia!”

⁸Kon baḷoinea tatua, ki Zakheus sinimindog bo noguman kon i Tuhan, “Tuhan, kapunyaanku tobotak ogoikudon kon intau mita bogá bo aka oyúon doman in intau inta pernadon inuboḷanku, yo pobuionkudon bui kon inia koopat noguntuḷ in kobayongnea!”

⁹Bo ki Yesus in noguman kon inia, “Singgaipa doman naa moiko motoḷuadí pinosaḷamat i Allah bo inogoian in kobiagan mobagu, sin iko nion in ki adíbí doman i Abraham.

¹⁰Sin ki Adí Intau in mamangoi motayak bo moposaḷamat kon intau inta nongobuḻi.”

¹¹Kon wakutu in intau mita mokidongogpamai kon i Yesus nongonguman, Sia in nongongumandon kon tobatú poumpamaan. Sin wakutu intua Sia in nodiugdon kon Yerusalem bo kai monia kamai ki Allah in ḷagi bidon momarenta saḷaku Datu kon dunia naa.

¹²Ki Yesus in nongonguman nanaa, “Oyúon in tobatú intau moḷoben inta minayá in kotá inta noyayú sin baḻíon monia datu, mopaḷut mako kon tua sia in mobuidon mangoi kon ḻipúnea.

¹³Kon wakutu in diápa minayá, sia in nogoiní kon bobantungnea taya mopuḷú bo nobogoi in doit buḷawan tumongobatú kon i monia takin koyow nanaa, ‘Tanaa in doit pakédon monimu pobuká kon usaha kon wakutu in akuoi mayá.’

¹⁴Táe intau mita inta toḻipúannea mosakí in gina kon inia, dá naonda in sia minayá, intau mita inta mosakí in gina kon inia tua nopotabá doman in tobatú intau sin moguman nanaa, ‘Kami in doíbí aka intau tanaa in mobaḻí datu nami.’

¹⁵Táe umpakabí natua, sia in tatapbí doman binaḻí datu. Nopaḷut mako kon tua sia nobuidon mangoi, bo pinoki oiníneadon in bobantungnea mita inta ain inogoiannea in doit buḷawan tatua sin poindoian mongo tongonudon in kauntungan monia.

¹⁶Bobantung inta muna namangoi bo noguman nanaa, ‘Tuang, doit buḷawan tobatú inta inogoi i tuang aindon nodia kon kauntungan mopuḷú in doit buḷawan.’

¹⁷Dá ki tuang tatua in notubag, ‘Mopia intua, iko in bobantung inta mopia! Sin iko motaau pirisayaan kon oaidan inta mointok. Tuamai in baḻíonkudon iko pongawasa kon mopuḷú in kotá.’

¹⁸Onda intua bobantung induanea namangoi bo noguman nanaa, ‘Tuang, doit buḷawan tobatú inta inogoi i tuang aindon nodia kon kauntungan ḻima in doit buḷawan.’

¹⁹Dá datu tatua in noguman kon inia, ‘Iko in mobaḻídon pongawasa kon ḻima in kotá.’

²⁰Bobantung ibanea doman namangoi bo noguman nanaa, ‘Tuang, naa in doit i tuang; binakutkudon in lenso bo sinagú.

²¹Sin moondok in akuoi kon i tuang, sin ki tuang in intau motogat in gina. Bo umuran mogamá kon onu inta deeman kapunyaan i tuang. Mokoyut doman kon inta deeman pinomuḷa i tuang tontaní.’

²²Dá datu tatua in noguman kon bobantungnea tatua, ‘Ei bobantung inta moraat! Poduduidon in singogmu mita tatua dá hukumonku in iko. Kinotaa-taaumubí mako kon akuoi naa intaubí inta totok motogat bo inta moibog mogamá kon onu inta deeman kapunyaanku bo inta moibog doman mokoyut kon inta deeman pinomuḷaku.

²³Aka natua yo nongonu sin doitku in diábí sinagúmu kon bank, sinbá naonda in akuoi namangoi, yo doit tatua in motaauku bui gamáan takin kauntungannea?’

²⁴Onda intua datu tatua in noguman kon intau mita inta sinimindog kon tua, ‘Gamá in doit tatua kon inia bo ogoi kon bobantung inta mopuḷúdon in doit buḷawannea tua.’

²⁵Táe intau mita tatua in noguman, ‘Tuang, kon inia in mopuḷúdon in doit buḷawan.’

²⁶Táe datu tatua in notubag, ‘Pokotorop: intau inta nobayongdon in kon inia, duganganbí bui. Táe intau inta diá in onu bo onu kon inia, yo onu in oyúonpa kon inia, gamáanbí doman.

²⁷Bo tanaa mako in tokodiadon mangoi in intau mita inta mongosakí in gina kon i nakó bo inta doí aka akuoi in mobaḻí datu kon i monia. Ḻimod in mosia kon tayowonku!’ ”

²⁸Naonda in ki Yesus nosingog kon tua komintan, Sia inumuna kon i monia minayá in Yerusalem.

²⁹Naonda in nodiugdon kon Betpage bo Betania kon Buḷud in Zaitun, Sia in nopotabá kon murí-Nea doyowa mayá umuna takin koyow nanaa,

³⁰“Bayádon kon ḻipú inta kon tayowonmai nion, bo aka moiko bo tumuotdon kon ḻipú tatua, yo moiko in mokoontong kon ki adí in keledai tobatú inta kotogo-togot. Keledai tatua in diápa kon dodai in onda sinakoian in intau. Dá bukádon in keledai tatua bo dia mangoi.

³¹Aka oyúon in moḻibó kon inimu nanaa, ‘Nongonu sin bukaanbí monimu in keledai tatua?’ Dá tubagai nanaa, ‘Ki Tuhan[26] moparaḷu.’ ”

³²Bo minayádon murí-Nea doyowa tatua, bo onu in kinobayáan monia tua in totuubí kon ná inta pinoguman-Nea.

³³Bo naonda in binuká monia in keledai tatua, ki toginea in noḻibó, “Nongonu sin bukaanbí monimu in keledai tatua?”

³⁴Dá mosia notubag doman nanaa, “Ki Tuhan moparaḷu.”

³⁵Naonda in diniadon monia in keledai tatua kon i Yesus, intau mita nopoaip in jubah kon ḻikud in keledai tatua bo notuḷung nopoponik kon i Yesus kon keledai tatua.

³⁶Kon wakutu in Sia sinumakoipa kon keledai tatua, intau mita nopoompatdon in jubah monia kon yuak in daḷan.

³⁷Naonda in ki Yesus nodiugdon kon Yerusalem, kon daḷan inta mosiḻig kon Buḷud in Zaitun, komintan dumodudui-Nea inta mobarong tua, kopiadon momaḷú modayow kon i Allah bo mopoyaput in singog sukur kon i-Nia, sin mosia aindon nokoontong kon inta mokoherang inaidan-Nea.

³⁸Mosia in nomaḷú nanaa, “Binarakatan in Datu inta namangoi kon bonu in tangoi Tuhan! Dodamean kon soroga, bo dinayo-dayowdon in ki Allah!”

³⁹Tongonumai intau in Parisi inta noitakin kon intau moantó tatua in noguman kon i Yesus, “Pak Guru, pokigogaiaidon momaḷú in dumodudui-Mu mita tanion.”

⁴⁰Dá ki Yesus in notubag, “Poguman-Kudon kon i monimu! Aka mosia naa bo kibio-biómaidon, yo batu bidon mita tanion in momaḷú.”

⁴¹Táe naonda in ki Yesus nodiugdon kon Yerusalem, nongombaḷ in Sia in nokoontongmai kon kotá tatua.

⁴²Bo poḷat nosingog, “Kaasí uḻe, mopiadon totok aka singgai in naa bo kotaauanmudon in onu inta motaau mokopoangoi kon dodamean! Táe tanaa iko in diábí mokoontong.

⁴³Sin moiangoibí in wakutunea saturumu mamangoi moḻipung kon inimu takin ropot monia. Kopungon bo sisíon monia in moiko nongkon bayongan tampat.

⁴⁴Rimumudon monia in iko takin intaumu mita inta nogutun kon naa; bo diábí in tobatúpamai in batu in pomayápa mako monia in moitudu motompia kon tampatnea. Sin diábí in kon ginamu mako in ki Allah in mamangoi moposaḷamat kon inimu!”

⁴⁵Ki Yesus sinumuot kon Baḷoi Tuhan bo mulai noguntun kon intau mita inta mopopotaḷui mita kon tua.

⁴⁶Sia in noguman kon i monia nanaa, “Oyúon in pinais nanaa: Ki Allah in noguman, ‘Baḷoi-Ku in mobaḻíbí Baḷoi Pososambayangan.’ Táe naa in binaḻí bidon monimu pugad in mogogagow!”

⁴⁷Pomuḷoi in singgai Sia mayá mobogoi in totundú kon bonu in Baḷoi Tuhan. Imang mita itoi bo mototundú mita kon agama takin itoi mita intau Yahudi moibogdon moḻimod kon i-Nia,

⁴⁸táe diápa kotaauan monia mongo naonda in pogogaid tua, sin bayongan intau umuranbí moibog mokidongog kon i-Nia, bo totok moibog in mosia in mokodongog kon singog-Nea mita.