Read Mongondow LUKAS 2 Bible Online

LUKAS 2 - Mongondow bible

LUKAS 2

¹Kon wakutu intua ki Kaisar Agustus nomarenta nokipais in tangoi in bayongan intau kon dodatuan in Rum.

²Naa in pinomangkoian pinogiapan kon intau mita, wakutu in ki Kirenius nobaḻí gubernur kon butá in Siria.

³Intau mita minayá nokipais in tangoi monia kon ḻipú monia tontaní.

⁴Ná doman tua in ki Yusup. Sia in nobuat nongkon ḻipú in Nazaret kon Galilea bo minayá in Betlehem butá in Yudea, ḻipú inta kinolahiran i Daud, sin sia in buí i Daud.

⁵Sia takin i Maria ki kantangnea inta sidiadon tua, nokipais doman in tangoi monia.

⁶Naonda in mosia kon Betlehem notompodon in wakutu i Maria mononggadí.

⁷Sia nopolahir in adí ḷoḷaki, ki adínea guya-guyang. Adí tatua binakutnea in yumbit in daing bodongka pinouḻid kon bonu in duḷang sin mosia in diá nokouḻí kon baḷoi pinongandupan.

⁸Doḷom tua in kon ḻipú tatua, oyúon in gombala mita inta yogot in moḷukad kon domba mita monia.

⁹Indoianmai sinimindogbí magí in malaekat i Tuhan, bo nokipogontong kon i monia. Sindar i Tuhan nonimbayag kon i monia, dá totok inangoian in ondok i mosia.

¹⁰Táe malaekat tatua in noguman, “Dika moondok! Sin akuoi in mamangoi moguman kon habar mopia kon i monimu, habar inta totok in mokosanang kon gina in bayongan intau.

¹¹Singgai in naa kon ḻipú i Daud, noilahirdon in Datu inta mopoposaḷamat kon i monimu, tuata in ki Kristus, ki Tuhan naton.

¹²Yo bá kotaauan monimu, yo naa in tandanea: Moiko in mokodungkuḷ kon adí mointok inta binakut in yumbit in daing bo pinouḻid kon bonu in duḷang.”

¹³Bo daḻídon malaekat tatua sinakinan in malaekat inta nobarong ibanea, inta nodayow kon i Allah, kai monia,

¹⁴“Dinayo-dayowdon in ki Allah kon tampat inta Totok in Moḷantud! Bo dodamean umuran kotaki-takin monimu, intau inta umuran mogaid kon mokosanang kon gina i Tuhan!”

¹⁵Naonda in malaekat mita tatua nonaḷámai kon i monia sin nobuidon kon soroga, gombala mita tatua noyosingog. Nanaa in yosingog monia tua, “Koḻigai bá mayá in Betlehem in kita bo moindoi kon onu inta ain nobaḻí kon tua, ná inta ain pinoguman i Tuhan kon i naton.”

¹⁶Dodaipa doman tatua mosia minayá nokipodungkuḷ kon i Maria bo kon i Yusup takin adí mointok inta pinouḻid mako kon bonu in duḷang.

¹⁷Bo naonda in inontong monia in adí mointok tatua, inouman in gombala mita tatua in onu inta ain pinoguman in malaekat i Tuhan kon i monia soaḷ adí tatua.

¹⁸Bo intau mita inta nokodongog kon ouman in gombala mita tatua nongoherang.

¹⁹Táe ouman tatua sinagú mako i Maria kon bonu in ginanea bo umuran kon bonu in raiannea.

²⁰Onda intua nobuidon in gombala mita tatua sindaḷan modayow bo moduí kon i Allah sin onu inta ain inontong bo dinongog monia tua notongkai inta ain pinoguman in malaekat kon i monia.

²¹Naonda in umurdon waḷu nosinggai, Adí tatua sinunat. Bo sinangoian monia ki Yesus, tangoi inta pinoki ponangoi in malaekat kon i-Nia wakutu in diápa kon bonu in sian i iná-Nea.

²²Bo naonda in notompodon wakutunea pondaritan podudui in hukum i Musa, ki Yesus in dinia monia kon Yerusalem sin posarakan kon i Tuhan.

²³Sin oyúon pinais kon bonu in hukum i Tuhan, nanaa, “Komintan adí ḷoḷaki guya-guyang mustibí posarakan kon i Tuhan.”

²⁴Mosia in makusud doman mobogoi in ḷagapan tarangkuku topar andeka paḷoma doyowa inta nongoguodpa mobaḻí kuruban ná inta ain sinantú kon Hukum i Tuhan.

²⁵Kon wakutu intua, kon Yerusalem oyúon intau tangoinea ki Simeon. Sia naa intau mopia bo inta umuran dinumudui kon parenta i Tuhan, bo sia in mogoḷat doman mako kon koangoian in mopoposaḷamat kon Israel. Sia naa in umuran kinawasa in Roho i Allah.

²⁶Roho i Allah ain noguman muna kon inia kon sia in diápabí matoi aka diápa mokoontong kon Datu Mopoposaḷamat inta pinodandi i Tuhan.

²⁷Singgai intua sia dinia in Roho i Allah minayá sinumuot kon Baḷoi Tuhan. Naonda in ki Yusup bo ki Maria nodia kon i Yesus inta mointokpa tua kon Baḷoi Tuhan sin pogaidan kon onu inta ain sinantú in hukum agama.

²⁸Indoianmai ginamáneabí in ki Yesus bo kinoyotan poḷat nodayow kon i Allah, kai-nia,

²⁹“Tanaa mako Tuhan, aindon inaidan-Mu onu inta pinodandi-Mu. Tuamain pomayádon mako in bobantung-Mu naa matoi takin pia in gina.

³⁰Sin mataku tontaní inta ain nokoontong kon mopoposaḷamat inta nongkon ini-Mu.

³¹Sia in sinadia-Mu kon bayongan in intau:

³²sia naonda bo bayag inta nonimbayag kon daḷan in intau mita ibanea, sinbá mosia in mamangoi kon ini-Mu; tuata in bayag inta mobaḻí dodoyonan poduían kon umat-Mu Israel.”

³³Ki iná bo ki amá-Nea noherang totok in nokodongog kon onu in siningog i Simeon kon Adí tatua.

³⁴Ki Simeon nomarakat kon i monia bo noguman kon i Maria ki iná in Adí tatua, “Adí tanaa aindon piniḻí i Allah sin momutú bo moposaḷamat kon moantó intau Israel. Sia in mobaḻí tanda nongkon i Allah, inta bayowan in moantó intau,

³⁵bo iko Maria in mokorasa naonda bo tura-turakon in pitow, táe Adí tanaa in mobuká kon onu inta noibuni kon gina in intau moantó.”

³⁶Kon tua oyúon doman in nabi bobay inta ain nogoguyang totok. Ki Hana in tangoinea, ki adí i Panuel, nongkon suku in Asyer. Pitu notaong sia nobiag noyotakin i buḷoinea,

³⁷táe tanaa sia dongkadon boba-bobay, bo umurnea aindon waḷu nopuḷú boopat notaong.[2] Sia umuranbí mamangoi in Baḷoi Tuhan. Doḷom bo singgai sia mogaid kon onu inta kino ibog i Tuhan, sia in mosambayang bo mopuasa.

³⁸Bo kon dodai intua sia in namangoi doman, bo nodayow kon i Allah bo noginsilang kon intau mita inta mogoḷat mako kon wakutu koangoian i Tuhan moposaḷamat kon Yerusalem. Pinogumannea mongo ki ine in Adí tatua.

³⁹Naonda in nodait inaidan i Yusup bo i Maria onu inta pinarenta kon hukum i Tuhan, mosia in nobuidon kon Nazaret kon Galilea.

⁴⁰Adí tatua nodugangdon in koḷoben bo koropot-Nea. Sia mobijaksana totok bo totok doman kinotabi i Allah.

⁴¹Pomuḷoi in taong guyanga i Yesus mayámai in Yerusalem sin porayaan kon singgai moḷoben Paska.

⁴²Bo naonda in ki Yesus umurdon mopuḷú bodoyowá notaong, mosia in minayá in Yerusalem moraya kon singgai in Paska, ná biasamai.

⁴³Naonda in nopaḷutdon pinorayaan tatua, mosia nobuidon, táe ki Yesus in kon Yerusalempabí bo diá kinotaauan i iná bo i amá-Nea.

⁴⁴Kai monia kamai Sia in noitakinbí kon yua-yuak in intau mita inta topobayáan monia tua. Bambí tosinggaidon kon binayáan monia bo mulaidon sinayak monia in Sia kon sigad in ginaḷum mita monia bo kon bayongan in intau inta nogogintaauan monia.

⁴⁵Táe diá noyodungkuḷ monia, dá mosia in nobui kon Yerusalem bo notayak kon i-Nia.

⁴⁶Naonda in toḷudon nosinggai in pinotayakan monia, indoianmai monia yo kon bonubí in Baḷoi Tuhan in Sia. Sia ḻimitú mako kon yua-yuak in mototundú mita kon agama bo mokidongog mako kon potundúan monia bo poḷat doman in Sia mopoḻibó-ḻibó kon i monia.

⁴⁷Komintan intau inta mokodongog in mongoherang sin totok mopandoi in Sia motubag kon onu in ḻibóon.

⁴⁸Natua doman in guyanga-Nea. Totok doman noherang in nokoontong kon i-Nia. Dá ki iná-Nea in noguman nanaa kon i-Nia, “Uḻe, nongonu inaidan-Mubí in nanaa kon inami? Noḻia-ḻiawdon totok in gina naminda i amá-Mu in notayak kon ini-Mu!”

⁴⁹Táe ki Yesus notubag, “Nongonu sin ki amá bo ki iná in motayakbí kon i-Nakó? Eta degá diábí kinotaauan i amá bo i iná kon Akuoi in mustibí oyúon kon bonu in Baḷoi i Amá-Ku?”

⁵⁰Táe diá kinomangaḻean monia in singog i Yesus tatua.

⁵¹Onda intua ki Yesus nobuidon kon Nazaret noyotakin monia bo umuran dinumudui kon parenta in guyanga-Nea. Bayongan inta ain nobaḻí umuran sinagú i Maria kon bonu in ginanea.

⁵²Kodugang-kodugangdon in koḷoben bo kopandoi i Yesus, bo Sia in umuran kinotabi i Allah bo kinoibog in bayongan intau.