Read Mongondow LUKAS 22 Bible Online

LUKAS 22 - Mongondow bible

LUKAS 22

¹Kon singgai moḷoben Roti Diá in ragi inta sinangoi Paska nodiugdon.

²Imang mita itoi bo mototundú mita kon agama norai mongo naonda in poḷoḻimod monia kon i Yesus, táe umuni-uni sin moondok kon intau moantó.

³Onda intua Ibilis ginumonú kon i Yudas inta dinonoi ki Iskariot, tobatú murí i Yesus inta kon sigad nayamopuḷú bodoyowá.

⁴Dá minayá in sia bo noyosingog takin imang mita itoi bo intau mita inta moḷoḷukad kon Baḷoi Tuhan. Sia nongonguman kon soaḷ naonda in daya moposarakan kon i Yesus kon i monia.

⁵Nopia totok in gina in intau mita tatua, dá dinandi monia kon ogoian monia in doit in sia.

⁶Ki Yudas in noibog, dá mulaidon in sia bo umuni-uni in motayak kon kasampatan moposarakan kon i Yesus kon i monia.

⁷Nodapotdon in singgai moḷoben Roti Diá in ragi, tuata in singgai inta porataan kon domba Paska.

⁸Dá ki Yesus in nopotabá kon i Petrus bo kon i Yohanes, “Bayádon bo posadiadon kon pongaanan naton kon singgai moḷoben Paska.”

⁹Dá taya dua noḻibó, “Kon onda in kon ibog i Pak Guru bayáan nami posadiaan?”

¹⁰Ki Yesus notubag, “Aka moiko tumuot kon tobatú kotá, yo moiko in moyodungkuḷ in tobatú ḷoḷaki inta nodia kon kendi kon bonu-bonu in tubig. Dudui kon inia modapot in baḷoi inta pongandupannea,

¹¹bo pogumandon kon i togi baḷoi tatua nanaa: Ki Pak Guru in nokiḻibó kon i tuang, ‘Kon onda in tampat inta motaau-Ku pongaanan takin murí-Ku mita kon singgai in Paska naa?’

¹²Yo tundúonbí i togi baḷoi tatua kon i namunda in tobatú yuang moḷoben kon ḻimonik. Kon tua aindon notouḷutdon in pakakatnea mita, dá sadiadon kon tua.”

¹³Onda intua minayádon in ki Petrus bo ki Yohanes. Kinobayáanmai monia komintanbí notongkai ná inta ain pinoguman i Yesus. Bo sinadiadon monia kon tua in pongaanan monia kon singgai in Paska.

¹⁴Naonda in wakutuneadon mongaan, ki Yesus in iḻimitú noyotakin in murí-Nea mita kon meja pongaanan.

¹⁵Bo Sia in noguman kon i monia, “Akuoi in moibogdon totok mokaan kon kaanon Paska tanaa moyotakin monimu wakutu in diápa mokorasa kon roriga in Akuoi!

¹⁶Sin muna-Kudon poguman kon i monimu: Akuoi in diá bidon mokaan bui kon kaanon tanaa modapot intua komintan poponiatadon i Allah kon dunia naa.”

¹⁷Onda intua binuat-Nea in palo pongonginuman kon anggur bo nosambayang nopoyaput in sukur kon i Allah. Nopaḷut mako Sia noguman, “Gamá in naa bo silai-silaidon mako;

¹⁸sinbá kotaauandon monimu: pinangkoidon kon tanaa mako, Akuoi in diá bidon bui monginum kon anggur tanaa modapot in ki Allah mamangoidon momarenta saḷaku Datu.”

¹⁹Onda intua ki Yesus in nogamá kon roti. Bo naonda in sinambayangan-Nea mako, binonsi-bonsig-Nea in roti tatua bo inogoi kon i monia poḷat noguman, “Naadon in awak-Ku [inta pinosarakan kon i monimu. Aidai doman in naa, saḷaku tanda kon moiko in umuran monorop kon i-Nakó.”

²⁰Natua doman, naonda in nopaḷut mako nongaan, Sia in nobogoi in palo pongonginuman kon anggur tatua kon i monia poḷat noguman, “Pongonginuman tanaa in dodandian i Allah inta mobagu inta ain sinoḻiuan in dugú-Ku. Dugú inta ain pinobutak sin kopontingan monimu.”]

²¹“Táe indoiai! Intau inta momaḻidawan kon i-Nakó in naadon koyota-yotakin-Ku!

²²Adí Intau in totuubí kon matoi ná inta ain sinantú i Allah; táe moboditodon in intau inta momaḻidawan kon i-Nia!”

²³Dá mosia in nomangkoidon nosiḻibóan mongo ki ine in kon sigad monia tua in momia natua.

²⁴Bo nomukádon bobayowan kon sigad in murí mita i Yesus. Mosia in nobobayowan mongo ki ine in moḷobe-ḷoben kon sigad monia tua.

²⁵Nokodongogmai kon natua, ki Yesus in noguman kon i monia, “Mongongawasa kon dunia naa inta diá nonotaau kon i Allah, mondorot kon rayatnea, bo pongawasanea mita sinangoi, ‘Mogogoḻiung kon Rayat.’

²⁶Táe moiko in diábí motaau natua. Mustibí nanaa, intau inta totok in moḷoben kon sigad monimu in mustipabí mobaḻí ná inta totok mointok, bo itoi in mustibí mobaḻí naonda bo bobantung.

²⁷Ki ine degá in moḷobe-ḷoben: intau inta iḻimitú nongaan kon meja mongo intau inta nobantung kon inia? Tantú intaubí inta iḻimitú tatua. Táe Akuoi in kon sigad monimu naa in saḷakubí bobantung.

²⁸Kon bonu in roriga inta korasaan-Ku, moiko in umuran kotaki-takin-Ku.

²⁹Ná ki Amá ain nobogoi kon i-Nakó in hak momarenta, dá Akuoi in mobogoi in hak tatua kon i monimu.

³⁰Takin natua dá moiko in motaau doman mobarasanang takin-Ku kon wakutu in Akuoi in mobaḻí Datu. Bo moiko in ḻimitú kon ḻimonik in mopuḷú bodoyowá in tampat pomomarentaan sin momarenta kon mopuḷú bodoyowá nosuku in bangusa Israel.”

³¹“Simon, Simon, indongogai! Ibilis aindon inogoian in kasampatan monungkuḷ kon i monimu; ná gandum pinoyotontaní kon kuḻitnea, sahingga inta mopia in pinoyotontanídon kon inta moraat.

³²Táe iko Simon, aindon sinambayangan-Ku, sinbá motantú in pirisayamu. Bo aka iko mobuidon mangoi kon i-Nakó, yo mustimubí doman iropotanmu in gina in bayongan ginaḷummu.”

³³Táe ki Petrus in notubag kon i Yesus, “Tuhan, akuoi in diábí moondok in tumuot kon ponjara andeka matoi moyotakin i Tuhan!”

³⁴Dá ki Yesus in noguman, “Pirisayadon in singog-Ku Petrus! Diápa mokukú in manuk in singgai naa, iko in koyongandon kotoḷu in nomayow kon deemanbí murí-Ku.”

³⁵Nopaḷut mako nosingog kon tua, Sia in noguman kon i monia, “Tungkuḷ in pinotabá-Ku in moiko bo diá-Ku inogoi nodia kon dompet, botutu andeka sapatu, yo degá nokoimontanmai in moiko in kinodaitan in onu bo onu?” “Dia!” tubag monia.

³⁶Dá ki Yesus in noguman, “Yo tanaa mako in poguman-Ku, ki ine in kodompet andeka kobotutu yo mustibí dia; bo ki ine in diá kopitow, yo mustibí in sia mopotaḷui in jubahnea sin potaḷui kon pitow.

³⁷Sin pirisayadon in tontagá kon Buk Motusi inta noguman nanaa, ‘Sia in inanggap naonda bo intau moraat,’ mustibí mobaḻí kon i-Nakó. Sin onu inta pinais kon Buk Motusi soaḷ Akuoi, koyogot bidon mobaḻí in tanaa mako.”

³⁸Dá murí-Nea mita in noguman, “Tuhan, indoiaika, doyowadon pitow in kon naa.” Dá kai Yesus doman, “Mobaḻídon nion.”[28]

³⁹Ki Yesus in iḷumuai kon kotá bo minayá in tampat inta biasamai bayáan-Nea kon buḷud in Zaitun. Murí-Nea mita minayá doman takin-Nea.

⁴⁰Naonda in noiyaputdon kon tua, Sia in noguman kon i monia nanaa, “Posambayangdon, sinbá moiko in diá moitaḷá aka koangoian in sobaan.”

⁴¹Onda intua Sia iyumayú topiḻik kon murí-Nea mita tatua, degá topogaraban batu in koyayúnea, bodongka sinumungkud bo nosambayang.

⁴²Nanaa in sambayang-Nea, “Amá, aka motaau, yo poyayúdon kon i-Nakó in roriga tanaa inta musti kobayáan-Ku. Táe deemanbí podudui in ibog-Ku, poduduibí kon ibog i Amá tontaní.” [

⁴³Tobatú malaekat namangoi kon i-Nia bo noginropot kon gina-Nea.

⁴⁴Tantúdon moondok in Sia, dá umurandon in Sia mosambayang. Uḷat-Nea in naonda bo dugú motait kon butá.]

⁴⁵Nopaḷut mako nosambayang, nobuat in Sia bo minayá bui kon murí-Nea mita. Kinobayáan-Neamai, mosia in nosiug mako sin moajar totok in gina monia.

⁴⁶Bo Sia in noḻibó kon i monia, “Nongonu sin mosiugbí in moiko? Pobangondon bo posambayang sinbá diá kotugatan sobaan in moiko.”

⁴⁷Koyogotpa in ki Yesus monongginamai kon murí-Nea mita tatua, namangoidon in intau tokawang, inta dinia i Yudas tobatú murí i Yesus tua. Noiyaputmai kon tua, ki Yudas baḷú minayá kon i Yesus bo nongayok.

⁴⁸Táe ki Yesus in noguman kon inia, “Yudas, degá ayokmu bidon tanaa in mobaḻí tanda kon iko in nomaḻidawandon kon i Adí Intau?”

⁴⁹Naonda in murí mita i Yesus nokoontong kon onu inta nobaḻí tatua, mosia in noḻibó, “Tuhan, tokosibatondon nami in pitow in mosia naa!”

⁵⁰Bo tobatú intau kon sigad monia tatua in nonibat kon tobatú bobantung i imang moḷoben, dá nopongkó in bongoḷannea.

⁵¹Táe ki Yesus in noguman, “Donaaidon!” Bo kinadaian-Neadon in bongoḷan in intau tatua bo inundaman.

⁵²Onda intua, ki Yesus in noguman kon imang mita itoi bo tontara mita inta moḷoḷukad kon Baḷoi Tuhan, takin itoi mita in Yahudi inta namangoi kon i-Nia sin modomok, kai-Nia, “Degá kai monimu kamai Akuoi naa in intaubí moraat, sin moiko in sidiabí mita in pitow bo bobobak in mamangoi modomok kon i-Nakó?

⁵³Pomuḷoi in singgai Akuoi umuran kon yua-yuak monimu kon bonu in Baḷoi Tuhan, táe diábí domokon monimu. Táe naa in wakutudon monimu sin kinawasadon in Ibilis in moiko.”

⁵⁴Ki Yesus in dinomok monia bo dinia pinobayá in baḷoi i imang moḷoben. Ki Petrus in dumuduianmai kon i monia, táe nongkon moyayú.

⁵⁵Kon palas in baḷoi imang moḷoben tatua, intau mita nonontuḷú bo iḻimitú iḻimibu kon tuḷu tatua. Ki Petrus in minayá doman bo dinumugang kon i monia.

⁵⁶Bobantung bobay in nokoontong kon i Petrus iḻimitú kon bingkí in tuḷu tatua bo umuran sinaridiannea mangoi. Onda intua bobantung tatua in noguman, “Iko doman inta umuran moyotakinmai i Yesus!”

⁵⁷Táe binayowan i Petrus kainia, “Beresibí diá nokanalku in intau tatua!”

⁵⁸Diá noonggot kon tua, tobatú doman intau in nokoontong kon i Petrus bo noguman nanaa, “Iko doman tobatú nongkon i monia ma!” Táe ki Petrus in notubag, “Diábí, deemanbí akuoi!”

⁵⁹Degá tongojammai nongkon tua, tobatú doman in intau nopobaḷú kon i Petrus nanaa, “Totuu uḻe, intau doman tanion in dumodudui i Yesus, sin sia intau doman in Galilea!”

⁶⁰Táe ki Petrus in notubag doman nanaa, “Diábí kinomangaḻeanku in makusud in singogmu tanion!” Bo kon dodaipa doman tatua, kon wakutu in ki Petrus yogot nosingog kon tua, dinongogmai manuk in nokukúdon.

⁶¹Ki Yesus baḷú nobobui kon i Petrus dá baḷú bo doman kinotoropannea in onu inta ain pinoguman i Yesus kon inia nanaa, “Kon wakutu in diápa mokukú in manuk singgai naa, iko aindon koyongan kotoḷu momayow kon iko in deemanbí murí-Ku.”

⁶²Bo iḷumuaidon in ki Petrus nongkon tua bo nongombaḷ mopoina-inak.

⁶³Intau mita inta noḷukad kon i Yesus nopoyambá kon i-Nia bo poḷat nomongkug.

⁶⁴Inoḻingoian monia in daing mata-Nea bo pinoḻibóan nanaa, “Pogumanka mongo ki ine in nomongkug kon ini-Mu?”

⁶⁵Bo noyagi-yagipa doman in siningog monia inta poningkuḻe kon i-Nia.

⁶⁶Bo naonda in doḷom-doḷomdon, nosipundon in guhanga mita in ḻipu intau Yahudi, imang mita itoi bo mototundú mita kon agama, bo nodia kon i Yesus pinotayow kon sidang agama.

⁶⁷Mosia in noguman kon i-Nia nanaa, “Pogumanka kon inami mongo Iko inta Datu Mopoposaḷamat?” Dá ki Yesus in notubag, “Umpakabí poguman-Ku kon inimu, táe moiko in umuranbí doman diá mopirisaya.

⁶⁸Bo umpakabí oyúon in ḻibóon-Ku kon inimu, yo doíbí doman moiko motubag.

⁶⁹Táe bá poguman-Kudon kon i monimu, kon tanaa mako, ki Adí Intau in ḻimitú bidon mako kon dotá in koḷanan[29] i Allah Inta Mokawasa.”

⁷⁰Dá mosia komintan in noḻibó nanaa, “Aka natua, yo Iko naa in ki Adí i Allah?” Ki Yesus in notubag, “Moiko bidon tontaní in noguman kon Akuoi naa ki Adí i Allah.”

⁷¹Dá nosingog in mosia komintan, “Diá bidon paraḷu in kita motayak kon sakusi ibanea, sin dinongogdon naton tontaní onu in pinoguman-Nea!”