Read Mongondow LUKAS 23 Bible Online

LUKAS 23 - Mongondow bible

LUKAS 23

¹Bo sinimindogdon in intau mita kon tua bo nodia kon i Yesus pinobayá kon tayowon i Pilatus.

²Kon tua in mosia mulaidon bo moponapud in tosingogon diá totuu kon i-Nia. Mosia in noguman, “Kinokadapatandon nami intau tanaa in notundú kon diá totuu kon intau moantó. Bo bayongan intau in daiton-Nea pongaruon sinbá doí moguboḻi kon pajak kon i Kaisar, sin kai-Nia Sia in tobatú Datu Mopoposaḷamat.”

³Dá ki Pilatus in noḻibó kon i Yesus, “Degá totuu kon Iko in Datu in intau Yahudi?” Tubag i Yesus, “Ikodon tontaní in noguman.”

⁴Dá ki Pilatus in nogumandon kon imang mita itoi bo intau mita inta kon tua, “Intau tanaa in diábí kinouḻíanku kon taḷá tobatúmai inta motaau baḻíonku dodoyonan pohukuman kon i-Nia.”

⁵Táe tantú domandon monia ḷongasion kon bá hukumon in Sia, mosia in noguman, “Totundú-Nea mita totok in mokopongaru kon bayongan intau in Yudea. Pinangkoipamai kon Galilea bo tanaa nodapotdon kon naa.”

⁶Naonda in ki Pilatus nokodongog kon singog monia tatua, sia in noḻibó kon i monia, “Degá Sia naa intau in Galilea?”

⁷Naonda in kinotaauanneadon kon ki Yesus intaubí nongkon wilayah i Herodes, baḷunea bo pinoki dia in Sia minayá kon i Herodes. Wakutu intua ki Herodes kon Yerusalem doman.

⁸Nopia totok in gina i Herodes in nokoontong mako kon i Yesus. Sin noonggotdon in sia in nokodongog kon ouman soaḷ ki Yesus bo moibogdon totok in sia moyodungkuḷ-Nea.

⁹Tuamai onda in noyodungkuḷ totoknea in pinoḻibo-ḻibóanmai in Sia, táe diá tobatúmai in sinubagan i Yesus.

¹⁰Imang mita itoi bo mototundú mita kon agama minayá doman sinumayow kon tua bo totok in noponapud kon i Yesus in tosingogon uboḷ.

¹¹Ki Herodes bo tontaranea mita nopoyambá bo noningkuḻe kon i Yesus. Pinopopakéan monia in ḷambung Datu in Sia, onda intua pinoki dia bui monia minayá kon i Pilatus.

¹²Kon singgaipa doman intua ki Herodes bo ki Pilatus noyobayatdon bui, bokaka noonggotdon in taya dua tua in nosisaturuan.

¹³Ki Pilatus in nosipun kon imang mita itoi, bo itoi mita intau in Yahudi, bo rayat,

¹⁴bodongka noguman kon i monia, “Moiko in nodia mangoi kon intau tanaa kon inakó poḷat noguman kon intau tanaa aindon notundú kon mokopoḷangkam kon bayongan intau. Tanaa ain pinirikisaku in Sia kon tayowon monimu tontaní, táe diábí in tobatúmai in nouḻíku oaid moraat inta ná pinonapud monimu kon i-Nia.

¹⁵Natua doman in kai Herodes, tuamai pinoki dianeadon bui mangoi kon i nami in Sia. Intau tanaa in diábí nogaid kon tobatúmai in soaḷ inta motaau baḻíon dodoyonan pohukuman kon i-Nia modapot in matoi.

¹⁶Tuamai in sambokonkudon in Sia bodongka buḻian.” [

¹⁷Kon pomuḷoi in singgai porayaan kon Paska, ki Pilatus musti momuḻi kon tobatú intau inta pinonjara bo posarakan kon intau moantó.]

¹⁸Bayongan in intau inta nosipun kon tua umuran momaḷú, “Ḻimodon in Sia, bo poḷuaidon in ki Barabas kon inami!” (

¹⁹Ki Barabas naa in pinonjara popisí in pinomarontakan bo popisí doman in pinoḻimodan.)

²⁰Ki Pilatus in moibog mopobebas kon i Yesus, tuamai in iḻibónea bui kon intau moantó kon tua.

²¹Táe mosia in umuran doman momaḷú, “Popopakúdon in Sia kon kayu pinoyotaḻempang!”

²²Bo kon intoḷuneadon in ki Pilatus noḻibó kon i monia, “Táe onubí in taḷá-Nea? Akuoi in diábí nokouḻí kon taḷá-Nea tobatúpamai inta motaau baḻíon dodoyonan pohukuman kon i-Nia dapot in matoi! Akuoi in mosambokdon kon i-Nia, bodongka pobebason in Sia.”

²³Táe umuran doman momaḷú in mosia sinbá ki Yesus in popopakúdon kon kayu pinoyotaḻempang. Dá pangabisannea dinuduiandon i Pilatus in ibog monia tua.

²⁴Ki Pilatus in nopoḷabúdon in hukuman matoi kon i Yesus ná inta ibog in intau mita tatua,

²⁵bo pinobebasneadon in intau inta inigum monia. Tobatú intau inta pinonjara popisí in pinomarontakan bo pinoḻimodan. Onda intua ki Yesus in pinosarakanneadon kon i monia sin aidanmai podudui in ibog intau mita tatua.

²⁶Dá ki Yesus in diniadon monia. Kon daḷan mosia noyodungkuḷ in tobatú intau, tangoinea in ki Simon. Sia in nongkon ḻipú in Kirene bo mopobayá in kotá tatua. Dinomok monia in sia bo pinakisa pinoki potaanan in kayu pinoyotaḻempang bo dumuduianmai kon tumi i Yesus.

²⁷Mobarong totok in intau in dumuduianmai kon i Yesus — kon sigad monia tua oyúon doman in tongonumai in bobay. Bobay mita tatua in umuran mongombaḷ bo mogamui kon i Yesus.

²⁸Táe ki Yesus nobobui kon i monia bo noguman, “Uḻe bobay mita in Yerusalem! Donaaidon ombaḷan in Akuoi, ombaḷaidon in awak monimu tontaní bo ki adí mita monimu.

²⁹Sin moiangoibí in wakutunea intau in mosingog nanaa, ‘Totuu kon mopia totok in bobay mita inta diá dodai onda in nononggadí bo inta diá doman dodai onda in nopoteté!’

³⁰Kon wakutu intua intau mita in moguman kon buḷud mita naa, ‘Dantugaidon monag in inami naa!’ Bo kon tombuḷud mita, ‘Bumbunaidon mangoi in kami naa!’

³¹Sin aka kayupa inta nobiag tatua, pomiaandon in intau ná tanaa, yo bambíkabí kayu inta noingkagdon! Onudon in pomiaan monia?”

³²Kon tua oyúon doman in doyowa intau. Taya dua tua tumpaḷa intau moraat inta dinia doman monia sin hukumon dapot in motoi poyotakinon i Yesus.

³³Naonda in noidapotdon kon tampat inta sinangoian “Ḷungkaká”. pinopopakúdon monia kon kayu pinoyotaḻempang in ki Yesus takin intau moraat doyowa tua. Tobatú in kon dotá in koḷanan bo tobatú in kon dotá in koḷoigi i Yesus.

³⁴Bo ki Yesus in nosambayang, “Amá ampungaidon in mosia sin diábí kinotaauan monia onu inaidan monia naa.” Onda intua, pakeang i Yesus sinilaidon monia kon tua táe munapa inundi.[30]

³⁵Intau mita in sinimindog mako kon tua bo moindoimai. Itoi mita intau Yahudi umuran morebeg kon i-Nia takin mosingog, “Sia ain noposaḷamat kon intau ibanea; diábí bo tungkuḷan-Nea in tanaa mako bo posaḷamaton in awak-Nea tontaní aka totu-totuubí kon Sia in Datu Mopoposaḷamat inta piniḻí i Allah!”

³⁶Tontara mita in namangoi doman bo moporupa-rupamai kon i-Nia. Inogoian monia in anggur noboil in Sia, poḷat noguman,

³⁷“Aka Iko Datu Intau Yahudi, yo posaḷamatdon in awak-Mu tontaní!”

³⁸Kon uḷuanmai i Yesus pinaisan nanaa, “Naadon in Datu Intau Yahudi.”

³⁹Tobatú intau moraat inta pinopopakú kon kayu pinoyotaḻempang kon tua, norebeg doman kon i Yesus, kai-nia, “Iko in Datu Mopoposaḷamat, toh? Yo posaḷamatkadon in awak-Mu bo kami naa!”

⁴⁰Táe intau moraat tobatú in sinumorú kon yobayatnea tatua, kainia, “Diá degá iko moondok kon i Allah? Iko in hukumon doman matoi ná Sia.

⁴¹Tongá aka hukuman kon i natonda in patusbí tarimaan podudui in oaid naton, táe Sia naa in totokbí in diá kotaḷá!”

⁴²Nosingog mako natua, sia in noguman kon i Yesus, “Yesus, toropdon in akuoi aka iko in mamangoidon saḷaku Datu!”

⁴³Dá kai Yesus doman, “Popirisayadon! Singgaipa doman in tanaa iko in moyotakin-Kudon kon Pirdaus.”

⁴⁴Degá jamdon mopuḷú bodoyowá noutu in singgai, mata in singgai diádon nonindar, bo bayongan in ḻipu kon tua sinimindipdon dapot in jam intoḷunea ḷoḷabungnea.

⁴⁵Bo kon dodai doman intua gorden kon Baḷoi Tuhan nobisik nosilai doyowa.

⁴⁶Bo ki Yesus in nomaḷú noropot totok, kai-Nia, “Amá! Kon bonu in kawasa-Mu, posarakan-Kudon in nyawa-Ku.” Nosingog mako natua in Sia minatoidon.

⁴⁷Naonda in itoi in tontara nokoontong kon onu inta ain nobaḻí tatua, sia nodayow kon i Allah, kainia, “Totuu, Sia naa in diábí kotaḷá!”

⁴⁸Intau moantó inta namangoi kon tua sin moindoi, nokoontong domandon kon onu inta nobaḻí. Mosia komintan in nobui takin nomanasaḷ totok.

⁴⁹Bo bayongan intau inta nogogintaauan mita i Yesus, noitakin doman in bobay mita inta dinumudui kon i-Nia nongkon Galilea, sinimindog nongkon moyayú bo noindoi kon bayongan inta ain nobaḻí.

⁵⁰Oyúon tobatú intau, ki Yusup in tangoinea. Sia in nongkon kotá in Arimatea kon butá in Yudea. Sia tua in intau mopia bo mobanar inta umuran mogoḷat mako kon wakutu koangoian i Allah momarenta saḷaku Datu. Umpakabí in sia tobatú Mahkama Agama, táe sia naa in diábí nosotuju kon kaputusan bo gogutú in mahkama agama ibanea tua.

⁵¹

⁵²Sia in minayá kon tayowon i Pilatus bo noigum kon mayat i Yesus.

⁵³Naonda intua, pinoponagneadon in mayat i Yesus bo binakutnea in daing inta totok in moaḷus bo inta totok in nomahaḷ. Nopaḷut mako kon tua inuḻidnea kon bonu in poḷoḷobongan inta pinomia kon bonu in buḷud batu. Poḷoḷobongan tatua in diápa kon dodai onda in pinaké pinoḷobongan.

⁵⁴Singgai tua, singgai in Jumaat; singgai Sabat in diádon moonggot.

⁵⁵Bobay mita inta namangoi noyotakin i Yesus nongkon Galilea, dinumudui noindoi kon poḷoḷobongan tatua poḷat nonarukiramai mongo inuḻid naonda in mayat-Nea tatua.

⁵⁶Onda intua, nobui in mosia bo nosadia kon toyokayu mita inta biasamai pakéon pomondu kon mayat. Mosia in nosadia doman kon ḷana mobondu sin poḷana kon mayat i Yesus. Kon singgai in Sabat mosia in nogogai nogaid podudui in hukum agama.