Read Mongondow LUKAS 24 Bible Online

LUKAS 24 - Mongondow bible

LUKAS 24

¹Táe kon singgai in Diminggu modiugpa mobayag, bobay mita tatua minayá in poḷoḷobongan bo nodia kon toyokayu mita inta aindon sinadia monia.

²Bo naonda in noiyaputmai kon poḷoḷobongan, indoianmai monia batu inta pinoḻingkop noḻitoidon.

³Bo mosia in sinumuot kon bonu in poḷoḷobongan tatua, táe diádon nouḻí monia in mayat i Tuhan Yesus.

⁴Sinimindogpa mako in mosia sin moporai-raimai kon soaḷ tatua, daḻíbí bo noisindogbí magí kon diug monia in intau doyowa inta nogiḷambung nobudó mopouḻi-uḻinag.

⁵Mosia in totok inagían in ondok, bo sinumungkud dapot in butá, táe intau doyowa tatua in noguman kon i monia, “Nongonu sin moiko in motayakbí kon intau inta nobiagdon kon sigad in intau minatoi?

⁶Sia in diábí kon naa. Sia aindon nobiag! Toropdon onu inta ain pinoguman-Nea kon i monimu kon tungkuḷ in Sia kon Galileapa,

⁷kon ‘Adí Intau in musti posarakan kon intau mita baradosa, bo popopakú kon kayu pinoyotaḻempang, táe kon singgai intoḷunea Sia in mobiag bui.’ ”

⁸Dá kinotoropandon monia in singog i Yesus tatua.

⁹Bo naonda in mosia nobuidon nongkon poḷoḷobongan tatua, inouman mita monia in bayongan inta ain nobaḻí tatua kon murí-Nea inta mopuḷú bo mita bo kon bayongan in dumodudui Yesus ibanea.

¹⁰Tangoi in bobay mita inta nopotaau kon dumodudui i Yesus mita tua in ki Maria Magdalena, ki Yohana bo ki Maria inta ki iná i Yakobus bo bobay doman mita ibanea inta noyotakin monia.

¹¹Táe rasuḷ mita inta pinogumanan monia in diá mopirisaya, sin irai monia kon bobay mita tatua in nongongumanbí kon inta diá totuu.

¹²Táe umpaka natua, ki Petrus in bango-bangon bo noribatuk minayá noindoi kon poḷoḷobongan tatua. Naonda in sia iḷumongow monag kon bonu in poḷoḷobongan tatua, dongkadon pusi inta pinobakut kon i Yesus in inontongnea. Ki Petrus in noherang totok bo nobui sindaḷan morai kon soaḷ onu inta ain nobaḻí.[31]

¹³Kon singgai doman tatua, dumodudui Yesus doyowa minayá in tobatú ḻipú inta tangoinea in Emaus, mopuḷúmai nokilo degá in koyayúnea aka nongkon Yerusalem.

¹⁴Kon daḷan mosia sindaḷan mongonguman kon bayongan inta bagupa nobaḻí tua.

¹⁵Koyogot in mosia mongonguman bo mopomiki-mikirmai kon soaḷ inta bagu nobaḻí tua, ki Yesus namangoi bo dinimiug kon i monia bo minayá doman noyotakin monia.

¹⁶Táe ná oyúon in noiḷamboi kon mata monia, sahingga in diá kinotaauan monia mongo ki ine in Sia.

¹⁷Bo ki Yesus in noḻibó kon i monia, “Onubí in sindaḷan monimu oumanon naa kon daḷan?” Mosia in baḷú sinumogon takin moajar in gina.

¹⁸Bo tobatú nongkon i monia inta tangoinea ki Kleopas noḻibó kon i Yesus nanaa, “Degá bodongka bidon ki Amá in intau kon ḷuai in Yerusalem naa inta diá nonotaau kon bayongan inta bagu nobaḻí tumimai naa?”

¹⁹Dá ki Yesus in noḻibó doman, “Onu intua?” Tubag monia doman, “Soaḷ inta nobaḻí kon i Yesus intau in Nazaret tua. Sia tua in tobatúbí nabi. Singog bo oaid-Nea mita totokbí in mokawasa — pinomayá kon mata i Allah andeka kon mata in bayongan intau.

²⁰Táe Sia tua in pinosarakan in imang mita itoi bo in itoi mita nami sin hukumon dapot matoi. Bo pinopopakú monia in Sia kon kayu pinoyotaḻempang!

²¹Bokaka aindon i harap mako nami kon Siabí tua inta mamangoi bo moposaḷamat kon Israel. Singgai naa in singgaidon kon intoḷunea nongkon kinobaḻian intua komintan.

²²Apapa doman oyúon in bobay mita inta noyotakinmai nami in nodia kon habar inta nokotaḻikokog kon inami. Modiugpa mobayag, mosia minayádon in poḷoḷobongan,

²³táe noiyaputmai diádon inontong monia in mayat-Nea kon tua. Bo nobui in mosia bo noguman kon nokoontong kon malaekat mita kon poḷoḷobongan tatua. Malaekat mita tatua in noguman kon ki Yesus in buidon nobiag kon sigad in intau minatoi.

²⁴Tongonumai in yobayat nami in minayá in poḷoḷobongan bo nouḻí magí onu inta ain inouman in bobay mita tatua in naanta totuubí mita, tongá mosia in diá nokoontong kon i Yesus.”

²⁵Bo ki Yesus in noguman kon i monia, “Moiko nion in totuubí kon bodok! Moḷaḷoi totok in pororai monimu kon onu inta ain pinoguman in nabi mita!

²⁶Degá diábí kinotaauan monimu kon Datu Mopoposaḷamat in mustibí muna mokorasa kon roriga sinbá mokouḻí kon kamuliaan-Nea?”

²⁷Onda intua nodait-Nea ininsilangan kon i monia in bayongan onu inta pinais kon Buk Motusi soaḷ Sia. Pinangkoi kon inta pinais i Musa nodapot in buk in nabi mita.

²⁸Mosia kodiug-kodiugdon kon ḻipú inta bayáan monia. Ki Yesus ki ubo-uboḷmai tumurus mayá,

²⁹táe sinahangdon monia in Sia, takin noguman, “Pongandupa kon tampat nami naa sin aindon modoḷom.” Dá nongandupdon in Sia bo nogogai takin monia kon tua.

³⁰Kon wakutu in ḻimitúdon mongaan moyotakin monia, ki Yesus in nogamá kon roti, bo nopoyaput in sukur kon i Allah poḷat nomonsi-monsig kon roti tatua, bo inogoi kon i monia.

³¹Kon dodaipa doman intua bo kinotaauandon monia kon ki Yesusbí inta kotaki-takin monia tua.

³²Bo mulaidon mosigumanan in mosia, kai monia, “Tuamai porasaan naton ná bí tumagab wakutu in Sia nongonguman naton kon daḷanpa, bo noginsilang kon bonu in Buk Motusi kon i naton?”

³³Kon dodaipa doman tua mosia nobuat bo nobui kon Yerusalem. Kon tua mosia in noyodungkuḷ in murí-Nea mopuḷú bomitá inta noyosipun takin dumodudui-Nea mita ibanea.

³⁴Noiyaputmai kon tua mosia in noguman nanaa, “Totuubí kon ki Tuhan aindon nobiag bui! Sia ain nokipogontong kon i Simon!”

³⁵Dumodudui i Yesus doyowa inta bagu namangoi tatua nongonguman doman kon onu inta ain nobaḻí kon i monia wakutu in mosia kon binayáanpa, bo kon naonda in kinototaau monia kon ki Tuhanbí intua kon dodai in Sia nomonsi-monsig kon roti.

³⁶Koyogotpa in mosia nongonguman kon bayongan inta ain nobaḻí tatua, indoianmai yo noisindogbí magí in ki Yesus kon yua-yuak monia bo noguman kon i monia, “Dodamean umuran kotaki-takin monimu!”[32]

³⁷Mosia in nongoitaḻikokog bo noondok sin kai monia kamai dimbuḷóbí in inontong monia tua.

³⁸Táe ki Yesus in noguman, “Nongonu sin moondokbí in moiko bo diá mopirisaya?

³⁹Indoiaika in ḻima bo sioḷ-Ku. Akuoibí in naa! Kokapka bo tarukira in awak-Ku, sin dimbuḷó in diábí kotapu andeka kotuḷan, ná inta inontong monimu kon i-Nakó naa.”

⁴⁰Koyogot in Sia noguman natua, nopoontong doman in Sia in ḻima bo sioḷ-Nea kon i monia.[33]

⁴¹Bo kon dodai in mosia diápa basí mopirisaya, popisí in noiḻiudon pia in gina bo noherang, ki Yesus in noḻibó kon i monia, “Oyúon degá in kaanon kon i monimu naa?”

⁴²Mosia in nobogoi kon i-Nia in toyá ginoreng topongkó.

⁴³Ginamá i Yesus intua bo kinaan kon tayowonmai monia.

⁴⁴Onda intua Sia in noguman kon i monia, “Naadon in soaḷ mita inta ain pinoguman-Ku kon i monimu kon wakutu in kotaki-takinpa monimu in Akuoi: kon bayongan inta ain pinais soaḷ Akuoi kon bonu in buk i Musa bo buk in nabi mita, bo buk Mazmur, tua in mustibí mobaḻí.”

⁴⁵Onda intua ki Yesus nomukat kon raian monia sinbá komangaḻean monia in bayongan inta ain pinais kon Buk Motusi.

⁴⁶Bo Sia in noguman kon i monia, “Kon bonu in Buk Motusi pinais nanaa: Datu Mopoposaḷamat in musti mokorasa kon roriga, bo musti mobiag bui nongkon kinopatoian-Nea kon singgai intoḷunea.

⁴⁷Bo podoyon doman kon tangoi i Datu Mopoposaḷamat tatua mustibí popotaau kon bayongan in bangusa, kon intau in mustibí mogogai in mogaid kon inta diá mopia bo potaau doman kon ki Allah in mongampungbí kon bayongan dosa mita monia. Bo habar tatua in musti popotaau pangkoion kon Yerusalem.

⁴⁸Moikobí nion inta mobaḻí sakusi kon bayongan tua komintan.

⁴⁹Sin onu inta ain pinodandi i Amá kon i monimu, Akuoibí in mobogoi. Táe moiko in musti umuran mogoḷat kon kotá tanaa modapot ogoiandon i Allah in kawasa in moiko.”

⁵⁰Nopaḷut mako kon tua, ki Yesus nodia kon i monia minayá iḷumuai kon kotá nodapot in Betania. Kon tua Sia nobingkat kon ḻima-Nea bo nomarakat kon i monia.

⁵¹Koyogotpa in Sia nomarakat, indoianmai yo noibingkatdon in Sia minayá in soroga, bo[34] noitondídon in Sia kon i monia.

⁵²Baḷú in mosia sinumungkud bo nosumba kon i-Nia. Onda intua nobuidon mosia kon Yerusalem takin sanang gina,

⁵³bo umuran modayow kon i Allah kon Baḷoi Tuhan.