Read Mongondow LUKAS 3 Bible Online

LUKAS 3 - Mongondow bible

LUKAS 3

¹Kon taong impuḷú bo ḻima kon pinomarentaan i Kaisar Tiberius, wakutu in ki Pontius Pilatus nobaḻí gubernur kon butá in Yudea bo ki Herodes in datu kon Galilea, ki Pilipus ki utatnea in datu kon Iturea bo kon Trakhonitis, ki Lisanias in datu kon Abilene.

²Tungkuḷ intua imang moḷoben in ki Hanas bo ki Kayapas.[3] Kon taong tatuata ki Allah in nosingog takin nomaké kon i Yohanes inta ki adí i Zakharia. Ki Yohanes in namangoi nongkon padang gurun.

³Ki Yohanes minaya-mayá mako in bayongan ḻipú inta kon diugmai in Ongkag in Yordan bo nopobaḷú, “Pogogaidon in mogaid kon dosa mita bo pokibaptisdon sinbá ampungandon i Allah in bayongan taḷámu.”

⁴Soaḷ tatua naonda bo inta ain pinais kon bonu in buk i Nabi Yesaya nanaa: “Oyúon singog in intau inta mopobaḷú nongkon padang gurun, ‘Sadiadon in daḷan kon i Tuhan, tuḻidon in daḷan kon i-Nia.

⁵Toko bumbunai in ḻembong mita, bo pomuḷoi in buḷud bo inta notombuḷud in tokotondodaidon. Daḷan inta nongobelung tokotuḻidon, bo inta nongotontudu tokotondodaion.

⁶Sinbá komintan intau mokoontong kon i Allah moposaḷamat kon bayongan intau!’ ”

⁷Ki Yohanes in noguman kon bayongan intau inta namangoi nokibaptis kon inia nanaa, “Ei moiko intau moromú! Ki ine in noguman kon moiko in kotaḻiban in hukuman i Allah inta kon singgai moiduduimai naa?

⁸Pogumanku kon i monimu, Popoontongpa muna in oaid monimu mopia, saḷaku tanda kon moiko in totu-totuu bidon nogogai in nogaid kon inta diá mopia. Bo donaaipa muna moguman in moiko kon ki Abraham in ki amá nami! Sinbá pogumanku kosilangon kon i monimu, batu mita tanaa in motaaubí aidan i Allah ki adí mita i Abraham!

⁹Boḻiung aindon sinadia mako pomupuḷ kon pangkoi dapot in uakatnea mita. Pomuḷoi in pinomuḷa inta diá mopomungai in bungai inta mopia in toko-pupuḷonbí bo tubáan kon tuḷu.”

¹⁰Dá intau moantó kon tua in noḻibó kon inia nanaa, “Aka natua yo onu in musti aidan nami?”

¹¹Ki Yohanes in notubag, “Aka ki ine in koḷambung doyowa, yo musti in sia mobogoi in ḷambung tobatú kon intau inta diá koḷambung; ná doman tua, aka ki ine in oyúon in kaanon, yo ogoiaibí in intau inta diá kokaanon.”

¹²Wakutu intua oyúon doman in intau mita inta mononagi kon pajak in namangoi nokibaptis kon i Yohanes. Mosia in noḻibó, “Pak guru, onu in musti aidan nami?”

¹³Tubagnea kon i monia, “Donaai monagi moiḻiu kon onu inta ain sinantú kon i monimu.”

¹⁴Oyúon doman in tontara in noḻibó, “Yo aka kami, onu in aidan nami?” Tubag i Yohanes, “Donaai mogagow bo donaai momakisa kon intau poḷat moponapud in inta diá mita totuu. Pakédon in gajimu tontaní!”

¹⁵Kon wakutu intua intau mita nomangkoidon noḻibo-ḻibóan, degá ki Yohanes naa in Datu Mopoposaḷamat inta inoḷat mako monia.

¹⁶Tuamai in ki Yohanes noguman kon i monia komintan, nanaa, “Akuoi in Mopobaptis kon i monimu in tubig, táe moiangoibí in intau inta moḷobe-ḷoben nongkon inakó. Umpaka tongá mobuká kon togot in sapatunea yo diá kobaḻí in akuoi. Sia tua in mopobaptis kon i monimu in Roho i Allah bo tuḷu.

¹⁷Digu kokada-kadai-Neadon sin poguaban kon gandum dapot in modarit. Gandum inta nodaritdon tontaníon-Nea bo tagúon kon tampatnea, táe bayongan pangkoinea in tubáan-Nea kon bonu in tuḷu inta diá mopio-piong!”

¹⁸Norupa-rupamai in tonggina i Yohanes kon wakutu in sia nopoyaput in Habar Mopia.

¹⁹Tongá naonda in sia nonoboḷow kon i Herodes, datu in Galilea inta mongibog kon i buḷoi i utatnea ki Herodias, bo nonogur doman kon oaidnea mita ibanea inta diá mopia.

²⁰Tongábí nokodugang kon romú i Herodes nodapot in ki Yohanes pinobonunea kon ponjara.

²¹Naonda in nodaitdon binaptis in intau mobayong kon tua, ki Yesus namangoi doman nokibaptis. Koyogot in baptison, Sia nosambayang bo ḷangit nobukat,

²²bo Roho i Allah noponag kon i-Nia naonda bo ḷagapan paḷoma. Bo kinodongogandon in singog nongkon ḷangit noguman nanaa, “Iko in ki Adí-Ku inta kinotabi-Ku. Iko in kinoibog-Ku.”

²³Ki Yesus in nomangkoidon nogaid kon oaidan-Nea wakutu in Sia umurdon degá toḷu nopuḷú notaong. Kain intau Sia naa in ki adí i Yusup, inta ki adí i Eli,

²⁴ki adí i Matat, adí i Lewi, ki Lewi, ki adí i Malkhi, adí i Yanai inta ki adí i Yusup,

²⁵ki adí i Matica, ki adí i Amos, inta ki adí i Nahum, adí i Hesli, inta ki adí i Nagai,

²⁶ki adí i Maat, inta ki adí i Matica, inta ki adí i Simei, ki adí i Yosekh, ki adí i Yoda,

²⁷inta ki adí i Yohanan, ki adí i Resa, inta ki adí i Zerubabel, adí i Sealtiel, inta ki adí i Neri,

²⁸ki adí i Malkhi, ki adí i Adí, ki adí i Kosam, inta ki adí i Elmadam, ki adí i Er,

²⁹ki adí i Yesua, inta ki adí i Eleazer, ki adí i Yorin, ki adí i Matat, ki adí i Lewi,

³⁰inta ki adí i Simeon, ki adí i Yohuda, inta ki adí i Yusup, adí i Yonam, ki adí i Elyakim,

³¹inta ki adí i Melea, ki adí i Mina, inta ki adí i Matata, ki adí i Natan, ki adí i Daud,

³²ki adí i Isai, ki adí i Obed, ki adí i Boas, ki adí i Salmon, ki adí i Nahason,

³³inta ki adí i Aminadab, ki adí i Admin, inta ki adí i Arni, ki adí i Hezron, ki adí i Peres, ki adí i Yohuda,

³⁴inta ki adí i Yakub, ki adí i Ishak, ki adí i Abraham, inta ki adí i Terah, ki adí i Nahor,

³⁵ki adí i Serug, inta ki adí i Rehu, adí i Peleg, ki adí i Eber, inta ki adí i Salmon,

³⁶inta ki adí i Kenan, ki adí i Arpakhsad, ki adí i Sem, ki adí i Nuh, inta ki adí i Lamekh,

³⁷inta ki adí i Metusalah, ki adí i Henokh, ki adí i Yared, inta ki adí i Mahalaleel, ki adí i Kenan,

³⁸ki adí i Enos, inta ki adí i Set, ki adí i Adam, inta ki adí i Allah.