Read Mongondow LUKAS 6 Bible Online

LUKAS 6 - Mongondow bible

LUKAS 6

¹Kon singgai in Sabat tobatú, wakutu in ki Yesus bo murí-Nea mita noitaḻib kon gobá in gandum, murí-Nea mita nokoyut kon bungai in gandum. Sindaḷan monia inungkaan, bo poḷat kinaan.

²Oaid monia tatua in inontong intau mita in Parisi, dá mosia in noḻibó, “Nongonu sin moiko in nogaidbí kon inta pinoton aidan kon singgai in Sabat?”

³Dá ki Yesus in noguman nanaa kon i monia, “Degá diápa dodai onda in kinobacaan monimu onu inta inaidan i Daud wakutu in sia bo dumoduduinea mita ginogoy?

⁴Sia in sinumuot kon Baḷoi Tuhan bo nogamá kon roti inta ain pinosumba kon i Allah bo kinaannea. Onda intua roti tatua inogoinea doman kon dumoduduinea mita. Bokaka aka podudui in hukum agama naton yo roti tatua in tongábí imang mita in motaau mokaan.”

⁵Ki Yesus in noguman doman, “Adí Intau nongawasa kon singgai in Sabat!”

⁶Kon Sabat ibanea, ki Yesus in sinumuot in Baḷoi Pososambayangan bo notundúmai kon i monia kon tua. Kon tua oyúon doman tobatú intau inta ḻimanea tosimpaḷ minatoi.

⁷Mototundú mita kon agama bo intau in Parisi umuran mako motayak kon taḷá i Yesus sinbá oyúon in baḻíon monia dodoyonan popongaduan kon i-Nia. Tuamai in mosia umuran monaridi mako mongo ki Yesus mongundam kon intau aka singgai in Sabat.

⁸Táe raian monia tatua kinotaauan i Yesus, dá Sia in noguman kon intau inta ḻimanea tosimpaḷ minatoi tua, “Igai sindog kon muna naa!” Dá nobuat in sia, bo sinimindog kon tua.

⁹Onda intua ki Yesus in noḻibó kon intau mita kon tua, “Aka podudui in hukum agama naton, onu degá in motaau aidan aka singgai in Sabat? Mogaid kon mopia andeka mogaid kon inta moraat? Moposaḷamat kon intau andeka mopobodito?”

¹⁰Ki Yesus in nobobui magí-mako kon i monia komintan, onda intua Sia in noguman[6] kon intau tatua, “Tonggó in ḻimamu.” Bo sinonggónea in ḻimanea tatua, dá kon dodaipa doman tatua nopia in ḻimanea inta minatoi tatua.

¹¹Táe intau mita in Parisi bo mototundú mita kon agama sinumorú totok kon i Yesus, dá nomangkoidon in mosia noyosingog mongo onu in aidan monia kon i Yesus.

¹²Wakutu intua ki Yesus notakod kon buḷud sin mayá mosambayang. Sia in nosambayang kon tua tonggobiita.

¹³Naonda in nobayagdon, sia in nogoiní kon dumodudui-Nea mita bodongka nomiḻí kon intau mopuḷú bodoyowá nongkon i monia tua. Sinangoian-Nea rasuḷ in taya mopuḷú bodoyowá tua. Naa in tangoi mita monia tua:

¹⁴Ki Simon (inta dinonoi ki Petrus), bo ki Andreas ki utat i Simon; ki Yakobus bo ki Yohanes, ki Pilipus bo ki Bartolomeus,

¹⁵Ki Matius bo ki Tomas, ki Yakobus ki adí i Alpeus, bo ki Simon intau in Zelot,

¹⁶ki Yudas inta ki adí i Yakobus bo ki Yudas Iskariot inta nomaḻidawan kon i Yesus.

¹⁷Onda intua ki Yesus nosiḻig nongkon buḷud tatua takin rasul-Nea mita, bodongka sinumogon kon tampat inta notondodai. Kon tua nobarong doman in dumodudui-Nea mita ibanea bo intau mita inta namangoi nongkon ḻipú mita inta kon butá in Yudea, Yerusalem, bo kon kotá mita in Tirus bo Sidon inta kon bingkí in dagat.

¹⁸Mosia tua in namangoi sin mokidongog kon singog mita i Yesus, bo poḷat mokiundam in bayongan takit monia. Oyúon doman inta kinotoḷangan in dimukud moraat, mosia in nopia doman.

¹⁹Komintan intau in moḷongasi moḻiai kon i Yesus, sin oyúon in kawasa ḷumuai nongkon i-Nia inta mokopia kon i monia komintan.

²⁰Ki Yesus inimindoi kon dumodudui-Nea mita bo nosingog nanaa, “Pia in kamang in moiko, intau mita inta nobogá, sin moiko nion in umat i Allah!

²¹Pia in kamang in moiko inta ginogoy tanaa mako; sin moiko in ogoianbí in kaanon kobotugon! Pia in kamang in moiko inta tanaa mako nongombaḷ sin moiko in kumosingbí.

²²Pia in kamang in moiko aka moiko sinaturu, diá sinarima, siningkuḻe bo pinoponapudan doman in uboḷ, sin popisí in moiko dumodudui i Adí Intau!

²³Kosanang bo kopiadon in gina monimu aka tua komintan bo korasaan monimu, sin moḷoben in silaimu kon soroga; bo bá kotaauan monimu kon natua doman in pinopoaid in mogoguyang monia kon nabi mita tungkuḷ intua.

²⁴Táe koboditodon in moiko inta nobiag nooyúon in tanaa mako; sin moiko ain nokorasa kon inta mopia kon dunia naa!

²⁵Koboditodon in moiko inta nobotug in tanaa mako; sin moiko in koantuganbí doman in gogoy! Koboditodon in moiko inta kinumosing tanaa mako; sin oyúonbí in wakutu monimu mokorasa kon robonoḷ in dodob bo mongombaḷ!

²⁶Koboditodon in moiko aka komintan intau bo moduí kon inimu; sin natua doman in mogoguyang monia noduí kon nabi mita inta deeman totu-totuu nabi tungkuḷ intua.”

²⁷“Tanaa mako Akuoi in mobogoi in koyow kon i monimu inta moibog mokidongog kon i-Nakó: kotabibí in saturumu, bo pogaidbí kon inta mopia kon intau inta moyaat in gina kon inimu.

²⁸Barakataibí in intau inta nogodi-godimai kon inimu bo sambayangaibí in intau inta nogaid kon inta diá mopia kon inimu.

²⁹Bo aka oyúon in intau monokap kon putongimu toḷosi, yo ogoi doman in putongimu toḷosi. Bo ki ine in mogagow kon jubahmu, yo ogoi doman in ḷambungmu.

³⁰Aka intau moigum kon inimu yo ogoiai mako in sia; bo aka kapunyaanmu bo inagow, yo donaaidon igumonmu bui.

³¹Bo onu in koibog monimu popoaid in intau kon i monimu, dá popoaid doman kon i monia in natua.

³²Aka moiko bo tongá motabi kon intau inta motabi doman kon inimu yo onubí in mangaḻenea? Intau doman mita baradosa in motabibí doman kon intau inta motabi kon i monia!

³³Bo aka moiko bo tongá doman mogaid kon inta mopia kon intau inta ain nopoaid kon mopia kon inimu, yo onubí in mangaḻenea? Intau baradosa momia doman kon natua!

³⁴Bo aka moiko bo mopoḷuan in doit tongá kon i monia inta mokopobui yo onubí in mangaḻenea? Intau baradosa in mopoḷuan doman in doit kon intau baradosa ibanea, onda intua igumondon bui monia!

³⁵Sabanarnea in deemanbí natua! Nanaabí in musti aidan monimu: Kotabibí in saturumu bo aidai in onu inta mopia kon i monia, bo popoḷuanaibí in mosia, táe donaai potayakan kon kauntungan in mosia. Aka natua in aidan monimu, yo moiko in motarimabí kon bungai in oaidmu inta moḷoben totok bo moiko in mobaḻí doman ki adí mita i Allah inta Totok in Moḷantud. Sin Sia in mopiabí doman kon intau mita inta diá motaau mosukur kon i Allah bo kon intau mita moraat.

³⁶Musti potonop monimu kon gina in totabi kon tumpaḷa intau ná ki Amámu nopuḻing doman in totabi kon intau!”

³⁷“Donaai in moiko mohakim kon intau, sinbá diá doman hakimon i Allah in moiko. Bo donaai doman mohukum kon intau. Sinbá diá doman hukumon i Allah in moiko. Ampungaibí in intau inta kotaḷá kon i monimu, sinbá ampungan doman i Allah in taḷá monimu.

³⁸Pobogoibí kon intau ibanea; sinbá ogoian doman i Allah in moiko moiḻiu kon inta inogoimu kon intau ibanea.”

³⁹Onda intua ki Yesus in nongonguman bui kon poumpamaan tanaa, kai-Nia, “Degá motaau aka intau bilog bo mokapit kon intau doman bilog? Tantú taya dua tua in tumpaḷabí moḷabú kon bubú.

⁴⁰Murí in diábí moiḻiu kon gurunea. Táe aka murí tatua bo nopaḷutdon nobalajar, yo sia in motongkaidon in gurunea.

⁴¹Nongonu sin moiko in moindoibí kon puḻing kon i utatmu, táe balak kon bonu in matamu in diábí kinotaauanmu?

⁴²Ná ondabí in moiko motaau moguman kon i utatmu, ‘Uḻe, onda bá inggamáanku in puḻing kon matamu nion’, sedang balak kon matamu in diábí indoianmu muna? Ei intau mongomunapik! Poḷuaipa muna in balak kon bonu in matamu. Bá matamu in motarangdon totok bain tua bo iko in motaau mopoḷuai in puḻing kon mata i utatmu.”

⁴³“Diábí in pangkoi inta mopia in mopomungai in bungai inta diá mopia. Natua doman diábí in pangkoi inta diá mopia in mopomungai in bungai mopia.

⁴⁴Sin nongkon bungainea kotaauanbí in pangkoinea. Sin bo bonganga in diábí mopomungai in ḷantat andeka díat diábí mopomungai in anggur.

⁴⁵Intau inta mopia in mogaidbí doman kon inta mopia sin ginanea in pinuḻingan in inta mopia. Táe intau inta moraat in mogaidbí doman kon inta moraat sin ginanea in pinuḻingan domandon in inta mongoraat. Sin onu inta siningog in bibig yo tua in iḷumuaibí nongkon ginanea.”

⁴⁶“Nongonu sin moiko in mokuukbí kon i-Nakó, ‘Tuhan, Tuhan,’ bokaka bo doíbí in mogaid kon onu inta pinoki aid-Ku?

⁴⁷Pomuḷoi in intau inta namangoi kon i-Nakó bo moibog mokidongog kon singog-Ku poḷat doman dumudui kon onu inta pinoki aid-Ku. Onu degá in motaau-Ku popotongakaian kon inia tua?

⁴⁸Sia in naonda bo intau inta noposindog in baḷoi. Intau tatua in nongaḻi muna kinoonag bodongka nogaid kon pondasi nongkon batu. Naonda in ḷunud moḷoben, bo baḷoi tatua inuntag in ḷunud tatua, baḷoi tatua in diá noḻiaimai sin ain pinosindog kon pondasi inta noroton.

⁴⁹Táe ki ine inta nokodongog kon singog-Ku, tongá doí mogaid kon onu in pinoki aid-Ku, intau tatua in naonda bo intau inta noposindog in baḷoi kon tudu in butá inta diá in pondasinea. Naonda in inuntag in ḷunud, baḷoi tatua baḷú noumpag; bo nogoguyaat totok!”