Read Mongondow LUKAS 8 Bible Online

LUKAS 8 - Mongondow bible

LUKAS 8

¹Diá noonggot kon tua ki Yesus minaya-mayá mako in kotá-kotáannea bo ḻipu-ḻipúannea, bo mopoyaput in Habar Mopia kon soaḷ naonda in ki Allah mamangoi momarenta saḷaku Datu. Rasul-Nea inta mopuḷú bodoyowá kotaki-takin-Nea doman.

²Oyúon doman in bobay inta ain inundaman-Nea nongkon kinotoḷangan in dimukud mita moraat bo bayongan takit ibanea. Naa in tangoi monia tua: Ki Maria inta dinonoi ki Magdalena (pitu in dimukud moraat inta ain pinoḷuai kon inia);

³ki Yohana, inta ki buḷoi i Khuza, bendahara i Herodes; ki Susana, bo nobayongpa doman in bobay ibanea. Onu in pakéon monia kon tungkuḷ in nobantung kon i Yesus bo kon murí-Nea mita, sinanggungbí monia tontaní.

⁴Diá mobonto-bontow in intau mita in mamangoi kon i Yesus. Mosia in namangoi nongkon ḻipu-ḻipúannea. Naonda in intau nobayongdon in noyosipun, ki Yesus in nongonguman kon tobatú poumpamaan kon i monia nanaa,

⁵“Oyúon intau monononggobá iḷumuai sin mogambor kon bibitnea. Kon wakutu in sia noponabud, oyúon bibit in noḷabú kon bingkí in daḷan. Bibit tatua korita-ritakan mako in intau, onda intua nodait kinaan in ḷagapan.

⁶Oyúon doman in noḷabú kon butá inta nobarong totok in batu. Naonda in nobiagdon buibí noḷaḷow sin noingkag in butánea.

⁷Oyúon doman in noḷabú kon yua-yuak in díat. Díat tatua nobiag noyotakin in bibit tatua poḷat doman monisímai kon bibit tatua nodapot in minatoi.

⁸Táe oyúon doman in noḷabú kon butá mopia. Bibit tatua in nobiag nopira bo nomungai nodatog totok. Bungainea in mogatut noguntuḷ in kobayongnea.” Nopaḷut mako nongonguman kon natua, Sia in noguman noropot nanaa, “Ki ine in kobongoḷan yo pokidongog!”

⁹Murí-Nea mita in noḻibó kon i-Nia mongo onu in mangaḻe in poumpamaan tatua.

¹⁰Dá ki Yesus in notubag, “Moiko aindon inogoian in totabi monotaau kon inta noibuni kon naonda in ki Allah momarenta saḷaku Datu. Táe intau mita ibanea pinopoyaputan táe tongá nomaké in poumpamaan, sinbá umpakabí in mosia monarukiramai, táe diá kotaauan monia onu in mobaḻí; bo umpakabí mosia mokidongog, táe diá komangaḻean monia.”

¹¹“Naa mangaḻe in poumpamaan tatua: Bibit tua in Pirman i Allah.

¹²Bibit inta noḷabú kon bingkí in daḷan, tua in ibarat intau inta ain nokidongog kon Pirman i Allah, onda intua inangoi in Ibilis bo inagow in Pirman tatua nongkon bonu in gina monia, sin dika bo mosia in mobaḻí mopirisaya bo posaḷamaton.

¹³Aka bibit inta noḷabú kon butá inta nobayong in batu, tua in ibarat intau inta nokidongog kon Pirman i Allah, bo notarima takin pia in gina, táe onu in dinongog monia tua diá noitonop kon bonu in gina monia. Mosia in tongá nopirisaya notoyong, naonda in kino angoian sobaan, mosia in diá nonahang bo nobaḷui in pirisaya monia kon i Allah.

¹⁴Bibit inta noḷabú kon yua-yuak in díat, tua in ibarat intau inta ain nokidongog kon Pirman, tongá gina monia umuran sinisí in kapunyaan inta inanggap monia mokosanang kon kobiagan monia kon dunia naa, sahingga diá notuoi in bungainea.

¹⁵Yo aka bibit inta noḷabú kon butá mopia, tua in ibarat intau inta nokidongog kon Pirman, bo pinotonopnea totu-totuu kon bonu in ginanea sahingga in nonahang kon yagi-yagi sobaan bo nobogoi in bungainea inta totok in mopia.”

¹⁶“Diábí intau in mopoyongkit mako in togá bo tungkubannea in tampayang andeka tagúonnea kon siup in ḷantaan. Tantú togá tatua in tuduonneabí kon tampatnea, sinbá komintan intau inta tumuot kon baḷoi tatua mokoontong kon bayagnea.

¹⁷Diábí in tobatúmai noibuni in diá popoontong; bo diábí in tobatúmai in binuni in diá kotaauan bo diá popotaa-taau mako.

¹⁸Manangka intua yo tarukiraai kopira onu inta ain dinongog monimu. Sin aka ki ine in oyúondon, yo kon inia tua in dugangan doman bui; táe ki ine in diápa, yo onu in oyúonpa kon inia gamáan domandon nongkon inia.”

¹⁹Ki iná bo ki utat mita i Yesus in namangoi kon i-Nia, táe diá noiyaput kon i-Nia sin nobarong totok in intau.

²⁰Dá oyúon in intau nopotaau kon i-Nia, “Ki iná bo ki utat i Pak Guru tua kon ḷuai, mosia moibog moyodungkuḷ i Pak Guru.”

²¹Táe ki Yesus in noguman kon i monia, “Intaubí mita inta moibog mokidongog kon Pirman i Allah bo inta moibog mogaid kon onu inta kinoibog-Nea, tuatabí in ki iná bo ki utat-Ku mita.”

²²Kon singgai tobatú, ki Yesus bo murí-Nea mita sinumakoi kon uangga. Sia in noguman kon i monia, “Igai bá kita mayá in ḷoḷan danow.” Dá minayá in mosia.

²³Kon wakutu in mosia kon binayáandon, ki Yesus nosiug noḷoḷot, indoianmai daḻíbí namangoi in tompot moropot totok kon danow tatua, sahingga in nobokoḷ noḷoben bo uangga mulaidon kobonuan in tubig, dá mokoanibdon kon i monia.

²⁴Dá murí-Nea mita in namangoi bo noguḷung kon i-Nia, kai monia, “Pak Guru, Pak Guru, mobodito in kita!” Ki Yesus in nobangon bo nongguak kon tompot bo bokoḷ inta koyogot mogirup tatua. Dá tompot bo bokoḷ tatua in nogogai bo noḷonongdon totok.

²⁵Bo siningog i Yesus in mosia, “Nongonu sin moiko in diábí mopirisaya kon i-Nakó?” Mosia in noondok bo noherang. Mosia in nosiḻibóan, “Ki inebí sabanarnea in intau tanaa sin umpaka tompot bo bokoḷ yo dumudui doman kon singog-Nea!”

²⁶Ki Yesus bo murí-Nea mita iḷumeag nodapot in ḻipú intau in Gerasa[9] inta kon ḷoḷanmai in Danow Galilea.

²⁷Naonda in ki Yesus noponag kon toba, Sia inangoi in tobatú intau inta nongkon kotá tatua. Intau tatua kinotoḷangan in dimukud moraat. Noonggotdon in sia in diá nogiḷambungmai bo diádon doman nogutun kon baḷoinea. Sia nogutun bidon kon angob mita inta poḷoḷobongan kon intau minatoi.

²⁸Naonda in sia nokoontong kon i Yesus, kinumarak in sia bo sinumungkud kon tayowonmai i Yesus bo nomaḷú, “Ei Yesus, ki Adí i Allah inta Totok in Moḷantud! Onuon i Tuhan in akuoi naa? Poigumonku totok kon i Tuhan, dika rorigaan in akuoi!”

²⁹Dimukud moraat tatua noguman natua, sin pinotabá i Yesus iḷumuai nongkon intau tatua. Sin mokakitdon in pogarab in dimukud moraat in intau tatua. Dá poḷoḷukad kon intau tatua in dongka bidon togotonmai in rante bo umantungan, táe bontowonnea doman in rante inta pinotogot kon inia, onda intua sia diaan in dimukud moraat mayá in padang gurun.

³⁰Ki Yesus in noḻibó kon intau tatua, “Ki ine in tangoimu?” Tubagnea doman, “Tangoiku ‘ki Legion’,” — sin nobayong totok in dimukud moraat in sinumuot kon inia.

³¹Dá dimukud mita tatua in nopoigum kon i Yesus sinbá diá potabá-Nea in mosia mayá in Irang Popatoi.[10]

³²Nodiug kon tua oyúon in boké noantó inta koyogot motayakmai kon kaanon monia kon oyukmai in buḷud, dá dimukud moraat tatua nopoigum kon i Yesus, sinbá ogoi in mosia mayá tumuot kon boké mita tatua. Dá dinuduian i Yesus onu in pinoigum monia tua.

³³Dimukud moraat mita tatua iḷumuai nongkon intau tatua bo minayá sinumuot kon boké mita tatua. Boké mita tatua minayá bo iḷumansik nongkon bingkí in irang bo noḷabú kon danow poḷat noḷomot.

³⁴Naonda intau mita inta noḷukad kon boké nokoontong kon natua, mosia noḷagui bo poḷat minayá nopohaba-habar mako kon onu inta ain nobaḻí tatua kon kotá bo kon ḻipú mita inta noyodiugmai.

³⁵Dá iḷumuaidon in intau mita kon tua sin moindoi kon onu inta ain nobaḻí kon tua. Mosia namangoi kon i Yesus bo inontong monia in intau inta sinaḷaandon in dimukud moraat. Intau tatua iḻimitúdon mako kon diug in sioḷ i Yesus, aindon noratak bo nogiḷambungdon. Mosia inta kon tua, komintan inangoian ondok in nokoontong kon onu inta nobaḻí tatua.

³⁶Naonda in koinggamá in kawasa in dimukud moraat kon intau tatua, nodait inouman in intau mita inta ain nokoontong tontaní kon onu inta ain nobaḻí tua.

³⁷Sahingga intau mita inta kon ḻipú in Gerasa tua nopoigum kon i Yesus, sinbá taḷaan-Nea in mosia sin moondokdon totok in mosia. Dá ki Yesus sinumakoidon bui kon uangga bo nonaḷámai kon i monia.

³⁸Intau inta ain sinaḷaan in dimukud mita moraat tatua nopoigum kon i Yesus sinbá ogoi in sia tumakin kon i Yesus. Táe pinotabá i Yesus in sia takin koyow nanaa,

³⁹“Pobuidon iko kon baḷoimu bo daitdon ouman in bayongan inta ain inaidan i Allah kon inimu.” Dá intau tatua minaya-mayádon mako kon bayongan kotá bo nopotaa-taau mako in bayongan inta ain inaidan i Yesus kon inia.

⁴⁰Naonda in ki Yesus nobui mangoi, Sia sinontomu intau in mobayong takin pia in gina, sin mosia in dongkadon mogoḷat mako kon i-Nia.

⁴¹Bo kon dodai intua namangoi domandon in intau, tangoinea ki Yairus. Ki Yairus naa, itoi kon baḷoi pososambayangan. Sia in sinumungkud kon tayowonmai in sioḷ i Yesus bo nopoigum totok sinbá ki Yesus moibog mamangoi in baḷoinea,

⁴²sin wakutu intua ki adínea inta tongá totobatú tua notakit dongkadon oḷaton. Adí tatua umurdon degá mopuḷú bodoyowá notaong. Dá ki Yesus minayá. Kon bonu in binayáan tatua totok in sisíon monia in ki Yesus.

⁴³Bo kon sigad in intau moantó tatua, oyúon in tobatú bobay inta aindon mopuḷú bodoyowá notaong notakit sinoḷoganmai in dugú,[11] bo diá tobatúmai in mokopia kon takitnea tatua.

⁴⁴Dá totok noramuji in sia bá moidiug kon i Yesus nongkon tumi bo mokadai kon ubung in jubah-Nea, dá kon dodaipa doman intua bobay tatua nopia.

⁴⁵Táe ki Yesus in noḻibó kon i monia, “Ki ine in noḻiai kon i-Nakó?” Táe diá tobatúmai in nongaku. Dá ki Petrus in noguman, “Pak Guru, totuu mobarong intau in noḻipung kon i Pak Guru; dapot in koundudan magí mako monia in ki Pak Guru!”

⁴⁶Táe kai Yesus doman, “Oyúon tobatú intau in sinumontuon noḻiai kon i-Nakó, kinorasaan-Ku kon oyúon in kawasa iḷumuai kon i-Nakó.”

⁴⁷Naonda in kinotaauandon in bobay tatua kon onu inta inaidannea tua aindon kinotaauan i Yesus, dá namangoi in sia, táe urot mako bo sinumungkud kon tayowon-Neamai. Onda intua inoumannea kon tayowon in intau moantó tatua kon nongonu sin sinumontuonbí in sia noḻiai kon i Yesus bo takitnea tatua in nopia doman kon dodaipa intua.

⁴⁸Ki Yesus in noguman kon bobay tatua, “Adí-Ku, pirisayamu ain nokosaḷamat kon inimu. Bayádon takin saḷamat.”

⁴⁹Koyogotpa in ki Yesus nosingog, namangoi in tobatú ginaḷum i Yairus bo noguman kon i Yairus, “Ki adí i Tuang minatoidon. Dá donaaidon in ki Tuang mamangoi bo mokiposusamai kon i Pak Guru!”

⁵⁰Tongá dinongog i Yesus onu inta pinoguman in intau tatua, dá Sia in noguman kon i Yairus, “Yairus, dikabí moondok. Popirisayabí dá mosaḷamatbí in ki adímu tatua.”

⁵¹Noiyaputmai kon baḷoi i Yairus, diá tobatúmai intau ibanea inogoi i Yesus dinumudui kon i-Nia sinumuot in gopot, koḻikudbí in ki Petrus, ki Yohanes, bo ki Yakobus takin ki iná bo ki amá in adí tatua.

⁵²Totokdon in ombaḷan bo amuian monia in adí tatua, táe ki Yesus in noguman kon i monia, “Dikadon mongombaḷ in moiko sin adí tatua in diábí minatoi tongábí nosiug!”

⁵³Táe kinosingan monia in Sia, sin kinotaauan monia kon minatoi bidon in adí tatua.

⁵⁴Dá kinadaian i Yesus in ḻima in adí tatua bo noguman, “Pobangondon, Uḻe!”

⁵⁵Bo nobuidon mangoi in dimukud in adí tatua, bo kon dodaipa doman intua nobiag bui in adí tatua bo poḷat sinimindog. Ki Yesus nokipokaan in adí tatua.

⁵⁶Guyanga in adí tatua totok in noherang in nokoontong. Táe onu inta ain nobaḻí tatua diábí inogoi i Yesus potaa-taau mako kon i inekabí.