Read Mongondow ULANGAN 1 Bible Online

ULANGAN 1 - Mongondow bible

ULANGAN 1

¹Buk in tanaa tombonunea in tosingogon mita inta pinotaau i Musa kon bangusa Israel kon dodai in mosia kon padang gurun kon Ḷopá in Yordan. Ḷopá tatua in kon dotá in pomukaan kon Ongkag in Yordan, kon diug in kotá in Sup, kon sigad in kotá in Paran kon pihak tobatú, bo kon kotá mita in Topel, Laban, Hazerot bo Di-Zahab kon pihak ibanea. (

²Nongkon Buḷud in Sinai nodapot in Kades-Barnea noitaḻib in butá inta kon buḷud in Edom, mopuḷú bomitá nosinggai in bayáan.)

³Kon singgai noginmitá kon buḷan mopuḷú bo mita kon taong noginggopat nopuḷú naonda in mosia nonaḷámai kon Mesir, ki Musa nopotaau kon bangusa tatua in bayongan inta pinoki potaau i TUHAN kon monia.

⁴Tua in nobaḻí naonda in ki Musa[1] nonaḷow kon Sihon, datu in intau Amori, inta nomarenta kon kotá in Hesybon, bo Og, datu in Basan, inta nomarenta kon kotá mita in Asytarot bo Edrei.

⁵Dá, kon dotá in pomukaan kon Yordan kon butá in Moab, ki Musa nomangkoi muna noginsilang kon hukum bo parenta mita i TUHAN. Guman i Musa,

⁶“Kon dodai in kita kon Buḷud in Sinai, ki TUHAN Allah naton in noguman, ‘Noonggotdon in moiko nogutun kon buḷud tanaa.

⁷Tanaa kokaidon in ḷoḷaiganmu bo bayádon kon buḷud in intau Amori bo kon bayongan in butá inta kon diugneamai, tuata in Ḷopá in Yordan, butá inta notombuḷud bo inta nooyuk, butá inta kon dotá in toḷatan bo pintad in Dagat Toyuak. Bayádon ḻitúai in butá in Kanaan bo Buḷud in Libanon modapot kon ongkag moḷoben in Eprat.

⁸Akuoi, ki TUHAN, aindon nopodandi in bayongan butá tatua kon mogoguyang monimu ki Abraham, ki Ishak bo ki Yakub takin bayongan buí monia. Dá bayádon ḻitúai in butá tatua.’ ”

⁹Ki Musa in noguman kon bangusa tatua, “Kon dodai in kita kon Buḷud in Sinai, akuoi nogumandon kon inimu: Oaidan modia kon i monimu totuu mobogatku aidan. Diádon mokosanggup in akuoi mogaid tontaní, tuamai

¹⁰ki TUHAN Allahmu nopobaḻídon kon i monimu nobarong totok naonda bo tundi mita kon ḷangit.

¹¹Igumon mako ki TUHAN, Allah in mogoguyangmu, umuran modugang kon kobayong monimu modapot in koribu noguntuḷ, bo mopobaḻí kon i monimu bangusa inta mobiag mooyúon bo motompia ná podudui kon inta pinodandi-Nea!

¹²Táe naondabí aka tongá akuoi tontaní in momotaan kon oaidan inta mobogat tua sin mopoyotutui kon bayongan inta mobaḻí kon inimu?

¹³Pomiḻídon kon batúan suku in tongonumai intau ḷoḷaki inta mobijaksana, inta kopongalaman bo inta momangaḻe totok, sinbá baḻíonku in mosia itoi kon sigad monimu.

¹⁴Onu inta pinoigumku tatua in sinarimadon monimu nopia.

¹⁵Tuamai kon sigad in itoi mita inta piniḻí monimu, tongonumai in intau inta mobijaksana bo inta kopongalaman ginamáku bo binaḻíkudon tongguḷu kon i monimu. Oyúon in binaḻí itoi kon intau toribu, ibanea doman in binaḻí itoi kon intau mogatut, ibanea in itoi kon intau ḻima nopuḷú bo ibanea in itoi kon intau mopuḷú. Akuoi in noduí doman kon itoi mita ibanea sin moindoi bo monompia kon sukumu mita.

¹⁶Kon dodai intua naa in pinoki aidku kon i monia: Indoiai kopia in yogogintaḷaan mita inta nomuká kon sigad in bangusamu. Koadilon in monantú, pinomayá pelekara inta noikabit kon intau tobangusamu andeka inta noikabit kon intau ango-angoi inta nogutun kon sigad monimu.

¹⁷Aka monantú yo dika mobogat kon toḷosi; musti potongkaion in monantú kon taḷá kon batúan in intau. Dika moondok kon i ineka, sin onu inta sinantú monimu tua in namangoibí nongkon i Allah. Aka pelekara tobatú bo mobogatmu totok tantúon, yo diádon mangoi kon inakó, bain akuoi in monantú kon tua.

¹⁸Kon dodai doman intuata akuoi nobogoi in topotundú mita kon i monimu soaḷ yagi-yagi inta musti aidan monimu.”

¹⁹“Bo pinodudui kon parenta i TUHAN Allah naton, kita in monaḷámai kon Buḷud in Sinai bo mayá mongin padang gurun inta mobendar bo motoyang mopobayá ná buḷud mita in intau Amori. Kon dodai in kita modapot kon Kades-Barnea,

²⁰akuoi in noguman: Tanaa in moiko ain nodapot kon buḷud mita in intau Amori, butá inta inogoi i TUHAN Allah naton bo i Allah in mogoguyang naton. Indoiai, niondon kon tayowonmu in butá inta nobendar. Bayádon bo ḻitúai ná inta ain pinarenta i TUHAN. Dika mogagawang in gina ande moondok.

²¹

²²Táe moiko in namangoi kon inakó bo noguman, ‘Maníka kita mopotabá in tongonumai intau umuna kon i naton mayá monaridi kon butá tatua sinbá potaaudon monia kon i naton daḷan bayáan naton bo potaau domandon monia in kaadaan in kotá inta angoian naton tatua.’

²³Onu in pinoigum monimu tua dinuduianku, tuamai akuoi nomiḻídon kon intau mopuḷú bodoyowá, tumongo batu in kon tosuku.

²⁴Mosia sinumuot kon buḷud mita tatua nodapot kon Ḷopá in Eskol, bo nodondaḷoi kon tua.

²⁵Noiduduimai kon tua mosia nobuidon mangoi kon i naton kodia-dia in bungai in ayop inta ginamá monia kon tua bo nopotaau kon butá inta ogoi i TUHAN Allah naton tua in totokbí in mopia.

²⁶Táe moiko nonoḻikud kon parenta i TUHAN Allahmu bo doí tumuot kon butá tatua.

²⁷Moiko nongunsingog nanaa, ‘Moyaat in gina i TUHAN kon i naton. Dá dinia-Nea in kita pinoḷuai nongkon Mesir bo posarakan kon bonu in kawasa intau in Amori sinbá ḻimodon monia in kita.

²⁸Dá onubí in mangaḻenea in bayáan naton intua? Intau mita inta pinotabá naton minayá intua nopogogondok doman kon i naton takin noguman kon bangusa tatua in moropo-ropot bo motori-torindog nongkon i naton, bo mosia in nogutun doman kon kotá mita inta tondoknea ná koḷantud in ḷangit. Mosia noguman doman kon nokoontong kon tuyá kon tua!’

²⁹Táe akuoi noguman: Dika moondok kon intau mita tatua.

³⁰Ki TUHAN Allah in modiabí kon i monimu bo moposaḷamat kon i monimu ná inta ain inontong monimu tontaní kon Mesir

³¹kon padang gurun. Inontongdon monimu naonda in ki TUHAN Allahmu nodia kon i monimu takin nosaḷamat kinoouput in binayáan nodapot in tampat tanaa, diá in yoposinea naonda bo ki amá nokoyot kon i adínea.

³²Tongá umpaka akuoi ain noguman natua, moiko in diápa doman moibog mopirisaya kon i TUHAN Allahmu,

³³inta minayá inumuna kon imonimu sin motayak kon pononḷoḷaiganmu. Sia in notundú kon daḷan kon inimu kon tungkuḷ in doḷom takin oigi tuḷú, bo kon tungkuḷ in singgai nomaké in oigi goḷom.”

³⁴“Dinongog i TUHAN in gomong-gomotmu tua bo sinumorú in Sia. Sia nongibot,

³⁵‘Diá tobatúmai in intau mita inta nobiag tanaa in tumuot kon butá mopia inta pinodandi-Ku kon mogoguyangmu.

³⁶Tongá ki Kaleb, adí i Yepune in tumuot kon tua, sin sia in umuran motoindudui kon i-Nakó. Ki Kaleb bo buínea in pobogoian-Ku kon butá inta ain dinondaḷoinea tatua.’

³⁷Moiko nokopopisí doman kon ki TUHAN sinumorú kon inakó bo noguman, ‘Musa, iko doman tontaní in diábí tumuot kon butá tatua.

³⁸Táe irigonai in gina in bobantungmu, ki Yosua adí i Nun. Sia tuata in modia kon intau in Israel mogagow kon butá tatua.’

³⁹Bo ki TUHAN noguman kon i naton komintan, ‘Adí mita monimu inta nongointokpa totok bo diápa motaau mopoyoposi inta mopia bo inta moraat, adí mita inta kain singog, monimu agowon in musungmu mita, kon i monia tuata in pobogoian-Ku kon butá tatua, bo mosia in mogutun kon tua.

⁴⁰Táe moiko, pobuidon kon padang gurun mongin daḷan inta mopobayá ná Teluk in Akaba.’

⁴¹Moiko in notubag, ‘Musa, kami binaradosadon kon i TUHAN. Táe kami in moibog bidon mayá moparang in tanaa ná inta pinarenta i TUHAN, Allah naton.’ Bo moiko in nopotouḷutdon sin mayá moparang, takin norai kon mayá monubu kon buḷud tatua in totuubí mogampang.

⁴²Táe ki TUHAN noguman kon inakó, ‘Dikabí pomayámu mako in mosia mayá moparang, sin diábí takinan-Ku in mosia, bo mosia in taḷowonbí in musung monia.’

⁴³Pinotaauku kon i monimu in onu inta pinoguman i TUHAN, tongá doíbí in moiko nokidongog. Moiko noḷawang kon parenta i TUHAN, bo takin tagadoḷá minayá in moiko kon buḷud tatua.

⁴⁴Bo intau in Amori inta nogutun kon buḷud tatua iḻumuai bo nomarang kon i monimu. Nobarong totok in mosia, naonda bo paanan in pasukan. Mosia nondudur kon i monimu nodapot in Horma, bo sinaḷow monia in moiko kon buḷud in Edom.

⁴⁵Onda intua moiko nobui bo nokuani kon i TUHAN sin mokituḷung, táe doí in Sia nokidongog ande noindoimai kon i monimu.”

⁴⁶“Nopaḷut mako kon tua kita in nogutunpa kon Kades noonggot totok.