Read Mongondow ULANGAN 14 Bible Online

ULANGAN 14 - Mongondow bible

ULANGAN 14

¹“Moiko nion in umat i TUHAN Allahmu. Dá aka oyúon in kinopatoian, dikabí in moiko monompaḻí kon awak ande mokibangkuḷug in buok kon dotá in pogotmu ná oaid in bangusa mita ibanea.

²Moiko nion in kapunyaan i TUHAN Allahmu; nongkon bayongan in bangusa kon dunia naa, moikobí nion inta piniḻí i Allah nobaḻí umat-Nea.”

³“Dika mokaan kon mahaḷuk inta pinoniata i TUHAN kon haram.

⁴Naa in motaau kaanon monimu: sapi, domba, bembé,

⁵rusa, domba in kayuon, bembé in kayuon, kijang

⁶bo bayongan mahaḷuk inta konukunea nobotak bo umuran mongongguyom.

⁷Moiko in diábí motaau in mokaan kon mahaḷuk inta konukunea diá nobotak bo diá mongongguyom. Dika mokaan kon unta, kelinci ande marmot. Mahaḷuk tatua in haram sin umpaka mongongguyom, táe konukunea in diábí nobotak.

⁸Dika mokaan kon boké. Mahaḷuk tatua in harambí, sin umpaka konukunea nobotak, táe diá in sia mongongguyom. Tapúnea in diábí motaau kaanon, aka minatoi diábí motaau ḻiaion.

⁹Moiko in motaaubí mokaan kon bayongan in toyá inta kokokapoi bo kogunap.

¹⁰Mahaḷuk inta nobiag kon tubig táe diá kokokapoi bo diá kogunap tua in harambí, dá diábí motaau kaanon.

¹¹Moiko in motaaubí in mokaan kon noyagi-yagimai in ḷagapan inta diá haram.

¹²Táe tongonu norupa in ḷagapan in diábí motaau kaanon monimu, tuata: ḷagapan boniá, monikuḷu, tongonu norupa in boniá nasar, kawag, ḷagapan unta, tangkudayagan, blekok bo noyagi-yagimai in bangow, undan, kasa bo poniki.[13]

¹⁹Bayongan oḷoḷayug inta kokoḻikipan in harambí, dá diábí motaau kaanon.

²⁰Mahaḷuk kokoḻikipan inta diá haram in motaaubí kaanon.

²¹Mahaḷuk inta minatoi mako naníon diábí motaau in kaanon monimu, táe motaaubí in kaanon in intau mita ango-angoi inta nogutun kon yua-yuak monimu, ande potaḷui kon bangusa ibanea. Moiko nion in umat inta ain piniḻí kon i TUHAN Allahmu. Tapú in adí in domba ande adí in bembé diábí motaau in poyodungúon takin tubig in teté i indenea.”

²²“Pomuḷoi in taong moiko musti mopotondí in mopuḷú noporosen nongkon bayongan inta nouḻímu.

²³Kon tayowon i TUHAN Allahmu, kon tampat inta piniḻí-Nea, inta mobaḻí tampat pooibadaan, moiko musti mokaan kon sosumba mopuḷú noporosen nongkon gandum, tubig in anggur, ḷana in zaitun takin adí in sapi bo adí in bembé dombamu inta muna pinogadí. Aidai intua sinbá umuran in moiko mobalajar mohoromat kon i TUHAN Allahmu.

²⁴Aka tampat inta piniḻí i TUHAN Allahmu noiḻiudon in yayú nongkon baḷoimu, modapot in mopoḷú noporosen nongkon onu inta nouḻímu kon butá inta inogoi i TUHAN Allahmu kon inimu diádon kodiaanmu kon tua, dá

²⁵potaḷuidon intua, bo doit boḻinea in diaanmu kon tampat inta ain piniḻí i TUHAN Allahmu.

²⁶Potaḷuidon in doit tatua kon onu in koibog monimu — sapi ande bembé domba, tubig in anggur ande oinumon inta mokoḷoḷangu — bo kon tampat tatua, kon tayowon i TUHAN Allahmu, moiko motoḷuadí musti mongaan moyotakin bo moposanang in gina.

²⁷Dika pomayá mako monimu in kobobiag in intau in Lewi inta nogutun kon kotámu mita; toropdon kon mosia tua in diábí kobutá tontaní.

²⁸Kon buit in taong nogintoḷu, moiko musti modia kon mopuḷú notonsilai nongkon bungai in boyómu kon butámu bo sipunon kon kotámu mita.

²⁹Kaanon tatua in ogoibí kon intau in Lewi sin mosia in diá kobutá, bo kon intau ango-angoi, adí uno-unon bo inta dongka boba-bobay inta nobiag kon kotámu mita. Mosia in motaaubí in mamangoi mogamá kon bayongan inta paraḷuon monia. Aka aidan monimu in natua, dá ki TUHAN Allahmu in momarakatbí kon bayongan onu inta inaidanmu.”