Read Mongondow ULANGAN 16 Bible Online

ULANGAN 16 - Mongondow bible

ULANGAN 16

¹“Rayaaidon in Paska kon buḷan Abib sin mohoromat kon i TUHAN Allahmu, sin kon bonu in buḷan tatua, kon dodai in doḷom, Sia in nopoḷuai kon i monimu nongkon Mesir.

²Bayádon kon tampat inta piniḻí i TUHAN kon porataan kon tobatú bembé domba ande sapi mobaḻí sosumba Paska sin mohoromat kon i TUHAN Allahmu.

³Sosumba Paska tatua musti kaanon takin roti inta diá iragian. Pitu nosinggai in koonggotnea moiko in musti mokaan kon roti inta diá iragian, ná kon dodai in moiko nonaḷámai kon Mesir takin iḻimika-ḻikat. Kaandon in roti tatua, roti inta sinangoian roti in roriga, sinbá kinoouput in kinobiaganmu moiko mokotorop kon singgai moiko nonaḷámai kon Mesir, tampat kinoyoyigaan monimu.

⁴Pitu nosinggai in koonggotnea kon butámu diá tobatúmai in motaau motagú kon ragi kon baḷoinea. Tapú in bobiagon inta iratá kon doḷom inta muna musti kaanon kon doḷom doman tatua.

⁵Bobiagon inta pakéon kon Singgai Moḷoben Paska musti ratáan kon tampat inta ain piniḻí i TUHAN Allahmu, bo diábí motaau in kon tampat ibanea kon bayongan butá inta inogoi-Nea kon inimu. Tua in mustibí aidan monimu kon dodai in mata in singgai tumoyop, ná kon tungkuḷ in moiko nonaḷámai kon butá in Mesir.

⁷Tuondon in ponoyá tatua bo kaan kon tampat inta ain piniḻí i TUHAN Allahmu, bo pobuidon kon baḷoimu mobangon monik doḷo-doḷom.

⁸Kon bonu in onom nosinggai moiduduimai moiko musti mokaan kon roti diá iragian. Kon singgai noginpitu moiko musti moyosipun sin mosumba kon i TUHAN Allahmu. Dikabí mogaid kon singgai tatua.”

⁹“Pogintádon kon pitu nodiminggu pangkoion kon singgai dungkuḷ moiko moratab kon gandum,

¹⁰bo porayaaidon in Rame Posipunan kon Boyó sin mohoromat kon i TUHAN Allahmu. Kon singgai tatua diádon in sosumba ibog in gina kon i-Nia podudui in kobayong in rijiki inta ain inogoi-Nea kon inimu.

¹¹Kon tayowon i TUHAN Allahmu, kon tampat inta piniḻí-Nea, moiko musti moposanang in gina moyotakin i adímu mita, bobantungmu mita bo intau in Lewi, intau ango-angoi, adí uno-unon bo intau mita inta dongkadon boba-bobay inta nogutun kon kotámu mita.

¹²Duduiaibí in bayongan parenta-Nea pokosatia, bo dika mokoḻiong kon koḻipod in moiko in atabí kon Mesir.”

¹³“Naonda in bayongan gandummu mopaḷutdon rata bo bayongan bungai in anggurmu nopaḷutdon pinugut, moiko in musti moraya kon Singgai Moḷoben Pondok Daun pitu nosinggai in koonggotnea.

¹⁴Pobarasanangdon takin i adímu mita, in bobantungmu mita, in intau in Lewi, intau ango-angoi, adí uno-unon bo inta dongka boba-bobay mita inta nogutun kon kotámu mita.

¹⁵Pitu nosinggai in koonggotnea musti in moiko moraya kon singgai moḷoben tatua sin mohoromat kon i TUHAN Allahmu kon tampat inta ain piniḻí i TUHAN. Kosanangdon in gina, sin ki TUHAN ki Allahmu ain nomarakat kon bungai in boyó bo oaidanmu.

¹⁶Bayongan in intau Israel ḷoḷaki in musti mamangoi kon i TUHAN Allahmu kon tampat inta piniḻí-Nea kotoḷu in totaong, tuata in kon Singgai Moḷoben Paska, kon Singgai Moḷoben Posipunan kon Boyó bo kon Singgai Moḷoben Pondok Daun. Bayongan in intau musti modia kon sosumba

¹⁷podudui in komampuannea, podudui in kobayong rijiki inta inogoi i TUHAN Allahmu kon inia.”

¹⁸“Kon pomuḷoi in kotá inta inogoi i TUHAN Allahmu kon inimu, moiko in musti moduí kon hakim mita bo petugas mita ibanea sin mohakim kon rayat takin moadil.

¹⁹Kon bonu in mogamá kon kaputusan, mosia in diábí motaau kinotantu-tantúnea ande mobogat kon toḷosi. Mosia in diábí doman motaau motarima kon doit tondan in pelekara, sin tondan in pelekara tua in mokobilog kon intau, nodapot in intau mobijaksana bo mojujur, dá mogamádon kon kaputusan inta diá moadil.

²⁰Moiko in mustibí umuran mokopoadil, sinbá umuran motaau mogutun bo mobiag motompia kon butá inta inogoi i TUHAN Allahmu kon inimu.

²¹Aka moiko momia kon mezbah kon i TUHAN Allahmu, dika mogukat kon patong berhala kayu lambang i Asyera kon diugnea,

²²bo dika moposindog in oigi sin posumbaan kon berhala, sin ki TUHAN Allahmu in doíbí kon oaid natua.