Read Mongondow ULANGAN 17 Bible Online

ULANGAN 17 - Mongondow bible

ULANGAN 17

¹Dika moposumba in sapi ande domba inta nobogit kon i TUHAN Allahmu, sin kodoí-Neabí intua.

²Aka kodongogan monimu kon kotámu tobatú oyúon in kon dosa kon i TUHAN Allahmu sin iḻimimpatdon kon dodandian

³bo parenta-Nea takin nosumba bo nogundoi kon ilah mita ibanea ande kon mata in singgai, buḷan ande tundi mita,

⁴dá mustibí taridian monimu kopiraan. Aka aid moraat tatua totu-totuudon nobaḻí kon Israel,

⁵yo intau inta kotaḷá in musti diaan kon ḷuai in kotá bo ara bo in batu dapot in matoi.

⁶Táe sia in tongábí motaau hukumon matoi aka oyúon in sakusi doyowa ande moiḻiu; intau tobatú diábí motaau in hukumon matoi aka tongá tobatú in intau mobaḻí sakusi.

⁷Sakusi mita in musti muna mogandur in batu inta muna kon intau tatua, bo duduiai in bayongan rayat. Aid tatua moponiata kon moiko in monginggamá kon aid moraat tatua.

⁸Aka oyúon in pelekara inta diá motaau putuson in hakim mita kon tua sin totuu mororiga, umpamanea pelekara poḻimodan inta sinuod ande diá sinuod, bobayowan soaḷ kapunyaan ande mositompaḻían kon awak, yo moiko in mustibí mayá kon tampat inta piniḻí i TUHAN Allahmu.

⁹Potaaudon pelekaramu tatua kon imang mita Lewi bo kon hakim inta koyogot mopobayá in oaidan monia, bo pomayádon mako mosia monantú kon tua.

¹⁰Mosiadon tua inta mobogoi in kaputusan, bo moiko in musti momia takin mokopotaridi kon onu inta pinoguman monia kon inimu.

¹¹Tarimadon in kaputusan monia bo aidaidon in onu inta sinantú monia modapot in soaḷ mita inta mongointok.

¹²Ki inekabí in mobarani moḷawang kon hakim ande imang inta yogot mopobayá in oaidannea yo musti hukumon matoi; oaid monimu tatua monginggamá kon aid moraat tatua kon Israel.

¹³Bayongan intau in mokodongogdon kon tua bo agíandon in ondok, dá diá bidon in mokobaḻí mogaid kon natua.”

¹⁴“Aka butá inta inogoi i TUHAN Allahmu kon inimu ain nobaḻí kapunyaanmu, bo moiko in nogutundon kon tua, bo degá moiko in moparaḷudon kon datu ná bangusa mita inta nogutun kon diugmai monimu.

¹⁵Tarukiradon kopira sinbá intau inta baḻíon monimu datumu tua in intaubí inta piniḻí i TUHAN Allahmu. Sia in musti intau inta nongkon bangusamu tontaní; dika moduí kon intau ango-angoi tobatú mobaḻí datumu.

¹⁶Datu in diábí motaau kokabaḷo mobayong sin pakéon in tontaranea bo diábí motaau mopotabá kon bangusa tanaa in bui mayá in Mesir sin motaḷui kon kabaḷo,[16] sin ki TUHAN ain noguman kon umat-Nea in diábí motaau mayá bui in butá tatua.

¹⁷Datu in diábí motaau kobuḷoi kon mobayong, sinbá sia diá monoḻikud kon i TUHAN. Sia in diábí doman motaau mosipun kon saḷaka ande buḷawan sin baḻíonnea kaoyúonannea tontaní.

¹⁸Aka intau tobatú dinuídon nobaḻí datu, yo sia in mustibí ogoian in buk tobatú inta pinomaisan kon hukum mita i Allah inta pinais nongkon buk taakan inta sinagú in imang mita Lewi.

¹⁹Buk tatua in mustibí umuran kon diugnea, bo kinoouput in kinobiagannea musti mobaca kon tua sinbá mobalajar mohoromat kon i TUHAN Allahnea bo mokoposatia in dumudui kon bayongan parenta inta pinais kon bonunea.

²⁰Aka umurannea intua bacaan, dá diábí in sia monganggap kon sia in mopia-pia kon intau mita tobangusanea, bo diábí ḻimimpat kon parenta i TUHAN naondaka in oaidnea. Bo sia takin buínea in momarenta kon bangusanea modapot kon adí bo ompu.”