Read Mongondow ULANGAN 19 Bible Online

ULANGAN 19 - Mongondow bible

ULANGAN 19

¹“Naonda in bangusa mita tatua iyopú i TUHAN Allahmu bo butánea inogoi kon inimu, bo naonda in ginamá monimu in kotá mita bo baḷoi mita monia bo nogutun kon tua,

²butá tatua in mustibí silaion monimu mobaḻí toḷu notonsilai, kon batúan tonsilai tatua tumongo batu doman in kotá pogogadopan inta diá moyoyiga bayáan sinbá bayongan intau inta noḻimod motaau moḷagui mayá intua.

⁴Aka intau tobatú diá sinumuod noiḷautdon in noḻimod kon intau ibanea inta deeman musungnea, yo sia in motaaubí moḷagui mayá kon sigad in kotá tobatú tatua bo mobiag kon tua.

⁵Umpamanea doyowa in intau noyotakin minayá in kayuon sin momupuḷ kon kayu. Koyogot in tobatú nomupuḷ kon kayu, mata in boḻiung nopantut nongkon puḷunea bo noitugat kon yobayatnea bo poḷat minatoi. Dá intau inta diá sinumuod noḻimod tatua in diábí kotaḷá bo motaaubí in sia moḷagui mayá in tobatú kotá kon sigad in kotá toḷu tatua sinbá mosaḷamat. Aka kuma bo tongá tobatú in kotá pogogadopan, degá moiḻiudon yayú in mayá intua, bo tombonu in baḷoi inta kohak motuḻí kon pinoḻimodan tatua motaaubí in mogaḷow kon inia bo takin torúnea sia moḻimod kon intau inta diá kotaḷá.

⁷Tuamai akuoi nomarenta kon i monimu moposadia in kotá toḷu.

⁸Aka ki TUHAN Allahmu moginḷobendon kon butámu ná inta pinodandi-Nea kon mogoguyangmu, bo bayongan in butá tatua inogoidon kon inimu,

⁹moiko in musti momiḻí bui kon kotá toḷu pogogadopan. (Butá tatua in ogoibí kon inimu aka moiko mogaid kon bayongan inta ain pinarentaku kon inimu singgai naa, bo aka moiko motabi kon i TUHAN Allahmu bo mobiag podudui in topotundú-Nea.)

¹⁰Aidaidon intua sinbá moiko diá baradosaan sin nopomayádon mako kon intau inta diá kotaḷá iḻimod kon butá inta inogoi i TUHAN Allahmu kon inimu.”

¹¹“Táe noyoposibí aka intau tobatú noḷabot kon musungnea bo sinumuodbí takin yaat in ginanea noḻimod kon inia, bo minayá noḷagui kon tobatú kotá pogogadopan sinbá mokouḻí kon pogadopan.

¹²Kon soaḷ in tatua guhanga mita kon kotánea musti mogoiní kon intau tatua bo moposarakan kon inia kon tombonu in baḷoi in intau iḻimodnea sin motuḻí kon pinoḻimodan tatua, sinbá sia in motaaudon ḻimodon.

¹³Dika monotabi kon inia. Poḷuatdon in intau Israel nongkon moḷoḻimod tatua, sinbá moiko mobiag motompia.”

¹⁴“Aka moiko modapotdon kon butá inta inogoi i TUHAN Allahmu kon inimu, dikabí momamping kon sigad in topodiugmu inta sinantú nongkon tungkuḷ intua.”

¹⁵“Tobatú in sakusi diábí tugat in moponiata kon intau tobatú totuudon kotaḷá; totok moyakag doyowa in sakusi inta paraḷu kon pelekara tatua.

¹⁶Aka intau tobatú mopoḷabú kon intau ibanea takin moponapud in uboḷ kon pongadilan, dá

¹⁷intau doyowa tatua musti mayá in tampat pooibadaan inta sinantú i TUHAN sinbá tantúon in imang mita bo hakim inta koyogot mopobayá in oaidan monia.

¹⁸Hakim mita musti monaridi kon pelekara tatua kotaridion totok, bo aka noniatadon kon intau tatua ain noponapud in uboḷ kon tumpaḷa intau Israel,

¹⁹sia in mustibí motarima kon hukuman inta pinoponiat kon musungnea tatua. Aka natua in aidan monimu yo moiko in monginggamádon kon inta moraat tatua.

²⁰Bayongan intau inta mokodongog kon soaḷ tatua mobaḻídon moondok, dá diádon tobatúmai in mogaid kon inta moraat natua.

²¹Dikabí motabi kon pelekara mita tatua. Nanaa in hukuman kon i monia: Nyawa toḻiuan in nyawa, mata toḻiuan in mata, ingipon toḻiuan in ingipon, ḻima toḻiuan in ḻima bo sioḷ toḻiuan in sioḷ.”