Read Mongondow ULANGAN 21 Bible Online

ULANGAN 21 - Mongondow bible

ULANGAN 21

¹“Aka kon butá inta inogoi i TUHAN Allahmu kon inimu bo kinokadapatan kon oyúon in intau minatoi iḻimod kon gobá bo diá kinotaauan mongo ki ine in noḻimod kon inia,

²dá guhanga bo hakimmu musti mayá mogukur kon koyayú in tampat inta kinouḻían kon mayat tatua mopobayá in kotá mita inta noyodiugan.

³Bo guhanga mita nongkon kotá inta totok in nodiug kon tua musti momiḻí kon sapi tobatú inta batánea inta diápa dodai in onda in pinogaid.

⁴Sapi tatua in musti diaan monia kon tampat tobatú kon diug in ongkag inta diá mogio-giot bo inta butánea diápa dodai in onda in pinajeko ande binunakan. Kon tampat tatua putoḷondon monia in sigogow in bobiagon tatua.

⁵Imang mita in Lewi musti doman mayá intua, sin mosia in musti monantú kon bayongan in pelekara popisí in aid inta moraat. Mosia tua in piniḻí i TUHAN Allahmu sin mogundoi kon i-Nia bo mosingog kon barakat podoyon kon tangoi-Nea.

⁶Bo bayongan guhanga nongkon kotá inta totok in nodiug bo musti mondarit kon ḻima monia kon tudu in sapi tatua

⁷bo moguman, ‘Deemanbí kami in noḻimod kon intau tatua, bo diá doman kinotaauan nami mongo ki ine in noḻimod.

⁸TUHAN, ampungaidon in Israel umat-Mu inta pinoḷuai-Mu nongkon Mesir. Ampungaidon in kami bo dikadon mopobaba kon inami in taḷá kon intau inta iḻimod diá kotaḷá tatua.’

⁹Dá pinongin mogaid kon onu inta sinuntut i TUHAN, yo moiko in diádon popobabaan in taḷá kon pinoḻimodan tatua.”

¹⁰“Aka moiko moparang bo ki TUHAN Allahmu nopountung kon i monimu, bo moiko mogamá kon tawanan in parang,

¹¹degá kon sigad monia tua oyúon in bobay moḷunat tobatú inta kinoibogmu bo ibogonmu in baḻíon in sia buḷoi.

¹²Diadon in bobay tatua kon baḷoimu. Kon tua in sia musti mokigonsing in buoknea,[20] mongingkonuku,

¹³bo momaḷui kon ḷambung. Sia in musti mogutun kon baḷoimu bo mononogumatoi kon kinopatoian in guyanganea tobuḷan in koonggotnea. Mopaḷut mako kon tua iko motaaudon motonibuḷoinea.

¹⁴Aka kon singgai moiduduimai bo iko doídon kon inia, iko in motaau bidon mopotabá kon inia kon ondaka in koibognea bo moiḷuatdon. Sia in diábí motaau baḻíonmu ná ata ande potaḷuimu, sin sia aindon pinakisamu mosiug takinmu.”

¹⁵“Aka ḷoḷaki tobatú in kobuḷoi kon doyowa, bo taya dua tumpaḷa nopononggadí in adí ḷoḷaki, táe adí inta muna noilahir deemanbí adí nongkon i buḷoinea inta totok in kinotabinea.

¹⁶Aka intau tatua moibog monantú mongo naonda in pososilainea kon kapunyaannea kon i adínea mita, sia in diábí motaau in momiḻí kon adí inta noilahir nongkon i buḷoinea inta totok in kinotabinea poḷat mobogoi kon adí tatua in tonsilai inta nobaḻí hak in adí guya-guyang.

¹⁷Sia in mustibí mobogoi in doyowa nosilai nongkon kapunyaannea kon adí ḷoḷaki inta guya-guyang, umpakabí adí tatua deeman ki adí i buḷoinea inta totok in kinotabinea. Hak in adí guya-guyang mustibí akúon i amánea, bo adí tatua in mustibí ogoian in haknea podudui in hukum.”

¹⁸“Aka oyúon in adí ḷoḷaki inta motogat i gina, moibog momarontak bo doí dumudui kon singog in guyanganea umpaka aindon ihukum monia in sia.

¹⁹Dá guyanganea in musti modia kon inia kon guhanga mita in kotá inta pinogutunan monia bo mopoigum sinbá adí tatua in adilon.

²⁰Mosia in mustibí moguman kon guhanga mita tatua, ‘Adí nami naa motogat in gina, moibog moḷawang bo doí dumudui kon i nami, sia moibog mopomia ibo-ibog kon doit bo monginum dapot in moḷoḷangu.’

²¹Bo intau mita ḷoḷaki kon kotá tatua musti mogarab in batu kon adí tatua modapot in matoi. Aid natua moponiata kon moiko in monginggamá kon aid moraat. Bayongan in intau kon Israel in mokodongogdon kon tua bo angoiandon in ondok.”

²²“Aka intau tobatú ihukumdon minatoi sin nogaidon kon inta moraat, bo mayatnea in binambé kon oigi,

²³yo mayat tatua in diábí motaau pomayá mako kon tua tonggobii tua, táe mustibí ḷobongon kon singgai doman tua. Mayat inta noibambé mokopoangoi kon kutuk nongkon i Allah kon butá. Dá ḷobongdon in mayat tatua sinbá moiko in diá mokokotor kon butá inta inogoi i TUHAN Allahmu kon inimu.