Read Mongondow ULANGAN 24 Bible Online

ULANGAN 24 - Mongondow bible

ULANGAN 24

¹“Umpamanea ḷoḷaki tobatú motonibuḷoi in mongodeaga tobatú, bo moiduduimai kon tua doídon in sia kon bobay tatua sin kinouḻíannea kon soaḷ inta mokooyá kon inia.[21] Bo ḷoḷaki tatua mobogoidon in surat gogaatan kon inia bo nopoguntundon kon inia nongkon baḷoinea.

²Onda intua bobay tatua pinobuḷoidon in ḷoḷaki ibanea.

³Táe naonda in noonggotmai kon tua ḷoḷaki tatua doí domandon kon inia, bo nobogoidon in surat gogaatan kon inia bo nopoguntun domandon kon inia. Ande minatoidon in ki buḷoinea nogindua tatua.

⁴Kon soaḷ doyowa tatua ki buḷoinea inta muna in diábí motaau mononibuḷoi bui kon bobay tatua; mustibí indoiannea in sia saḷaku bobay inta ain kinotoran. Aka buínea doman pobuḷoion, yo aidnea tatua in nopoompámaidon kon i TUHAN Allahmu. Moiko in diábí motaau in momia kon dosa ná moraat intua kon butá inta inogoi i TUHAN kon inimu.”

⁵“Ḷoḷaki tobatú inta bagu nobuḷoi diábí motaau in pokituotan tontara bo mayá moparang ande mogaid kon oaidan ibanea. Sia in mustipabí ḷuatan kon oaidannea kon bonu in totaong sin monompia kon tonibuḷoinea bo moposanang in gina i buḷoinea.[22]

⁶Aka moiko mopoḷuan in onuka kon intau ibanea, dikabí mogamá kon batu poḷoḻintog in intau tatua kon gandum sin baḻíonmu jaminan. Sin aka gamáanmu in batu tatua, yo moiko in nogagowdon kon onu inta pakéon monia pomiag kon tombonu in baḷoinea.

⁷Intau inta nodakop kon intau tobangusanea bo binaḻínea ata ande pinotaḷuinea, yo mustibí hukumon matoi. Aid monimu natua in monginggamábí kon inta moraat tatua.

⁸Aka oyúon takit in kuḻit inta mokobahaya, yo aidaidon kopira in onu inta pinarenta in imang mita Lewi kon inimu; duduiaidon in topotundú mita inta pinotaauku kon i monia.

⁹Toropdon onu in inaidan i TUHAN Allahmu kon i Miryam kon daḷan binayáanmu iḻumuai nongkon Mesir.

¹⁰Aka moiko mopoḷuan in onuka kon tumpaḷa intau, dikabí tumuot kon baḷoinea sin mogamá kon ḷambungnea sin baḻíon jaminan.

¹¹Oḷatdon kon ḷuai bo pomayádon mako bá siadon tontaní in modia mangoi kon inimu.

¹²Aka intau tatua nobiag nobogá, ḷambung tatua in dikabí tahangonmu tonggobii,

¹³táe mustibí pobuionmu kon inia pomuḷoi in doḷom, sinbá motaau pakéonnea pomuḷoi in mosiug. Dá sia in mopoyaputdon in sukur moantó bo iko in koibogdon i TUHAN Allahmu.

¹⁴Dika mondorot kon intau totondanan inta nobiag nobogá bo umuran kodaitan, pinomayá intau tobangusamu ande intau ango-angoi inta nogutun kon kotámu tobatú.

¹⁵Pomuḷoi in singgai kon dodai in mata in singgai diápa tumoyop mustidon uboḻian monimu in tondan in pinogaidannea kon singgai tatua; sia in mogoḷat mako kon doit tatua sin pakéonnea. Aka diá uboḻian monimu in tondan pinogaidannea, sia in mokuanidon kon i TUHAN sin mokituḷung kon i monimu, bo moiko in poniatadon kon dinosa.

¹⁶Dika hukumon matoi in intau tatua popisí in aid moraat inta inaidan i adínea, bo dika mohukum matoi kon adí popisí in aid moraat inta inaidan in guyanganea. Batúan intau tongábí motaau hukumon matoi popisí in aidneabí tontaní.

¹⁷Dika mogagow kon hak in intau ango-angoi bo in adí uno-unon, bo dika mogamá kon pakeang in boba-bobay tobatú sin baḻíon jaminan.

¹⁸Toropdon kon moiko in nokoimontandon nobaḻí ata kon Mesir bo pinoḷuai i TUHAN Allahmu; tuamai in akuoi mobogoi in atorang tanaa kon inimu.

¹⁹Aka moiko mosipundon kon bungai in boyómu, dikabí in moiko mobui sin mopuyut kon gandum inta kinotaḷáan. Gandum tatua in mustibí pomayádon mako kon intau ango-angoi, adí uno-unon bo intau inta dongkadon boba-bobay, sinbá moiko barakatan i TUHAN Allahmu kon bayongan oaidanmu.

²⁰Naonda in moiko komintandon mosipú kon bungai in zaitun bo bungai in anggurmu, dikabí mobui sin mosipun kon bungainea mita inta kinotaḷáan. Tua in mustibí pomayá mako monimu kon intau ango-angoi, kon adí uno-unon bo kon intau inta dongkadon boba-bobay.

²²Toropdon kon moiko in nokoimontandon nobaḻí ata kon Mesir; tuamai in akuoi mobogoi in atorang tanaa kon inimu.