Read Mongondow ULANGAN 25 Bible Online

ULANGAN 25 - Mongondow bible

ULANGAN 25

¹Umpamanea intau in Israel doyowa minayá kon pongadilan sin mopongadu kon pelekara, bo inta tobatú in pinoniata kon diá kotaḷá, bo ibanea in kotaḷá.

²Aka inta kotaḷá tatua pinopoḷabúan in hukuman sambokon, yo ki hakim in mustibí moguman kon inia kon tumongkob. Kotongonu sambokon, tua in moidoyonbí kon aid moraat inta inaidannea,

³táe diábí motaau in moiḻiu kon koopat nopuḷú sambokon. Aka moiḻiu, dá mangaḻenea kon tua intau tatua siningkuḻedon kon tayowon in intau mobayong.

⁴Dika momompon kon bibig in sapi inta yogot moḻintog kon gandum.”

⁵“Aka intau ginaḷum bo mogutun moyotakin, bo tobatú kon sigad monia minatoi tongá diá kogadí kon ḷoḷaki, dá ki baḷunea in diábí motaau motonibuḷoi in intau ibanea kon ḷuai in ginaḷum in buḷoinea inta ain minatoi. Ginaḷum i buḷoinea in mustibí mononibuḷoi kon bobay-bobay tatua.

⁶Adí ḷoḷaki guya-guyang monia in mustibí anggapon adí i utat inta ain minatoi tatua, sinbá oyúon in buínea kon sigad in bangusa Israel.

⁷Aka intau tatua doí motonibuḷoi takin i baḷú i utatnea, dá bobay tatua in musti mayá kon tayowon in guhanga in kotá bo moguman, ‘Ki ipáku in doí mopobayá in oaidannea mobogoi kon i utatnea in buí tobatú kon sigad in bangusa Israel.’

⁸Bo guhanga mita in ḻipú kon kotá in musti mogoiní kon intau tatua bo moyosingog takinnea. Aka sia umuran doman doí,

⁹ki baḷú i utatnea in musti dimiug kon inia kon tayowon in guyanga mita in ḻipú kon kotá, mogamá kon silop in intau tatua, monduyá kon pogotnea bo moguman, ‘Nanaa in musti popoaid kon intau inta doí mobogoi in buí kon i utatnea.’

¹⁰Bo kon sigad in intau Israel koluarga in intau tatua tangoiondon ‘Koluarga in intau inta pinogunggakan kon silop.’ ”

¹¹“Aka intau ḷoḷaki doyowa koyogot moropatoi bo ki buḷoi in intau tobatú moramuji motuḷung kon i buḷoinea takin norangkom kon dodiaan in musung i buḷoinea,

¹²yo pongkódon in ḻima in bobay tatua bo dikabí motabi kon inia.

¹³Dika monguboḷ takin momaké in pononimbangan bo ukuran inta diá totuu.

¹⁵Paké in pononimbangan bo ukuran inta moitutui sinbá moumur in kobiaganmu kon butá inta inogoi i TUHAN Allahmu kon inimu.

¹⁶Ki TUHAN Allahmu in doíbí kon intau inta moibog monguboḷ.”

¹⁷“Toropdon naonda in pinogogaid in intau Amalek kon i monimu kon dodai in moiko kon binayáan iḻumuai nongkon Mesir.

¹⁸Mosia in diábí noondok kon i Allah bo nonubu kon i monimu nongkon tumi kon dodai in moiko noḷopí totok bo kinodaitan in ropot, bo noḻimod kon bayongan in intaumu mita inta dongkadon yumoyigamai in mayá kon tumi.

¹⁹Tuamai, aka ki TUHAN Allahmu mobogoidon in butá tatua kon inimu bo moiko moamandon nongkon bayongan musung inta nogutun kon ḻibumumai, yo bayongan intau in Amalek tua in mustibí modait ḻimodon dá mosia in diádon toropon bui. Dika koḻiongan!”