Read Mongondow ULANGAN 27 Bible Online

ULANGAN 27 - Mongondow bible

ULANGAN 27

¹Onda intua moyotakin in itoi mita in Israel, ki Musa nopotaau in koyow tanaa kon bangusa tatua, “Duduiaidon bayongan in parenta inta pinotaauku kon inimu singgai naa.

²Kon singgai moiko ḷumoḷan kon Ongkag in Yordan sin tumuot kon butá inta inogoi i TUHAN Allahmu kon inimu, moiko in mustibí moposindog in tongonumai in batu moḷoben bodongka uḷakan monimu in kapur.

³Paisdon kon batu mita tatua in bayongan tosingogon nongkon hukum mita tanaa. Aka moiko tumuotdon kon butá inta nooyúon bo mopia inta pinodandi i TUHAN, Allah in mogoguyangmu kon inimu,

⁴bo moiko kon ḷoḷandon in Ongkag in Yordan, yo moiko in mustibí mayá in Buḷud in Ebal. Kon tua in moiko musti moposindog bo mopouḷak in kapur kon batu mita tatua ná inta pinarentaku kon inimu singgai naa.

⁵Kon tampat tatua musti doman posindogon monimu kon i TUHAN Allahmu in mezbah tobatú nongkon batu mita inta diápa dodai in onda in kinotugatan in pakakat mita uatoi,

⁶sin batúan in mezbah inta pinosindog kon i TUHAN Allahmu in musti pomiaan nongkon batu inta diápa nogaat. Kon tudu in mezbah tatua moiko in musti moposumba in kuruban mita payongon.

⁷Posumbadon doman in kuruban dodameanmu bo kaandon kon tua takin koḷunganga in gina kon tayowon i TUHAN Allahmu.

⁸Kon tudu in batu inta binutakan in kapur tatua musti paison monimu kosilangon in bayongan tosingogon nongkon hukum mita i Allah.”

⁹Onda intua moyotakin in imang mita in Lewi, ki Musa noguman kon bayongan bangusa in Israel, “Utat mita, tarukirapa bo indongogai! Singgai naa moiko ain nobaḻí umat i TUHAN Allahmu.

¹⁰Tuamai duduiaidon in ki TUHAN Allahmu bo aidaidon in bayongan parenta-Nea inta pinotaauku kon inimu singgai naa.”

¹¹Bo ki Musa noguman kon bangusa Israel,

¹²“Naonda in moiko ḷumoḷan kon Ongkag in Yordan, suku Simeon, Lewi, Yohuda, Isakhar, Yusup bo Benyamin musti simindog kon tudu in Buḷud in Gerizim kon dodai in singogondon in barakat kon bangusa tanaa.

¹³Kon dodai in siningog in kutuk, suku Ruben, Gad, Asyer, Zebulon, Dan bo Naptali musti simindog kon tudu in Buḷud in Ebal.

¹⁴Intau mita in Lewi musti mosingog kon tosingogon mita tanaa koḷangonon bo Intau in Israel musti motubag, ‘Amin’.

¹⁵Intau mita in Lewi: ‘Kinutuk in intau mita inta mogaid kon patong nongkon batu, kayu ande logam, bo sumbaannea umado-adop; ki TUHAN in doíbí kon posumbaan kon toḻindua in Allah!’ Bayongan rayat: ‘Amin!’

¹⁶‘Kinutuk in intau inta diá mohoromat kon guyanganea bo mopomayá mako kon i monia.’ ‘Amin!’

¹⁷‘Kinutuk in intau inta monisí kon sigad in butá in topodiugneamai.’ ‘Amin!’

¹⁸‘Kinutuk in intau inta nopoḷaḻe kon intau bilog.’ ‘Amin!’

¹⁹‘Kinutuk in intau inta mogagow kon hak in intau ango-angoi, adí uno-unon bo inta dongka boba-bobay.’ ‘Amin!’

²⁰‘Kinutuk in intau inta mopoompámai kon i amánea popisí in nosiugdon takin buḷoi tobatú i amánea.’ ‘Amin!’

²¹‘Kinutuk in intau inta nogagak kon mahaḷuk.’ ‘Amin!’

²²‘Kinutuk in intau inta nosiug takin i utatnea totok bobay, ande ki utatnea inta toamáan ande toinaan.’ ‘Amin!’

²³‘Kinutuk in intau inta nosiugdon takin i guyánea.’ ‘Amin!’

²⁴‘Kinutuk in intau inta inumado-adop noḻimod kon intau.’ ‘Amin!’

²⁵‘Kinutuk in intau inta notarima kon doit pinosogó sin moḻimod kon intau inta diá kotaḷá.’ ‘Amin!’

²⁶‘Kinutuk in intau inta diá nogintompod kon hukum bo totundú i Allah kon bonu in dodianea.’ ‘Amin!’ ”