Read Mongondow ULANGAN 29 Bible Online

ULANGAN 29 - Mongondow bible

ULANGAN 29

¹Naadon in tosingogon mita in dodandian inta pinodoyon kon parenta i TUHAN pinomia i Musa takin bangusa Israel kon dodai in mosia kon butá in Moab. Dodandian tatua in nobaḻí indugang in dodandian inta pinomia i TUHAN takin i monia kon Buḷud in Sinai.

²Ki Musa nogoiní kon bayongan intau in Israel noyosipun, bodongka noguman kon i monia, “Moiko ain nokoontong tontaní kon onu in inaidan i TUHAN kon i datu in Mesir, intau mita moḷobennea bo bayongan in butánea.

³Moiko in nokoontong domandon kon bodito mita inta motoyang, mujizat mita bo inta mokoherang mita inta pinomia i TUHAN.

⁴Táe dapot in tanaa mako diápa inogoi-Nea in moiko momangaḻe kon bayongan inta kinorasaan monimu tatua.

⁵Opat nopuḷú notaong in koonggotnea ki TUHAN nodia kon i monimu nongin padang gurun, tongá pakeang bo silopmu in diábí nokoyongan.

⁶Moiko in diábí koroti kaanon, tubig in anggur ande oinumon mokoḷoḷangu, táe ki TUHAN nobogoi in bayongan inta paraḷuon monimu sinbá kotaauan monimu kon Siabí in ki TUHAN Allahmu.

⁷Bo naonda in kita nodapot in tampat tanaa, ki datu Sihon nongkon Hesybon bo ki datu Og nongkon Basan namangoi nonubu kon i naton táe sinaḷow naton in mosia.

⁸Butá monia inagow naton bo sinilai naton kon suku in Ruben, in Gad bo tongosilai in kon suku in Manasye.

⁹Dá moiko in musti mokoposatia in dumudui kon bayongan dodandian tanaa, sinbá moiko mokouḻí kon bayongan inta sinayakmu.

¹⁰Singgai naa moiko komintan in simindog kon tayowon i TUHAN Allahmu, bayongan tongguḷu in suku, guhanga mita in ḻipú, porwira, bayongan in ḷoḷaki,

¹¹bobay, mongoadí bo bayongan intau ango-angoi inta nogutun kon sigad monimu bo motuḷung kon i monimu momongkó kon kayu bo momotaan kon tubig.

¹²Ki TUHAN Allahmu nomia kon dodandian takin monimu, bo moiko komintan noyosipun kon naa sin mopoyotogot in dodandian tatua takin motarima kon kowajibannea mita.

¹³Pinongin dodandian tatua ki TUHAN singgai naa nopobaḻídon kon i monimu bangusa-Nea, bo Sia in nobaḻí Allahmu ná inta pinodandi-Nea kon inimu bo kon mogoguyangmu ki Abraham, ki Ishak bo ki Yakub.

¹⁴Dodandian tatua bo bayongan in kowajibannea pinomia i TUHAN deemanbí tongá takin i monimu,

¹⁵táe takinbí batúan in intau inta singgai naa sinimindog kon naa, kon tayowon i TUHAN Allah naton, bo takin doman buí naton kon singgai moiduduimai.”

¹⁶“Kinotoropanpabí monimu in naonda in kobobiag naton kon Mesir bo naonda in kita minayá nongin butá in bangusa mita ibanea.

¹⁷Moiko ain nokoontong kon patong mita berhala monia inta mokorongó nongkon kayu, batu, saḷaka bo buḷawan.

¹⁸Dá ḷukadaidon sinbá diá modapot in tobatúmai in intau kon sigad monimu, ḷoḷaki ande bobay, koluarga ande suku inta sinimindog kon naa, in monoḻikud kon i TUHAN Allah naton sin mayá mosumba kon ilah mita in bangusa ibanea. Oaid natua naonda bo uakat inta nobiag nobaḻí pinomuḷa inta pait bo korasum.

¹⁹Kon sigad monimu inta nokodongog kon tuntutan inta bo motogat tatua yo donaaidon oyúon in morai kon nasibnea tua in umuran tantú mopia, umpakabí in sia tumontogat dumudui kon daḷannea tontaní. Soaḷ tatua in mokoyopú kon i monimu komintan, intau mita inta moraat ande inta mopia.

²⁰Ki TUHAN in diábí mongampung kon intau ná tatua. Táe, Sia in kotugatanbí in torú i TUHAN inta moḷoben, bo bayongan bodito inta pinais kon bonu in buk tanaa in moiumabí kon inia modapot in sia yopúon i TUHAN.

²¹Ki TUHAN in mopobaḻíbí kon inia mobaḻí contoh kon bayongan in suku Israel, bo mohukum kon inia pongin kutuk inta kinotangoian kon bonu in dodandian inta pinais kon bonu in buk tanaa, buk in hukum i TUHAN.

²²Kon singgai moiduduimai, buímu bo intau ango-angoi nongkon butá moyayú in mokoontongbí kon bodito mita bo yoyiga inta poangoi i TUHAN kon butámu.

²³Gobámu mita in mobaḻídon butá inta moingkag bo kokoḷoban in balerang bo simuton. Butánea in diádon motaau bunakan bo bonok in diádon mobiag kon tua. Butámu in mobaḻídon ná kotá mita in Sodom bo Gomora, Adma bo Zeboin inta iyompat i TUHAN kon dodai in noyaat totok in gina-Nea.

²⁴Dá bayongan intau kon dunia in moḻibó, ‘Nongonu sin ki TUHAN nomiabí kon natua kon butá monia? Nongonu sin Sia in totokbí in sinumorú natua?’

²⁵Bo nanaa in tubagnea, ‘Popisí in mosia nonoḻikud kon dodandian takin i TUHAN, Allah in mogoguyang monia; dodandian inta pinomia-Nea takin i monia kon dodai in Sia nodia kon i monia iḻumuai nongkon Mesir.

²⁶Mosia nogundoi kon ilah mita ibanea inta diá kinotaauan monia, bokaka diá ogoi i TUHAN in mosia mosumba kon ilah mita tatua.

²⁷Tuamai ki TUHAN sinumorú kon umat-Nea bo nopoangoi kon butá monia in bayongan bodito inta pinais kon bonu in buk tanaa.

²⁸Torú i TUHAN noiḷuai námai tua in kotoyangnea, bo kon bonu in torú-Nea inta totok in moḷoben tatua Sia nogugut kon bangusa Israel nongkon butá monia bo nopogarab kon i monia minayá in butá in intau dá mosia in nogutundon kon tua.’

²⁹Tongonu nopasaḷ in binuni i TUHAN Allah naton; táe hukum-Nea in pinoniata-Nea kon i naton, bo kita takin buí naton in musti umuran dumudui modapot in adí bo ompu.”