Read Mongondow ULANGAN 30 Bible Online

ULANGAN 30 - Mongondow bible

ULANGAN 30

¹“Tanaa in motaaudon momiḻí mongo barakat ande kutuk ná inta ininsilanganku kon inimu. Aka moiko nokorasadon kon bayongan in yoyiga tatua bo nobiag kon sigad in bangusa mita ango angoi kon tampat pinoporaritan i TUHAN Allahmu, yo moiko in mokotorop bidon kon onu in piḻíon inta inogoiku kon inimu.

²Aka moiko bo buímu moibog mobui kon i TUHAN Allahmu, bo takin ḻimbatú in gina dumudui kon parenta-Nea mita inta pinotaauku kon inimu singgai naa,

³dá ki TUHAN Allahmu in monotabibí kon i monimu. Moiko in diaan-Neabí bui nongkon bangusa mita inta pinoporangkapan kon i monimu, bo bui ogoian in kobiagan motompia.

⁴Umpakabí moiko noirangkapdon kon dunia naa, sipunonbí i TUHAN Allahmu in moiko bo diaan mobui.

⁵Dá buidon mouḻí monimu in butá inta koḻipod pinogutunan in mogoguyangmu. Bo moiko in baḻíondon mobiag totok motompia, bo baḻíon-Neadon in moiko mobayong moiḻiu kon kobayong in mogoguyangmu.

⁶Moiko bo buímu in ogoiandon in gina inta motoindudui, dá moiko in motabidon kon i TUHAN Allahmu takin ḻimbatú in ginamu sinbá umurandon mogutun kon butá tatua.

⁷Bayongan in kutuk tatua in popoḷabú-Neadon kon musungmu mita inta mondoí bo mondorot kon i monimu.

⁸Moiko in buidon motoindudui kon i TUHAN bo mopobayádon in bayongan parenta-Nea inta pinotaauku kon inimu singgai naa.

⁹Ki TUHAN Allahmu in mopobaḻídon in bayongan totayakmu motarima kon bungainea; moiko in mokouḻídon kon adí mobayong bo bobiagon mobayong; gobámu mita in mobogoibí in bungai in boyó inta mobayong totok. Ki TUHAN takin pia in gina-Nea mobogoibí in kobiagan motompia kon i monimu, ná doman pia in gina-Nea mobogoi in kobiagan motompia kon mogoguyangmu.

¹⁰Táe moiko in mustibí motoindudui kon i TUHAN Allahmu bo dumudui kon bayongan in hukum-Nea inta pinais kon bonu in buk tanaa, buk in Hukum i TUHAN. Moiko in mustibí mobui kon i-Nia takin ḻimbatú in ginamu.

¹¹Parenta inta pinotaauku kon inimu in diábí totok mororiga kon inimu bo diábí doman moiḻiu in yayú.

¹²Tampatnea in deemanbí kon ḷangit, dá moiko in moḻibó, ‘Ki ine in mamonik mogamá kon tua sin pakéon naton, sinbá kodongogandon naton bo motaaudon duduian?’

¹³Tampatnea in deemanbí doman kon ḷoḷan in dagat, dá moiko in moḻibó, ‘Ki ine in mayá ḷumoḷan kon dagat sin mogamá kon tua bo pakéon naton, sinbá kodongogan naton bo motaaudon duduian?’

¹⁴Dika moḻibó natua, sin parenta tatua nodiugdon kon inimu. Kinotaauandon monimu bo kinohapalan bidon monimu, dá dongka bidon mopoaid.

¹⁵Singgai naa moiko in motaau bidon momiḻí kon inta mopia ande inta moraat, mobiag ande matoi.

¹⁶Singgai naa akuoi momarenta kon i monimu sinbá motabidon kon i TUHAN Allahmu bo motoindudui kon i-Nia poḷat mogaid kon bayongan in parenta-Nea sinbá moiko in mobiag motompia bo mobaḻí bangusa inta moḷoben. Ki TUHAN Allahmu in momarakatbí kon i monimu kon butá inta diádon moonggot in ḻitúan monimu.

¹⁷Táe aka moiko bo diá motoindudui bo doí doman mokidongog, bo mopomayá doman mako in awakmu poḷaḻeon sin mosumba kon ilah mita ibanea,

¹⁸yo notantú bidon kon yopúon in moiko, bo kobiaganmu in diábí moonggot kon butá inta diádon moonggot in ḻitúan monimu. Toropdon! Tua in pinotaaukudon kon i monimu singgai naa.

¹⁹Tanaa in motaau bidon moiko momiḻí mongo mobiag ande matoi, barakat i TUHAN ande kutuk-Nea. Ḷangit bo butá oiníonku mobaḻí sakusi kon simpod in tosingogonmu. Piḻídon in mobiag.

²⁰Kotabibí in ki TUHAN Allahmu, duduiaidon in Sia, bo pokosatiadon kon i-Nia. Dá moiko bo buímu in mobiag moumur kon butá inta pinodandi i TUHAN kon mogoguyangmu, ki Abraham, ki Ishak bo ki Yakub.”