Read Mongondow ULANGAN 33 Bible Online

ULANGAN 33 - Mongondow bible

ULANGAN 33

¹Kon dodai in diápa minatoi, ki Musa, totabá i Allah, nomarakat kon bangusa Israel pinongin tosingogon mita tanaa:

²“Ki TUHAN namangoi nongkon Buḷud in Sinai; Sia nomuká kon tudu in Edom naonda bo mata in singgai bo nongkon Buḷud in Paran sia nonimbayag kon umat-Nea. Sia sinakinan in mopuḷú noribu in malaekat; tuḷú nodokot kon dotá in koḷanan-Nea.

³Totuu, ki TUHAN in motabi kon bangusa-Nea[26] Sia in mogoḻiungbí kon bayongan in intau inta nobaḻí kapunyaan-Nea. Koḻigai in kita dumokó kon tayowon in sioḷ-Nea bo dumudui kon parenta-Nea mita.

⁴Hukum inta inogoi i Musa in duduian naton, kapunyaan inta totok in koboḻi kon bangusa tanaa.

⁵Kon dodai in Israel noyosipun takin itoinea mita, ki TUHAN in nobaḻí Datu kon umat-Nea.”

⁶Ki Musa noguman nanaa kon suku i Ruben, “Igumon mako suku i Ruben diá moyopú, umpaka tongá topiḻik in intaunea.”

⁷Bo kon suku i Yohuda, ki Musa noguman: “O TUHAN, indongogaipa in kuani in Yohuda; potobatúdon bui in mosia takin bangusanea. Takinaipa in mosia moparang, o TUHAN, tuḷungaipa in mosia monayow kon musung monia.”[27]

⁸Bo kon suku i Lewi ki Musa in noguman: “Takin Urim bo Tumim[28] pinoniata-Mu in ibog-Mu, pinongin intau in Lewi, mogogundoi-Mu inta mosatia. Iko nonungkuḷdon kon i monia kon Masa, bo nobobayowan monia kon bokaká in Meriba.

⁹Mosia in mosatia kon ini-Mu noiḻiu kon ibanea mako, noiḻiu kon guyanga bo ginaḷum motoḷuadí. Parenta-Mu mita in dinuduian monia, dodandian-Mu in inintompodan monia.

¹⁰Mosia notundú kon umat-Mu dinumudui kon bayongan in parenta-Mu bo noposumba in kuruban kon tudu in mezbah-Mu.

¹¹O TUHAN, tuḷungaipa in suku tanaa sinbá moropot, igumon mako Iko in moibog kon oaidan monia. Yopúdon in bayongan musung monia dá diádon mokosindog bui.”

¹²Bo kon suku i Benyamin sia noguman: “Naadon in suku inta kinotabi i TUHAN. Sia nogoḻiung kon i monia singgai bo doḷom bo nogutun kon sigad monia.”[29]

¹³Bo kon buí i Yusup sia noguman: “Igumon mako in butá monia barakatan i TUHAN in uyan, bo tubig nongkon ḻimonag in butá.

¹⁴Poigumon mako pomuḷoi in sempo in pomomungai pinomuḷa ayop mita momungai modatog totok ayop mita inta totok in mongopia inta moḷutú kon pangkoinea.

¹⁵Poigumon mako in buḷudnea mita inta nongkon tungkuḷ intua mopuḻing bungai in boyó inta totok in mopia.

¹⁶Igumon mako butánea in mopuḻing in bayongan in inta totok mopia, bo barakatan in kopopia i TUHAN inta nosingog nongkon ḻimbuyun inta nodokot. Igumon mako barakat tatua in moponag kon buí i Yusup, sin sia tua inta nobaḻí itoi kon sigad i utatnea mita.

¹⁷Kon i Yusup oyúon in ropot in bantong, bo tungoi in sapi in kayuon tuata in ribuan Manasye bo puḷúan ribu in Epraim. Bangusa mita in sinungoinea bo inundudnea nodapot in popod in butá.”

¹⁸Bo kon suku mita i Zebulon bo i Isakhar sia noguman: “Igumon mako Zebulon mobiag motompia sin bobayáannea mita, bo Isakhar in motompia kon pinononḷoḷaigannea mita.

¹⁹Mosia in nogoiní kon bangusa mita minayá in buḷud monia bo moposumba in kuruban inta mobanar kon tua. Mosia in mokouḻí kon kaoyúonan nongkon dagat, bo nongkon bungaion kinoouputbí in pintad.”

²⁰Bo kon suku i Gad sia in noguman: “Dinayo-dayowdon in ki Allah inta noginḷoben kon butá in Gad. Gad nogoḷat mako naonda bo singa tobatú sin moyabi kon kokaḷ ande kuḻit in uḷu.

²¹Butá inta totok in mopia ginamá sin ogoi kon inia tonsilai in itoi inogoi kon i monia. Mosia in nopoaid in bayongan parenta bo hukum i TUHAN kon dodai in itoi mita in Israel noyosipun noyotakin.”[30]

²²Bo kon suku i Dan sia noguman: “Bo naonda bo singa batánea inta iḷumanduk in iḻumuai nongkon Basan.”

²³Bo kon suku i Naptali sia in noguman: “Naptali in inogoian in barakat mobarong bo tabi i TUHAN; butánea in nongkon Danow Galilea nodapot kon toḷatan.”

²⁴Bo kon suku i Asyer sia in noguman: “Ki Asyer binarakatan noiḻiu kon suku mita ibanea; igumon mako in sia in nobaḻí inta kinotabi i utatnea mita, bo pangkoi in zaitun mobiag moḷumbá kon butánea.

²⁵Igumon mako kotánea mita in oḻingoian in ḷoḻingkop mita in ngara nongkon bitú bo uatoi sinbá kobiagannea in umuran moaman bo motompia.”

²⁶“Ei Israel! Diábí in ilah ná ki Allahmu; Sia in minayá kon ḷangit diá in poḻiuan bo nongin goḷom sin motuḷung kon i monimu.

²⁷Ki Allah in umuranbí mobaḻí mototuḷungmu, kokaḷ-Nea inta mononoi in motonoi kon i monimu. Sia in noguntun kon musung nongkon tayowon monimu, bo nopotabá kon i monimu noyopú kon i monia.

²⁸Dá buí i Yakub in mobiagbí takin diá in tongkuḷabot kon butá inta nopuḻing in gandum bo tubig in anggurnea, bo binutakan in topuot nongkon ḷangit.

²⁹Kosanangdon in iko, ei Israel! Diábí in bangusa ná iko pinosaḷamat i TUHAN. Ki TUHAN in naonda bo pitow bo oḻingoi kon inimu; sin moduḷu kon inimu bo mobogoi in kauntungan kon inimu. Musungmu mita in mamangoibí mokikotabimai, bo iko in totokbí in moritak kon i monia.” [31]