Read Mongondow ULANGAN 34 Bible Online

ULANGAN 34 - Mongondow bible

ULANGAN 34

¹Bo ki Musa nonaḷámai kon rata in Moab bo notakod kon Buḷud in Nebo, kon tudu totok in Pisga kon dotá in pomukaan kon Yerikho. Kon tua pinoontong i TUHAN kon inia in bayongan butá tatua, inta: Butá in Gilead nopobayá ná utuan kinoyoyayú in kotá in Dan;

²bayongan in wilayah in Naptali; wilayah in Epraim bo Manasye, wilayah in Yohuda nopobayá in toyopan kinoyoyayú in Dagat Toyuak;

³kon dotá in toḷatan Yohuda bo rata inta nobendar nongkon Zoar nopobayá in Yerikho, kotá inta nopuḻing in kurma.

⁴Bo ki TUHAN noguman kon i Musa, “Tuata in butá inta pinodandi-Ku kon i Abraham, kon i Ishak bo kon i Yakub ogoi kon buí monia. Poontong-Ku kon inimu, Musa, tongá diábí ogoi-Ku in iko mayá intua.”

⁵Bo minatoidon in ki Musa inta mogogundoi i TUHAN tua kon butá in Moab, ná inta munadon pinoguman i TUHAN.

⁶Ki TUHAN noḷobong kon inia kon ḷopá tobatú kon Moab kon ḷoḷan in kotá in Bet-Peor, táe dapot in singgai naa diábí tobatúmai intau in nonotaau totok mongo kon onda in poḷoḷobongannea.

⁷Ki Musa minatoi kon dodai in umur mogatut bo doyowa nopuḷú notaong. Ropotnea in diábí nogaat bo matanea umuranpabí doman motarang.

⁸Kon rata in Moab intau mita in Israel mongombaḷmai kon i Musa bo nonogumatoi toḷu nopuḷú nosinggai in koonggotnea.

⁹Ki TUHAN in nobogoi kon i Yosua ki adí i Nun in kabijaksanaan sin sia in piniḻídon i Musa monoḻiu kon inia. Bangusa Israel motoindudui kon i Yosua bo nopobayá in parenta mita inta inogoi i TUHAN kon i monia pinongin i Musa.

¹⁰Kon Israel in diá bidon in nabi ná ki Musa inta nongonguman i TUHAN noyogintayowan.

¹¹Diádon in mogaid kon mujizat mita bo inta mokoherang mita ná inta pinomia i Musa kon butá in Mesir, kon i datunea bo kon intaunea mita moḷoben podudui in parenta i TUHAN.

¹²Diá in momia kon oaidan mita inta motoyang bo inta mokoondok ná inta pinomia i Musa kon tayowon in bayongan bangusa israel.