Read Mongondow ULANGAN 6 Bible Online

ULANGAN 6 - Mongondow bible

ULANGAN 6

¹“Ki TUHAN Allahmu in nopotabá kon inakó motundú kon bayongan hukum tanaa kon inimu sinbá aidan monimu kon butá inta diádon moonggot bo bayáan monimu pogutunan.

²Moiko bo buímu musti umuran mohoromat kon i TUHAN Allahmu bo dumudui kon bayongan hukum-Nea inta pinotaauku kon inimu, sinbá moumur in kobiagan monimu kon butá tatua.

³Tuamai indongogaidon utat mita, pokosatiadon in mogaid kon tua, sinbá mopia in kobiagan monimu bo mobaḻí bangusa inta moḷoben kon butá inta nooyúon bo inta mopia, ná inta pinodandi i TUHAN Allah in mogoguyang naton.

⁴Utat mita, toropdon! Tongábí ki TUHAN, bo tongábí ki TUHAN tontaní in Allah naton![6]

⁵Kotabibí in ki TUHAN Allahmu takin bayongan ginamu: Poniata intua kon bonu in kobiaganmu bo oaidmu.

⁶Dika mokoimontanmai in mokoḻiong kon parenta mita inta inogoiku kon i monimu singgai in naa.

⁷Tundúdon kon i adímu mita. Ouman intua kon bonu in baḷoi bo kon ḷuai in baḷoi, kon dodai in mogogai bo kon dodai in mogaid.

⁸Popobogot kon kokaḷmu bo popopaké kon pogotmu[7] sin toro-toropon.

⁹Paisdon kon oigi in ngara in baḷoimu bo kon ngaramu moḷoben.”

¹⁰“Ki TUHAN Allahmu nodandi kon mogoguyangmu ki Abraham, ki Ishak bo ki Yakub kon Sia in mobogoibí in butá tatua kon inimu. Kotánea mita moḷoben bo mopia, bo deemanbí moiko in noposindog intua.

¹¹Baḷoinea mita in mopuḻing in pakakat mita inta mopia, bo deemanbí moiko in momonu kon tua. Moiko in mokodungkuḷ kon parigí mita, bo deemanbí moiko in nongaḻi. Moiko in mokouḻí kon gobá mita in anggur bo zaitun, bo deemanbí moiko in nomuḷa. Aka ki TUHAN modia kon i monimu mayá in butá tatua, bo oyúondon in bayongan inta kinoibog monimu kaanon,

¹²yo ḷukadai kopiaan sinbá diá in moiko mokoḻiong kon i TUHAN inta ain nopoḷuai kon i monimu nongkon Mesir, tampat pinononggataan kon i monimu.

¹³Horomat in ki TUHAN, Allahmu bo kosundudon kon i-Nia tontaní, bo aka moiko mongibot, yo aidai intua tongá podoyon kon tangoi-Nea.

¹⁴Dika mosumba kon ilah mita ibanea inta sinumba in bangusa mita ibanea inta nogutun kon diugmai monimu.

¹⁵Aka moiko mosumba kon ilah mita ibanea, dá moiko in umuranbí kotugatan in torú i TUHAN Allahmu bo yopúon-Nea komintan, sin ki TUHAN Allahmu inta kon sigad monimu nion in doíbí potongkaion in onuka.

¹⁶Dika monungkuḷ kon i TUHAN Allahmu ná inta pinomia monimu kon Masa.

¹⁷Duduiaidon in bayongan hukum inta inogoi i TUHAN Allahmu kon inimu.

¹⁸Aidaidon onu inta podudui kon i TUHAN mopia bo moadil, dá moiko in mobiagbí motompia. Butá mopia inta pinodandi i TUHAN kon mogoguyangmu, in mobaḻíbí kapunyaanmu,

¹⁹bo moiko in moguntunbí kon musungmu mita ná inta pinodandi i TUHAN.

²⁰Kon singgai moiduduimai adímu mita in moḻibóbí kon inimu, ‘Nongonu sin ki TUHAN Allah naton nopotabábí kon i naton dumudui kon bayongan parenta tatua?’

²¹Dá musti tubagan monimu nanaa, ‘Koḻipod in kita nobaḻí ata i datu in Mesir, bo ki TUHAN in nopoḷuat kon i naton takin ropot inta moḷoben.

²²Kami tontaní in nokoontong kon ki TUHAN nomia kon inta mokoherang mita bo inta mokoondok mita kon intau in Mesir bo datu monia takin bayongan intau moḷoben monia.

²³Iḷuat-Nea in kita nongkon Mesir, sin diaan-Nea mangoi in naa in kita, bo butá tanaa inogoi-Nea kon i naton ná inta pinodandi-Nea kon mogoguyang naton.

²⁴Ki TUHAN Allah naton in nopotabá kon i naton mogaid kon bayongan parenta tatua bo mohoromat kon i-Nia. Aka kita momia natua, umuran-Nea ḷukadan in bangusa naton sinbá umuran mobiag motompia.

²⁵Aka mokoposatia in kita in dumudui kon bayongan inta pinarenta i TUHAN Allah naton kon i naton,[8] dá umuran-Nea koibog in kita.’ ”