Read Mongondow ULANGAN 7 Bible Online

ULANGAN 7 - Mongondow bible

ULANGAN 7

¹“Ki TUHAN Allahmu in modiabí kon i monimu mayá in butá inta bain pogutunan monimu, bo mobayongbí in bangusa inta poguntunon-Nea nongkon tua. Koonto-ontongmubí in Sia moguntun kon pitu in bangusa inta moḷobe-ḷoben bo moropo-ropot nongkon i monimu, tuata in intau mita in Het, Girgasi, Amori, Kanaan, Peris, Hewi bo Yebus.

²Aka ki TUHAN Allahmu moposarakan in bangusa mita tatua kon bonu in kawasamu bo moiko monaḷowdon kon i monia, ḻimodon in mosia komintan. Dika motabi kon i monia ande momia kon dodandian takin i monia.

³Moiko in diábí motaau motonibuḷoi takin i monia, bo dika doman ogoi in adí mita monimu motonibuḷoi takin i monia,

⁴sinbá mosia diá mopoyayú kon i adí mita monimu nongkon i TUHAN sin mayá mosumba kon ilah mita ibanea. Aka moiko mosumba kon ilah mita ibanea, ki TUHAN tumorú bo moiko in baḷú-Neadon yopúon.

⁵Tuamai, umpagdon in mezbah mita in bangusa mita tatua, rimumudon in oigi mita batu inta inanggap monia mokaramat, pupuḷdon in lambang mita i Asyera, bo tubádon in patong mita berhala inta sinumba monia.

⁶Aidaidon in tua komintan sin moiko nion in kapunyaan i TUHAN Allahmu. Nongkon bayongan bangusa kon dunia naa, moikobí nion inta piniḻí i TUHAN Allahmu mobaḻí umat inta sinondí kinotabi-Nea.

⁷Moiko kinotabi bo piniḻí i TUHAN, deemanbí popisí in moiko in moḷobe-ḷoben nongkon bangusa mita ibanea; totuubí kon moikobí nion in bangusa inta totok in mointok kon dunia naa.

⁸Táe ki TUHAN nomiḻí kon i monimu sin motabi in Sia kon i monimu bo mogintompod kon dandi inta pinomia-Nea takin mogoguyangmu. Tuamai in noposaḷamat in Sia kon i monimu takin kawasa inta moḷoben bo nopoḷuat kon i monimu nongkon kawasa i datu in Mesir.

⁹Pokotorop kon ki TUHAN Allahmu in tongábí Sia-Sia mita in ki Allah, bo Sia in Allah inta mosatia. Ki TUHAN nogintompod kon dandi-Nea bo noponiata in tabi-Nea inta diá modai-dait modapot in toribu nopobuían kon intau mita inta motabi kon i-Nia bo motoindudui kon parenta-nea mita.

¹⁰Táe diábí in ondo-ondok-Nea mako in mohukum kon i monia inta mondoí kon i-Nia.

¹¹Dá duduiaidon in bayongan hukum inta pinotaauku kon inimu singgai in naa.”

¹²“Aka tarukiraan monimu in parenta mita tatua, bo mosatia in mopoaid, dá ki TUHAN Allahmu in mosatiabí doman kon dodandian inta pinomia-Nea takin i monimu. Sia in mopoontongbí in tabi-Nea inta motantú kon i monimu, ná inta pinodandi-Nea kon mogoguyangmu.

¹³Sia in motabibí bo momarakat kon i monimu, dá adímu mobarong bo umuran doman kodugang-kodugang in kobarong monia. Sia in momarakatbí kon gobámu mita, dá mobarong in gandum, anggur bo ḷana in zaitun. Sia in momarakatbí kon i monimu dá mobarong in sapi bo bembé dombamu. Bayongan barakat tatua in tarimaanbí monimu kon butá inta inogoi i TUHAN kon inimu, podudui in dandi-Nea kon mogoguyangmu.

¹⁴Nongkon bayongan bangusa kon dunia, diábí tobatúmai in mokouḻí kon barakat inta námai tua in kobarongnea ná inta kon i monimu. Nongkon i monimu bo nongkon bayongan in bobiagonmu diábí in tobatúmai in mobantó.

¹⁵Moiko in ḷukadanbí i TUHAN nongkon bayongan in takit bo poyayúon nongkon bayongan in bodito inta inontong monimu kon Mesir, táe bodito mita tatua in popouma-Neabí kon musungmu mita.

¹⁶Batúan in bangusa inta pinosarakan i TUHAN Allahmu kon bonu in kawasa mu musti yopúon monimu; dika mopoontong in tabi kon i monia. Dika mosumba kon ilah mita monia, sin aid mita natua mokopoangoi kon bodito kon inimu.

¹⁷Degá kon raian monimu in bangusa mita tatua mobaro-barong nongkon i monimu dá diá in moiko mokountun kon i monia.

¹⁸Táe dika moondok kon i monia; toropdon onu in pinomia i TUHAN Allahmu kon i datu in Mesir bo bayongan in rayatnea.

¹⁹Toropdon in bodito mita inta motoyang inta inontong monimu tontaní, soaḷ mita inta mokoherang, bo ropot inta moḷoben inta pinaké i TUHAN Allahmu sin mopoḷuat kon i monimu. Ná doman in popoaid i TUHAN Allahmu kon bayongan bangusa inta kinoondok monimu.

²⁰Modapot in ki TUHAN Allahmu mopomukádon in inta mokodoḻiok[9] kon sigad monia, dá intau mita inta mokoḷagui bo inta mogadop in matoibí doman.

²¹Dá dikabí moondok kon bangusa mita tatua. Ki TUHAN Allahmu in moḷukadbí kon i monimu. Sia in ki Allahbí inta moḷoben bo motoyang.

²²Bangusa mita tatua in poguntunon-Neabí piḻim-piḻikon nongkon tayowonmu. Diábí motaau in baḷúon monimu yopúon kodaiton, sinbá mahaḷuk mita inta moraat diá modugang mobarong bo mobaḻí gogondok kon inimu.

²³Natuata in pogogaid i Allah moposarakan in musungmu mita kon inimu. Potombaukon-Neabí in mosia modapot in mosia moyopú.

²⁴Sia in moposarakanbí in datu mita monia kon inimu. Ḻimodonbí monimu in mosia, bo tangoi monia in koḻiongandon. Diábí tobatúmai in mokotahang monayow kon i monimu; mosia komintan in daitonbí monimu yopúon.

²⁵Tubádon in patong mita berhala inta sinumba monia. Dika mongibog kon saḷaka ande buḷawan inta kopake-paké monia bo dika mogamá sin pakéonmu tontaní. Aka moiko ḻimimpat kon parenta tatua matoi in moiko, sin ki TUHAN Allahmu in doíbí in mokoontong kon posumbaan kon patong berhala.

²⁶Dika motagú kon patong berhala kon bonu in baḷoimu, sinbá kutuk inta noiuma kon inia diá moiuma kon inimu doman. Tua mita in musti kodoí bo anggap diá in mangaḻenea, sin kinutuk i TUHAN.”