Read Mongondow ULANGAN 8 Bible Online

ULANGAN 8 - Mongondow bible

ULANGAN 8

¹“Bayongan in hukum inta inogoiku kon inimu singgai naa musti aidan monimu pokosatia, sinbá moiko umuran mobiag, modugang mobarong bo mogutun kon butá inta pinodandi TUHAN kon mogoguyangmu.

²Toropdon! Opat nopuḷú notaong koonggotnea in ki TUHAN Allahmu nodia kon i monimu kon bonu in binayáan moyayú sinumaḻib kon padang gurun. Binayáan tatua imakusud i TUHAN monungkuḷ kon i monimu, sinbá koontongan-Neadon onu in kon bonu in ginamu bo indoian-Nea mongo moiko mokopotoindudui kon parenta-Nea mita.

³Pinomayá-Nea mako in moiko ginogoi, bo moiko inogoian-Nea in manna sin kaanon. Moiko bo mogoguyang monimu diápabí dodai onda nokaan kon kaanon natua. Inaidan i TUHAN in natua sin motundú kon i monimu kon intau tua in diábí mobiag tongá nongkon kaanon, táe nongkon bayonganbí doman in onu inta siningog i TUHAN.

⁴Kon bonu in opat nopuḷú notaong naa pakeangmu diábí nobaḻí nokoyongan bo sioḷmu in diábí doman nobobagá.

⁵Toropdon kon ki TUHAN Allahmu motundú kon i monimu naonda bo ki amá motundú kon i adínea mita.

⁶Dá aidaidon in bayongan inta pinarenta i TUHAN Allahmu. Kobiagdon podudui in hukum-Nea mita bo horomatdon in Sia.

⁷Ki TUHAN Allahmu nodia kon i monimu pinobayá in butá inta mopia; butá inta mobayong in ongkag bo bokakánea, bo danow inta mointampurang monag kon ḷopá bo kon buḷud mita.

⁸Butá tatua nobogoi in noyagi-yagimai in gandum, anggur, bungai in ara, bungai in delima, pangkoi in zaitun bo biluk.

⁹Kon tua moiko in diábí koaputan in gogoy ande kodaitan. Batu karangnea oyúon in uatoi, bo buḷudnea mita motaau pongaḻian monimu kon bitú.

¹⁰Moiko in kinooibogbí in mongaan, bo mopoyaput in sukur kon i TUHAN Allahmu sin butá mopia inta inogoi-Nea kon inimu.”

¹¹“Ḷukadai kopia dika modapot in moiko mokoḻiong kon i TUHAN Allahmu; dika tobatúmai in taḻiban monimu in nongkon bayongan hukum-Nea inta inogoiku kon i monimu singgai in naa.

¹²Aka moiko nongaandon nodapot in nobotug bo noposindogdon in baḷoi mita inta mopia sin pogutunanmu,

¹³bo aka nodugangdon in sapi bo bembé bain dombamu, saḷaka bo buḷawanmu takin bayongan kapunyaanmu ibanea,

¹⁴yo ḷukadai kopia sinbá moiko diá mobaḻí mododia bo mokoḻiongdon kon i TUHAN Allahmu inta nopoḷuai kon i monimu nongkon Mesir, tampat inta pinononggataan kon i monimu.

¹⁵Ki TUHAN nodia kon i monimu nongin padang gurun inta nobendar mako bo inta motoyang, inta mobayong in uḷag mobisa bo bambau. Kon butá inta moingkag diá in tubig binaḻí-Nea in tubig iḻumuai nongkon batu, sinbá moiko motaau monginum dapot in moguḻí in yogangmu.

¹⁶Kon padang gurun Sia nobogoi in manna kaanonmu, kokaanon inta diábí kinotaauan in mogoguyangmu. Inaidan i TUHAN intua sin monungkuḷ kon i monimu bo motundú sinbá mokopoompá kon gina, bá kon buitnea Sia mopoaid in mopia kon i monimu.

¹⁷Dá, dika mokoimontanmai in morai kon moikobí in noramuji takin ropotmu tontaní nodapot in moiko nobaḻí nobiag nooyúon.

¹⁸Torop kon ki TUHAN Allahmubí in nobogoi in kaoyúonan tatua kon inimu. Tua inaidan-Nea sin umaai in singgai naa Sia umuranpabí mosatia kon dodandian inta pinomia-Nea takin mogoguyangmu.

¹⁹Dika mokoḻiong kon i TUHAN Allahmu bo dika mayá kon ilah mita ibanea sin mosumba bo mogundoi kon i monia. Singgai in naa akuoi moponorop kon i monimu kon aka aidanpa doman monimu intua, yo notantú bidon kon yopúon i TUHAN in moiko.

²⁰Aka moiko diá motoindudui kon i TUHAN Allahmu, yo yopúon-Nea domandon in moiko, naonda bo bangusa mita inta iyopú-Nea kon tayowon monimu.”