Read Mongondow YOHANES 15 Bible Online

YOHANES 15 - Mongondow bible

YOHANES 15

¹Ki Yesus in noguman bui, “Akuoi in pangkoi in anggur inta mopia, bo ki Amá-Ku in monononggobánea.

²Pomuḷoi in tanga kon i-Nakó inta diá momomungai, pongkóon-Nea, bo pomuḷoi in tanga inta momungai, gaatannea in daunnea bo daritan-Nea sinbá modugangdon modatog in bungainea.

³Moiko nion in nodarit bidon, sin totundú inta inogoi-Ku kon inimu.

⁴Umuranbí potobatú-Ku bo Akuoi umuranbí doman motobatú takin i monimu. Tanga in diábí momungai tontaní aka diá in sia moidapoḷpa mako kon pangkoinea. Natua doman in moiko, momungai aka umuran motobatú takin-Ku.

⁵Akuoibí in pangkoi in anggur, bo moiko in tanganea mita. Intau inta umuran motobatú takin-Ku bo Akuoi i motobatúnea, momungaibí in sia modatog, sin aka diá in Akuoi yo moiko in diábí mokopogaid kon onu bo onu.

⁶Ki ine in diá umuran motobatú takin-Ku, ḷumbúon naonda bo tanga, bo moingkagdon. Tanga mita inta moingkagdon natua daiton sipunon bo pogarab kon bonu in tuḷu bo tubáan.

⁷Aka moiko bo umuran motobatú takin-Ku bo totundú-Ku in umuran popotonop mako monimu kon gina, yo poigumdon kon i Amá kon onukabí in koibog monimu; dá onu in pinoigummu tua in ogoi-Neabí.

⁸Aka moiko momungai modatog, yo ki Amá-Ku in pomuliaan; bo moiko in totu-totuudon mobaḻí murí-Ku mita.

⁹Ná ki Amá ain notabi kon i-Nakó, natua doman Akuoi ain notabi kon i monimu. Dá umurandon kobiag in moiko saḷaku intau inta kinotabi-Ku.

¹⁰Aka moiko umuran mogaid kon inta pinarenta-Ku, yo moiko in umuran mosatia in dumudui kon tabi-Ku, ná doman Akuoi inta umuran mosatia kon tabi i Amá-Ku sin umuran nopobayá in parenta-Nea mita.

¹¹Naa mita in pinoguman-Ku kon i monimu, sinbá sanang in gina-Ku oyúon domandon kon i monimu, bo sanang in gina-Ku motompodon.

¹²Naa parenta-Ku: Positabianbí in moiko, ná doman Akuoi in notabi kon i monimu.

¹³Intau inta totok in motabi kon yobayatnea mita in intaubí inta nobogoi in kobiagannea sin kopontingan monia.

¹⁴Moiko nion in yobayat-Ku mita, aka pomiaan monimu in onu inta pinarenta-Ku kon inimu.

¹⁵Moiko in diá bidon oiníon-Ku ata, sin aka ata yo diábí kotaauannea onu in yogot aidan i tuangnea. Moiko in inoiní-Ku Yobayat, sin bayongan inta ain dinongog-Ku kon i Amá in pinotaau-Kudon kon i monimu.

¹⁶Deemanbí moiko in nomiḻí kon i-Nakó. Akuoibí in nomiḻí kon i monimu, bo nopotabá kon i monimu mayá sinbá modiamai kon bungai mobayong, bungai mita inta diá moyopú. Dá ogoibí i Amá in onukabí inigum monimu inta pinodoyon kon tangoi-Ku.

¹⁷Naadon in parenta-Ku kon inimu: Moiko in musti umuran mositabian tobatú bo tobatú.”

¹⁸“Aka dunia naa mosaturu kon i monimu, yo toropdon kon Akuoi in muna bidon kinodoí in dunia.

¹⁹Aka kuma bo moiko nion in kapunyaan in dunia, dá kotabibí in dunia in moiko saḷaku kapunyaannea. Táe moiko ain piniḻí-Ku nongkon dunia naa, dá moiko in deeman bidon kapunyaan in dunia, tuamai dunia naa in mosaturu kon i monimu.

²⁰Toropdon onu inta ain pinoguman-Ku kon i monimu, ‘Ata in diábí moḷobe-ḷoben nongkon i tuangnea.’ Dá aka mosia in nomogutúdon kon i-Nakó, yo mosia in momogutúbí doman kon i monimu. Aka mosia dumuduidon kon totundú-Ku, yo mosia in dumuduibí doman kon onu inta tundúonmu.

²¹Bayongan tua in daitonbí monia popoaid kon i monimu, sin moiko in dumodudui-Ku, bo diábí kinotaauan monia in Sia inta nopotabá kon i-Nakó.

²²Aka kuma bo Akuoi in diá namangoi bo diá doman nopotaau intua komintan kon i monia, dá diábí in mosia baradosaan. Táe aka tanaa, yo diá bidon in baḻíon monia dodoyonan moguman kon diá dosaan in mosia.

²³Intau inta mosaturu kon i-Nakó, yo mosaturu doman kon i Amá-Ku.

²⁴Aka kuma kon yua-yuak monia bo Akuoi in diápa nogaid kon soaḷ mita inta diápa kon dodai in onda inaidan in intau, yo mosia in diábí binaradosa. Táe tanaa mosia ain nokoontong kon onu inta ain pinomia-Ku, bo mosia in mosaturu kon i-Nakó andeka kon i Amá-Ku.

²⁵Tongá musti bidon natua, sinbá mobaḻídon in onu inta pinais kon bonu in Hukum Agama monia nanaa: ‘Dia in kinodoyonan pinosaturuan monia kon i-Nakó.’

²⁶Potabá-Kubí mangoi kon i monimu in Mototuḷung tobatú inta nongkon i Amá. Tuata in Roho inta moponiata kon kobobanar soaḷ ki Allah. Aka Sia in mamangoidon, yo Sia in mobogoibí in kosakusian soaḷ Akuoi.

²⁷Bo moiko in mustibí doman mobogoi in kosakusian soaḷ Akuoi, sin moiko ain noyotakin-Ku nongkon pinomangkoianpamai.