Read Mongondow YOHANES 16 Bible Online

YOHANES 16 - Mongondow bible

YOHANES 16

¹Tua komintan in potaau-Ku kon i monimu sinbá diá mobaḷui in pirisaya monimu.

²Moiko in poḷuaionbí nongkon baḷoi mita in pososambayangan. Bo moiangoibí in wakutunea kon intau inta moḻimod kon i monimu in mosangka kon sia tua in dinumuduibí kon parenta i Allah.

³Tua in aidan monia kon inimu sin diápa kinotaauan monia in ki Amá andeka Akuoi.

⁴Táe tanaa in muna-Kudon potaau kon i monimu, sinbá aka tua mobaḻídon kon singgai moiduduimai, yo kotoropandon monimu kon tua aindon pinotaau-Ku kon i monimu.” “Soaḷ tanaa in diábí pinoguman-Ku kon i monimu nongkon pinomangkoianmai, sin Akuoi in kotaki-takinpa monimu.

⁵Táe tanaa Akuoi in mayádon kon i-Nia inta ain nopotabá mangoi kon i-Nakó; bo diá tobatúmai intau kon sigad monimu in moḻibó kon onda in bayáan-Ku.

⁶Nodapotbí in tanaa moajarbí in gina monimu sin pinotaau-Kudon intua kon inimu.

⁷Táe totuubí in poguman-Ku tanaa kon i monimu: Totokbí in mopia kon i monimu aka mayá in Akuoi, sin aka Akuoi bo diá mayá, yo diábí mamangoi kon i monimu in mototuḷung tatua. Táe aka Akuoi bo mayá dá potabá-Kubí mangoi in Sia kon i monimu.

⁸Aka Sia in mamangoi yo poniata-Neabí kon dunia naa in mangaḻe totok in dosa, nongkon onu inta totuu, bo nongkon hukuman i Allah.

⁹Poniata-Neabí kon aka diá mopirisaya kon i-Nakó, yo tua in dosabí;

¹⁰Poniata-Neabí doman kon Akuoi naa in totuubí, sin Akuoi mayá kon i Amá bo diá bidon ontongon monimu in Akuoi.

¹¹Poguman-Nea doman kon ki Allah in momangkoidon mohukum, sin mongongawasa kon dunia naa in ihukumdon.

¹²Mobayongpabí in musti poguman-Ku kon i monimu, táe tanaa mako in diápa mokosanggup in moiko in motarima kon tua mita.

¹³Táe aka Roho tatua mamangoi, ki Inta moponiata in kobobanar soaḷ ki Allah, yo diaan-Neabí in moiko bo tundúon monotaau kon bayongan kobobanar tatua. Sin Sia in diábí mosingog podudui in ibog-Nea tontaní, táe mogumanbí kon onu in dinongog-Nea, bo poguman-Neabí kon inimu onu in mobaḻí kon singgai moiduduimai.

¹⁴Sia in mopoḷantudbí kon i-Nakó, sin onu in popotaau-Nea kon inimu, sinarima-Neabí nongkon i-Nakó.

¹⁵Bayongan inta kon i Amá tua in Akuoibí doman in kitogi. Tuamai Akuoi in moguman kon onu in pinotaau in Roho tatua kon ini-Mu in sinarima-Neabí nongkon i-Nakó.”

¹⁶“Diádon moonggot bo diádon in moiko mokoontong kon i-Nakó, ná doman tua diádon moonggot poindoian mako monimu kon i-Nakó.”

¹⁷Nokodongogmai kon natua, tongonumai in murí-Nea nosiḻibóan, “mongo onu in makusud-Nea in noguman: ‘Diá bidon moonggot bo diádon in moiko mokoontong kon i-Nakó, bo diá domandon moonggot in poindoian monimu kon i-Nakó. Bo Akuoi in mayá kon i Amá’?”

¹⁸Mosia in umuran moḻibó, “Onu in mangaḻenea, ‘diádon moonggot’? Diá komangaḻean naton mongo onu in oumanon-Nea tanion!”

¹⁹Kinotaauanbí i Yesus kon mosia in moibog moḻibó kon i-Nia. Dá tuamai Sia in noguman, “Koina Akuoi in noguman, ‘Diádon moonggot, moiko in diádon mokoontong kon i-Nakó, bo diá domandon moonggot poindoian monimu kon i-Nakó.’ Tua degá inta oumanonmai monimu mongo onu in makusudnea?

²⁰Poguman-Kudon kon i monimu, moiko nion in mongombaḷbí bo mogamui, táe mopiabí in gina in dunia naa. Morobonoḷbí in gina monimu, táe robonoḷ in gina monimu tua in mobaḷuibí ḷunganga in gina.

²¹Aka bobay inta motoyongdon mononggadí, mosusa in ginanea, sin wakutuneadon mokorasa kon roriga. Táe naonda in ki adínea moilahirdon, koḻiongan bidon in bobay tatua in yoyiganea sin lantaran pia in ginanea sin adí tatua noilahirdon kon dunia.

²²Natuabí doman in moiko: Tanaa mako mosusapabí in gina monimu, táe buipabí in Akuoi moyodungkuḷ monimu, dá moḷunganga in gina monimu; bo diábí tobatúmai intau in motaau mogamá kon ḷunganga in ginamu tatua.

²³Kon singgai tatua, moiko diá bidon moḻibó kon onu bo onu kon i-Nakó. Poguman-Kudon kon i monimu: Onukabí in igumon monimu kon i Amá podoyon kon tangoi-Ku, ogoibí i Amá intua kon i monimu.[35]

²⁴Umaai in tanaa mako, moiko in diápa kon dodai onda in noigum kon onu bo onu pinongin tangoi-Ku. Poigumdon, dá motarimabí in moiko, sinbá ḷunganga in ginamu motompodon.”

²⁵“Naa komintan in poguman-Ku kon i monimu takin momaké in oandaian. Táe moiangoibí in wakutunea, Akuoi in diádon momaké in oandaian, táe poguman-Ku bidon taran-tarangan kon i monimu in soaḷ ki Amá.

²⁶Kon wakutudon tuata moiko in moigum kon i Amá podoyon kon tangoi-Ku; pokotaaudon, Akuoi in diábí moigum kon i Amá sin ogoi kon i monimu,

²⁷sin ki Amá in motabibí kon i monimu. Sia in motabibí kon i monimu sin moiko in motabi kon i-Nakó, bo mopirisaya kon Akuoi in namangoi nongkon i Allah.

²⁸Totuubí kon Akuoi naa in nongkon i Amábí, bo ain namangoi in dunia. Táe tanaa taḷaan-Kudon in dunia sin mobuidon kon i Amá.”

²⁹Bo murí-Nea mita in noguman kon i Yesus, “Indoiaika dá tanaa ki Tuhan taran-tarangandon diádon nomaké in oandaian,

³⁰bo kinotaauan bidon nami kon bayongan yagi-yagi kinotaauanbí i Tuhan. Diá bidon paraḷu in intau moḻibó kon onu bo onu kon i Tuhan. Tuamai kami in mopirisayabí kon ki Tuhan in namangoibí nongkon i Allah.”

³¹Dá ki Yesus in noḻibó: “Dá mopirisayadon moiko in tanaa?

³²Pokotorop! Moiangoibí in wakutunea, sedang bo noiangoi bidon, moiko in poyayiton. Moiko in mobuidon kon baḷoinea-baḷoinea bo taḷaandon monimu in Akuoi. Táe Akuoi in diábí tongá Aku-Akuoi mita, sin ki Amá in kotaki-takin-Kubí.

³³Naa komintan in poguman-Ku sinbá moiko in mokouḻí kon kobiagan motompia bo moonow sin notobatú-Kudon. Kon dunia naa moyoyangpabí in moiko, táe korotonbí in ginamu, sin Akuoi in diábí taḷowon in dunia naa!”