Read Mongondow YOHANES 17 Bible Online

YOHANES 17 - Mongondow bible

YOHANES 17

¹Nopaḷut mako nosingog kon tua, ki Yesus iḷumangag kon ḷangit bo noguman, “Amá, naadon in wakutunea. Poḷantudon in ki Adí-Mu, sinbá ki Adí-Mu in mopoḷantud doman kon i Amá.

²Amá inogoi-Mudon in kawasa kon i-Nia sin mongawasa kon bayongan inta nobiag, sinbá Sia in mobogoi doman in kobiagan mononoi kon i monia inta inogoi i Amá kon i-Nia.

³Nanaa in kobiagan mononoi tua; ibogon tua bayongan intau in monotaau kon i Amá inta tongábí Sia tua in ki Allah inta mobanar, bo monotaau doman kon i Yesus Kristus inta pinotabá i Amá.

⁴Akuoi ain nopomulia kon i Amá kon dunia naa takin aid nokopoḷapat kon oaidan inta pinoki aid i Amá kon i-Nakó.

⁵Amá! Pomuliadon in Akuoi in tanaa mako kon tayowon-Mu, takin kamuliaan inta kon i-Nakó wakutu in noyotakin i Amá kon dodai in dunia naa diápa binaḻí.

⁶Pinotaau-Kudon in ki Amá kon bayongan in intau kon dunia naa inta ain inogoi i Amá kon i-Nakó. Ki Amábí in kitogi kon i monia tua, bo ki Amábí doman in nobogoi kon monia tua kon i-Nakó. Mosia in dinumuduidon kon singog i Amá.

⁷Tanaa in kinotaauandon monia kon bayongan inta inogoi i Amá kon i-Nakó in komintanbí nongkon i Amá.

⁸Pinotaau-Kudon kon i monia in singog inta inogoi i Amá kon i-Nakó; bo sinarimadon monia. Kinotaauan monia kon Akuoi in totu-totuubí namangoi nongkon i Amá bo mosia in mopirisayabí kon ki Amábí in nopotabá kon i-Nakó.

⁹Sambayangan-Ku in mosia. Deemanbí dunia naa in sambayangan-Ku, táe intaubí mita inta ain inogoi i Amá kon i-Nakó, sin ki Amábí in kitogi kon i monia.

¹⁰Onda in kapunyaan-Ku, kapunyaanbí doman i Amá-Ku intua, bo onda in kapunyaan i Amá, kapunyaan-Kubí doman tua. Akuoi ain pinomulia kon sigad monia.

¹¹Akuoi in mamangoidon kon inimu in tanaa. Diá bidon in Akuoi mogutun kon dunia naa, táe mosia in umuranpabí kon dunia naa. Amá inta motusi! Ḷukadaipa in mosia takin kawasa in tangoi-Mu. Tangoi inta ain inogoi-Mu kon i-Nakó[36] — sinbá mosia in motobatúdon ná kitada.

¹²Wakutu in Akuoi koyota-yotakinpa monia, Akuoi ain noḷukad kon i monia takin kawasa in tangoi i Amá, tangoi inta inogoi i Amá kon i-Nakó.[37] Iḷukadan-Kudon in mosia bo diábí in tobatúmai nobaḻí kon sigad monia tua, koḻikudbí in sia inta ain sinantú kon mobuḻi; sinbá mobaḻídon onu inta ain pinais kon Buk Motusi.

¹³Tanaa Akuoi in mamangoidon kon i Amá. Tua komintan in pinotaau-Kudon wakutu in Akuoi kon duniapa naa, sinbá totu-totuudon korasaan monia in ḷunganga in gina-Ku.

¹⁴Pinotaau-Kudon kon i monia in Pirman i Amá bo mosia in sinaturu in dunia, sin deemanbí kapunyaan in dunia naa in mosia, ná doman Akuoi inta deemanbí kapunyaan in dunia.

¹⁵Deemanbí Akuoi in mopoigum konbá gamáandon i Amá in mosia nongkon dunia naa, táe poigumon-Ku sinbá ḷukadan i Amá in mosia nongkon kawasa i inta moraat.

¹⁶Ná Akuoi naa inta deemanbí kapunyaan in dunia naa, dá mosia doman tua in deemanbí kapunyaan in dunia.

¹⁷Baḻí in mosia tongá kapunyaan i Amá pongin inta mobanar. Pirman i Allah tuata in mobanar.

¹⁸Ná ki Amá nopotabá kon i-Nakó namangoi in dunia naa, dá natua doman in Akuoi mopotabá kon i monia kon dunia naa.

¹⁹Popisí in kopontingan monia, Akuoi in noposarakandon in awak-Ku saḷaku kapunyaan i Amá sinbá mosia in tongá doman mobaḻí kapunyaan-Ku pongin inta nobanar nongkon i Amá.

²⁰Bo deemanbí tongá mosia in sambayangan-Ku, táe intaubí doman mita inta mopirisaya kon i-Nakó kon singgai moiduduimai sin mosia in nopirisaya kon onu inta pinotaau monia naa.

²¹Akuoi in mopoigum Amá sinbá mosia komintan in motobatúdon, ná ki Amá notobatú takin-Ku bo Akuoi in notobatú doman i Amá; sinbá mosia in motobatú doman takin Naton sinbá dunia in mopirisaya kon Ikobí inta ain nopotabá kon i-Nakó.

²²Mosia inogoian-Kudon in kamuliaan inta inogoi i Amá kon i-Nakó, sinbá mosia in motobatúdon naonda bo Kita ain notobatú.

²³Akuoi takin mosia, bo ki Amá takin Akuoi, sinbá mosia in totu-totuudon motobatú, sinbá kotaauandon in dunia naa kon ki Amábí in nopotabá kon i-Nakó bo ki Amábí in monotabi kon i monia ná tabi i Amá kon i-Nakó.

²⁴Amá, ibogon-Ku, sinbá mosia inta ain inogoi i Amá kon i-Nakó in moyotakin-Ku doman kon tampat inta bayáan-Ku, sinbá koontongandon monia in kamuliaan-Ku, inta ain inogoi i Amá kon i-Nakó. Sin Akuoi in kinotabi i Amá kon wakutu in dunia naa diápa pinomia.

²⁵Amá inta moadil! Diá kinotaauan in dunia naa in ki Amá, táe Akuoi in nonotaaubí kon i Amá bo intau mita tanaa in nonotaau bidon kon ki Amábí in nopotabá kon i-Nakó.

²⁶Pinotaau-Ku bidon kon i monia in tangoi i Amá bo umuran-Kubí popotaau intua, sinbá tabi i Amá kon i-Nakó umuran mako kon gina-gina mako monia bo Akuoi in motobatú i monia.”