Read Mongondow YOHANES 18 Bible Online

YOHANES 18 - Mongondow bible

YOHANES 18

¹Naonda in ki Yesus nosambayang mako natua, Sia takin murí-Nea mita minayádon kon ḷoḷan Ongkag in Kidron. Kon tua oyúon in tobatú taman, bo ki Yesus takin murí-Nea mita sinumuot kon taman tatua.

²Tampat tatua in kinotaauan doman i Yudas inta nomaḻidawan kon i Yesus; sin mokakitdon ki Yesus takin murí-Nea mita in moyosipun kon tampat tatua.

³Dá ki Yudas in namangoidon in tampat tatua takin kodia-dia in tokolompok in tontara in Rum bo tongonu domanmai in moḷoḷukad kon Baḷoi Tuhan inta pinotabá in imang mita itoi bo in intau mita in Parisi. Mosia in nodia kon ḷoḷutam, lantera bo poḷombow.

⁴Kinotaauanbí i Yesus in bayongan inta mobaḻí kon i-Nia. Dá Sia in dinimiug kon intau mita tatua bo noḻibó, “Motayak kon i ine in moiko?”

⁵Mosia in noguman, “Ki Yesus Intau in Nazaret.” Tubag i Yesus, “Akuoibí naa inta sinayak monimu.” Ki Yudas inta nomaḻidawan in sinimindog doman noyotakin monia.

⁶Kon dodai in ki Yesus noguman, “Akuoibí in naa inta sinayak monimu,” mosia komintan inumundok bo noumpag kon butá.

⁷Bo ki Yesus in bui noḻibó, “Ki ine in tayakon monimu?” Dá kai monia doman, “Ki Yesus Intau in Nazaret.”

⁸Tubag i Yesus, “Ain pinoguman-Ku kon Akuoibí inta sinayak monimu. Bo aka Akuoibí in tayakon monimu, dá pomayádon mako in ibanea nion mayá.” (

⁹Singog-Nea tatua, noponiata kon nobaḻídon onu inta ain pinoguman-Nea muna nanaa: “Amá, nongkon sigad in intau mita inta inogoi i Amá kon i-Nakó, diá tobatúmai in mobuḻi.”)

¹⁰Ki Simon Petrus inta nodia kon pitow, norabut kon pitownea bo nonimboi kon simpaḷ in imang moḷoben dá nopongkó in bongoḷannea dotá in koḷanan. Ki Malkus in tangoi in simpaḷ inta nopongkó in bongoḷan tatua.

¹¹Dá ki Yesus in noguman kon i Petrus, “Tungkogdon bui kon gumánea in pitowmu nion! Degá iraimumai kon diábí inumon-Ku in palo in roriga inta inogoi i Amá kon i-Nakó?”

¹²Bo tontara mita in Rum takin itoinea bo moḷoḷukad mita inta pinotabá in intau Yahudi nodomokdon poḷat notogot kon i Yesus.

¹³Muna in dinia monia in Sia kon i Hanas, sin ki Hanas naa in kinunuton i Kayapas. Ki Kayapas naa in imang moḷoben kon taong tatua.

¹⁴Ki Kayapas naa inta ain nononggina kon itoi mita in Yahudi, kon mopia-piabí tobatú intau in matoi sin kopontingan in bayongan intau.

¹⁵Ki Simon Petrus takin tobatú murí ibanea in dinumudui kon i Yesus. Murí i Yesus tobatú tatua kinotaauan i imang moḷoben, dá sia sinumuot noyotakin i Yesus kon palas i imang moḷoben,

¹⁶táe ki Petrus in tongábí kon ḷuai kon ngara mogoḷat mako. Onda intua murí tobatú tatua in iḷumuai bo noyosingog takin bobantung bobay inta noḷukad kon ḷoḻingkop, onda intua dinianeadon sinumuot in ki Petrus.

¹⁷Bobantung bobay inta noḷukad kon ḷoḻingkop tatua noguman kon i Petrus, “Ei, iko doman in tobatú murí in intau tatua ma?” “Deeman,” tubag i Petrus.

¹⁸Motumpingdon totok dodai intua, dá bobantung mita bo moḷoḷukad mita in nomiagdon kon tuḷu nongkon baga bo nonayang mosia. Ki Petrus in minayá intua bo sinimindog nonayang noyotakin monia.

¹⁹Imang moḷoben in noḻibódon kon i Yesus soaḷ murí-Nea bo soaḷ totundú-Nea.

²⁰Ki Yesus in notubag, “Akuoi in umuran taran-tarangan kon tayowon intau mobayong. Akuoi umuran doman mobogoi in totundú kon bonu in baḷoi pososambayangan bo kon bonu in Baḷoi Allah inta nobaḻí tampat poyoyosipunan intau in Yahudi. Diábí kon dodai onda Akuoi tongá umuni-uni in mosingog.

²¹Dá nongonu sin iko in moḻibóbí kon i-Nakó natua? Ḻibódon kon i monia inta ain nokodongog kon onu inta sinundú-Ku; kinotaauan bidon monia totok onu inta siningog-Ku.”

²²Naonda in ki Yesus nosingog natua, tobatú pongawal kon diug-Neamai nonokap kon i Yesus bo poḷat noguman, “Mobaranibí totok in Iko in mosingog natua kon i imang moḷoben!”

²³Ki Yesus in notubag, “Aka Akuoi in nosingog kon noitaḷá, yo pogumanka kon naa onu in noitaḷá tua! Táe aka noitutuibí in siningog-Ku tua, nongonu sin iko nonokapbí kon i-Nakó?”

²⁴Bo kotogo-togotpa doman natua, pinoki diadon i Hanas in ki Yesus pinobayá kon i Kayapas tobatú Imang Moḷoben.

²⁵Ki Simon Petrus in sinimindogpa doman mako bo nonayang kon tua. Intau mita kon tua in noguman kon inia, “Iko doman in murí in Intau tatua ma?” Táe ki Petrus nomayow, “Deeman!”

²⁶Tobatú ata i imang moḷoben, inta ginaḷum in intau inta bongoḷannea pinongkó i Petrus, noguman, “Diábí moyotaḷá kon ikobí naa inta inontongku noyotakin in Intau tatua kon taman?”

²⁷Bo ki Petrus in buipa doman nomayow, “Diábí,” — bo kon dodaipa doman intua manuk nokukú.

²⁸Doḷo-doḷompa totok dinia monia in ki Yesus nongkon baḷoi i Kayapas pinobayá kon komaḻig i gubernur. Intau mita in Yahudi in diábí sinumuot kon komaḻig tatua, sinbá mosia in diá monajis podudui in agama monia, sin mosia in tumakindon mokaan kon kaanon in Paska.

²⁹Manangka intua ki Pilatus in iḷumuai nokipodungkuḷ kon i monia bo noḻibó, “Nongonu sin diniabí monimu mangoi in intau tanaa?”

³⁰Mosia in notubag, “Aka Sia diá kotaḷá, dá tantú diábí dinia mangoi nami kon i Gubernur.”

³¹Ki Pilatus in noguman kon i monia, “Gamádon bo hakim monimu tontaní podudui in hukummu tontaní!” Táe intau mita Yahudi tatua in notubag, “Kami in diábí motaau mohukum kon intau dapot in matoi.” (

³²Naa in nobaḻí sinbá mobaḻídon onu inta ain pinoguman i Yesus soaḷ kopopatoi-Nea.)

³³Ki Pilatus in sinumuot bui kon komaḻig bo nogoiní kon i Yesus poḷat noḻibó, “Degá Iko nion Datu Intau Yahudi?”

³⁴Ki Yesus in notubag, “Ḷoḻibómu nion in nongkon bonu in ginamu tontaní andeka oyúon in intau ibanea in nopotaau muna kon inimu soaḷ Akuoi?”

³⁵Ki Pilatus in notubag, “Degá akuoi naa intau Yahudi? Mosia inta nodia kon ini-Mu pinoangoi kon inakó in intaubí mita tobangusa-Mu bo imang mita itoi. Yo onu degá in inaidan-Mu?”

³⁶Ki Yesus in noguman, “Dodatuan-Ku naa in deemanbí nongkon dunia naa. Aka kuma bo dodatuan-Ku naa nongkon dunia naa, dá intau-Ku mita in moramujibí totok sinbá Akuoi in diá posarakan kon pongawasa mita in Yahudi. Táe totuubí kon dodatuan-Ku in deemanbí nongkon dunia naa!”

³⁷Dá ki Pilatus in noḻibó kon i-Nia, “Aka natua, yo Iko nion in Datu?” Ki Yesus in notubag, “Ikodon in noguman kon Akuoi naa in Datu. Akuoi in noilahir bo namangoi in dunia naa takin tobatú makusud mobogoi in kosakusian soaḷ inta nobanar. Intau inta nongkon nobanar tatua in mokidongogbí kon i-Nakó.”

³⁸Ki Pilatus in noḻibó kon i-Nia, “Onu in mangaḻe in inta mobanar tatua?” Nosingog mako natua, ki Pilatus iḷumuai bui bo minayá nokipodungkuḷ kon intau mita in Yahudi bo noguman, “Diábí in tobatúmai in taḷá nouḻíku kon i-Nia.

³⁹Táe nobaḻídon kabiasaan kon i monimu, akuoi in umuran momuḻi kon tobatú intau inta pinonjara aka kon Singgai Moḷoben Paska. Dá degá moibog in moiko bá pobebaskudon kon i monimu in datu intau Yahudi tanaa?”

⁴⁰Táe mosia in nomaḷúdon totok, “Diá motaau, dikabí in intau tanion, ki Barabasdon!” (Ki Barabas naa in tobatú intau mogogagow bo mononakow.)