Read Mongondow YOHANES 19 Bible Online

YOHANES 19 - Mongondow bible

YOHANES 19

¹Onda intua ki Pilatus sinumuot bo nopotabá in intau nosambok kon i Yesus.

²Tontara mita in nomia kon mahkota nongkon tanga mita inta dodugian, bo pinobandow monia kon uḷu i Yesus. Onda intua iḷambungan monia in jubah nopars,

³bo mopobui-buimai mamangoi kon i Yesus bo moguman, “Mobiag datu intau Yahudi!” Onda intua mosia monokap kon pogot-Nea.

⁴Nopaḷut mako ki Pilatus iḷumuai bui bo noguman kon intau moantó kon tua, “Indoiai! Diniakudon in Sia kon inimu, sinbá kotaauan monimu kon diábí in Sia kinouḻíanku kon tobatúmai in taḷá-Nea.”

⁵Bo ki Yesus in iḷumuai takin nogijubah nopars. Ki Pilatus in noguman kon i monia, “Indoiaika in Intau tatua.”

⁶Naonda in imang mita itoi bo pongawal mita tatua nokoontong kon i Yesus, mosia in nomaḷú, “Popopakúdon in Sia kon kayu pinoyotaḻempang! Popopakúdon in Sia kon kayu pinoyotaḻempang!” Dá ki Pilatus in noguman kon i monia, “Gamádon in Sia, bo popopakúdon monimu tontaní kon kayu pinoyotaḻempang, sin akuoi in diábí nokouḻí kon tobatúmai in taḷá kon i-Nia.”

⁷Intau mita in Yahudi tatua in noguman, “Podudui in hukum nami, Sia in musti hukumon matoi sin Sia in nongaku ki Adí i Allah.”

⁸Naonda in ki Pilatus nokodongog kon singog monia natua, nodugangdon bui in ondoknea.

⁹Dá sia in sinumuot bui kon komaḻig bo naonda in ki Yesus dinia pinotuot, ki Pilatus in noḻibó kon i-Nia, “Nongkon ondabí in Iko nion?” Táe diá sinubagan i Yesus.

¹⁰Dá ki Pilatus in noḻibó bui, “Iko in doídon mongonguman takin-Ku? Bá kotaauan-Mu, oyúon in kawasaku mopobebas kon ini-Mu, bo kawasaku mopopakú kon kayu pinoyotaḻempang kon ini-Mu!”

¹¹Ki Yesus in notubag, “Aka ki Allah diá mobogoi in kawasa tatua kon inimu, yo beresibí diá in kawasamu kon i-Nakó. Tuamai intaubí inta noposarakan kon i-Nakó kon inimu in moḷobe-ḷoben in dosanea nongkon inimu.”

¹²Nokodongogmai kon natua in ki Pilatus, totokdon ramujionnea pobebason in ki Yesus. Táe intau mita in Yahudi totokdon momaḷú in moguman, “Aka ki Tuang mopobebas kon i Nia, yo ki Tuang in deeman yobayat i Kaisar!”

¹³Nokodongogmai kon natua, pinoki diadon i Pilatus iḷumuai in ki Yesus, bo minayádon in sia iḻimitú kon kadera pongadilan inta sinangoian Taḷog Batu (Litostrotos). (Kon bonu in bahasa Ibrani sinangoian Gabata.)

¹⁴Wakutu intua singgaidon pinobasadiaan kon poramean Paska, degá jam mopuḷúdon bo doyowa. Ki Pilatus nogumandon kon intau mita tatua, “Naa in datumu!”

¹⁵Mosia in nomaḷú, “Ḻimodon in Sia! Ḻimodon in Sia! Popopakúdon Sia kon kayu pinoyotaḻempang!” Ki Pilatus in noḻibó, “Musti degá in akuoi in mopopakú kon kayu pinoyotaḻempang kon i datumu?” Imang mita itoi notubag, “Tongábí ki Kaisar in datu nami!”

¹⁶Dá pinosarakandon i Pilatus in ki Yesus sin bayáandon popopakú kon kayu pinoyotaḻempang. Bo ginamádon monia in ki Yesus bo dinia.

¹⁷Ki Yesus iḷumuai takin kopota-potaan in kayu pinoyotaḻempang popopakúan kon i-Nia bo nopobayá in tampat inta sinangoian “Tampat in Ḷungkaká”. (Kon bonu in bahasa Ibrani sinangoian Joljuta.)

¹⁸Kon tua in Sia pinopopakúdon kon kayu pinoyotaḻempang. Oyúon doman intau doyowa in pinopopakú kon kayu pinoyotaḻempang takin i Yesus singgai tua. Tobatú kon dotá in koḷoigi, tobatú kon dotá in koḷanan, bo ki Yesus kon yua-yuak monia.

¹⁹Kon dotá omonikan kayu inta pinopopakúan kon i Yesus pinoki popakúan doman i Pilatus in kayu topongkó inta pinaisan, “Ki Yesus Intau Nazaret, Datu in Yahudi.”

²⁰Nobayong intau in Yahudi nokobaca kon pais tatua, sin tampat inta pinopopakúan kon i Yesus kon kayu pinoyotaḻempang in nodiug kon kotá. Tua in pinais doman kon bahasa Ibrani, Latin, bo Yunani.

²¹Dá imang mita itoi in noguman kon i Pilatus, “Donaai paison ‘Datu Intau Yahudi’, táe paisbí nanaa, ‘Intau tanaa in noguman, Akuoi Datu Intau Yahudi.’ ”

²²Táe ki Pilatus in notubag, “Onu inta ain pinaisku, diá bidon motaau baḷuian.”

²³Naonda in tontara mita tatua nopopakú mako kon i Yesus kon kayu pinoyotaḻempang, mosia in nogamá kon pakeang i Yesus bo sinilai monia opat, tumongo silai kon i monia. Ginamá doman monia in jubah-Nea. Jubah tatua diábí in tanda pinodaguman — sinuji nongkon ḻimonik nodapot kon omonagannea.

²⁴Dá tontara mita tatua in noyosingog, “Donaaidon poyopongkóon in jubah tanaa. Koḻigai bá morabut kon lot in kita, tayakon mongo ki ine in mokouḻí.” Soaḷ tatua in nobaḻí sinbá motompodon onu inta ain pinais kon bonu in Buk Motusi, nanaa: “Mosia in mosilai kon pakeang-Ku, bo norabut kon lot sin motayak kon jubah-Ku.” Bo totuu natuabí in pinomia in tontara mita tatua.

²⁵Kon diug in kayu inta pinopopakúan kon i Yesus, sinimindog kon tua ki iná i Yesus, ki utat bobay i iná-Nea, ki Maria ki buḷoi Klopas, bo ki Maria Magdalena.

²⁶Naonda in ki Yesus nokoontong kon i iná-Nea bo murí inta kinotabi-Nea sinimindog mako kon tua, Sia in noguman kon i iná-Nea, “Iná, tua in ki adí i Iná.”

²⁷Noguman mako natua in ki Yesus kon i iná-Nea, Sia in noguman doman kon murí-Nea tatua, “Tua in ki inámu.” Bo kon dodaipa doman tatua dinia in murí tatua in ki iná i Yesus nogutun tobaḷoiannea.

²⁸Kinotaauan bidon i Yesus kon tanaa bayongan yagi-yagi ain noḷapat, bo bá onu inta ain pinais kon bonu in Buk Motusi in mobaḻídon, dá Sia in noguman, “Akuoi in moyogang.”

²⁹Kon tua oyúon in palo inta nopuḻing in anggur boil. Dá mosia in nogamá kon gabus bo pinoḷodok kon bonu in anggur boil tatua, bodongka pinopoturak kon buḷú topongkó bo pinopodiug kon bibig i Yesus.

³⁰Ki Yesus in nonginsip kon anggur boil tatua bo noguman, “Ain nopaḷut!” Bo kinumuyungdon in Sia bo poḷat minatoi.

³¹Itoi mita in Yahudi in doíbí aka mayat in intau mita inta pinopopakú kon kayu pinoyotaḻempang umuran moigantong mako kon tua umaai Singgai in Sabat, apa doman Sabat dodai intua in Singgai Moḷoben. Sin singgai inta pinopopakúan kon i Yesus tua in noiḷabú kon singgai inta mopoikoḷomai in Sabatdon tatua. Dá itoi mita i Yahudi minayádon kon i Pilatus bo nopoigum sinbá sioḷ in intau mita inta pinopopakú kon kayu pinoyotaḻempang tatua tokoputoḷandon bodongka popoponag in mayat monia nongkon kayu pinoyotaḻempang tatua.

³²Dá tontara mita tatua in minayá bo nomutoḷ muna kon sioḷ in intau doyowa inta pinopopakú noyotakin i Yesus.

³³Naonda in mosia noibayádon kon i Yesus, indoianmai monia yo minatoi bidon, dá sioḷ-Nea diádon pinutoḷan monia.

³⁴Táe sian i Yesus sinakuḷ in tobatú tontara in ginubat; dá iḷumuaidon in dugú bo tubig.

³⁵Intaubí inta ain nokoontong tontaní kon onu inta ain nobaḻí tatua in nopotaau kon soaḷ tatua, sinbá moiko in mopirisaya doman.[38] Bo onu inta pinotaaunea tatua in totuubí, bo kinotaauannea kon totuubí intua.

³⁶Tua in nobaḻí sinbá mobaḻídon onu inta pinais kon bonu in Buk Motusi, “Diábí tobatúmai in tuḷannea putoḷon.”

³⁷Kon bonu in Alkitab in pinais doman nanaa: “Mosia in moindoibí kon i-Nia inta ain sinakuḷ monia.”

³⁸Noiduduimai kon tua, ki Yusup inta nongkon Arimatea nopoigum kon i Pilatus mogamá kon mayat i Yesus. (Ki Yusup naa in dumodudui Yesus, táe tongá umado-adop sin moondok kon intau mita Yahudi.) Inogoi i Pilatus in onu inta pinoigumnea tatua, dá binayáneadon pinopoponag in mayat i Yesus tatua.

³⁹Ki Nikodemus inta nokoimontandon in namangoi kon i Yesus doḷom, minayá doman noyotakin i Yusup. Ki Nikodemus in nodia doman kon ramuan taḷong mobondu bo gaharu degá toḷumai nopuḷú nokilo in kobayongnea.

⁴⁰Binayá ginamá nayadua in mayat i Yesus bo binakut in pusi pinoyobakut in ramuan mobondu tatua pinodudui kon kabiasaan poḷoḷobong in intau Yahudi

⁴¹Kon diug in tampat inta pinopopakúan kon i Yesus kon kayu pinoyotaḻempang oyúon in tobatú taman. Kon bonu in taman tatua oyúon in poḷoḷobongan mobagu inta diápa kon dodai in onda pinoḷobongan kon intau.

⁴²Lantaran poḷoḷobongan tatua in nodiug, apa doman singgai in Sabat motoyongdon pangkoion, dá iḷobongdon monia kon tua in ki Yesus.