Read Mongondow YOHANES 2 Bible Online

YOHANES 2 - Mongondow bible

YOHANES 2

¹Doyowa nosinggai noiduduimai kon tua oyúon in pinonikaan kon kotá in Kana kon Galilea, bo ki iná i Yesus in kon tua doman.

²Ki Yesus bo murí-Nea mita in inoiní doman kon pesta tatua.

³Bo naonda in kinodaitan in anggur, ki iná-Nea in noguman kon i Yesus, “Mosia in kinodaitan in anggur.”

⁴Ki Yesus in notubag, “Iná, donaaipa mokiaid in onu bo onu kon i-Nakó, sin deemanpa wakutunea Akuoi mopoontong intua.”

⁵Táe ki iná i Yesus in noguman kon simpaḷ mita kon pinonikaan tatua: “Aidaidon in onu in pokiaid-Nea kon i monimu.”

⁶Kon tua oyúon in tampayang onom inta sinadia sin pakéon pondaritan podudui in adat in Yahudi. Tampayang tobatú bonunea degá mogatut noliter.

⁷Dá ki Yesus in noguman kon simpaḷ mita kon tua, “Bonuaidon tubig in tampayang mita tatua.” Dá binonuandon doman mita monia kinopuḻing.

⁸Onda intua ki Yesus noguman kon i monia, “Tanaa ponayukaika kon topiḻik nongkon tampayang tatua bo dia kon itoi in pesta bo pokinanam.”

⁹Bo itoi in pesta tatua nonanamdon kon tubig inta ain nobaḻí anggur tatua. (Táe diábí kinotaauannea mongo nongkon onda in anggur tatua, tongábí simpaḷ mita in nonotaau kon soaḷ mita tatua.) Dá itoi in pesta tatua in minayá dinimiug kon nonikaan ḷoḷaki,

¹⁰bo noguman: “Biasamai intau in munabí mopoinum in anggur inta mopia totok, bo aka tamu mita mooropdon monginum, bain tua bo poḷuaiondon in anggur inta diá totok mopia. Táe ki utat in umuranbí notagú kon anggur mopia umaai in tanaa mako!”

¹¹Tuata in soaḷ mokoherang inta dungkuḷ totok inta pinomia i Yesus. Tua in pinomia-Nea kon Kana inta kon Galilea. Takin tanda tatua Sia in nopoontongdon in kawasa-Nea. Dá murí-Nea mita in nopirisayadon kon i-Nia.

¹²Nopaḷut mako kon tua ki Yesus minayá in Kapernaum noyotakin i iná-Nea, i utat-Nea bo in murí-Nea mita. Mosia in nogutunpa kon tua tongonupamai degá nosinggai.

¹³Naonda in Singgai Moḷoben Paska in Intau Yahudi nodiugdon, ki Yesus minayá in Yerusalem.

¹⁴Kon palas in Baḷoi Tuhan inta kon Yerusalem, oyúon in intau inta mopopotaḷui mita in sapi, domba, bo paḷoma, bo oyúon doman in intau inta mopoponoḻiu in doit in ḻimitú mako kon tua.

¹⁵Ki Yesus in nonuḷapid kon tali bo pinomia sambok bodongka noguntun kon bayongan mahaḷuk kon tua, pinomayá domba, sapi pinoḷuai-Nea nongkon Baḷoi Tuhan. Bo meja mita inta tampat poponoḻiuanmai in doit sinoko baḻintuang-Nea, sahingga in doit nongoirangkap.

¹⁶Bo Sia in noguman kon intau mita mopopotaḷui in paḷoma, “Tokodiadon komintan nongkon naa. Dikabí baḻíon monimu pasar in Baḷoi Amá-Ku!”

¹⁷Dá kinotoropandon in murí-Nea mita kon oyúon in pinais kon bonu in Buk Motusi nanaa: “Tabi-Ku kon Baḷoi-Mu, o Allah, tumaga-tagab in kon gina-Ku.”

¹⁸Tongá itoi mita in Yahudi moḷawang kon i-Nia, mosia in noguman kon i Yesus, “Onu in motaau poontong-Mu kon inami saḷaku tanda kon oyúon in hak-Mu in mogaid kon ná tanaa.”

¹⁹Tubag i Yesus, “Rumbundon in Baḷoi Tuhan tanaa, bo tongábí kon daḷom in toḷu nosinggai in poposindogan-Ku bui.”

²⁰Itoi mita in Yahudi tatua in noguman kon i Yesus, “Opat nopuḷú bo onom notaong pinoposindogan in Baḷoi Tuhan tanaa, bo Iko in mongaku kon mokoposindog kon tua tongá kon daḷom in toḷu nosinggai?”

²¹Táe makusud i Yesus Baḷoi Tuhan tua in awak-Neabí tontaní.

²²Dá tuamai naonda in ki Yesus nobiag nongkon kinopatoian-Nea, buidon kinotoropan in murí-Nea mita, kon soaḷ tatua pernadon pinoguman i Yesus. Dá mosia in nopirisayadon kon onu inta pinais kon bonu in Buk Motusi bo bayongan inta siningog i Yesus.

²³Kon tungkuḷ in ki Yesus kon Yerusalempa dodai in Singgai Moḷoben Paska, nobayong intau in nopirisaya sin nokoontong kon soaḷ mita inta mokoherang pinomia-Nea.

²⁴Táe diábí pirisayaan i Yesus in mosia, sin kinotaauan-Neabí in gina in bayongan intau.

²⁵Tuamai diá bidon paraḷu mokodongog kon tosingogon in intau ibanea, sin kinotaauan-Nea onu in kon bonu in gina intau.