Read Mongondow YOHANES 20 Bible Online

YOHANES 20 - Mongondow bible

YOHANES 20

¹Kon singgai in Diminggu modiugpa mobayag, ki Maria Magdalena minayá in poḷoḷobongan. Inindoianneamai yo batu inta pinonaḷob noḻitoidon nongkon bubú in poḷoḷobongan tatua.

²Dá noribatuk in sia bo minayá notayak kon i Simon Petrus bo kon murí inta kinotabi totok i Yesus, bo noguman, “Ki Tuhan in ginamádon in intau nongkon poḷoḷobongan. Diá kinotaauanku mongo sinagú monia kon onda.”

³Ki Petrus bo murí-Nea ibanea tatua minayá in poḷoḷobongan.

⁴Taya dua tumpaḷa noribatuk, táe murí tobatú tatua in moḻika-ḻikat nongkon i Petrus, bo sia in muna nodapot kon poḷoḷobongan.

⁵Sia in iḷumongow kon poḷoḷobongan tatua bo inontongnea in pusí inta pinobakut noiukat mako kon tua, táe diábí in sia sinumuot.

⁶Bo noiangoidon in ki Petrus. Ki Petrus in baya-bayá sinumuot kon bonu in poḷoḷobongan tatua. Sia in nokoontong doman kon pusí inta pinobakut kon mayat in noiukat mako kon tua,

⁷táe pusí inta pinobakut kon uḷu i Yesus diábí noidiug kon tua, tua in iḻitodbí tontaní.

⁸Onda intua murí inta noiyaput muna tua in sinumuotdon doman. Tua inontongnea bo nopirisaya doman in sia. (

⁹Dapot kon dodai intua diápa kino mangaḻean monia in onu inta pinais kon bonu in Buk Motusi kon Sia in mustibí mobiag nongkon kinopatoian-Nea.)

¹⁰Nopaḷut mako kon tua murí mita i Yesus tatua in nobui.

¹¹Táe ki Maria Magdalena in simindogpa mako kon tayowon poḷoḷobongan tatua bo mongombaḷmai. Koyogot in sia nongombaḷ, iḷumongow kon bonu in poḷoḷobongan,

¹²bo inontongnea in malaekat doyowa nogiḷambung nobudó. Mosia in iḻimitú kon tampat inta pinoguḻidan kon mayat i Yesus. Tobatú kon dotá in uḷuan, bo tobatú kon dotá in sioḷan.

¹³Malaekat mita tatua in noḻibó, “Iná, nongonu sin mongombaḷ?” Ki Maria in noguman, “Ki Tuhanku in ginamádon in intau, bo diá doman kinotaauanku mongo pinobayá monia in onda.”

¹⁴Naonda in nosingog mako natua, sia in nobobui ná tumi bo inontongnea in ki Yesus sinimindog kon tua. Táe diábí kinotaauannea kon ki Yesus intua.

¹⁵Ki Yesus noḻibó kon inia, “Iná, nongonu sin mongombaḷ? Ki ine in tayakon i Iná?” Sinangka i Maria kon Sia tua in moḷoḷukadbí kon taman tatua, dá sia in noguman, “Amá, aka ki Amá in nomamping kon i-Nia nongkon naa, yo tuḷungaipa poguman kon inakó mongo kon onda in pinotagúan i Amá kon i-Nia, sinbá motaauku bayáan gamáan in Sia.”

¹⁶Ki Yesus in noguman kon inia, “Maria!” Ki Maria inimindoi kon i Yesus bo noguman kon bonu in singog in Ibrani, “Rabuni!” (Mangaḻenea “Guru”.)

¹⁷“Dikapa kadaian in Akuoi,” guman i Yesus kon inia, “sin Akuoi in diápa namonik kon i Amá. Táe bayádon kon i utat-Ku mita, bo potaaudon kon i monia kon tanaa Akuoi in mayá kon i Amá-Ku bo kon i Amá doman monimu, kon i Allah-Ku bo kon i Allah-mu.”

¹⁸Dá binayá domandon i Maria pinotaau kon murí mita i Yesus, kon inontongneadon in ki Tuhan bo ki Tuhanbí doman in noguman kon tua komintan kon inia.

¹⁹Kon singgai doman in Diminggu tatua, naonda in nodoḷomdon, murí mita i Yesus noyosipun kon baḷoi tobatú bo kinunsían monia komintan in ḷoḻingkop, sin moondok kon intau mita in Yahudi. Táe ki Yesus in baḷúbí noisindog magí kon yua-yuak monia bo noguman, “Salam dodamean bo kobiagan motompia kotaki-takin monimu.”

²⁰Nosingog mako kon natua, pinoontong-Nea in ḻima bo sian-Nea kon i monia. Nopia totok in gina monia naonda in nokoontong kon i Tuhan.

²¹Bo ki Yesus in noguman kon i monia bui, “Salam dodamean bo kobiagan motompia kon i monimu. Ná ki Amá nopotabá kon i-Nakó, yo natua doman in Akuoi mopotabá kon i monimu.”

²²Nosingog mako natua, Sia in nopoirupdon in tompot-Nea kon i monia bo noguman, “Tarimadon in Roho i Allah.

²³Aka moiko in mongampung kon dosa in tobatú intau, yo ampungan doman i Allah in sia. Aka diá ampungan monimu in dosa in tobatú intau, dá diábí doman ampungan i Allah in sia.”

²⁴Ki Tomas (inta dinonoi ki “Apang”), tobatú murí inta kon sigad in murí-Nea mopuḷú bodoyowá tua in diá koyota-yotakin monia dodai in ki Yesus namangoi.

²⁵Dá murí mita i Yesus ibanea in noguman kon i Tomas, “Kami ain nokoontong kon i Tuhan!” Táe ki Tomas in notubag: “Aka diápa ontongonku tontaní in paḷot in pakú kon ḻima-Nea bo kon sian-Nea tua, yo totokbí in diá mopirisaya in akuoi.”

²⁶Naonda in todiminggu noiduduimai kon tua, murí mita i Yesus noyosipun bui kon tua, ki Tomas in oyúon domandon kon tua noyotakin monia. Komintan kinunsían monia in ḷoḻingkop, táe ki Yesus in namangoi bo sinimindog kon yua-yuak monia bo noguman, “Salam dodamean bo kobiagan motompia kotaki-takin monimu.”

²⁷Noiduduimai kon tua, ki Yesus in noguman kon i Tomas, “Indoiaidon in ḻima-Ku, bo popoturakdon kon naa in tononuyúmu. Tonggó magí in ḻimamu bo popotudakdon kon sian-Ku. Dikadon moḻia-ḻiaw in gina, táe popirisayadon!”

²⁸Ki Tomas in noguman kon i Yesus, “Tuhanku bo Allahku!”

²⁹Dá ki Yesus in noguman kon inia, “Iko in nopirisaya popisí in inontongmudon toh? Kosanangdon totok in mosia inta umpaka diá nokoontong táe nopirisaya kon i-Nakó!”

³⁰Nobayongpabí in soaḷ mita inta mokoherang in pinomia i Yesus kon tayowon in murí-Nea mita, táe diádon pinais kon bonu in buk tanaa.

³¹Táe onu inta pinais kon buk tanaa, makusudnea kon bá mopirisaya[39] in moiko kon ki Yesusbí tua in Datu Mopoposaḷamat, bo ki Adí i Allah, bo popisí in pirisayamu tatua dá mokouḻí i moiko kon kobiagan.