Read Mongondow YOHANES 4 Bible Online

YOHANES 4 - Mongondow bible

YOHANES 4

¹Dinongogdon in intau mita in Parisi kon ki Yesus ain nokouḻí poḷat nobaptis kon intau mobayo-bayongdon kon dumodudui i Yohanes. (

²Sabanarnea i Yesus in diábí nobaptis táe murí-Neabí mita.)

³Naonda in kinotaauan i Yesus kon tua komintan dinongogdon in intau mita in Parisi, dá Sia in minayá nongkon Yudea bo nobuidon kon Galilea.

⁴Kon binayáan-Nea tatua musti in Sia moitaḻib kon Samaria.

⁵Dá nodapotdon in ki Yesus kon kotá tobatú kon Samaria, Sikhar in tangoinea. Ḻipú tatua diá noyayú nongkon butá inta inogoi i Yakub koḻipod kon i Yusup, ki adínea.

⁶Kon tua oyúon parigí i Yakub. Noḷopídon totok in ki Yesus sin bobayáan tatua, tuamai in Sia iḻimitúpa kon bingkímai in parigí tatua. Dodai intua noutudon in singgai, degá jam mopuḷú bo doyowa.

⁷Bo murí-Nea mita minayádon in kotá sin notaḷui kon kaanon. Diá noonggot kon tua oyúon tobatú bobay in Samaria in namangoi sin monangkob. Ki Yesus in noguman kon inia, “Iná, motaau degá in Akuoi moigum kon tubig inumon-Ku?”

⁸

⁹Bobay tatua in notubag, “Ki Tuang intau in Yahudi, bo akuoi naa inta in Samaria; nongonu sin ki Tuang moigumbí kon tubig inumon kon inakó?” (Sin intau mita in Yahudi diá noyoyobayatan intau mita in Samaria.)[8]

¹⁰Ki Yesus in notubag, “Aka kuma bo kinotaauanmu in totabi i Allah bo kinotaauanmu in ki ine in noigum kon inumon kon inimu, yo nopasti bidon kon iko tontaní in moigumbí kon tubig inumon kon i-Nia tua. Bo ogoian-Neabí iko in tubig kobiagan tatua.”

¹¹Dá bobay tatua in noguman doman, “Diá in totayuk i Tuang bo nodaḷom totok in parigí tanaa. Kon ondabí in kouḻían i Tuang kon tubig inta mokobiag tua?

¹²Ki Yakub mogoguyang nami, ain nobogoi in parigí tanaa kon inami.[9] Bo sia tontaní ain nogamá kon tubig inumonnea nongkon naa; ná doman tua in ki adínea mita bo bobiagonnea mita. Degá ki Tuang in moḷobe-ḷoben nongkon i Yakub?”

¹³Dá kai Yesus doman, “Intau inta monginum kon tubig tanaa in buipabí moyogang,

¹⁴táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”

¹⁵Guman in bobay tatua, “Tuang, ogoiaidon in akuoi in tubig tatua, sinbá diádon moyoga-yogang in akuoi; bo diáka bidon mopobui-buimai kon naa sin monangkob.”

¹⁶Guman i Yesus kon inia, “Bayádon bo oiní in ki buḷoimu mamangoi in naa.”

¹⁷Bobay tatua in notubag, “Diábí in ki buḷoiku.” Guman doman i Yesus bui, “Totuu in tubagmu nion.”

¹⁸“Sin iko in koḻimadon pinobuḷoi, bo ḷoḷaki inta nobiag noyogaḷummu tanaa mako in deemanbí ki buḷoimu.”

¹⁹Bobay tatua in noguman, “Kinotaauankudon tanaa kon ki Tuang in tobatúbí nabi.”

²⁰“Mogoguyang nami nosumba kon i Allah kon buḷud tanaa, táe intau mita toḻipúan i Tuang moguman kon tongábí kon Yerusalem in tampat pososumbaan in intau kon i Allah.”

²¹Ki Yesus in noguman kon inia: “Popirisayadon, komintanmai intau in mosumba kon i Amá, deeman bidon kon tombuḷud tanaa bo deemanbí doman kon Yerusalem.

²²Moiko intau in Samaria mosumba kon i inta diá kinotaauan monimu, táe aka kami intau in Yahudi nosumba kon i-Nia inta kinotaauan nami, sin kasaḷamatan in namangoi nongkon intau in Yahudi.

²³Táe moiangoibí in wakutunea, sedang bo noiangoi bidon, takin in kawasa in Roho i Allah intau mita in mosumba kon i Amá inta mobanar ná inta kinoibog i Amá.

²⁴Sin ki Allah in Rohobí bo tongábí takin Roho i Allah dá intau mita in motaau mosumba kon i Amá podudui in kaadaan-Nea.”

²⁵Bobay tatua in noguman kon i Yesus, “Kinotaauankubí kon Datu Mopoposaḷamat (inta sinangoi ki Kristus) in mamangoibí. Aka Sia mamangoi, potaau-Neabí in bayongan in yagi-yagi kon i naton.”

²⁶“Akuoibí naa inta i makusudmu nion”. guman i Yesus, “Akuoi inta moyosingogmumai tanaa.”

²⁷Bo dodai intua murí mita i Yesus noiangoidon bui. Mosia in noherang totok in nokoontong kon i Yesus nongonguman takin tobatú bobay. Táe diá in tobatúmai in mosia in nokobaḻí noḻibó kon bobay tatua, “Onu in paraḷu i iná?” andeka noḻibó kon i Yesus, “Mongo onu in inouman i Amá takin bobay tatua?”

²⁸Bo bobay tatua in nonaḷámaidon kon tampayangnea kon tua bo minayá in kotá bo noguman kon intau mita kon tua,

²⁹kai-nia “Koḻigai, mayá in kita moindoi kon intau inta nopotaau kon inakó kon bayongan inta ain pinomiaku. Degá bo Siabí tua in Datu Mopoposaḷamat?”

³⁰Dá mosia nobuatdon nongkon kotá bo minayá nokipodungkuḷ kon i Yesus.

³¹Dodai intua murí-Nea mita in nonongganutdon kon i Yesus nongaan. “Pak Guru,” kai monia, “Mongaandon.”

³²Táe ki Yesus in notubag, “Kon i-Nakó oyúon in kaanon inta diá kinotaauan monimu.”

³³Dá murí-Nea mita in nosiḻibóandon, nanaa “Degá oyúondon intau in nogatod mangoi kon kaanon kon i-Nia?”

³⁴Ki Yesus in noguman, “Kaanon-Ku naa in dumuduibí kon onu inta kinoibog i-Nia inta nopotabá kon i-Nakó, bo moginḷapat kon oaidan inta pinoki aid-Nea kon i-Nakó.

³⁵Kai monimu in ‘opatpa nobuḷan bo mokoyut.’ Táe Akuoi in moguman kon inimu: Indoiaika magí-mako in gobá inta ain nodarag bo noḷutúdon, motaaudon koyuton!

³⁶Bo tanaapabí doman mako bo intau inta mokokoyut tua in motarima kon tondan in pinogaidannea bo mosipundon kon bungai in kobiagan mopia bo inta mononoi. Dá intau inta nomuḷa bo inta nokoyut tumpaḷabí moḷunganga in gina.

³⁷Totuubí in toḻibag nanaa, ‘Tobatú in momuḷa, ibanea i mokoyut.’

³⁸Akuoi in mopotabá kon i monimu mayá mokoyut kon gobá inta deeman moiko in nomuḷa; intaudon ibanea in nogaid kon tua, bo moiko in motarima kon kauntungan nongkon oaidan monia tua.”

³⁹Nobayong in intau in Samaria inta nogutun kon kotá tatua in nopirisaya kon i Yesus popisí in nokodongog kon ouman in bobay tatua. Sin bobay tatua in noguman, “Sia in noguman kon inakó kon bayongan inta ain pinomiaku.”

⁴⁰Dá naonda in intau mita in Samaria mita tatua noyodungkuḷ i Yesus, mosia in nopoigum totok sinbá, mogutunpa in Sia takin monia. Dá ki Yesus in nogutunpa kon tua takin i monia doyowa nosinggai.

⁴¹Bo nodugangdon nobayong in intau nopirisaya kon i Yesus sin nokodongogdon tontaní kon totundú-Nea.

⁴²Mosia in noguman kon bobay tatua, “Mopirisayadon in kami in tanaa, deeman bidon tongá popisí in onu inta inoumanmu kon inami, táe kami in nokodongogdon tontaní kon tosingogon-Nea. Bo kinotaauandon nami kon Sia tua in totuubí Mopoposaḷamat in dunia.”

⁴³Naonda in doyowadon nosinggai in nogutun kon Sikhar, minayádon in ki Yesus kon Galilea.

⁴⁴Ki Yesus tontaní in nogumandon nanaa, “Tobatú nabi in diábí horomaton kon ḻipúnea tontaní.”

⁴⁵Táe naonda in Sia noiyaputmai in Galilea, intau mita in nonontomu kon i-Nia takin sanang in Gina, sin wakutu in Singgai Moḷoben Paska kon Yerusalem, inontongdon monia in bayongan inta pinomia i Yesus.

⁴⁶Noiduduimai kon tua ki Yesus in buidon minayá in Kana inta kon Galilea, kotá inta pernadon pinomiaan-Nea kon inta mokoherang, “Tubig nobaḻí anggur.” Kon kotá tatua oyúon in tobatú pogawai kon komaḻig, dodai intua ki adínea in notakit kon Kapernaum.

⁴⁷Naonda in dinongognea kon ki Yesus in nongkon Yudea namangoidon in Galilea, dá sia in minayádon kon i Yesus nopoigum sinbá mamangoipa in Kapernaum bo mongundam kon i adínea inta dongkadon oḷaton.

⁴⁸Ki Yesus in noguman kon pogawai in komaḻig tatua, “Aka moiko bo diá nokoontong kon inta mokoherang mita, yo tantú diábí in moiko mopirisaya.”

⁴⁹Táe pogawai komaḻig tatua in noguman, “Tuang, ḷagidon angoi bá diápa matoi in ki adíku.”

⁵⁰Ki Yesus in noguman kon inia, “bayádon, nopia bidon in ki adímu.” Intau tatua in nopirisaya kon singog i Yesus bo minayá.

⁵¹Kon daḷanpa, bobantungnea mita in nonontomudon kon inia bo noguman, “Ki adí i Tuang in nopiadon.”

⁵²Dá iḻibóneadon kon i monia mongo jam tongonu nopia in ki adínea. Tubag monia, “Koḷabung, degá jam imitánea singgai bo noinggamá in patúnea.”

⁵³Bo kinotoropandon in pogawai in komaḻig tatua kon jam natuata in ki Yesus in noguman kon inia: “Nopia bidon in ki adímu.” Dá sia takin tombonu in baḷoinea komintandon nopirisaya kon i Yesus.

⁵⁴Tua in tanda mokoherang induanea inta pinomia i Yesus kon Galilea naonda in Sia nongkon Yudea.