Read Mongondow OUMAN IN RASUL MITA 13 Bible Online

OUMAN IN RASUL MITA 13 - Mongondow bible

OUMAN IN RASUL MITA 13

¹Wakutu intua kon jamaat in Antiokhia oyúon in tongonumai in nabi bo guru, naa in tangoi monia tua: Ki Barnabas, ki Simeon inta dinonoi ki Niger, ki Lukius intau in Kirene, ki Menahem inta noyobiag i Datu Herodes,[18] bo ki Saulus.

²Kon singgai tobatú wakutu in mosia nosambayang kon i Tuhan bo nopuasa, Roho i Allah in noguman kon i monia nanaa, “Piḻídon in ki Barnabas bo ki Saulus mobaḻí totabá-Ku, sinbá mosia in mogaid kon oaidan inta aindon sinantú-Ku pokiaid kon i monia.”

³Naonda in nopaḷutdon nopuasa bo nosambayang in mosia, binarakatandon monia in ki Barnabas bo ki Saulus bo poḷat pinotabá minayá in taya dua.

⁴Lantaran pinotabá in Roho i Allah, dá ki Barnabas bo ki Saulus minayádon in Seleukia. Nongkon tua mosia in sinumakoi kon uangga minayá in Siprus.

⁵Naonda in noiyaput in mosia kon ḻipú in Salamis, mosia in nopotaa-taau mako in pirman i Allah kon bonu in baḷoi mita pososambayangan in intau Yahudi. Kon binayáan monia tatua, ki Yohanes inta dinonoi ki Markus in notuḷung kon i monia.

⁶Mosia in minayá noḻibu kon bayongan pulau kon tua noidapot kon Papos. Kon tua in mosia noyodungkuḷ in tobatú intau in Yahudi, inta ki Bar Yesus in tangoinea. Tobatú mososihir bo mongaku kon sia in tobatú nabi.

⁷Sia naa in totok noyobayat i Sergius Paulus, gubernur kon pulau tatua, intau inta totok mopandoi. Sia in nogoiní kon i Barnabas bo kon i Saulus sin moibog mokidongog kon pirman i Allah.

⁸Táe ki Elimas (tangoi in mososihir tatua aka kon bahasa in Yunani) in tantú momayow kon i Barnabas bo kon i Saulus, sin ramujionnea bá ki gubernur in diá mopirisaya kon i Yesus.

⁹Táe ki Saulus — inta sinangoiandon ki Paulus — kinawasa in Roho i Allah inimindoi kon inia,

¹⁰bo noguman, “Ei intau inta mouboḷ totok, ki adí in Ibilis! Iko nion saturu in bayongan inta mopia. Nongonu sin diábí doman mogogai iko in moḷamboi kon tomayá i Allah moposaḷamat kon intau?

¹¹Yo indoiai in tanaa, hukumon i Tuhan iko! Iko in mobilog bo diádon mokoontong kon mata in singgai samantara naa.” Kon dodaipa doman intua kinorasaandon i Elimas kon oyúon in topuot morondí in noikoḷob kon matanea, dá sia in mayá mongoka-ngokapdon in motayak kon intau inta motaau mokapit kon inia.

¹²Naonda in inontongdon i gubernur in onu inta nobaḻí tatua, nopirisayadon totok in sia kon i Yesus; sin nopia totok in ginanea kon totundú mita soaḷ ki Tuhan.

¹³Ki Paulus bo yobayatnea mita, nongkon Papos sinumakoi kon uangga bo minayá in Perga inta kon Pampilia. Kon tua ki Yohanes Markus nonaḷámaidon kon i monia bo nobui kon Yerusalem.

¹⁴Nongkon Perga, ki Paulus bo yobayatnea mita nongingguput kon bobayáan monia noidapot kon Antiokhia inta kon Pisidia. Onda intua kon singgai in Sabat mosia in minayá in baḷoi pososambayangan bo iḻimitú mako kon tua.

¹⁵Naonda in nopaḷutdon binaca in Hukum i Musa bo Buk in Nabi mita, itoi mita in baḷoi pososambayangan tatua nopotabá in intau minayá noḻibó kon i Paulus bo kon yobayatnea mita. Nanaa in ḷoḻibó monia tua, “Utat mita, aka oyúonbí in koyow inta mokorigon kon pirisaya bo mokohibur kon bayongan umat i Allah tanaa mita, yo pogumandon.”

¹⁶Dá baḷúdon sinimindog in ki Paulus bo noponuḷadá in ḻimanea bo noguman, “Uḻe bayongan ginaḷumku intau mita in Israel bo utat mita ibanea kon naa inta motoindudui kon i Allah! Indongogaipa in singogku naa:

¹⁷Ki Allahbí in intau Israel inta nomiḻí kon mogoguyang naton bo inta nobogoi in buí mobayong kon i naton sahingga in nobaḻí bangusa inta moḷoben wakutu in nogutunpa kon Mesir in mosia saḷaku mokokiangoi. Onda intua takin kawasa moḷoben ki Allah nopoḷuai kon i monia nongkon butá in Mesir tatua.

¹⁸Opat nopuḷú notaong pinosabaran-Nea kon oaid mita monia[19] kon padang gurun.

¹⁹Bo pitu nobangusa in pinutúan-Nea kon butá in Kanaan tatua sin mosila-silai mako kon butá tatua kon bayongan in intau Israel sinbá mobaḻí kapunyaan monia.

²⁰Tua komintan in nobaḻí kon bonu in opat nogatut bo ḻima nopuḷú notaong in koonggotnea. Naonda in sinilai butá in Kanaan tatua,[20] inogoian i Allah in hakim in mosia. Hakim pangabisan in ki Nabi Samuel.

²¹Noidudui kon tua mosia noigum kon datu, dá inogoi i Allah in ki Saul, ki adí i Kish inta nongkon suku Benyamin. Opat nopuḷú notaong sia in nobaḻí datu.

²²Naonda in kinodoídon i Allah in sia, ki Allah nomiḻídon kon i Daud nobaḻí datu monia. Bo tanaa inta pinoguman i Allah soaḷ ki Daud, ‘Nouḻí-Kudon in ki Daud inta ki adí i Isai tobatú intau inta totok in mokosanang kon gina-Ku. Sia tua inta motoindudui kon onu in kinoibog-Ku.’

²³Nongkon buí i Daud tuata, podudui in dandi-Nea, Sia in moposadia in tobatú Datu Mopoposaḷamat kon bayongan in intau Israel, dá Sia tuata in ki Yesus.

²⁴Wakutu in ki Yesus diápa nomangkoi kon oaidan-Nea, pinobaḷúdon muna i Yohanes kon bayongan intau Israel kon musti mogogaidon in mogaid kon dosa mita monia bo baptisondon.

²⁵Naonda in motoyongdon mopaḷut in oaidannea, ki Yohanes in noguman kon i monia nanaa, ‘Degá kai monimu kamai yo ki inebí in akuoi naa? Akuoi naa in deemanbí Sia inta oḷaton mako monimu. Táe moiangoibí in Sia inta oḷaton mako monimu nion, moitoḷuan mangoi kon inakó; umpaka tongá mobuka kon togot in sapatu-Nea yo diá mokobaḻí akuoi.’

²⁶Utatku mita inta buí i Abraham bo utat mita ibanea inta motoguondok kon i Allah! Habar inta mokosaḷamat aindon pinoyaput kon inaton;

²⁷sin bayongan intau inta nogutun kon Yerusalem bo itoinea mita in diábí nonotaau kon Siabí tua inta mopoposaḷamat, sahingga ihukumbí monia in Sia nodapot minatoi. Táe hukuman tatua in mogintompodbí kon onu inta ain pinoguman muna in nabi mita inta tantú bacaan monia aka kon singgai in Sabat.

²⁸Umpaka diá kinouḻían monia kon taḷá inta motaau baḻíon monia dodoyonan pohukuman kon i-Nia modapot in matoi, táe pinakisabí doman monia pinoki ḻimod kon i Pilatus in Sia.

²⁹Bo naonda in nopaḷutdon inaidan monia in bayongan inta ain noipais kon bonu in Buk Motusi soaḷ Sia, pinopoponagdon monia in mayat-Nea nongkon kayu pinoyotaḻempang bodongka iḷobong.

³⁰Táe biniag bui i Allah in Sia kon sigad in intau minatoi.

³¹Onda intua tongonumai nosinggai in Sia umuran namangoi nokipogontong kon dumodudui-Nea mita inta namangoi noyotakin-Nea nongkon Galilea mayá in Yerusalem. Mosia tuata inta nobaḻí sakusi-Nea kon umat masai naa.

³²Tuamai tanaa mako kami in mopoyaput in Habar Mopia kon i monimu: Kon onu inta aindon pinodandi i Allah kon mogoguyang naton,

³³aindon sinotuu-Nea kon i naton takin daḷan nomiag bui kon i Yesus nongkon kinopatoian-Nea, ná inta ain pinais kon buk in Mazmur induanea, nanaa, ‘Ikobí nion in ki Adí-Ku, singgaipa doman naa Akuoi in mobaḻí ki Amá-Mu.’

³⁴Aindon biniag i Allah in Sia nongkon sigad in intau minatoi. Táe tanaa mako in diá bidon mokorasa kon popatoi natua in Sia. Sin ki Allah in nogumandon nanaa, ‘Akuoi in mobogoi in dandi motusi kon ini-Mu bo pototuu-Kubí dandi inta aindon doman pinodandi-Ku kon i Daud.’

³⁵Ná doman tua in kon tontagá mita ibanea in pinoguman nanaa, ‘Diábí pomayá-Mu mako in Simpaḷ-Mu inta motoindudui tatua moyoyang kon bonu in poḷoḷobongan.’

³⁶Naonda in nogaid mako kon onu inta kinoibog i Allah in ki Daud kon wakutu in nobiagpa, sia in minatoi domandon bo iḷobong kon diug i mogoguyangnea. Dá noyoyangbí domandon komintan in awaknea.

³⁷Táe ki Yesus inta biniag i Allah nongkon kinopatoian-Nea, diábí noyoyang in awak-Nea.

³⁸Tuamai utatku mita, mustidon kotaauan monimu kon pinongin i Yesusbí tuata habar soaḷ pongampungan kon dosa pinotaau kon i monimu; musti kotaauan monimu kon pomuḷoi in intau inta mopirisaya kon i-Nia, pinilatandon nongkon dosa mita inta diábí motaau tongá popatan pongin bayongan in parenta mita i Allah inta pinoyaput i Musa.

³⁹

⁴⁰Manangka intua tarukira totok kopira, dika modapot in mobaḻí kon i monimu[21] onu in pinoguman in nabi mita nanaa,

⁴¹‘Tarukira totok kopira, ei moiko intau mita inta mosingkuḻe! Moherangbí in moiko, bodongka matoi! Sin kon masa in tanaa Akuoi in mogaid kon oaidan inta diábí pirisayaan monimu, umpakabí oyúon intau in mopomangaḻe kon inimu.’ ”

⁴²Wakutu in ki Paulus bo ki Barnabas nonaḷámaidon kon baḷoi pososambayangan tatua, bayongan intau kon baḷoi pososambayangan tatua nongoyow kon i nayadua sinbá umuranpa mamangoi kon singgai in Sabat ibanea mako, bo mogingguput kon onu inta aindon muna pinoyaput nayadua kon i monia.

⁴³Naonda in iḷumuaidon in bayongan intau nongkon baḷoi pososambayangan tatua, ki Paulus bo ki Barnabas in dinuduian in moantó intau Yahudi bo intau doman mita ibanea inta sinumuotdon kon agama Yahudi. Dá umuran sinongginaan in rasul mita tatua in mosia sinbá umuran mobiag kon bonu in totabi Allah.

⁴⁴Kon singgai in Sabat noiduduimai, gogió komintan intau kon kotá tatua namangoi mokidongog kon singog mita i Allah.

⁴⁵Wakutu in inontong intau mita Yahudi in intau moantó tatua, mosia in totok nointoi. Totok monia singkuḻeon in ki Paulus bo toko bayowan monia onu in pinogumannea.

⁴⁶Táe taran-tarangan in taya dua in nosingog nanaa: “Koḻipodpabí singog i Allah naa in pinoyaput kon i monimu. Táe diá sinarima monimu, sin moiko ain noguman tontaní kon moiko in diábí patus motarima kon kobiagan mononoi. Tuamai tanaa mako taḷaan nami in moiko bo mayá kon intau ibanea.

⁴⁷Sin tanaadon in parenta i Tuhan kon inami, ‘Aindon sinantú-Ku in moiko mobaḻí bayag kon bayongan in intau ibanea inta deeman intau in Yahudi, sinbá nongkon i monimu, bayongan in intau kon dunia naa in mosaḷamat.’ ”

⁴⁸Wakutu in dinongog in bayongan intau inta deeman Yahudi in singog tatua, nopia totok in gina monia bo totokdon in nodayow kon i Tuhan. Bo bayongan intau inta aindon piniḻí i Allah sinbá mokouḻí kon kobiagan mononoi, komintandon nopirisaya.

⁴⁹Singog i Tuhan noiwayadon kon bayongan ḻipú kon tua.

⁵⁰Táe intau mita moḷoben kon kotá tatua bo bobay mita inta nongkon kalangan intau moḷantud inta motoguondok kon i Allah, totok pongaruon in intau mita in Yahudi. Mosia in nogaid kon soaḷ inta nokopomuka kon saturu monia kon i Paulus bo kon i Barnabas, bo inuntundon monia in taya dua nongkon daerah tatua.

⁵¹Dá sinopiran in rasul mita tatua kon tayowon intau moantó tatua in ḷobud inta nongoikompit kon sioḷ monia saḷaku tompoingat kon i monia, bodongka minayá in Ikonium.

⁵²Dumodudui mita monia kon Antiokhia nongosanang in gina bo kinawasaan in Roho i Allah.