Read Mongondow OUMAN IN RASUL MITA 14 Bible Online

OUMAN IN RASUL MITA 14 - Mongondow bible

OUMAN IN RASUL MITA 14

¹Kon Ikonium ki Paulus bo ki Barnabas in nokorasa kon soaḷ inta notongkai. Mosia in minayá doman kon baḷoi pososambayangan in intau Yahudi bo nopoyaput in pirman i Allah kon tua, sahingga in nobarong totok intau Yahudi bo intau inta deeman Yahudi in nopirisaya kon i Yesus.

²Táe intau mita in Yahudi inta doí mopirisaya, totokdon in mopongaru kon intau mita inta deeman Yahudi, dá nomukádon yaat in gina i intau mita tatua kon bayongan intau inta mopirisaya kon i Yesus.

³Manangka intua ki Paulus bo ki Barnabas in nogutun noḻin onggot kon tua. Bo umuranbí nobarani in mosia in nongonguman kon soaḷ ki Tuhan. Dá pinoniatadon i Tuhan kon habar inta pinotaau monia soaḷ totabi-Nea tatua in totuubí; mosia in inogoian-Neadon in kawasa mogaid kon soaḷ mita inta mokoherang bo inta diá komampuan in intau aidan.

⁴Táe intau mita kon kotá tatua in diá notobatú kon raian; oyúon in dinumudui kon intau mita in Yahudi inta diá nonotaau kon i Allah bo oyúon doman in dinumudui kon rasul mita tatua.

⁵Bo intau mita in Yahudi takin itoi mita monia noyotakin in intau mita deeman Yahudi in noyopakat moposikisa bo mogandur in batu kon rasul mita tatua

⁶Táe kinotaauan i Paulus bo i Barnabas in tomayá monia tatua, dá minayá in taya dua bo sinimí kon Listra bo Derbe.

⁷Kon tua in mosia umuranbí doman nopoyaput in Habar Mopia.

⁸Kon Listra oyúon in ḷoḷaki tobatú inta sioḷnea noḻempeng nongkon noilahirpamai, sahingga in sia diá kon dodai in onda in nokobayá, sin totuu moḻemé in sioḷnea.

⁹Intau tatua in ḻimitú mako kon tua mongindongogmai kon i Paulus mosingog. Bo inontong i Paulus kon mopirisaya in intau tatua, dá tuamai mopiapabí. Dá ki Paulus inimindoi kon inia,

¹⁰bo noguman noropot, “Sindogdon kotuḻid!” Intau tatua iḷumanduk in sinimindog bo minayá.

¹¹Naonda intau moantó nokoontong kon onu inta ain inaidan i Paulus, mosia in nomaḷú kon bonu in bahasa Likaonia, “Dewa mita in noponagdon kon dunia naa naonda bo intau.”

¹²Dá ki Barnabas sinangoian monia ki Zeus yo ki Paulus in ki Hermes, sin sia in nosingog.

¹³Bo namangoi in ki Imang i Dewa Zeus, inta tampat pososambayangannea kon ḷuai in kotá, nodia kon sapi mita koḷakian bo nopoḷambá in bungang kon ngara in kotá tatua. Bo noyotakin doman monia nobogoi in sosumba kon rasul mita tatua.

¹⁴Naonda in ki Paulus bo i Barnabas nokodongog kon onu inaidan in intau mita tatua, nomera-merak in mosia kon ḷambung monia bo sindaḷan noribatuk minayá irumuak kon intau moantó tatua, bo nomaḷú,

¹⁵“Ei, nongonu sin moiko in mogaidbí kon nanaa? Kami naa in intaubí doman ná moiko! Kami in kon naa tongábí namangoi mopoyaput in Habar Mopia kon i monimu sinbá taḷaanmaidon monimu in soaḷ mita inta diá baraguna tanion bo mopirisayadon kon i Allah inta aindon nobiag nongkon kinopatoian-Nea, ki Allah inta nomia kon ḷangit bo butá, dagat bo bayongan inta kon bonunea.

¹⁶Koḻipod in pinomayápabí mako i Allah in intau mobiag podudui in ibognea tontaní.

¹⁷Táe umuran-Neabí poniata in totabi-Nea bo mobogoi kon onu inta mopia. Ogoian-Nea in uyan nongkon ḷangit bo hasil in butá kon musimnea. Umuran-Nea inogoian in kaanon in moiko bo pinosanang in gina monimu.”

¹⁸Táe umpaka námaidon tua in pinogoguman in rasul mita tatua kon i monia, táe diábí doman in mosia nokoampag. Tantúbí doman in mosia nobogoi in sosumba kon i monia.

¹⁹Tongá dodai intua namangoidon in intau mita Yahudi kon Listra. Mosia nongkon Antiokhia kon Pisidia bo nongkon Ikonium bo mopongaru kon intau moantó tatua sinbá dumudui kon i monia. Bo ki Paulus in inarab monia in batu poḷat dinia pinoḷuai kon kotá. Bo kai monia kamai ain bidon minatoi,

²⁰táe naonda in iḻipung intau mita inta mopirisaya, sia in nobangon bo bui sinumuot in kotá. Nopoikoḷomai kon singgai sia in minayádon in Derbe takin i Barnabas.

²¹Kon Derbe, ki Paulus bo ki Barnabas nopoyaput doman in Habar Mopia bo nobayongdon in intau in nobaḻí nopirisaya kon i Yesus. Onda intua mosia in nobuidon kon Listra, bo minayá kon Ikonium bo Antiokhia inta kon Pisidia.

²²Kon kotá mita tatua mosia in minayá noginrigon kon gina in intau mita inta mopirisaya kon i Yesus bo nononggina sinbá umuran mopirisaya kon i Yesus. Nanaa in tonggina monia tua, “Munapabí moantó in roriga mouḻí naton, bain tua bo mokorasa kon kopiaan kon Dunia Mobagu i Allah.”

²³Pomuḷoi in jamaat pinomiḻíandon i Paulus bo i Barnabas kon intau mita inta baḻíon itoi in jamaat tatua. Sinambayangan monia poḷat pinopuasaan bo pinosarakan monia kon i Tuhan inta pinirisaya monia tua.

²⁴Onda intua ki Paulus bo ki Barnabas in nogingguputdon kon bobayáan monia, mosia in nongin ḻipú in Pisidia bo nodapotdon kon Pampilia.

²⁵Bo naonda in nopaḷutdon nopoyaput in Habar Mopia kon Perga, mosia minayá in Atalia, inta kon pintad.

²⁶Bain nongkon tua mosia bo sinumakoi kon uangga minayá in Antiokhia. Kotá tatuata inta muna-munamai pinotarimaan monia kon totabi i Allah, sinbá aidandon monia in oaidan inta koyogot monia iḷapatan masai naa.

²⁷Naonda in noiyaputdon kon Antiokhia, nodait monia sinipun in bayongan jamaat, bo pinongongumanan kon onu inta aindon inaidan i Allah kon i monia. Bo inouman doman monia in totuḷung i Allah nobuká kon daḷan nodapot in intau mita inta deeman Yahudi nopirisaya kon i Yesus.

²⁸Kon kotá tatua ki Paulus bo ki Barnabas nogutun noonggot noyotakin in jamaat mita inta mopirisaya.