Read Mongondow OUMAN IN RASUL MITA 16 Bible Online

OUMAN IN RASUL MITA 16 - Mongondow bible

OUMAN IN RASUL MITA 16

¹Ki Paulus in nogingguputdon kon bobayáannea. Sia minayá in Derbe, bo Listra. Kon tua oyúon tobatú dumodudui i Yesus inta ki Timotius in tangoinea. Ki inánea intau in Yahudi táe nopirisayadon kon i Yesus; ki amánea intau in Yunani.

²Kon sigad in intau mopirisaya inta nogutun kon Listra bo Ikonium, kinotaauan monia kon ki Timotius tua in intaubí mopia.

³Tuamai ki Paulus in noibog nodia kon inia takinnea. Dá pinoki sunatnea in ki Timotius, sin intau mita in Yahudi kon tua nonotaau kon ki amánea intaubí in Yunani.

⁴Kon pomuḷoi in kotá inta pongandupan monia, ki Paulus bo ki Silas mopotaau in onu inta ain nobaḻí kaputusan wakutu in rasul bo itoi mita in jamaat nosidang kon Yerusalem. Mosia in nononggina kon intau mita mopirisaya kon tua sinbá umuran dumudui kon atorang mita tatua.

⁵Dá pirisaya in jamaat umuran modugang moropot, bo jamaat kobarong-kobarong domandon.

⁶Ki Paulus bo ki Silas in diá inogoi in Roho i Allah mopoyaput in Habar Mopia kon propinsi Asia. Dá mosia in nopobayádon kon daerah in Prigia bo Galatia.

⁷Naonda in noiyaput kon sigad in Misia, mosia in nonungkuḷ sinumuot kon propinsi Bitinia, táe diá inogoi in Roho i Allah.

⁸Dá sinumurus[22] kon Misia bo baya-bayá in Troas.

⁹Nodoḷom monag, kon Troas, ki Paulus in nokoontong kon tobatú oontongon. Kon bonu in oontongon tatua sia in nokoontong kon intau in Makedonia tobatú sinimindog kon tayowonneamai bo totok in nopoigum sinbá mosia in mayápa in Makedonia motuḷung kon i monia.

¹⁰Naonda in nokouḻí kon oontongon tatua, baya-bayá nobasadia in kami sin mayá in Makedonia. Sin nopirisayabí totok in kami kon ki Allahbí in nopotabá kon inami mayá intua mopoyaput in Habar Mopia kon bayongan in intau kon tua.

¹¹Dá kami in sinumakoidon kon uangga nongkon Troas minayá in Samotrake, bain nopoikoḷomai kon singgai bo minayá in Neapolis.

¹²Nongkon tua kami minayá in Pilipi, tobatú kotá kon distrik inta dungkuḷ kon Makedonia.[23] Pilipi naa in jajahan pomarenta in Rum. Kon tua kami in nogutun tongonumai nosinggai.

¹³Kon singgai in Sabat kami minayá in bingkí in tubig kon ḷuai in ngara in kotá, sin kinotaauan nami kon oyúon in baḷoi pososambayangan in intau Yahudi kon tua. Bo iḻimitúpa in kami noyosingog mako in bobay mita inta noyosipun kon tua.

¹⁴Tobatú kon sigad monia tua in intau inta mopopotaḷui in kaeng nopars. Ki Lidia in tangoinea. Sia in intau nongkon Tiatira inta totok motoindudui kon i Allah. Tuamai iḻiai i Tuhan in ginanea sinbá tarimaannea onu in pinotaau i Paulus kon inia.

¹⁵Dá mosia tobaḷoian in nodait binaptis. Naonda in nopaḷut binaptis, inoinínea in kami poḷat noguman in sia, “Aka rasaanmai i utat mita kon akuoi in totu-totuu bidon mopirisaya kon i Tuhan Yesus, dá koḻigai mongandupa kon baḷoiku.” Totoknea in pakisaan sinbá duduianpa nami in oigumnea tatua.

¹⁶Kon singgai tobatú doman, wakutu in kami minayá in tampat pososambayangan tatua, kami in noyodungkuḷ in tobatú bobantung bobay. Bobay tatua in kinawasaan in dimukud moraat bo inta mononoḷanow kon kobobiag in intau. Oaidannea tatua in nodia kon kauntungan moḷoben kon intau inta pinobantungannea.

¹⁷Bobay tatua in dumuduianmai kon i Paulus bo kon inami komintan bo sindaḷan momaḷú, “Intau mita tanaa simpaḷbí mita i Allah Inta totok in Moḷantud! Mosia in mamangoi mopotaau in daḷan kasaḷamatan kon i monimu komintan!”

¹⁸Tongonumai degá nosinggai in bobay tatua umuran momaḷú natua. Diádon nokotahang in ki Paulus in mokidongogmai kon pomaḷúannea natua dá binobuinea bo poḷat noguman kon dimukud tatua, “Podoyon kon tangoi Yesus Kristus akuoi in moguman kon inimu ḷuaidon nongkon bobay tanion!” Dá kon dodaipa doman in tatua iḷumuai in dimukud moraat tatua nongkon bobay tatua.

¹⁹Naonda in bobay mita inta pinobantungan in bobay mononoḻindap tatua nokotaaudon kon diádon in kasampatan monia mokouḻí kon doit mobayong, dá dinomok monia in ki Paulus bo ki Silas bo dinia monia pinobayá in pasar pinotayow kon mongongawasa kon tua.

²⁰Mosia in dinia monia pinotayow kon pomarenta in Rum bo noguman, “Taya dua naa intau in Yahudi. Mosia in umuran mongacau kon kotá naton.

²¹Tongganutan monia in bayongan intau dumudui kon adat monia inta diábí notongkai in atorang mita naton, intau in Rum. Kita in diábí motaau in dumudui andeka motarima kon adat mita natua!”

²²Intau moantó kon tua in sinumakin doman moponapud in uboḷ kon i nayadua tua. Dá pomarenta mita tatua in nomera-merak kon ḷambung nayadua poḷat pinoki sambok kon intau mita kon tua.

²³Naonda in mosia sinambok totok, pinotuotdon monia kon ponjara in taya dua tatua. Itoi in ponjara totok in dinandi kon bá kopiraan totok in moḷukad kon rasul doyowa tatua sinbá diá mokoḷuai.

²⁴Popisí parenta tatua, dá pinobonu itoi in ponjara tatua kon ruangan inta kon yua-yuak bo inumantungan in taya dua tatua.

²⁵Táe naonda in noonggotdon kon doḷom ki Paulus bo ki Silas nosambayang bo nodondong nodayow kon i Allah. Dá bayongan intau kon ponjara tua nodait nokodongog.

²⁶Daḻíbí bo nobaḻí in ḻinug inta totok in moropot nodapot pondasi in ponjara tatua nodandú doman. Bayongan in ḷoḻingkop nobukat bo rante mita inta pinotogot kon bayongan intau inta pinonjara nongobuká.

²⁷Dá noitaḻikokog bo noibangon itoi in ponjara tatua. Naonda in nokoontongmai kon nongobukatdon mita in ḷoḻingkop in ponjara tatua, nogamádon in sia kon pitow sin simimpatoi, sin kainiakamai bayongan intau inta kon ponjara tatua nodait bidon noḷagui.

²⁸Táe ki Paulus in nomaḷú noguman, “Dika simimpatoi! Sin kon naapabí komintan in kami!”

²⁹Itoi in ponjara tatua noigum kon togá bo binayánea sinuaian bonu in ponjara tatua. Urot mako in sia bo noitungkud kon tayowonmai i Paulus bo i Silas.

³⁰Dá dinianeadon pinobayá in ḷuai in taya dua tua bo noguman, “Tuang, onu degá in musti pomiaanku sinbá mosaḷamat in akuoi?”

³¹Dá tubag i Paulus bo i Silas kon inia, “Popirisaya kon i Tuhan Yesus! Mosaḷamatbí in iko — moiko tobaḷoian!”

³²Bo pinopotaauandon i Paulus bo i Silas kon Habar Mopia in mosia motoḷuadí.

³³Kon doḷompa doman tua bo dinia itoi in ponjara tatua in mosia bo dinaritan in kekeb mita monia. Dá sia bo bayongan in intau inta kon bonu in baḷoinea baya-bayádon binaptis.

³⁴Noiduduimai kon tua itoi in ponjara tatua nodia kon i Paulus bo kon i Silas minayá in baḷoinea bo mosia in inoḷudan in kaanon. Sia takin bayongan koluarganea totok nopia in gina monia sin mosia tanaa nopirisaya kon i Allah.

³⁵Naonda in doḷo-doḷom, pomarenta in Rum nopotabá in puḻisi minayá in ponjara mopoyaput in parenta sinbá buḻian in ki Paulus bo ki Silas.

³⁶Dá pinoyaputdon itoi in ponjara tatua kon i Paulus in parenta tatua, kainia, “Tuang, intau mita moḷoben kon Rum aindon nobogoi in parenta kon tai tuang in buḻiandon. Dá motaau bidon mobui in tanaa mako. Bayádon bo mokopopiadon kon daḷan!”

³⁷Táe ki Paulus in noguman kon intau inta pinotabá monia tatua, “Kami naa intaubí doman in Rum. Diápa kinotaauan monimu in kami mongo noitaḷá andeka diá, táe kami in sinambokdon muna monimu kon tayowon intau moantó bo pinobonu kon ponjara. Bo tanaa mosia in mopotabádon kon inami mayá takin umuni-uni? Doíbí in kami natua! Potabádon mangoi kon naa in pomarenta mita tatua bo momuḻi kon i nami.”

³⁸Dá puḻisi mita inta pinotabá tatua in minayá noguman kon soaḷ tatua kon pomarenta mita in Rum. Naonda in pomarenta mita tatua nokotaaudon kon ki Paulus bo ki Silas intaubí in Rum, mosia inagíandon in ondok.

³⁹Bo mosia in minayá nopoigum maap kon i Paulus bo kon i Silas, poḷat pinoḷuaidon monia kon ponjara tatua in mosia bo ḷagi pinarentaan kon bá monaḷámaidon kon kotá tatua.

⁴⁰Ki Paulus bo ki Silas in nonaḷámaidon kon ponjara tatua bo minayá in baḷoi i Lidia. Naonda in noyodungkuḷdon in intau mita mopirisaya kon tua, mosia in nonongginapa kon i monia, onda intua ki Paulus bo ki Silas in minayádon nogingguput kon bobayáan monia.