Read Mongondow OUMAN IN RASUL MITA 17 Bible Online

OUMAN IN RASUL MITA 17 - Mongondow bible

OUMAN IN RASUL MITA 17

¹Ki Paulus bo ki Silas nopobayá in Tesalonika nogingguput kon bobayáan monia. Mosia in nongin Ampipolis bo Apolonia. Kon tua oyúon in baḷoi pososambayangan intau Yahudi.

²Dá ki Paulus minayá in baḷoi pososambayangan tatua bo ná biasamai aidannea aka oyúon in baḷoi pososambayangan ontongonnea — sia in mongonguman takin intau mita kon tua soaḷ tombonu in Alkitab. Toḷu nodiminggu noyodudui sia in sinumuotmai kon baḷoi pososambayangan tatua.

³Buk Motusi tatua in binaḻínea dodoyonan noginsilang bo noponiata kon ki Datu Mopoposaḷamat inta pinodandi i Allah tua in mustibí motarima kon roriga, matoi táe bui mobiag. Ki Paulus in noguman doman nanaa, “Ki Yesus inta potaauku kon i monimu naa, Sia tuata in ki Datu Mopoposaḷamat inta pinodandi i Allah.”

⁴Dá tongonumai intau kon tua nobaḻí nopirisaya kon i Yesus bo poḷat dinumudui mita kon i Paulus bo kon i Silas; natua doman in bayongan intau in Yunani inta moondok kon i Allah bo bobay mita inta duduianmai monia kon tua, nodait doman nopirisaya kon i Yesus.

⁵Táe nokoontongmai kon natua, intau mita in Yahudi totok nongointoi. Dá nogoinídon in mosia kon bayongan intau moraat kon tua inta tongá umuran moyo-moyosipun sin diá kooaidan bo pinarenta monia nongacau kon bayongan kotá kon tua bo minayá nonuntun kon baḷoi i Yason intau inta nopirisayadon kon i Tuhan Yesus poḷat notayak kon i Paulus bo kon i Silas sin bayáan potayow kon intau moantó.

⁶Táe diá nouḻí monia in taya dua, dá ki Yasondon takin in tongonumai intau mopirisaya ibanea in dinia monia kon tayowon intau mita moḷoben kon kotá tatua. Bo totokdon in nomaḷú nanaa: “Intau mita tanaa in mongongacau kon bayongan tampat! Mosia in namangoi doman in kotá naton naa,

⁷bo sinarima doman i Yason kon baḷoinea. Mosia naa inta umuran moḷawang kon atorang mita i Kaisar kon Rum, sin mosia in noguman kon oyúonbí in datu ibanea inta ki Yesus in tangoinea.”

⁸Singog monia tatua in nokotoboḻingo kon intau mobarong bo kon intau mita moḷoben kon tua.

⁹Táe naonda in inogoian i Yason bo i utat mita ibanea in doit in mosia dá binuḻiandon bui monia.

¹⁰Doḷom tua ki Paulus bo ki Silas pinotabádon in bayongan intau inta mopirisaya kon kotá tatua, sinbá mayádon in Berea. Noiyaputmai kon tua mosia in minayá in baḷoi pososambayangan intau Yahudi.

¹¹Intau mita in Yahudi kon Berea mopia-pia nongkon intau mita in Yahudi kon Tesalonika. Takin sanang gina mosia in mokidongog kon habar soaḷ ki Yesus, bo pomuḷoi in singgai mosia inumuran mobaca kon Buk Motusi sin monarukira mongo totuu in sinundú i Paulus kon i monia tua.

¹²Nobarong kon sigad monia tua in nopirisaya kon i Yesus, bo deemanbí tongá topiḻik in intau mita in Yunani inta duduianmai monia in nopirisaya, pinomayá ḷoḷaki andeka bobay.

¹³Dá naonda in dinongog in bayongan intau Yahudi inta nogutun kon Tesalonika kon ki Paulus in nopoyaput domandon in Habar Mopia kon Berea, intau mita in Yahudi tatua namangoi domandon intua, nohasut bo nopoyaying in gina in bayongan intau kon tua.

¹⁴Dá ḷagidon in utat mita kon Berea tua inatod in ki Paulus kon pintad, táe ki Silas bo ki Timotius in tantúpabí nogutun kon kotá tatua.

¹⁵Naonda in ki Paulus inatodon dapot kon Atena, utat mita inta norogatod tatua in nobuidon kon Berea takin nodia kon koyow i Paulus sinbá ki Silas bo ki Timotius in musti ḷagi momatuk kon inia.

¹⁶Wakutu in ki Paulus nogoḷatpa mako kon i Silas bo kon i Timotius kon Atena, noajar totok in ginanea sin kotá tatua nopuḻing in berhala mita.

¹⁷Tuamai wakutu in kon baḷoi pososambayangan, sia in umuran mososiritaanmai takin in bayongan intau Yahudi bo intau mita ibanea kon tua inta ain nopirisaya kon i Allah. Ná doman tua, pomuḷoi in singgai aka moyodungkuḷ in intau mita kon pasar mita, yo sia in umuran doman mososiritaanmai monia.

¹⁸Guru mita nongkon golongan in Epikuros bo Stoa nobobayowanmai takinnea. Oyúon kon sigad monia tua in nosingog nanaa, “Eta onubí in kotaauan in intau mita tanion? Mosia nion in dondunguḷbí mita, táe moantó in ouman!” Bo ibanea in moguman doman, “Sia nion ná bí mopotaau in dewa ibanea.” Tua mita in singog monia sin ki Paulus nopotaau in habar soaḷ ki Yesus kon i monia bo soaḷ doman kobiagan naonda in matoi.[24]

¹⁹Bo dinia monia in ki Paulus pinotayow kon sidang Areopagus. Kon tua mosia in noguman kon inia nanaa, “Kami in moibog monotaau kon totundú mobagu inta poyaputmumai nion.

²⁰Sin dongogon nami in mokoherangbí mita in oumanmu. Manangka intua moibog in kami monotaau kon mangaḻenea.” (

²¹Sin bayongan intau in Atena bo intau mita mokokiangoi inta nogutun kon tua totok mongoibog tumompoḻitúanmai mokidongog bo mongonguman kon soaḷ mita inta mobagu.)

²²Kon wakutu in sinimindogdon in ki Paulus kon tayowon intau moantó inta noyosipun kon Areopagus tua, ki Paulus in nosingog: “Ei intau mita in Atena! Ontongonku moiko totokbí in motoindudui mita kon agama.

²³Sin wakutu in akuoi nodondaḷoi kon kotámu tanaa, bo nonarukiramai kon tampat mita pososambayangan monimu kon naa, akuoi nokoontong doman kon tampat pobobogoian monimu kon sosumba; kon tampat tatua pinaisan nanaa, ‘Kon i Allah Inta Diá Kotaauan.’ Yo ki Allahbí inta diá kinotaauan monimu tuata in potaauku naa kon i monimu.

²⁴Ki Allah inta nomia kon dunia bo tombonunea mita, Sia tuata in ki Tuhan in ḷangit bo butá. Sia in diábí nogutun kon baḷoi in dewa-dewa inta pinomia in ḻima intau.

²⁵Sia tua in diábí moparaḷu kon totuḷung in intau, sin Sia tua inta mobogoi in kobiagan, tompot bo bayongan yagi-yagi kon intau.

²⁶Nongkon intau tobatú pinomia-Nea in bayongan intau bo pinoutun-Nea kon dunia naa. Siabí doman tua inta nonantú nongkon pinomangkoianmai, toonu bo kon onda in motaau kobiagan in intau.

²⁷Inaidan i Allah intua komintan sinbá tayakon monia in Sia. Poigumon mako doa moyodungkuḷ monia in Sia kon wakutu i mosia motayak kon i-Nia. Táe sabanarnea in diábí noyayú kon i naton in ki Tuhan.

²⁸Sin ná inta kain singog in intau, ‘Kita naa in nobiag bo motaau mamagí mamako modapot in oyúon kon dunia, lantaranbí kawasa-Nea.’ Ná doman kain momomantun monimu, ‘Kita naa in komintanbí ki adí-Nea mita.’

²⁹Dá lantaran kita bo ki adíbí mita i Allah, dá diábí motaau anggapon naton kon ki Allah tua in ná bí onda bo patong inta inaidan nongkon buḷawan andeka inaidan nongkon saḷaka andeka ná batu inta inaidan pinodudui in kopopandoi intau.

³⁰Oaid mita naton inta diá mopia inta koḻipod ain bidon iḻiong i Allah, asaḷ bo tanaa mako kita bo bayongan intau kon dunia, mogogaidon in mogaid kon dosa mita.

³¹Sin ain bidon sinantú-Nea in wakutu pongadilan kon bayongan intau kon dunia naa. Oaidan tatua aidan in tobatú intau inta ain piniḻí i Allah tontaní. Bo bá totu-totuu mopirisaya in bayongan intau kon soaḷ tatua, dá biniag bui i Allah in Sia nongkon kinopatoian-Nea!”

³²Naonda intau mita tatua nokodongog kon inta pinoguman i Paulus soaḷ mobiag bui naonda in matoi, oyúon in kon sigad monia in kinumosing. Oyúon doman in noguman, “Kami in moibogpa bui mokidongog kon inimu mosingog kon soaḷ natua.”

³³Dá sinaḷaanmaidon in Paulus in mosia.

³⁴Táe oyúon kon sigad monia tua in dinumudui kon i Paulus bo nopirisaya kon i Yesus. Mosia tua in ki Dionisius tobatú anggota in majelis Areopagus, bo ki Damaris, tobatú bobay kon tua takin tongonumai doman intau ibanea.