Read Mongondow OUMAN IN RASUL MITA 19 Bible Online

OUMAN IN RASUL MITA 19 - Mongondow bible

OUMAN IN RASUL MITA 19

¹Wakutu in ki Apolos kon Korintuspa, ki Paulus in koyogot domandon minaya-mayá mako in ḻipu-ḻipúannea inta totok nongoyayú kon daerah tatua bo sia in noiyaputdon kon Epesus. Kon tua noyodungkuḷ in sia in tongonumai intau inta nopirisayadon kon i Yesus.

²Ki Paulus in noḻibó kon i monia, “Notarimadon degá in moiko kon Roho i Allah kon wakutu in moiko nopirisaya kon i Yesus?” Mosia in notubag, “Diápa. Ka diápabí kon dodai onda in dinongog nami kon oyúonbí in Roho i Allah.”

³Dá bui noḻibó in ki Paulus, “Aka natua yo baptisan taonda in pinaké kon i monimu?” Mosia in noguman, “Baptisan i Yohanes.”

⁴Ki Paulus in noguman, “Ki Yohanes nobaptis kon intau mita tatua sinbá mogogaidon in mosia in mogaid kon dosa. Táe wakutu intua ki Yohanes in nopotaau domandon kon intau mita in Israel kon mosia in musti mopirisaya kon Intau inta mamangoi moidudui kon inia, makusud in singognea tua in ki Yesusbí.”

⁵Naonda in mosia nokodongog kon singog tatua, dá mosia in sinokobaptisdon bui pinodoyon kon tangoi i Tuhan Yesus.

⁶Nopaḷut mako kon tua binarakatandon i Paulus in intau mita tatua, bo Roho i Allah in nongawasadon kon i monia, dá mulaidon in mosia nongonguman kon bonu in bahasa inta mokoherang bo nopotaau in habar mita nongkon i Allah.

⁷Degá mopuḷúmai bodoyowá in mosia tua.

⁸Toḷu nobuḷan in ki Paulus umuran nobarani in nongonguman kon bonu in baḷoi pososambayangan bo mosisoaḷan takin bayongan in intau kon tua sin mopoyakin kon i monia in soaḷ ná onda in ki Allah momarenta saḷaku Datu.

⁹Táe oyúon doman in kon sigad monia tua in motogat in gina bo doí mopirisaya. Kon tayowon in intau moantó kon tua totokbí in mosia morebeg kon tomayá mita i Allah moposaḷamat kon intau podoyon kon pirisaya kon i Yesus. Tuamai in sinaḷáanmai i Paulus in mosia, bo minayá takin dumodudui mita i Yesus kon tampat pokokuliaan kon Tiranus. Kon tua pomuḷoi in singgai sia in mosisoaḷan takin intau mita kon tua.[26]

¹⁰Doyowa notaong tantú natua in inaidannea, sahingga in bayongan intau kon Asia, intau in Yahudi andeka intau in Yunani komintan nokodongog kon singog mita i Tuhan.

¹¹Ki Allah nomaké kon i Paulus in nogaid kon inta mokoherang mita.

¹²Aka lenso andeka baan inta nokoimontandon pinaké i Paulus bo diaan kon intau mita notakit, yo mopiabí mita in takit monia bo dimukud mita moraat in ḷumuaibí doman mita nongkon i monia.

¹³Oyúon in tongonumai mogogonow intau Yahudi, mosia in maya-mayá mako moguntun kon dimukud moraat nongkon intau mita. Mogogonow mita tatua monungkuḷ mongundam nomaké in tangoi Tuhan Yesus. Nanaa in kai monia, “Podoyon kon tangoi i Yesus inta pinotaau i Paulus tua, akuoi in moguntun kon i monimu!”

¹⁴Ḷoḷaki taya pitu inta nogaid kon natua in ki adíbí mita i Skewa, tobatú itoi in imang kon tua.

¹⁵Táe dimukud mita moraat tatua in noguman kon i monia, “Kinotaauankubí in ki Yesus bo ki Paulus, táe ki ine in moiko?”

¹⁶Bo intau inta kinotoḷangan in dimukud moraat tatua in iḷumanduk bo nodomok kon i monia poḷat kopia nomongkug nodapot in noḷaguidon mosia nongkon baḷoi tatua bo sinoko tompaḻían bo nopilang, sin ḷambung monia in binera-berak in dimukud mita moraat tatua nongkon awak monia.

¹⁷Bayongan intau in Yahudi bo intau mita ibanea inta nogutun kon Epesus komintan nokodongog kon soaḷ mita tatua, dá nongoondok in mosia bo totok in nodayow kon tangoi i Tuhan Yesus.

¹⁸Bo nobarong totok in intau inta nopirisayadon kon i Yesus in namangoi nongaku kon tayowon in intau moantó, kon mosia nokoimontan doman in nogaid kon soaḷ mita natua.

¹⁹Dá bayongan in mogogonow tatua nosipundon kon buk notes mita monia bo sinokotubá kon tayowon intau moantó. Boḻi in buk notes mita tatua aka rekengon mangoi degá ḻima nopuḷú noribu in doit saḷaka.[27]

²⁰Natuata in nobaḻí, dá pirman i Tuhan[28] in totokdon in noibaya-bayá mako bo totokdon in moropot in pongarunea.

²¹Naonda in nopaḷut in bayongan inta nobaḻí tatua, ki Paulus in nogamádon kon kaputusan[29] mayá in Makedonia bo Akhaya bo yumaput kon Yerusalem. Sia in noguman, “Mopaḷut kon tua, akuoi in musti mayá doman in Rum.”

²²Dá muna in sia nopotabá kon simpaḷnea doyowa, ki Timotius bo ki Erastus umuna kon inia mayá in Makedonia, sin sia in mogutunpa tongonumai nosinggai kon Asia.

²³Degá kon wakutu in tuata bo nobaḻí in ropatoi moḷoben kon Epesus sin popisí habar soaḷ ki Yesus.

²⁴Sin kon kotá tatua oyúon in intau mogogaid kon saḷaka, tangoinea ki Demetrius, sia in mogaidmai doman kon baḷoi mita in dewa sin pogutunan i Dewi Artemis. Oaidan intau tatua mobogoi in kauntungan moantó kon mogogaidnea mita.

²⁵Tuamai in sinipunnea nodait in intaunea mita takin mogogaid kon saḷaka mita ibanea bo noguman nanaa, “Utat mita! Kinotaauanbí monimu kon oaidanbí tanaa in kouḻían naton kon doit.

²⁶Bo tanaa aindon inontong bo dinongog monimu tontaní onu in inaidan i Paulus. Sia in noguman kon dewa mita inta pinomia intau in deemanbí totu-totuu dewa. Bo nobayongdon totok intau in nopirisaya kon onu in pinogumannea tatua, deeman tongá kon Epesus naa, táe gogiódon bo komintan in Asia naa.

²⁷Bahayanea kon tua in diádon mopia in tangoi in porusahaan naton tanaa. Deemanbí doman tongá tua, táe nodapotbi in baḷoi i Dewi Artemis diádon in mangaḻenea. Bokaka sia tua in Dewi Artemis inta umuran duíonmai in bayongan intau kon Asia bo bayongandon in intau kon dunia naa!”

²⁸Naonda in nokodongog kon singog tatua in intau mita tatua, nosakí totok in gina monia bo mosia in totokdon nomaḷú bo noguman, “Mobiag in ki Artemis, dewi intau in Epesus!”

²⁹Dá notombauk in bayongan intau kon kotá tatua. Bo intau mita inta nopotombauk tatua in nodomok kon i Gayus bo kon i Aristarkhus, intau in Makedonia inta nogindua kon i Paulus kon bonu in binayáannea bo pinoḷuai monia kon tampat pododondongan tatua.

³⁰Mayá rumuak in ki Paulus kon intau moantó kon tua, táe diá inogoi in intau mita kon tua inta mopirisaya kon i Yesus.

³¹Natua doman in intau mita moḷoben kon Asia, inta yobayat mita i Paulus. Mosia in nongoyow kon intau sinbá ki Paulus in diá mayá in tampat pododondongan tatua, bo mokipogontong.

³²Intau mita inta noyosipun kon gedung tatua notombaukdon. Oyúon in momaḷú nanaa, oyúon doman in momaḷú natua. Nobarongbí in intau in diá nonotaau mongo onu in nobaḻí bo nongonu sin noantóbí in intau noyosipun kon tua.

³³Kain intau kamai kon tua dá ki Aleksanderbí in nokopopisí kon tua mita, sin sinuḷud in intau Yahudi pinobayá in muna in sia. Dá notonggó kon ḻima in sia sin moginsilang kon onu inta nobaḻí kon tayowon intau moantó kon tua.

³⁴Táe naonda in inontong monia kon intaubí in Yahudi in sia, dá noyododaidon in mosia nomaḷú. Doyowa nojam in pinomaḷúan monia tua, kai monia, “Mobiag in ki Artemis, dewi intau in Epesus!”

³⁵Noonggotmai kon tua dá jurutulis in sidang kon kotá tatua nokopoonow kon kaadaan tatua. Sia in noguman, “Ei intau mita in Epesus! Kinotaauanbí in bayongan intau kon kitabí inta kon Epesus naa in intau inta totok monompiamai kon baḷoi i Dewi Artemis bo batu motusi inta moḷabúmai nongkon ḷangit.

³⁶Bo diábí in motaau momayow kon tua. Manangka intua pokoonowdon bo dika baḷú kinoai-aidnea.

³⁷Tanaa moiko aindon nodia mangoi kon intau tanaa, inta diábí nogagow kon baḷoi i dewa andeka noporomu-romúmai kon i dewi naton.

³⁸Aka ki Demetrius takin mogogaidnea mita bo mopongadu sin oyúon taḷá in intau tobatú, yo donaaibí mako in popongaduan monia kon pongadilan. Sin diábí ampagan in pomarenta bo pomarenta in tantúbí oyúon.

³⁹Tongá aka diápa doman moorop in moiko dá motaaubí in yosingogon bui kon rapat takin guhanga mita in ḻipú.

⁴⁰Sin onu in nobaḻí singgai naa, mokobahayabí kon i naton. Sin motaaubí poyobuion in singog kon kitabí in nomarontak, sin diábí in motaau naton baḻíon dodoyonan nongonu sin nogaidbí in kita kon nokotombauk tanaa.”

⁴¹Naonda in noguman kon tua mita, bayongan in intau kon tua nodaitdon pinoki pobuian i jurutulis tatua.