Read Mongondow OUMAN IN RASUL MITA 2 Bible Online

OUMAN IN RASUL MITA 2 - Mongondow bible

OUMAN IN RASUL MITA 2

¹Naonda in singgai Pentakosta, inta singgai iḻima nopuḷú nongkon kino bingkatan i Yesus, bayongan in intau mopirisaya in noyosipun kon tampat tobatú.

²Daḻí bo kinodongogan in singog nongkon ḷangit naonda bo tompot moropot nogirup. Baḷoi inta iḻitúan mako in intau mita tatua komintandon kinodongogan in singog tatua.

³Bo inontong monia in dilá mita naonda bo dokot in tuḷu dumakit magí mako bo poḷat dinumompá kon i monia komintan.

⁴Mosia tua in komintandon kinawasa in Roho i Allah. Dá nomangkoidon in mosia nosingog nomaké in bahasa in intau ibanea. Mosia in nosingog podudui in singog inta inogoi in Roho i Allah singogon.

⁵Kon wakutu intua noantó in intau in Yahudi inta nongkon bayongan butá kon dunia naa in nogutun kon Yerusalem. Mosia tua in intau inta motoindudui kon parenta i Allah.

⁶Naonda in nokodongog kon singog tatua, nobayong totok in intau in namangoi noyoḻipung. Mosia nongoherang in nokodongog kon rasul mita tatua nosingog nomaké in bahasa monia tontaní.

⁷Nongoitongau bo nongoherang in mosia bo noguman, “Kinotaauan nami intau mita inta nosingog tanion in intaubí in Galilea?

⁸Yo nongonubí sin dongogon naton mosia in momakébí in bahasa inta pakéonmai naton kon butá naton tontaní?

⁹Kita naakan, intaubí in Partia, Media, Elam; Mesopotamia, Yudea, Kapadokia; Pontus, Asia,

¹⁰Prigia, Pampilia, Mesir bo butá mita inta kon Libia inta kon diug in Kirene; bo oyúon doman in mokokiangoi nongkon Rum,

¹¹oyúon in intau mita in Yahudi; bo oyúon doman intau nongkon ḻipú ibanea inta sinumuotdon kon agama Yahudi. Oyúon doman in intau inta namangoi nongkon Kreta bo Arab. Dinongogdon naton komintan in mosia tua in nosingog takin nomaké in bahasa naton, bo nopotaau in soaḷ mita mokoherang inta inaidan i Allah!”

¹²Dá noherang bo nobingung in mosia komintan bo nosiḻibóan, “Onubí degá in mangaḻe in tanaa?”

¹³Táe, oyúon doman intau mita kon tua in tongá noningkuḻe, kai monia, “Ah, intau mita tatua in tongábí noḷoḷangu in anggur!”

¹⁴Dá ki Petrus takin rasul taya mopuḷú bomitá in sinimindog bo nosingog kon tayowon in intau moantó inta kon tua. Noropot in singognea noguman kon i monia nanaa, “Ei intau mita in Israel bo bayongan intau inta nogutun kon Yerusalem! Indongogai kopira totok, pogumankudon kon i monimu, kon

¹⁵intau mita tanaa in diábí noḷoḷangu, ná kain singog monimu; sin tanaa in bagupabí jam siow doḷo-doḷom.

¹⁶Tongá soaḷ tanaa ain bidon muna pinotaau i Allah inta pinoyaput i Nabi Yoël nanaa:

¹⁷‘Kon singgai tumi, Akuoi in mobogoi in Roho-Ku kon bayongan in intau. Ki adímu mita ḷoḷaki bo ki adímu mita bobay in mopotaaubí kon i monimu in soaḷ mita inta pinotaau-Ku kon i monia. Intaumu mita inta nongobagupa in mokoontong kon soaḷ mita inta poontong-Ku kon i monia. Guyangamu mita in tumogoindopbí kon togoindop inta ogoi-Ku kon i monia.

¹⁸Ná doman tua in bobantung-Ku mita — ḷoḷaki bo bobay — , kon singgai mita tatua, ogoian-Ku in Roho-Ku. Sahingga mosia mopotaau in onu inta pinoguman-Ku kon i monia.

¹⁹Bo Akuoi in mogaid kon oaidan mita inta totok in mokoherang kon ḷangit, bo tanda mita kon butá naa; bo oyúonbí in dugú bo tuḷu bo poyok mobunod.

²⁰Mata in singgai in mobaḻí mosindip, buḷan in mosimpuya naonda bo dugú kon wakutu in diápa moiangoi in singgai i Tuhan, singgai inta totok in moḷoben bo momulia tua.

²¹Kon singgai tatua ki ine in mokuani kon tangoi i Tuhan mosia in posaḷamaton.’

²²Utatku mita intau in Israel! Indongogai in singogku tanaa: Makusudku tua in ki Yesus intau in Nazaret. Sia pinotabá i Allah mamangoi kon imonimu. Tua in moniata kon i monimu sin Sia ain nogaid kon oaidan inta mokoherang totok bo nopoontong in tanda mita inta nongkon i Allah. Tua mita in inaidan-Nea kon yua-yuak monimu bo tua in kinotaauanbí monimu.

²³Bo pinodudui in tomayá i Allah kon i-Nia, Sia pinosarakan kon imonimu. Sia in pinopopakú monimu kon kayu pinoyotaḻempang bo pinomayá mako in iḻimod in intau mita inta mongoromú.

²⁴Táe Sia in biniag bui i Allah. Sia in pinilatan nongkon roriga in popatoi, sin diábí motaau aka Sia in umuran kon bonu in kawasa in popatoi.

²⁵Sin Sia ain bidon pinotaau muna i Daud, nanaa, ‘Akuoi in nokoontong kon i Tuhan umuran kon munaku; Sia in umuran moḷukad mako kon inakó, sinbá akuoi in diá kotuyayowan in rupa-rupa.

²⁶Tuamai in ginaku umuran moḷunganga, bibigku in umuran mopoyaput in dodayow: bo awakku in umuranbí mosanang in mogoḷat mako kon bonu in tampat inta pinogogayanku pangabisan.

²⁷Sin diábí pomayá-Mu mako in rohoku in kotaḷáan kon dunia intau minatoi. Bo diábí doman pomayá-Mu mako in ata-Mu inta umuran kodu-kodudui in moindoi kon koyoyangan in awak.

²⁸Iko in ain nopotaau in daḷan mopobayá in kobiagan mononoi kon inakó. Moḷunganga totok in ginaku sin Iko in umuran kotaki-takinku.’

²⁹Utatku mita, bá singogonkudon kotarangon kon i monimu in soaḷ ki Daud, ki mogoguyang naton. Sia ain minatoi bo iḷobongdon doman; pinoḷobongan kon inia in umuranpa oyúon kon sigad naton dapot in masa in tanaa.

³⁰Sia naa in tobatú nabi inta nonotaau kon ki Allah aindon nodandi pinodoyon kon ibot kon inia kon oyúon in buínea in baḻíon i Allah Datu.

³¹Tuamai, pinotaaudon muna i Daud kon Datu Mopoposaḷamat tatua in buibí mobiag. Nanaa in kainia, ‘Sia in diábí pomayá mako in kotaḷáan kon bonu in dunia intau minatoi; awak-Nea in diábí moyoyang bo modait.’

³²Ki Yesusbí naa inta ain biniag i Allah nongkon kinopatoian. Kami naa in nokoontong tontaní kon tua komintan.

³³Sia biningkat bo inogoian in tampat pomomarentaan inta moḷantud, bo inogoian i Allah in kawasa, bo notarima kon Roho i Allah inta ain pinodandi tua, bo Roho doman tatua in inogoi-Nea kon inami naa, tuata inta inontong bo dinongog monimu kon naa,

³⁴Ki Daud tontaní in diábí namonik in soroga, táe sia in nosingog nanaa, ‘Ki Tuhan in noguman kon i Tuhanku:

³⁵Ḻitúdon kon dotá in koḷanan-Ku,[3] modapot in bayongan saturumu baḻíon-Ku tumungkud kon tayowon-Mu!’

³⁶Manangka intua bayongan in intau Israel in musti monotaau totok kon ki Yesus inta ain pinopopakú monimu kon kayu pinoyotaḻempang binaḻí bidon i Allah Tuhan bo Datu Mopoposaḷamat!”

³⁷Naonda in mosia nokodongog kon singog i Petrus tatua noḻiai in gina monia. Bo noḻibó in mosia kon i Petrus bo kon rasul mita ibanea, “Utat mita onu degá in musti pomiaan nami?”

³⁸Ki Petrus in noguman kon i monia nanaa, “Pogogaidon in mogaid kon dosa in moiko bo pokibaptisdon kon bonu in tangoi i Yesus Kristus sinbá modait ampungan in dosa. Bo moiko in motarima kon Roho i Allah.

³⁹Sin moikobí bo ki adímu mita bo bayongan in intau inta kon tampat nongoyayú — tuatabí mita in intau inta inoiní i Tuhan sinbá mamangoi kon i-Nia, tuabí in pinopomakusudan in dandi i Allah tatua.”

⁴⁰Natuata pinogoginsilang i Petrus kon i monia. Bo nobarongpa doman in tongginanea ibanea inta monongganut kon i monia sinbá umukatdon kon bangusa mita inta moraat inta toko hukumon i Allah.

⁴¹Noantó in intau in nopirisaya kon inta pinoguman i Petrus bo poḷat nokibaptis. Dodai intua intau inta nopirisaya in nodugangdon toḷu noribu in kobayongnea.

⁴²Mosia morajing totok in mokidongog kon onu in sinundú in rasul mita tatua bo umuran moyosipun moyotakin mongaan bo mosambayang.

⁴³Nobayongdon totok in soaḷ mita mokoherang inaidan in rasul mita tatua sahingga in mopia in gina monia bo moondok doman.

⁴⁴Intau mita inta mopirisaya tatua in umuran nobiag notobatú bo onu in oyúon kon i monia pakéon doman monia moyotakin.

⁴⁵Bo umuranbí oyúon in kon sigad monia tua in mopotaḷui in kapunyaan monia bo sila-silaion mako kon intau mita podudui in kaparaḷuan monia.

⁴⁶Pomuḷoi in singgai mosia in moyosipun kon Baḷoi Tuhan; mosia mongaan doman moyotakin kon baḷo-baḷoiannea. Tua komintan inaidan monia takin pia in gina bo takin doman dodia inta moompá.

⁴⁷Mosia in umuran modayow kon i Allah. Kobobiag monia in totuu mokosanang kon gina in bayongan intau. Pomuḷoi in singgai tantú dugangan i Tuhan in kobayong monia, intau mita inta posaḷamaton-Nea.