Read Mongondow OUMAN IN RASUL MITA 20 Bible Online

OUMAN IN RASUL MITA 20 - Mongondow bible

OUMAN IN RASUL MITA 20

¹Naonda in kaadaan kon Epesus noonowdon bui, ki Paulus in nogoiní kon dumoduduinea mita bo sinongginaan. Onda intua nogumandon in sia kon mayá in Makedonia.

²Kon Makedonia, sia in minaya-mayá mako in ḻipu-ḻipúannea bo nokipodungkuḷ kon intau mita inta nopirisaya kon i Yesus bo poḷat nononggina kon i monia sinbá umuran mopirisaya. Onda intua minayá in Yunani.

³Naonda in nogutun kon tua toḷu nobuḷan, ki Paulus in sinumakoidon bui kon uangga bo minayá in Siria, táe kon wakutu intua umuranpabí doman tomayáan mako ḻimodon in intau Yahudi in sia. Tuamai nobui in sia nongin Makedonia.

⁴Sia in sinakinan i Sopater, ki adí i Pirus intau in Berea, bo i Aristarkhus, bo i Sekundus intau in Tesalonika, bo i Gayus intau in Derbe. Ki Timotius, ki Tikhikus bo ki Tropimus doman takin intau mita inta nongkon Asia.

⁵Mosia tua in inumuna bo nogoḷat kon inami kon Troas.

⁶Táe naonda in nopaḷutdon singgai moḷoben Roti Diá Koragi tatua, kami nongkon Pilipi sinumakoi kon uangga. Opat nosinggai in binayáan nami bo noiyaput kon Troas bo noyodungkuḷ monia kon tua. Pitu nosinggai in kami kon tua.

⁷Doḷom diminggu[30] kami in noyosipun sin mongaan moyotakin in bayongan ginaḷum mita kon tua. Ki Paulus nososiritaanpa mako in bayongan intau inta mopirisaya kon tua, sin tomayánea in mayádon bui in sia in mopoikoḷomai kon singgai. Mosia in nongonguman nodapot noonggot kon doḷom.

⁸Kon bonu in yuang inta pinoyosipunan nami nobayong in togá pinoyongkit.

⁹Kon tua oyúon tayowmobiag tobatú inta iḻimitú mako kon jandela, ki Eutikhus in tangoinea. Popisí in noonggot totok in pinongongumanan monia takin Paulus, dá sinomposiugdon totok in tayowmobiag tatua, bo noḷoḷot bo noḷabú monag in sia nongkon ḷundukan intoḷunea. Naonda in binuatdon monia, minatoidon in sia.

¹⁰Dá noponag in ki Paulus. Kouḻi-uḻidpa in tayowmobiag tatua bo inumumpag poḷat ginakapannea bo noguman kon intau mita kon tua, “Dika moḻia-ḻiaw in gina, sin nobiagpabí in sia naa!”

¹¹Onda intua ki Paulus in bui noponik kon yuang inta pinoyosipunan monia bo nosilaidon kon kaanon kon roti bo nongaandon noyotakin. Nopaḷut mako iningguputanpa doman i Paulus in oumannea dapot modiug mobayag. Onda intua minayádon sia.

¹²Intau mita nodiadon nobui kon tayowmobiag tatua kon baḷoinea takin kobiag-biag bidon. Nopia totok in gina monia poḷat noinggamá in robonoḷ mita in dodob monia.

¹³Kami in sinumakoi kon kapaḷ bo minayá muna in Asos, sin monomayá motomu kon i Paulus kon tua, sin sia ain nongoyow muna, sin wakutu intua sia in moibog maya-mayá mongin toba.

¹⁴Naonda in noyodungkuḷ kon Asos, ki Paulus in sinumakoidon kon kapaḷ bo kami minayádon kon Metilene.

¹⁵Nongkon tua in kami iḷumeagdon bui, bo nopoikoḷomai kon singgai kami in noiyaputdon in tampat inta noyogintayowanmai in pulau Khios. Nopotoumámai kon singgai kami in noidapotdon in Samos bo singgai noiduduimai kami in noiyaputdon kon Miletus.

¹⁶Ki Paulus nogamádon kon kaputusan kon diádon mongandup kon Epesus, sinbá diá tongá moḷumbú kon wakutu. Sin sia in ḻimikat sinbá ḷagidon modapot in Yerusalem kon singgai moḷoben porayaan kon singgai Pentakosta.

¹⁷Wakutu in sia kon Miletuspa, sia in nopotabádon in intau tobatú minayá in Epesus moguman sinbá bayongan in intau inta ain binaḻí itoi kon jamaat tatua mamangoi in Miletus mokipodungkuḷ kon inia.

¹⁸Naonda in mosia noiangoi, ki Paulus in noguman kon i monia, “Utatku mita, kinotaauan bidon monimu naonda in kobobiagku wakutu in akuoi kon sigadpa monimu pinangkoipamai kon singgai dungkuḷ akuoi noidapotmai kon Asia naa.

¹⁹Akuoi in notuḷung kon i monia takin sanang in gina takin nokopoompá kon dodia, poḷat doman noḷabú in ḷuá in mogaid kon oaidan inta pinoki aid i Tuhan. Akuoi in nogaid umuran doman mokorasa kon roriga sin tantú moyogintayow mako in tomayá moraat in intau mita in Yahudi.

²⁰Táe umpakabí natua yo diábí kon dodai in onda in akuoi nogogai nopotaau kon onu inta mokobaraguna kon i monimu. Tua komintan ain pinotaauku kon i monimu bo ain doman sinundúku kon i monimu kon tayowon in intau mobarong andeka kon baḷo-baḷoiannea.

²¹Akuoi in umuran doman noponorop kon intau mita in Yahudi bo bangusa ibanea sinbá mosia in mogogaidon in mogaid kon dosa mita monia bo mamangoi kon i Allah poḷat mopirisayadon kon i Yesus Kristus ki Tuhan naton.

²²Bo tanaa mako akuoi in mustibí dumudui kon ibog in Roho i Allah inta nodia mayá in Yerusalem. Bo kon tua diápabí kotaauanku mongo onu in mobaḻí kon inakó.

²³Tongá Roho i Allah aindon noguman kon inakó kon wakutu in akuoi tumuot magí mako kon kotá-kotáannea, yo ponjara in nobaḻí tampatku bo roriga in umuran mogoḷat mako.

²⁴Táe tua in diábí hirauonkumai matoi kabí asaḷ bo oaidan inta pinoki aid i Tuhan Yesus kon i nakó in moḷapatku aidan bo ginaku in umuran motantú modapot in kopaḷutan kobiaganku naa kon akuoi in mustibí mopoyaput in Habar Mopia inta ain pinonotabi i Allah kon i naton.

²⁵Bo tanaa in kinotaauanku bidon kon kita in diá bidon moyodungkuḷ bui. Moiko komintan aindon binayáanku pinopoyaputan in Habar kon naonda in ki Allah momarenta saḷaku Datu.

²⁶Tuamain, singgai naa in pogumankudon kon i monimu, aka oyúon in kon sigad monimu nion in mobodito, yo tua in deeman bidon taḷáku.

²⁷Sin diábí kon dodai in onda in akuoi moḷagui mopohabar in bayongan tomayá i Allah kon i monimu komintan, sin tuabí in oaidanku.

²⁸Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah[31] inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.[32]

²⁹Kotaauankubí kon naonda in akuoi mayá, intau mita moraat inta moibog momoguyaat kon tomayá i Allah in mamangoi kon yua-yuak monimu. Bo diábí in tabi monia tua in momogutú kon umat i Allah.

³⁰Modapot in oyúon doman in intau mita kon sigad monimu in mobaḻí mopopotaau in habar inta diá totuu. Mosia in mogaid kon natua sinbá intau mita inta ain nopirisaya kon i Yesus in moiḷaḻe bo dumudui kon i monia.

³¹Tuamai umuran kiḷuka-ḷukadmai bo toropdon saḷaḷu kon akuoi in toḷu notaong, doḷom bo singgai in diábí dodai onda in nogogai nononggina kon i monimu komintan takin koomba-ombaḷ doman.

³²Bo tanaa mako in posarakankudon moiko kon i Tuhan sinbá Sia in moḷukad kon i monimu bo bá moiko in umuran kumadai mako kon totabi-Nea. Ki Allah in nopuḻing kawasa inta mokorigon kon i monimu bo Sia in mobogoi kon i monimu in barakat mita inta ain sinadia-Nea kon bayongan umat-Nea.

³³Diápabí kon dodai onda akuoi nohaga in doit andeka pakeang nongkon intau ibanea.

³⁴Kinotaauan bidon monimu tontaní, kon akuoi in noramuji bidon tontaní motayak kon onu in pakéonku bo onu doman pakéon in yobayatku mita inta topobayáanku.

³⁵Tua komintan in inaidanku sinbá moiko in moibog dumayan kon i nakó, sin aka kita in mogaid mokoporajing tua in mangaḻenea kita ain notuḷung kon intau mita inta nongoyangkó. Mustibí toropon mako in naa: ‘Mopi-piabí kon mobogoi dika in motarima.’ ”

³⁶Nosingog mako kon natua, ki Paulus bo bayongan intau kon tua in sinumungkud bo nosambayang.

³⁷Mosia in nongombaḷ komintan poḷat nonggakap bo nongayok kon i Paulus bo noguman kon inia kon mokopopiadon in kon daḷan.

³⁸Nokuyang totok in gina monia sin mosia ain nokodongog kon singog i Paulus kon diá bidon bui moyodungkuḷnea in mosia komintan. Bo inatodon monia in sia nodapot in kapaḷ inta takoiannea.