Read Mongondow OUMAN IN RASUL MITA 22 Bible Online

OUMAN IN RASUL MITA 22 - Mongondow bible

OUMAN IN RASUL MITA 22

¹“Amáku mita bo bayongan in ginaḷumku! Indongogaipa in singogku tanaa kon i monimu. Sinbá diá moyotaḷá in kita komintan!”

²Naonda in dinongog monia ki Paulus nosingog nomaké in bahasa Ibrani, nodugangdon nobió in mosia. Ki Paulus in noguman nanaa,

³“Akuoi naa intaubí in Yahudi, pinononggadí kon Tarsus kon butá in Kilikia, táe akuoi in nointoi kon kotá tanaa, ki Gamaliel in guru moḷobenku inta ain notundú kon i nakó notompia totok. Sia in notundú kon hukum i Musa inta inogoinea kon mogoguyang naton. Sahingga in akuoi nobaḻí mogogaid i Allah inta totok in morajing, ná tanaa mako.

⁴Akuoi ain nomogutú kon intau mita inta nopirisayadon kon totundú inta nobagu tua. Mosia komintan, pinomayá ḷoḷaki ande bobay, sinokodomokku bo pinobonu kon ponjara.

⁵Onu in pinomiaku tatua in kinotaauanbí in Imang Moḷoben bo bayongan tongguḷu in agama. Motaaubí ḻibóon monimu kon i monia in tua. Sin mosia tuata inta ain nomais kon surat ḷouna in singog kon inakó inta inogoi kon intau mita in Yahudi kon Damsyik. Surat tatua in noginsilang kon akuoi in inogoiandon in kasampatan modomok kon intau mita kon tua inta ain dinumudui mita kon totundú nobagu tatua, bo poḷat doman modia kon i monia sin hukumon kon Yerusalem.”

⁶“Táe kon daḷan wakutu in akuoi nodiugdon kon Damsyik, wakutu intua noutudon in singgai, indoianmai yo oyúonbí in sindar inta nobayag totok bo nokotuḷow nonindarbí magí nongkon ḷangit noiḻibu kon inakó.

⁷Dá noumpagdon in akuoi kon butá bo nokodongog kon singog inta noguman kon inakó nanaa, ‘Saulus, Saulus! Nongonu sin iko in momogutúbí kon i-Nakó?’

⁸Dá akuoi noḻibó nanaa, ‘Ki ine Iko, Tuang?’ Dá tubag in singog doman tatua: ‘Akuoi naa in ki Yesus intau in Nazaret inta pinogutúmu nion.’

⁹Intau mita inta noyotakinku in nokoontong doman kon sindar tatua, táe singog in diábí dinongog monia.

¹⁰Bo akuoi in noḻibó kon i Tuhan, ‘Dá onu in aidanku, Tuhan?’ Ki Tuhan in noguman nanaa kon inakó, ‘Pobangondon bo bayádon in Damsyik, bain kon tua bo poguman-Ku kon inimu onu in aidanmu.’

¹¹Wakutu intua akuoi in diádon nokoontong popisí sindar inta nokotuḷow tatua. Dá dongkadon kinapit in yobayatku mita kon dodai in sinumuot kon Damsyik.

¹²Kon Damsyik oyúon in intau tangoinea ki Ananias. Sia tua in intaubí mopia inta umuran motoindudui kon hukum i Musa. Bayongan in intau in Yahudi inta nogutun kon Damsyik totokbí in moinsim kon inia.

¹³Sia in namangoi noindoi kon inakó, bo sinimindog kon diugku poḷat noguman nanaa, ‘Saulus utatku, bukádon in matamu bo indoidon!’ Dá kon dodaipa doman in tatua akuoi in dinumungá bo nokoontongdon kon inia.

¹⁴Onda intua sia in noguman kon inakó nanaa, ‘Ki Allah in mogoguyang naton ain nomiḻí kon inimu sinbá iko in monotaaudon kon onu in kinoibog-Nea, bo mokoontong kon i Yesus, simpaḷ i Allah inta ain nogaid kon onu in kinoibog i Allah, bo iko ain nokodongog kon singog i Yesus tontaní.

¹⁵Iko in mopotaau kon bayongan in intau kon onu inta ain inontongmu bo inta dinongogmu tua.

¹⁶Bo tanaa in donaaidon mokopoonggot in iko, pobangondon bo bayádon pokibaptis. Pokuanidon kon i Tuhan sinbá iko in pilatandon nongkon bayongan in dosamu.’ ”

¹⁷“Naonda in akuoi nobuidon kon Yerusalem bo wakutu in akuoi yogot in nosambayang kon bonu in Baḷoi Tuhan akuoi in kinawasadon in Roho i Tuhan.

¹⁸Akuoi in nokoontong kon i Tuhan; bo Sia in noguman kon inakó, ‘Ḷagidon taḷaai in Yerusalem naa, sin diábí indongogan monia in onu in pogumanmu soaḷ Akuoi.’

¹⁹Dá akuoi in noguman, ‘Tuhan, kinotaauan bidon monia totok kon akuoibí naa in inta tumuot magí mako kon baḷoi mita pososambayangan bo modomok kon intau mita inta mopirisaya kon ini-Mu bo poḷat pobonu kon ponjara.

²⁰Natua doman, naonda in ki Stepanus inta simpaḷ-Mu iḻimod, akuoi tontaní in kon tua bo nopia-pia doman in ginaku in pinoḻimodan monia tatua.’

²¹Táe ki Tuhan in noguman kon inakó, ‘bayádon sin Akuoi in mopotabá kon inimu mayá in tampat moyayú kon ḻipú in intau mita inta deeman Yahudi.’ ”

²²Intau moantó kon tua in nokidongog kon i Paulus nodapot in singognea tatua; bo naonda intua mosia in nomangkoidon nomaḷú, “Ḻimodon in intau naníon. Diábí patus mobiag in sia!”

²³Mosia in tantú nomaḷú takin mopogambat in ḷambung monia bo mopogonik in ḷobud.

²⁴Tuamai itoi in tontara mita tatua in noguman kon dia in ki Paulus kon tampat monia bá pakisaan pirikisaan kon tua sinbá kotaauandon mongo nongonu sin intau mita in Yahudi in mopomaḷú natua kon inia.

²⁵Táe wakutu in ki Paulus aindon sinogot sin sambokondon, ki Paulus in noḻibó kon itoi in tontara inta sinimindog kon tua, “Degá motaau in mosambok kon intau in Rum aka sia in diápa adilon muna?”

²⁶Nokodongogmai kon tatua, tontara tatua in minayá kon i itoinea bo noḻibó nanaa, “Onuon i tuang intau tanaa? Sia tua intaubí in Rum!”

²⁷Dá itoi in tontara tatua in minayá kon i Paulus bo noḻibó, “Pogumanka mongo totuu kon iko nion intau in Rum!” Ki Paulus in notubag, “Totuu akuoi naa intaubí in Rum.”

²⁸Itoi in tontara tatua in noguman, “Wakutu in akuoi sinumuot nobaḻí warga negara in Rum nomahaḷ totok in pinoguboḻiku!” Táe ki Paulus in noguman, “Hakku tatua oyúon sin akuoi pinononggadí kon tua saḷaku intau in Rum.”

²⁹Dá mosia inta monomayá mosambok kon inia in daḻí inumundok ná doman tua itoi in tontara tatua noondokdon naonda in kinotaauanneamai kon ki Paulus tua intaubí in Rum.

³⁰Itoi in tontara Rum tatua in moibog totok monotaau mongo nongonu sin intau mita in Yahudi tatua in mopotaḷábí kon i Paulus. Tuamai nopoikoḷomai kon singgai sia in nogoiní kon imang mita itoi bo Mahkama Agama noyosipun kon tua. Onda intua ki Paulus pinoḷuaidon monia kon ponjara bo dinia kon tayowon monia tua.