Read Mongondow OUMAN IN RASUL MITA 24 Bible Online

OUMAN IN RASUL MITA 24 - Mongondow bible

OUMAN IN RASUL MITA 24

¹Ḻima nosinggai noiduduimai kon tua, Imang Moḷoben ki Ananias bo itoi mita in Yahudi takin tobatú pongacara monia inta ki Tertulus in tangoinea, namangoi kon tayowon i Gubernur Peliks bo nopongadu kon i Paulus.

²Ki Paulus in dinia domandon kon tayowon monia, ki Tertulus in inoinídon doman, dá nomangkoidon in ki Tertulus nosingog kainia, “Tuang gubernur inta mopia! Naonda in ki Tuang nomarenta kon butá nami naa, mopiadon totok in kinorasaan nami. Bo ki Tuang mopandoi momarenta dá nobayong domandon in mopia in kinorasaan nami.

³Tua komintan in sinarimadon nami takin pia in gina bo kami in mopoyaput doman in sukur kon i Tuang.

⁴Táe bá diá moantó in wakutu pakéon, dá akuoi in mopoigum sinbá ki Tuang moibog mongindongog kon onu in pongadu nami tanaa.

⁵Aindon kinokadapatan nami kon intau tanaa mongongacaubí inta mokobahaya. Sin kon ondakabí in bayáannea, sia in umuran mokopomuká kon ropatoi kon sigad in intau Yahudi. Sia naa in nobaḻídon itoi intau in Nazaret.

⁶Sia ain nonungkuḷ doman nongotor kon Baḷoi Tuhan. [Manangka intua dinomok nami in sia bo hakimon podudui in hukum agama nami.

⁷Táe itoi in tontara ki Lisias tua in namangoi bo nogagow kon inia nongkon inami,

⁸bo sia nomarenta sinbá intau mita inta moibog mopongadu in mamangoi kon i Tuang.] Aka ki Tuang momirikisa tontaní kon inia, kotaauan bidon i Tuang in taḷánea inta pinogadu nami naa.”

⁹Intau mita in Yahudi inta kon tua in nopototuu doman kon onu in pinonapud tua kon inia. Mosia in noguman doman, totuubí in singog i Tertulus tua.

¹⁰Dá ki gubernur in nobogoi in kasampatan kon i Paulus nosingog. Dá ki Paulus in nosingog nanaa, “Kinotaauanku bidon kon aindon kon taongannea iko in nobaḻí hakim kon intau mita in Yahudi. Tuamai in diábí moondo-ondok in akuoi momayow kon onu inta ain pinonapud monia kon inakó kon tayowon i Tuang.

¹¹Motaaubí pirikisaan tontaní i Tuang, kon diábí noiḻiu kon mopuḷú bodoyowá nosinggai inta ain kinotaḻiban akuoi in namangoi in Yerusalem sin mosambayang.

¹²Bo diábí doman kon dodai onda in tobatúmai intau nokouma kon inakó koyogot in nobobayowan in intau ibanea andeka nogaid kon kakacauan kon bonu in Baḷoi Tuhan andeka kon baḷoi pososambayangan andeka doman kon tampat ibanea kon kotá.

¹³Bo mosia in diábí doman motaau mobogoi in bukti kon onu inta ilapur monia kon i Tuang soaḷ inta pinonapud monia kon inakó tua.

¹⁴Táe akuonkubí kon i Tuang kon akuoi in nosumbabí kon i Allah in mogoguyang nami podudui in onu inta ain pinais kon bonu in buk i Musa bo buk in nabi mita.

¹⁵Akuoi in ná bí doman mosia inta moharap doman mako kon i Allah kon bayongan intau in mobiagbí bui naonda in matoi, intau mopia andeka intau moraat!

¹⁶Tuamai akuoi in umuran moramuji totok sinbá ginaku in umuran modarit kon tayowon i Allah bo kon tayowon in intau.

¹⁷Bo naonda in tongonumaidon notaong in nonaḷámai kon Yerusalem, akuoi in nobui mangoi kon tua sin modia kon doit inta pinotuḷung kon bangusaku bo mayá doman mobogoi in sosumba kon i Allah.

¹⁸Wakutu in akuoi koyogot nomia kon tua kon Baḷoi Tuhan, kinotambakan mangoi monia in akuoi, bo naonda in nopaḷut in upacara pinondaritan kon awakku tua, wakutu intua diábí nobayong intau bo diábí noropatoi. Tongábí tongonumai intau in Yahudi kon tua inta nongkon Asia.

¹⁹Tuamai mosiabí tua in musti mamangoi naa bo mopongadu kon i Tuang, aka oyúon in pinonapud monia kon inakó.

²⁰Andeka pomayádon mako sinbá intau mita tatua in mamangoi tontaní bo moguman kon romú onu in nouḻí monia kon inakó wakutu in akuoi kon tayowon in Mahkama Agama.

²¹Tongábí tokalimat tanaa in nouḻí monia inta siningogku wakutu in akuoi kon tayowon monia, naa in singogku: Akuoi in adilon monimu in singgai naa tongábí popisí in akuoi mopirisaya kon intau mita inta ain minatoi in mobiagbí bui.”

²²Bo ki Peliks inta nonotaaudon totok kon soaḷ totundú i Yesus nonimpodon kon sidang soaḷ pelekara tatua. Sia in noguman, “Aka moiangoidon naa in itoi in tontara ki Lisias, bain tua bo tantúonku in pelekara monimu tanion.”

²³Bo ki Gubernur in nopotabá kon porwira inta noḷukad kon i Paulus sinbá mayá monahang kon inia, táe sia in nobaḻíbí tahanan bebas bo yobayatnea mita in motaaubí mamangoi kon inia bo mobogoi in kaparaḷuannea mita.

²⁴Bo naonda in tongonumaidon nosinggai, namangoidon in ki Peliks takin ki buḷoinea ki Drusila inta intau in Yahudi. Bo ki Peliks nokioní kon i Paulus bo nokidongog in sia kon totundú i Paulus soaḷ mopirisaya kon i Yesus Kristus.

²⁵Táe naonda in ki Paulus nongonguman kon soaḷ mobiag moitutui, soaḷ monahang kon napusu bo soaḷ hukuman kon singgai tumi, inagían ondok in ki Peliks dá nogumandon nanaa in sia, “Iko in motaaudon mayá in tanaa. Bain aka oyúon in kasampatan mopia, buikubí pokioiní in iko.”

²⁶Ki Peliks in noharap mako kon ogoianbí i Paulus in doit in sia. Tuamai in umurannea pokioiní in ki Paulus bo mongonguman takinnea.

²⁷Táe naonda in notompodon doyowa notaong in ki Peliks nobaḻí gubernur, binaḷuiandon in sia i Perkius Pestus. Bo popisí in modondouḷug kon intau in Yahudi dá pinomayádon mako i Peliks in ki Paulus kon bonu in ponjara.