Read Mongondow OUMAN IN RASUL MITA 25 Bible Online

OUMAN IN RASUL MITA 25 - Mongondow bible

OUMAN IN RASUL MITA 25

¹Toḷu nosinggai naonda in ki Pestus noidapot in propinsi tatua, sia in nobuat nongkon Kaisarea bo minayá in Yerusalem.

²Kon tua imang mita itoi takin itoi mita intau in Yahudi namangoi kon tayowonnea bo nopongadu kon taḷá i Paulus.

³Mosia in umuran modondouḷug kon i Pestus sinbá podudui in kopopia in ginanea, sin in moibog mopotabá kon intau modia kon i Paulus mayá in Yerusalem; sin mosia ain notobatú kon gina moḻimod kon inia wakutu in sia kon daḷanpa.

⁴Táe ki Pestus in notubag, “Ki Paulus in tanaa in sinahangbí kon Kaisarea; bo akuoi tontaní in diádon moonggot bo mobui kon tua.

⁵Sia in noguman doman: maníka intau mita inta inogoian monimu in hak in mayádon moyotakinku bo mopoyaput in tuntutan kon inia aka oyúon in taḷánea.”

⁶Degá waḷupa andeka mopuḷú nosinggai in ki Pestus nogutun kon Yerusalem bodongka mobui kon Kaisarea. Nopoikoḷomai kon singgai mosia in nosidang bo ki Paulus in pinoki oinínea namangoi in tayowon monia.

⁷Naonda in ki Paulus noiyaputdon in yuang pinosidangan, intau mita in Yahudi inta namangoi mita nongkon Yerusalem sinimindog iḻimibu kon inia, bo yagi-yagidon in pinonapud monia kon inia. Táe mosia in diá nokouḻí kon bukti in onu inta pinonapud monia tua kon inia.

⁸Ki Paulus in nopoyaput doman in tosingogonnea nanaa, “Akuoi in diábí nogaid kon taḷá tobatúmai kon hukum i Musa andeka kon Baḷoi Tuhan andeka doman kon i Kaisar in Rum.”

⁹Táe ki Pestus inta moibog sinbá kosanang in gina in intau Yahudi in noguman kon i Paulus, “Moibog degá iko mayá in Yerusalem sinbá sidangon kon tua kon tayowonku soaḷ pelekara tanaa?”

¹⁰Táe ki Paulus in notubag, “Naa in akuoi simindog mako kon tayowon pongadilan i Kaisar; bo kon naabí in tampat ponantúan kon taḷá bo ain bidon totok in kinotaauan i Tuang tontaní kon akuoi in diábí kotaḷá kon intau mita in Yahudi tanion.

¹¹Aka akuoi bo totu-totuu kotaḷá inta motaau baḻíon monimu dodoyonan pohukuman kon inakó dapot in matoi, yo kodu-koduduibí in akuoi. Táe aka onu in pinonapud monia tua bo diá totuu, yo diá in tobatúmai intau in kohak moposarakan kon inakó sin tongá popisí in ogoi ponotabi kon i monia nion. Akuoi in monuntut kon tantúondon kon pongadilan i Kaisar!”

¹²Dá naonda in sia noyosingog in intau inta mononongginanea mita, ki Pestus in noguman nanaa, “Ikobí in noigum kon bá tantúondon kon pongadilan i Kaisar, dá iko musti mayá kon i Kaisar.”

¹³Diá noonggot kon tua ki Datu Agripa bo ki Bernike namangoi kon Kaisarea sin mobogoi in saḷamat kon i Pestus.

¹⁴Naonda in tongonumaidon nosinggai kon tua in mosia, inouman i Pestus kon i Datu Agripa in persoalan i Paulus tatua kainia, “Kon naa oyúon tobatú intau inta i hukum kon wakutupa in ki Peliks nobaḻí gubernur.

¹⁵Wakutu in akuoi kon Yerusalem imang mita itoi bo itoi mita intau in Yahudi namangoi nopongadu kon intau tatua bo poigumondon monia sinbá akuoi in mopoḷabúdon in hukuman kon inia.

¹⁶Táe akuoi in noguman kon i monia, kon intau in Rum in diábí motaau in moposarakan mako natua kon intau inta sinangka kotaḷá sin hukumon, aka intau inta sinangka tatua diápa noyogintayow in intau mita inta noponapud kon inia bo ogoian in kasampatan mosingog kon onu in pomayownea.

¹⁷Dá wakutu in mosia namangoi in naa noyotakinku, nopoikoḷomai kon singgai ḷagi nogaid kon sidang bo intau tatua in inoiní pinotayow kon i monia.

¹⁸Táe naonda intau mita inta nopongadu tatua sinimindog kon ḻibuneamai, diábí in tobatúmai in pinongadu monia in oaid moraat in pinomianea ná inta kon raianku.

¹⁹Mosia in tongábí mobobayowan kon soaḷ agama monia, bo soaḷ intau inta ki Yesus in tangoinea. Sia ain minatoi, táe ki Paulus in noguman kon Sia in totu-totuubí kon nobiag bui.

²⁰Popisí in akuoi moragu-ragu kon naonda in pomomirikisa kon pelekara mita natua, dá akuoi in noḻibó kon i Paulus mongo moibog in sia mayá in Yerusalem sinbá tantúon kon tua in pelekaranea tatua.

²¹Táe ki Paulus in nopoigum sinbá pelekaranea tatua poki tantúdon kon i Kaisar. Sia in nopoigum doman sinbá sia in mogutunpa kon bonu in tahanan, pogoḷa-goḷatan kon ponantúan i Kaisar kon pelekaranea tatua.”

²²Dá ki Agripa in noguman kon i Pestus nanaa, “Akuoi in moibog mokidongog kon inia tontaní.” Ki Pestus in notubag nanaa, “Bain ikoḷom bo indongoganmu in singognea tua.”

²³Nopoikoḷomai kon singgai, ki Agripa bo ki Bernike takin pakeang dinas monia sinumuot kon yuang pososidangan takin itoi mita in tontara bo itoi mita kon kotá tatua. Onda intua ki Pestus nomarenta kon diadon tumuot in ki Paulus.

²⁴Noituotmai in ki Paulus, ki Pestus in noguman nanaa, “Tuang Datu Agripa bo bayongandon intau kon naa! Intau tanaa aindon pinongadu kon inakó in intau mita in Yahudi inta kon Yerusalem bo inta kon naa. Mosia in namangoi bo kopia momaḷú sin momakisa sinbá intau ná tanaa in diádon motaau biagan kon dunia naa.

²⁵Táe diábí kinouḻíanku in sia kon taḷá tobatúmai inta motaauku baḻíon dodoyonan pohukuman kon inia modapot in matoi. Bo siabí tontaní in nopoigum sinbá pelekaranea tatua in tantúondon kon pongadilan i Kaisar, dá tuamai in sinantúkudon kon sia in diaandon kon i Kaisar.

²⁶Táe diápa tobatúmai in nouḻíku in katarangan mopia inta motaauku paison kon surat bo pokidia kon i Kaisar soaḷ pelekaranea tatua. Tuamai in diniakudon in sia kon tayowon i Tuang mita totokanea in kon i Tuang Datu Agripa! Makusudku tua aka mopaḷutdon pirikisaan yo oyúon in soaḷ inta motaauku paison.

²⁷Sin podudui in raianku in diábí mopia aka mogatod kon tobatú intau inta i hukum bo diá kotaki-takin in onu inta nobaḻí kinodoyonan in taḷá mita inta pinonapud kon inia.”