Read Mongondow OUMAN IN RASUL MITA 26 Bible Online

OUMAN IN RASUL MITA 26 - Mongondow bible

OUMAN IN RASUL MITA 26

¹Ki Agripa in noguman kon i Paulus nanaa, “Iko in inogoian in kasampatan mosingog mopoyotutui kon onu inta pinonapud monia.” Dá notonggódon kon ḻimanea in ki Paulus bo nosingog,

²“O, Tuang Datu Agripa mosanangdon totok in ginaku sin singgai naa inogoi i Tuang mosingog kon tayowon i Tuang in akuoi mopoyotutui in onu inta pinonapud in intau mita in Yahudi kon inakó.

³Apapa doman ki Tuang in nonotaau totok kon adat kabiasaan bo persoalan mita in intau Yahudi. Tuamai poigumonku kon i Tuang, indongoganpa kopiaan in singogku tanaa takin gina moonow.

⁴Bayongan intau in Yahudi nonotaaubí komintan kon kobobiagku pinangkoipamai akuoi tayowmobiagpa, sin akuoi in nobiagbí kon yua-yuak monia kon Yerusalem.

⁵Ain noonggot in mosia nonotaau kon inakó. Bo aka mosia in moibog, mosia in motaaubí mobogoi in katarangan kon nongkon dungkuḷpabímai akuoi in nobiag saḷaku intau in Parisi bo akuoi in totokbí in dinumudui kon atorang mita in agama nami.

⁶Bo tanaa mako akuoi in sinimindog kon naa sin sidangon popisí in akuoi nopirisaya kon dandi inta inogoi i Allah kon mogoguyang nami.

⁷Dandi doman tatua inta inoḷat mako in intau Israel inta mopuḷú bodoyowá nosuku. Tuamai in mosia mosumba kon i Allah doḷom bo singgai. Bo popisí in akuoi mopirisaya kon dandi tatua, Tuang Datu Agripa, dá intau mita in Yahudi noponapud in taḷá kon inakó.

⁸Nongonu sin tai utat mita intau in Yahudi in diábí mopirisaya kon ki Allah in nomiagbí kon intau minatoi?

⁹Koḻipod akuoi in totokbí doman in diá mopirisaya kon ouman soaḷ ki Yesus intau in Nazaret tatua.

¹⁰Bo totuubí kon tuabí in inaidanku kon Yerusalem. Akuoi in deemanbí tongá nopobonu kon ponjara kon intau mita inta mopirisaya kon i Yesus, táe naonda in akuoi nokouḻí kon surat kawasa nongkon imang mita itoi, akuoi mosatuju doman totok in poḻimodan kon intau inta mopirisaya kon i Yesus.

¹¹Moantó in pinogutúku in mosia kon baḷoi mita pososambayangan, pakisaanku sinbá diádon mopirisaya in mosia kon i Yesus. Totokbí moyaat in ginaku kon i monia tungkuḷ intua, noidapot in aḷowanku in mosia kon ḻipu-ḻipúannea.”

¹²“Bo makusud doman tatua nodapot in akuoi nodia kon surat kawasa nongkon imang mita itoi bo minayá in Damsyik.

¹³Bo kon yuak in daḷan, noutudon singgai wakutu intua uḻe Tuang Datu Agripa, akuoi in nokoontong kon sindar nongkon ḷangit inta totok in motarang, nonindar kon inami komintan.

¹⁴Dá nongoumpag kon butá in kami. Onda intua nokodongog kon singog in akuoi kon bonu in bahasa Ibrani, ‘Saulus, Saulus! Nongonu sin umuranbí pogutúonmu in Akuoi? Umuranbí mororiga iko aka umuran moḷawang kon i-Nia inta nobaḻí ki Tuangmu.’

¹⁵Dá kai nakó doman, ‘Eta ki inebí Iko, Tuang?’ Dá ki Tuhan in notubag, ‘Akuoi naa in ki Yesus inta umuran pogutúonmu nion.

¹⁶Pobangondon bo sindog! Akuoi in mokipogontong kon inimu poḷat monantú kon inimu mobaḻí mogogundoi-Ku. Musti poyaputmu kon bayongan intau in onu inta ain inontongmu singgai naa andeka kon singgai inta moiduduimai soaḷ Akuoi.[35]

¹⁷Tondíon-Ku in iko kon sigad in intau mita in Israel bo intau mita inta deeman Yahudi. Potabá-Ku in iko mayá kon i monia

¹⁸mobuká kon mata monia, sinbá mobuká in mata monia bo mokoontong kon inta mobayag; bo diádon kopongaruan in Ibilis táe tongádon tantú kon bonu in kawasa i Allah. Sin aka mopirisaya kon i-Nakó, yo dosa mita monia in tokoampunganbí bo mobaḻíbí umat mita inta piniḻí i Allah in mosia.’ ”

¹⁹“Tuamai uḻe, Datu Agripa, totok in motoindudui in akuoi kon onu inta ain inontongku bo inta ain sinarimaku nongkon i Allah tua.

²⁰Taran-tarangan in akuoi in mopotaau kon bayongan intau kon musti mogogai in mogaid kon dosa mita in mosia bo moposarakandon in kobiagan monia kon i Allah. Tua komintan in musti poniata kon oaid monia pomuḷoi in singgai. Muna in kon Damsyik in pinopotaauanku kon onu inta nobaḻí tanaa, onda in tua kon Yerusalem bo kon bayongandon in Yudea bo kon sigad doman in intau mita inta deeman Yahudi.

²¹Tuamai in dinomok intau mita in Yahudi in akuoi kon bonu in Baḷoi Tuhan sin ḷongasion monia bo ḻimodon.

²²Táe tantúpabí sinotabi i Allah in akuoi dá notaaupabí sinimindog kon naa in tanaa mako bo mongonguman kon bayongan inta ain kinorasaanku kon bayongan intau — moḷoben andeka mointok. Onu in inoumanku naa in diábí noyoposi in onu inta ain muna pinoguman in nabi mita bo i Musa;

²³kon Datu Mopoposaḷamat inta pinodandi i Allah tatua in mustibí mororigapa muna, bain tua bo mobaḻí intau inta muna-munamai mobiag nongkon sigad in intau mita minatoi; sinbá motaau in Sia mopoyaput in Habar Mopia — tuata in kasaḷamatan — kon intau mita in Yahudi bo intau mita inta deeman Yahudi.”

²⁴Koyogotpa in ki Paulus mopoyotutui in onu inta nobaḻí kon inia, ki Pestus in nomaḷúdon kai-nia, “Diábí noratak in iko nion Paulus! Kinoḻiuandon in pandoimu dá diádon motoratakmai in raianmu!”

²⁵Táe ki Paulus in noguman, “Akuoi in noratakbí, uḻe Datu Agripa. Onu in pogumanku naa in komintanbí totuu, raianku in nopiapabí.

²⁶Ki Tuang Agripa tontaní in porasaanku nonotaaubí totok kon soaḷ mita tanaa. Tuamai nobaranidon taran-tarangan in akuoi in nosingog kon tayowon i Tuang. Sin nodait bidon kinotaauan i Tuang in naa komintan, sin diábí in nobaḻí kon tampat inta noibuni.

²⁷Uḻe Tuang Datu Agripa, degá mopirisaya in ki Tuang kon onu in pinoguman in nabi mita? Kon raianku in mopirisayabí in ki Tuang!”

²⁸Dá ki Agripa in noguman kon i Paulus, “Kainimu kamai dá mogampangbí in akuoi mobaḻí intau Keresten?”

²⁹Dá tubag doman i Paulus, “Sambayanganku kon i Allah sinbá moonggot ande motoyong, ki Tuang takin bayongan intau inta nokodongog kon singogku singgai naa in modait mobaḻí ná akuoi naa — táe deemanbí tokigon ná tanaa!”

³⁰Pangabisannea ki tuang datu, ki gubernur bo ki Bernike takin bayongan in intau ibanea kon tua komintandon sinimindog bo iḷumuai.

³¹Naonda in kon ḷuai, nosigumanan in mosia, kai monia, “Diábí in tobatúmai in taḷá kon intau tanaa in nouḻí naton inta motaau baḻíon dodoyonan pohukuman kon inia dapot in matoi andeka pomonjaraan kon inia.”

³²Bo nogumandon in ki Agripa kon i Pestus, “Intau tanaa in motaau bidon buḻian, aka kuma bo diádon monuntut in sia kon adilonbí in pelekaranea tatua kon pongadilan i Kaisar.”